Fasin blong Stap Obei long Loa I blong Stap Fri

Mi bin kasem wan spesel presen las Krismes we i tekem plante memori i kambak. Nis blong mi i givim long mi. I bin stap long medel blong ol samting we mi bin livim insaed long olfala famle haos blong mifala taem mi muvaot afta we mi mared. Presen ia, i wan smol braon buk we mi holem long han blong mi. Hem i wan buk we oli stap givim long ol LDS man we i go long ami long taem blong Wol Wo 2. Mi bin luk se presen ia i olsem wan we i kam long Presiden Hiba J. Grant mo ol kaonsela blong hem, J. Ruben Klak Junia mo Deved O. MaKei.

Long wan leta long fored blong buk, ol trifala profet ia blong God oli raetem: “Ol samting we i stap hapen long ami i no letem mifala blong gohed blong toktok wetem yu stret, o tru long wan nara man. Nambawan rod we i stap i blong putum long han blong yu samfala pat blong revelesen blong tedei mo sam eksplenesen blong ol prinsipol blong Gospel we bae i givim long yu, long weaples yu stap long hem, wan niu hop mo fet, mo semtaem kamfot, harem gud, mo pis blong spirit.”¹

Tedei, yumi faenem yumi bakegen long wan narafala wol wo. Be naoia, i no wetem ol tul blong faet. Hem i wetem ol tingting, ol toktok, mo ol aksen. Hem i wan wo agensem sin, mo bitim eni nara taem, yumi nidim blong talem bakegen long man blong obei long ol komanmen. Fasin blong livim relijin long saed, i kam olsem nomol praktis, mo plante bilif mo praktis blong fasin ia i agensem olgeta bilif mo praktis we Lod Hemwan i putum blong gud blong ol pikinini blong Hem.

Long smol braon buk ia, stret afta long leta we i kam long Fas Presidensi, i gat “Wan Fas Toktok I Go Long Ol Man Long Ami”, we taetol blong hem i “Fasin blong Stap Obei long Loa, I blong Stap Fri.” Not ia i soemaot laen we i stap bitwin loa blong ami, we “i blong gud blong evriwan we oli stap long ami,” mo tabu loa.

Not ia i talem: “Long yunives tu, long ples we God i stap rul, i gat wan loa—we i blong ful yunives, i no save finis—wetem sam blesing mo sam panismen we i no save jenis.”

Las toktok blong not ia i lukluk plante long fasin blong obei long loa blong God: “Sapos yu wantem gobak long olgeta we yu lavem mo no gat sem … sapos yu wantem stap wan man mo laef gud—nao yu folem ol loa blong God. Taem yu mekem olsem, bae yu save ademap, long fridom we yu stap traehad blong holemtaet, wan moa fridom we ol narawan oli save dipen long hem, we i fridom aot long sin; from se i tru, ‘fasin blong stap obei long loa, i blong stap fri.’”²

?From wanem toktok ia: “fasin blong obei long loa, i blong stap fri” i stap ring long mi se i tru tumas long tetaem ia? ?From wanem hem i stap ring se, i tru tumas long yumi evriwan naoia?

Ating hem i from yumi gat save tru long revelesen abaot histri blong laef blong yumi bifo. Yumi luksave se taem God, Papa we I No Save Finis, i bin presentem plan blong Hem long stat blong taem, Setan i wantem jenisim plan ia. Hem i talem se hem i save pemaot evri man. I no gat wan sol bae i lus, mo Setan i gat tras long hemwan se Hem i save mekem plan blong hem bae i kamtru. Be i gat wan praes we oli no save akseptem—bae man i nomo save mekem joes, we i bin wan presen we God i givim (luk long Moses 4:1–3). Long saed blong presen ia, Presiden Harol B. Li i talem: “Afta long laef, i gat fridom blong mekem joes we i presen we i moa bigwan we God i givim long man.”³ Mo, hemia i no wan smol samting blong Setan i no luksave fridom ia blong man. Yes, hem i kam stamba problem biaen long Wo long Heven. Viktri, long Wo long Heven, i bin stap long saed blong fridom blong man.

Be Setan i no finis long ples ia. Bakap plan blong hem—plan we hem i stap wok from stat long taem blong Adam mo Iv—i blong temtem ol man mo woman, blong soemaot se yumi no naf blong kasem presen blong fridom blong mekem joes we God i givim. Setan i gat plante risen blong mekem wanem hem i stap mekem, ating bigwan nao i blong givimbak; be tu, hem i wantem blong mekem ol man mo woman oli harem nogud, semmak olsem hem. I no mas gat wan long yumi i tingdaon long paoa blong tingting blong Setan blong mas win. Wok blong hem long plan we i no save finis blong God, i givim “fasin blong go agens long evri samting” (2 Nifae 2:11) mo i testem fridom blong yumi mekem joes. Wanwan joes we yu mo mi i mekem, i wan tes blong fridom ia—taem yumi jusum blong stap obei, o no obei long ol komanmen blong God i wan joes bitwin “fridom mo laef we i no save finis” mo “kam prisena mo ded.”

Stamba doktrin ia, oli tijim klia long Seken Nifae, long seken japta: “From samting ia, ol man i fri folem bodi blong mit mo bun; mo oli kasem evri samting we i gat nid long man. Mo oli fri blong jusum fridom mo laef we i no save finis, tru long bigfala Man blong givhan, blong evri man, o blong jusum blong kam prisena mo ded, folem fasin blong kam prisena mo paoa blong devel; from hem i lukaotem blong mekem se evri man i save harem nogud olsem hem” (2 Nifae 2:27).

Long plante samting, wol ia i bin stap long wo oltaem. Mi biliv se taem Fas Presidensi i bin sendem smol braon buk ia long mi, oli bin wari moa abaot wan wo we i moa bigwan bitim Wol Wo 2. Mi biliv tu se oli bin hop se buk ia, bae i wan smol aean blong fet agensem Setan mo ol ami blong hem long wo ia we i bigwan moa—wo agensem sin—mo i stap blong mekem mi tingbaot blong laef folem ol komanmen blong God.

Wan wei blong skelem yumiwan mo komperem yumiwan long ol jeneresen bifo i tru long wan olfala standet we man i save long hem—Ol Ten Komanmen. From se, plante ples long wol we i gat gud fasin, speseli Kristin wol, Ol Ten Komanmen hem i baondri we oli bin akseptem mo i stap blong talem wanem i gud mo wanem i nogud.

Long jajmen blong mi, fo long Ol Ten Komanmen ia, oli hang strong yet long hem tedei bitim bifo. Olsem wan kalja, yumi sakemaot mo panisim fasin blong kilimded man, stil, mo giaman, mo yumi stap biliv yet we papa mo mama i responsibol long pikinini blong tufala.

Be olsem wan bigfala sosaeti, yumi sakemaot olsem nating nomo, ol narafala sikis komanmen:

• Sapos yumi putum ol samting blong wol i kam fastaem, hemia i soem tru se, yumi gat “ol narafala god” we yumi stap putum fastaem long tru God.

• Yumi mekem ol popula pipol olsem aedol, ol laefstael, ol mane, mo yes, samtaem sam pikja o samting.

• Yumi yusum nem blong God long eni kaen nogud wei, wetem tu, samtaem taem yumi singaot o yumi swea.

• Yumi yusum Sabat dei blong luk mo plei ol bigfala spot, ol bigfala gem, bigfala soping, mo evri nara kaen samting be i no blong wosip.

• Yumi tekem se fasin blong gat seks aotsaed long mared i olsem wan pleiplei, mo wan gud taem.

• Mo fasin blong kavetem samting i kam bigbigwan tumas long fasin blong laef. (Luk long Eksodas 20:3–17.)

Ol profet blong evri dispensesen oli bin stap givim woning agensem tufala moa series komanmen—tufala long saed blong fasin blong kilimded man mo adaltri. Mi luk wan stamba poen from tufala impoten komanmen ia—bilif ia se laef hemwan i spesel janis we i kam long God mo bodi blong yumi blong mit mo bun, ol tempol blong laef long wol, bae yumi krietem olgeta insaed long ol limit we God i putum. Blong man i putum rul blong hem i riplesem ol loa blong God, long eni en blong laef, i bigfala tingting blong mekem sin mo bigfala sin.

Ol stamba samting we i kamaot long ol nogud fasin ia abaot mared, i stap kasem ol famle—paoa blong famle i stap kamdaon kwiktaem, mo hemia i mekem bigfala damej long sosaeti. Mi luk stamba blong problem ia mo risal blong hem. Taem yumi stap lego komitmen blong yumi mo tru fasin long ol mared patna blong yumi, yumi tekemaot glu we i holem sosaeti blong yumi i stap tugeta.

Wan gud wei blong tingting long ol komanmen, i blong luk se, oli ol advaes blong lav we i kam long wan Papa long Heven we i save evri samting. Gol blong Hem i hapines blong yumi we i no save finis, mo ol komanmen blong Hem oli rod map we Hem i givim blong gobak long Hem, we i wan wei ia nomo we bae yumi save hapi blong taem we i no save finis. ?Olsem wanem hom mo famle i impoten long glad blong yumi we i no save finis? Long pej 141 blong smol braon buk blong mi ia, i talem se: “I tru, heven blong yumi i moa bitim ol hom blong yumi ia we yumi stap tingting long hem long taem we i no save finis.”⁴

Doktrin blong famle mo hom, oli bin talemaot klia bakegen wetem paoa insaed long “Famle: Wan Ofisol Toktok I Go long Wol.” Hem i talemaot tru fasin blong ol famle, mo afta, i eksplenem hao hem i go wetem tempol wosip. Ofisol toktok i talem tu loa ia we hapines we i no save finis blong ol famle i stanap long hem, we hem i : “tabu paoa blong mekem pikinini i mas tekem ples nomo bitwin man mo woman we tufala i bin mared folem loa olsem hasban mo waef.”⁵

God i talemaot long ol profet blong Hem, se i gat sam standet blong gud fasin we i no save jenis. Sin bae oltaem i sin. Fasin blong no stap obei long ol komanmen blong Lod, oltaem, bae i stopem yumi blong kasem ol blesing blong Hem. Wol i jenis bigwan mo oltaem, be God, ol komanmen blong Hem, mo ol blesing we Hem i promesem oli no stap jenis. Oli stap semmak, mo oli no jenis. Ol man mo woman oli kasem fridom blong olgeta blong mekem joes olsem wan presen we i kam long God, be fridom blong olgeta, mo afta, hapines blong olgeta we i no save finis, i kam taem oli obei long ol loa blong Hem. Olsem we Alma i givim advaes long boe blong hem, Korianton, we i stap go olbaot: “Fasin nogud i neva bin mekem ol man i glad.” (Alma 41:10).

Long taem tedei, blong taem we gospel we i fulwan i kambak, Lod i bin talemaot bakegen long yumi ol blesing we Hem i promesem sapos yumi obei long ol komanmen blong Hem:

Long Doktrin mo Ol Kavenan seksen 130, yumi ridim se

i gat wan loa, we oli talem wetem atoriti long heven bifo ol stat blong wol ia we oli no save tekembak, mo evri blesing i folem loa ia.

Mo taem yumi kasem eni blesing we i kam long God, hem i from fasin blong yumi blong stap obei long loa ia we blesing ia i folem (luk long D&C 130:20–21).

I tru. I no gat wan doktrin we oli talemaot wetem moa paoa insaed long skripja bitim doktrin ia, se ol komanmen blong Lod oli no stap jenis mo oli joen wetem hapines mo gud laef blong yumi olsem wanwan man mo woman, mo olsem ol famle, mo olsem wan sosaeti. I gat ol gud fasin blong laef we oli no save jenis. Fasin blong no stap obei long ol komanmen blong Lod, oltaem, bae i stopem yumi blong kasem ol blesing blong Hem. Ol samting ia oli no stap jenis.

Long wan wol we kampas blong gud fasin blong sosaeti i no stap wok gud, gospel we i kambak blong Jisas Kraes, i neva muvmuv; mo semmak long ol stek mo ol wod blong hem, ol famle, mo wanwan memba blong hem. Yumi no mas pikpikimap mo jusum wanem komanmen we yumi ting se i impoten blong folem, be yumi mas luksave evriwan long ol komanmen blong God. Yumi mas stanap strong mo no muv, blong gat stret tras long fasin blong Lod we i no stap muv, mo gat stret tras long ol promes blong Hem.

Bae yumi stap wan laet antap long hil, wan eksampol blong stap obei long ol komanmen we oli neva bin jenis mo bae oli neva jenis. Semmak olsem we smol buk ia i leftemap tingting blong ol LDS soldia blong stanap strong long gud fasin long taem blong wo, bae yumi tu, long lata-dei wo ia, yumi stap olsem wan laet long ful wol mo speseli long ol pikinini blong God we oli stap lukaot blong kasem ol blesing blong Lod. Long hemia, mi testifae long nem blong Jisas Kraes, amen.