Peikiong Kosonned Iei Saledek

I ale ehu kisakis kaselel ni Kirismas samwalahro me katamando irehkei. I pahn nainiki serepein me kihieng ieo. E wia kisehn dipwisou kei me I pwilikihdi nan imwat ihmwen mahs ahnsou me I mweselsang mwo mwurin ahi pwopwoudda. Kisakiso iei pwuhk pohn pwehl wet me I kolokol. Iei pwuhk wet me kohieng LDS koaros me iangala sounpei nan Mahwin Keriau en Sampah. I, pein, wiahki me pwuhk wet wia kisakis ehu sang President Heber J. Grant oh sapwellime sounsawas akan, J. Reuben Clark Jr. oh David O. McKay.

Nan kisin likou ehu ni tepin pwuhko, soukohp silimen pwukat en Koht ntingiedi: “Mwekid en mahwin sohte mweidada sen pein pwarowei de kadarowei weliapat. Ihme se uhd kak wia iei kihong nan pehmwen koasoai en kaudiahl en mwehi et oh kawehwehpen tepin padahk kan en Rongamwahuo pwe en kak kihong uhk, sohte lipilipil wasa ke mihie, koapwoaroapwoar oh pwoson oh pil nsenamwahu, kapohl oh meleilei en ngehn.”¹

Rahn wet kitail mihier nan pil ehu mahwin en sampah. Met kitail sohte mahwinki dipwisou en mahwin keper. Kitail mahwinki madamadau, koasoai, oh wiewia. Mahwin en dihp ehu met, oh met laudsang mahs kitail anahne mehn ketemen en kapwaiada kosonned akan. Mour en sampah wialahr me koaros idawehn, oh tohto lamalam oh tiahk en mour wet sohte pahrekohng mwohkan me Pein Kauno ketin koasoanehdi ong kamwahupen Sapwellime kan.

Nan pwuhk pohn pwehl wet, mwurinte nein Presidensi Keieu kisin likouo, mie pil ehu “Iren Kapehse ong Ohl Akan Nan Doadoahk en Sounpei,” me oarelepe iei “Peikiong Kosonned Iei Saledek.” Lepin patohwet karasapene kosonned en palien sounpei, me “mwahu ong koaros me ieiang sounpei,” oh kosonned en nanleng.

Kisin likouo pil koasoaia, “Pil nan lahng kan, wasa me Koht ketin kakaun, mie kosonned—ong koaros, poatoapoat … kosonned—iangahki kapai kei oh kalokolok me sohte kak wekila.”

Keimwseklahn koasoai me mih nan kisin likouo koasoaia duwen peikiong kosonned en Koht: “Ma komw men wia aramas mwahu men ni omw pahn pwurodo rehn ahmw peneinei sohte namenek, … ma komw men wia ohl emen oh ahniki mour peren —eri kapwaiada kosonned en Koht. Ni ahmw wia met komw kak kapatahiong saledek kesempwal kan me komw nannantihong en doarehla, ehu me mehteikan mwein uhsang, saledek sang dihp; pwe ni mehlel ‘peikiong kosonned iei saledek.’”²

Dahme kahrehda lepin lokaia pwukat “peikiong kosonned iei saledek” wia lokaia mehlel ong ie ahnsouo? Dahme kahrehda e pil mehlel ong kitail ahnsou wet?

Mwein pwehki kitail wehwehki duwen atail mour mwohn mour wet. Kitail kasawiada me ni ahnsou me Koht Sahm Soutuk kasalehda Sapwellime koasoandi ong kitail ni tepin ahnsou, Sehdan mwahuki kawikila pilahno. E nda me e pahn doarehla aramas koaros. Sohte emen pahn salongala, oh Sehdan koapwoaroapwoariki me e kak kapwaiada ah koasoandio. Ahpw mie pweine me sohte kak alahlda—iei ohlahn en aramas saledek en pilipil me wia kisakis en Koht (tehk Moses 4:1–3). President Harold B. Lee koasoaiahki kisakis wet, “Likin mour, saledek en pilipil wia kisakis en Koht me keieu laud ong aramas.”³ Eri e sohte wia mehkot tikitik ehu Sehdan eh kihsang en aramas saledek en pilipil. Ni mehlel, e wiahla irehieu me kahrehieng Mahwin en Nanleng eh wiawi. Pweida nan Mahwin en Nanleng iei pweida ehu ong saledek en pilipil en aramas.

Ahpw Sehdan sohte uhdi. Ah pilahn keriau—pilahn me e koadkoadoahke sangete ahnsoun Adam oh Ihp—iei en kasongosongih ohl oh lih, pwehn kasalehda me kitail sohte warohng sapwellimen Koht kisakis en saledek en pilipil. Sehdan wiewia mepwukat pwehki kahrepe tohto, mwein kahrepe keieu laud iei me e men ikih, ahpw e pil men wiahiong ohl oh lih en kin nsensuwed duwehte ih me kin nsensuwed. Kaleke kitail kasohwe uwen en Sehdan eh anahne en kana. Eh pwukoa nan sapwellimen Koht pilahn soutuk iei en “pelianda mehkan koaros” (2 Nephi 2:11) oh song atail saledek en pilipil. Pilipil me kowe oh ngehi wiahda wia mehn song atail saledek en pilipil—ma kitail pahn pilada kitail en peik de sapeikiong kosonned en Koht wia pilipil ehu nanpwungen “saledek oh mour soutuk” oh “selidi oh mehla.”

Padahk poahsoan wet sansal mwahu nan 2 Nephi, keriau en ire laud: “Eri, aramas kin saledek nin duwen pali uduk; oh mehkoaros kin kohieng irail iei me kin konehng aramas. Oh irail kin mweimweiohng en pilada saledek oh mour soutuk, sang rehn Sountomw lapalap en aramas koaros, de irail en pilada selidi de mehla, nin duwen selidi oh manaman en tepelo; pwe e kin rapahki aramas koaros en kak pahtoula duwehte ih.” (2 Nephi 2:27).

Sampah wet, ni soangen mwohmw kei, wie mahmahwin ahnsou koaros. I kamehlele me ahnsou me Presidensi Keieu kadardohngie pwuhk pohn pwehlo, re medemedewe laud mahwin me laudsang Mahwin Keriau en Sampah. I pil kamehlele me irail likih me pwuhko pahn wia ahi mehn perehrehn pwoson sang Sehdan oh nah sounpei kan nan mahwin laud wet—mahwin iong dihp—oh wia mehn ketemen ong ie I en momourki kosonned akan en Koht.

Ehu wiepen kasosohng de karasa kitail ong dih en mahs akan iei sang ni ehu mehn kasosohng me keieu mering—Kosonned Eiseko. Ong pali laud en sampah, mehlel mehn Suhs oh Souleng kan, Kosonned Eisek iei me wia dahme mwahu oh suwed me keieu alahlda oh werei.

Ni pein ahi teneki, kitail kin kapwaiada pahieu en Kosonned Eiseko duwehtehte mahs. Nin duwen pwihn en aramas ehu, kitail kin kailongki kam aramas, pirap, oh likamw, oh kitail kamehlelehte pwukoahn seri ong pahpa nohno.

Ahpw ni duwen wehi, kitail kin kalapw soikala kosonned weneu teiko:

• Ma dahme kesempwal ong sampah wia ehu iren kasosohng, mehlel kitail ahnikihier “koht tohrohr” oh kesempwalikihsang Koht mehlelo.

• Kitail kin wiahkihla koht aramas ndand, ahniki mour mwahu, oh kepwehpwe, oh ehng, ekei pak sansal oh dipwisou teikan.

• Kitail kin doadoahngki mwaren Koht ni soangen wiepe suwed tohto, iangahki me kitail kin pwuriamwei ndahla oh atail kahula kan.

• Kitail kin doadoahngki Rahn Sarawi ong atail mwadong keieu laud kan, atail mwemweit keieu laud kan, atail netineti keieu laud, oh kereieng soahng koaros likin sarawi.

• Kitail kin wiahki nsenen pwopwoud likin pwopwoud mehn mwadong oh kemweit.

• Oh noahrok nohnlahr rek nan atail mour. (Tehk Eksodus 20:3–17.)

Soukohp en mwehi koaros kin kehkehlingki duwen kosonned kesempwal riau—me pid kam aramas oh kamwahl. I kilang ehu ire me poahsoanehda kosonned riau pwukat—lamalam me mour pwilidohsang kupwursapan en Koht oh me paliwaratail kan, me wia tehnpas en mour wet, konehng en kapikipikda nan irair kan me Koht ketin koasoanehdier. Pwe aramas en kihong pein ah koasoandi weliandi kosonned akan en Koht ong tepin oh imwin mour wia iren pohnmwahso laud oh dihp toutou.

Lipw laud kan en mwamwahllahn kesempwalpen pwopwoud iei lipwe kan ong peneinei—kehlepen peneinei wie sosohrala ni inenen mwadang, oh sohrala wet elehiengehr ohla laud en tohn wehi. I kilangehr lipwen kahpwal pwukat. Ni atail sohla wauneki inou oh sohla mehleliong atail pwoud kan, kitail kin kihsang dahme kin kolpene tohn wehi.

Ehu wiepe katapan en medewehki kosonned akan iei me re wia iren kaweid sang Sahm Nanleng me eripit oh mwahngih mehkoaros. Sapwellime doadoahk iei atail popohl soutuk, oh Sapwellime kosonned akan iei atail ahl. E ketkidahr kitail en pwurala Reh, me iei ihte me kitail pahn kak en ahniki peren soutuk. Ia uwen kesemwpal en imwatail oh atail peneinei ong atail peren soutuk? Nan teh 141 en nei pwuhk pohn pwehlo kosoia, “Mehlel atail nanleng iei imwatail kan met nan mour soutuk.”⁴

Padahk me pid peneinei oh ni ihmw pwurehng kohda ni sansal oh kehlail nan “Peneinei: Kalohk Ehu Ong Sampah.” E kalohkihda duwen peneinei oh eri kawehwehda duwen tehnpas sarawi oh kaudok ahr dokpene. Kalohko pil kawehwehda kosonned me poahsonehda popohl soutuk en peneinei, iei, “Me manaman sarawi en wiahda mour pahn doadoahk ihte nanpwungen ohl oh lih, me kapwopwoud ni pwung en kosonned ni duwen ohl oh lih pwopwoud.”⁵

Koht kasalehiong Sapwellime soukohp akan me mie soahng kan me mehlel douluhl. Dihp pahn wiewiahte dihp kohkohlahte. Sapeikiong kosonned akan en Kauno pahn irehdi Sapwellime kapai kan. Sampah pahn kin wekiwekidek laud ahnsou koaros, ahpw Koht, Sapwellime kosonned akan oh kapai kan me inoupe miehier sohte pahn wekila. Re koasoandier oh sohte pahn wekidekla. Ohl oh lih kin alehdi arail kisakis en saledek en pilipil sang Koht, ahpw arail saledek oh, eri iangahki, arail popohl soutuk kin kohsang arail peikiong Sapwellime kosonned akan. En Alma kaweid ong nah pwutak Corianton, “Suwed, kaidehn mwahn popohl” (Alma 41:10).

Nan rahn pwukat en Kopwurupwurdohn rongamwahuo ni unsek, Kauno pil pwurehng kasalehiongkitailehr kapai kan me inoupe miehier ma kitail pahn peikiong Sapwellime kosonned akan.

Nan Doctrine and Covenants 130 kitail wadek:

Mie kosonned ehu, kokouda poatoapoat nanleng mwohn sampah wet eh wiawihda, me kapai koaros poadada powe.

Ni ansou me kitail kin alehdi kapai sohte lipilipil sang Kauno, iei sang ni peikiong kosonned me kapaio poadada powe (D&C 130:20–21).

Mehlel te me sohte padahk me pwuhk sarawi kawehwe kehlailsang kosonned akan en Kauno me sohte kin wekila oh duwen arail doke atail popohl oh nsenamwahu, ni duwen aramas, ni duwen peneinei, oh ni duwen tohn wehi. Mie soahng kan me mehlel douluhl. Sapeikiong kosonned akan en Kauno pahn ireikitaildi sang Sapwellime kapai kan. Mepwukat sohte kin wekila.

Nan sampah ehu me ahn wehi pepehm en dahme pwung wie pweipweiek, rongamwahu kopwurupwurdohu en Sises Krais sohte kin pweiek, oh ah stake oh ward kan, ah peneinei kan, oh towe kan sohte konehng pweiek. Kitail sohte konehng pil seli mehnia kosonned me kitail pahn kesempwaliki en kolokol ahpw pohnese koaros kosonned akan en Koht. Kitail anahne uh kehlail oh tengeteng, ahniki soupeikasal unsek nan Kauno eh sohte kin wekila oh likih ni unsek Sapwellime inou kan.

Kitail en wia marain ehu pohn dohlo, mehn kahlemeng ehu ong ni peikiong kosonned akan me sohte kin oh sohte pahn wekidekla. Duwehte pwuhk tikitiko eh kangoangehki sounpei LDS ko en uh kehlail ni me pwung nan ahnsoun mahwin, kitail, nan mahwin wet en imwin-rahn, konehng en wia mehn kamarain ong sampah pwon oh ni mehlel ong sapwellimen Koht serihkan me raparapahki kapai kan sang Kauno. Duwen met I kadehdehki ni mwaren Sises Krais, ahmen.