Ahkostwen nuh ke Masap pa Moul Sukohsohk

Sel Elder L. Tom Perry

Ke U luhn Mwet Sap Singucul Luo


Mukul ac muhtwacn uh eis sulaclah lalos oacna sie mwe sang sin God, tuhsruhk sukohsohk lalos ac, fohlohkihnyac uh, engan ma pahtpaht tuhkuh ke ahkostwen nuh ke masap Lal.

Nga eis sie mwe sang sacohk ke Christmas tari ah ma mwe acsmakihn pucspucs tuhkuh kac. Ma acn nuhtin wiyuck el use nuh sihk. Ma an ke inmahsrlon ma fihliyucki na ke lohm mah se sesr ke nga tuh mukwilac liki acn we tukun nga pahyuckyak. Mwe sang sac pa puk srihsrihk tuhn in yactro se nga sruok ke pouk inge. Puk se inge ma tuh ituckyang nuh sin solse ma wi alu uh suc tuh sroacng welah military ke Mweun Ahkluo luhn Facluh. Nga sifacna motko muh puk se inge sie mwe sang sel Prestuhn Heber J. Grant ac mwet in kahsruh lal, J. Reuben Clark Jr. ac David O. McKay.

Ke ma an met ke puk uh, mwet pahluh tolu luhn God inge suhmuhslah: “Mukwikwi luhn un military uh tiac lwelah kuht in sramsram nuh suwos pacl nuh kwewa, kuht sifacna kuh sin mwet ahol kuht. Inkacnek wo se emet tohkoh an pa in usot nuh suwos kuhtuh ip ke mwe fwackyuck in pacl inge ac ke mwe ahkuhtweyac luhn ip yohk luhn Wosasuc ma ac fah usot nuh suwos, ke oacna sie acn ma kowos oasr we, finsrak ac luhlahlfongi ma ahksasucyeyucklac, ac oacyacpac insracelak, engan, ac mihslac luhn nguhn.”1

Mihsenge kuht sukkuhtyak sifacna ke sie pac mweun. Ma inge tiac sie mweun ke kuhfwen mweun. Ma ke nuhnak, kahs, ac orekma. Ma ke mweun ke ma koluk, ac yohk na kuht enenuh in ahkacsmakihnyeyuck ke masap uh. Sriyucklac luhn alu uh liki government uh eklac oacna in ma pah se, ac ma pucspucs ke luhlahlfongi ac mukwikwi luhn ma inge lain ma tuh akwucki sin Leum Sifacna nuh ke mwe insewowo luhn tuhlihk Nahtuhl.

Lun puk srihsrihk tuhn in yactro uh, tukun na lwacta se sin Prestuhnsi Se Met, oasr sie mwe kahsruh ke “Sihm in Ahkolah nuh sin Mukul Solse,” sifac kac an pa Ahkostwen nuh ke Masap Pa Moul Sukohsohk.” Mwe kahsruh uh srolwaclah sie lain suwohs inmahsrlon masap luhn military, suc pa “ma wo nuh sin mwet nuh kwewa suc wi solse,” ac masap muhtahl.

Ma inge fahk, “Fin facluh, pac, acn ma God El kol, oasr masap—facluh nohfohn, masap … ma pahtpaht—ma oasr mwe insewowo ac mwacta ma tiac kuh in ikihlyucklac.”

Kahs sahflah ke mwe kahsruh ke sihm uh lohacng na nuh ke ahkostwenyacn masap luhn God: “Kom fin finsrak in fohlohk nuh yurin mwet kom luhngse ac in wacngihn auli, … kom fin orek mukul ac moul engan—na karuhnguhnwacng masap luhn God. Ke kom oruh ohinge kom kuh in ahkyohkye sukohsohk na yohk srihpac ma kom karuhnguhnwacng an, sie pac ma mwet sahyac elos sahp muhngnguh, pa sukohsohklah liki ma koluk; tuh pwacyena lah ‘ahkostwen nuh ke masap uh pa moul sukohsohk.’”2

Efuh pohloh kahs se “ahkostwen ke masap pa moul sukohsohk” uh oacna in pwacye nuh sihk ke pacl se inge? Efuh ma inge oacna in pwacye nuh sesr nuh kwewa inge?

Sahp ma ke srihpen kuht ahkkahlwemye sie etwacack ke moul se met liki moul se lasr inge. Kuht akihlen lah ke God Pahpah ma Pahtpaht El ahkkahlwemye plwacn Lal nuh sesr ke muhtwacwacackiyac ah, Setuhn el ke ekuhllah plwacn sac. El fahk muh el ac molwelah mwet nuh kwewa. Tiac kuhtwena mwet ac tuhlac, ac Setuhn el puhlakihn wo muh el kuh in oraclah plwacn se lal uh. Tuhsruhk oasr sie molo ma tiac lwelah—kuhnausyucklac luhn mwet uh in sukohsohk in sulaclah, suc pa sie mwe sang utuckuh sin God (liye Moses 4:1–3). Ke mwe sang se inge Prestuhn Harold B. Lee el fahk, “Sahyacn na moul uh, sukohsohk in sulaclah uh pa mwe sang yohk se emet nuh sin mwet uh.”3 Ke ma inge tiac ma srihsrihk se nuh sel Setuhn elan pihlesruh sukohsohk in sulaclah luhn mwet uh. Pwacyena lah, ma se inge pa srihpac yohk se ke Mweun Inkuhsrao. Kuhtanglah ke Mweun Inkuhsrao uh pa sie kuhtanglah nuh ke sukohsohk in sulaclah luhn mwet uh.

Tuhsruhk Setuhn el tiacna tui. Plwacn se tok lal—plwacn se ma el oruh na e ke pacl lal Adam ac Eve—pa in srihfe mukul ac muhtwacn, yohkna in ahkpwacyeye lah kuht tiacna fal in eis mwe sang luhn God ke sukohsohk in sulaclah. Oasr srihpac pucspucs luhn Setuhn in oruh ma el oruh uh. Sahp srihpac fokoko se emet an pa fohlohksahk, tuhsruhk el oacyacpac kena in oruh mukul ac muhtwacn uh in suhpwacr oacna ke el suhpwacr. Tiac kuhtwena sesr enenuh in srihkkihn insacnweacng luhn Setuhn in kuhtanglah. Ma kunacl ke plwacn ma pahtpaht luhn God uh oraclah kihsruhngyacn ma nuh kwewa (liye2 Nephi 2:11) ac srihkeyuck sukohsohk in sulaclah lasr uh. Kais sie sulaclah ma nga ac kom oraclah uh pa sie srihkeyuck luhn sukohsohk in sulaclah lasr uh—lah kuht sulaclah in ahkostwen kuh seahkos nuh ke masap luhn God pa sie sulaclah inmahsrlon moul sukohsohk ac moul ma pahtpaht ac srohoh ac misac (liye 2 Nephi 2:27).

Mwe luti yohk se inge lutiyuck kahlwem ke 2 Nephi, sapta ahkluo: Mwet uh sukohsohk in fal nuh ke mahno ac elos sukohsohk in sulaclah moul sukohsohk ac moul ma pahtpaht ke Mwet Lahngo kuh in sulaclah srohoh ac misac in fal nuh ke srohoh ac kuh luhn devil. Devil el suk tuh mwet nuh kwewa in kuh in suhpwacr in oacna el ” (2 Nephi 2:27).

Ke inkacnek pucspucs, facl se inge kwacna mweun. Nga luhlahlfongi ke Prestuhn Se Met elos suhpwacma puk srihsrihk tuhn in yactro se nuhtihk inge, elos elyah ke sie mweun ma yohk liki Mweun Ahkluo luhn Facluh. Nga oacyacpac luhlahlfongi muh elos finsrak tuh puk uh in sie mwe loango luhn luhlahlfongi in lain Setuhn ac un mwet mweun lal ke mweun yohk se inge—mweun lain ma koluk—ac in ahkacsmakihnyeyuc in muhta na ke masap luhn God.

Sie inkacnek in srihke kuht sifacna nuh ke fihlin fihl ke pacl somlah ah pa ke sie ip yohk mahtuh emet etweyuck sin mwet uh—ke Masap Singucul ah. Inkaiyacn facl kapkapwack, yohkna acn ma akwucki ke kwewana luhlahlfongi luhn mwet Jew ac Kristin, Masap Singucul uh insese kac emet ac fokoko ke inmahsrlon ma wo ac ma koluk.

Ke nuhnak luhk uh, ahkosr sin Masap Singucul an liyeyuckyang arulacna wo in pacl inge. Oacna facsin uh, kuht sruhnga ac tiac lwelah ahkmas, pihsrapasr, ac kikiacp, ac kuht srackna luhlahlfongi ke ma kunen tuhlihk nuh sin ninac kiyaclos ac pahpah tuhmwaclos.

Tuhsruhk oacna sie mura, kuht kwacna lwelah masap ohnkohsr sahyac uh:

  1. Fin ma yohk srihpac luhn facluh uh ac mwe ahkkahlwemye, pwacyena lah oasr “god sahyac” kuht fihliyac met liki God pwacye.
  2. Kuht kaksakihn mwet pwengpweng, ke ohiyacn moul wo, ke kahsruhp, ac ahok, kuhtuh pacl uh ke ma sruhlwaclah kuh kuhtwena ma.
  3. Kuht orekmakihn inen God ke kain in ohiyac koluk nuh kwewa, weacng kahskahs sramlacp ac kahskahs koluk lasr uh.
  4. Kuht orekmakihn lwen Sabbath nuh ke pacl in sritacl yohk emet lasr, pacl in oruh mukwikwi pwacr emet lasr, pacl in som moul yohk lasr, ac ma nuh kwewa sahyacn alu.
  5. Kuht oruh in nuhnkuh macruht a orek kosro uh oacna mukwikwi pwacr ac mwe pwacrkihnyuck.
  6. Ac in mwel uh eklac sie ohiyac ma kwacna orek ke moul uh. (Liye Exodus 20:3–17.)

Mwet pahluh ke fihlin fihl nuh kwewa ahksensenkackihn kuhnahoslah luhn luo sin masap yohk srihpac uh—ma srihsrngi nuh ke ahkmas ac orek kosro. Nga liye sie ip yohk ma oacna sie ke masap yohk srihpac luo inge—sie luhlahlfongi lah moul uh pa sie kuh luhn God ac lah mahnosr, tempuhl luhn moul suhkawihl, enenuh in oreklac ke inmahsrlol ma God El akiyac. Tuh ke mwet uh ahollah masap lal sifacna nuh ke masap luhn God oreklac luhn moul uh ac ahkmas uh pa mwe srihkasrak yohk se emet luhn ma kuht motko ac upaciyacn ma koluk uh.

Ma sikyak ke orek srihkkihnyuck muhtahliyacn macruht uh pa mwacta nuh sin sucu uh—fokoko luhn sucu uh arulacna sa in muhnahslah. Muhnahslah se inge oruh kuhnausyucklac mura uh. Nga liye suwohs srihpac uh ac mwacta uh. Ke kuht fuhlweack in insacnweacng ac oaru lasr nuh sin mwet kuht macruht se an, kuht eis ma se ma sruokyac mura uh nuh sie.

Sie ohiyac ma kahsruh in nuhnkuh ke masap an pa ma inge kahsruh luhng kuhlwacng sin Pahpah Lucng suc lahlmwetmwet, ac etuh ma nuh kwewa. Srihpac yohk Lal an pa engan ma pahtpaht lasr, ac masap Lal pa mwe kolyuck ma El use nuh sesr in fohlohklac nuh Yohrohl, suc pa sie fanna inkacnek ma kuht kuh ac fah engan ne tok ma pahtpaht. Fuhkah yohk srihpaciyacn lohm uh ac sucu uh nuh ke engan ma pahtpaht lasr? Ke sra puk 141 ke puk srihsrihk tuhn in yactro se nuhtihk inge fahk, “Pwacyena lah inkuhsrao lasr yohk kuhtuh srihsrihk liki sie luhman lohm sesr uh nuh tok ma pahtpaht.”4

Mwe luti ke sucu ac lohm uh tuh sifilpac kalweniyuck ke pacl somlah ke kahlwem yohk ac fokoko ke “Sucu: Sie Mwe Fahkwack nuh fin Facluh.” Ma inge sulkackihn ohiyac ma pahtpaht luhn sucu ac na ahkuhtweyac kuhpahsr kac nuh alu ke tempuhl. Pweng uh oacyacpac sulkackihn ke masap ma engan ma pahtpaht luhn sucu uh ac palyeyuck, in oacna, “kuh muhtahl in orwaclah tuhlihk uh enenuh in tuhkuh yurin mukul ac muhtwacn pahyuck se muhkwena.”5

God El ahkkahlwemye nuh sin mwet pahluh Lal lah oasr ip yohk wo. Ma koluk uh ac kwacna pa ma koluk uh. Seahkostwen nuh ke masap luhn Leum ac fah kwacna eislah liki kuht mwe ahkinsewowo Lal. Facluh kwacna ekyek ac upac, tuhsruhk God, masap Lal, ac mwe insewowo ma uliyuck uh tiacna eklac. Ma inge ma ne tok ma pahtpaht ac tiac kuh in eklac. Mukul ac muhtwacn uh eis sukohsohk in sulaclah lalos oacna sie mwe sang sin God, tuhsruhk moul in sukohsohk lalos ac, ke ma inge, engan ma pahtpaht lalos tuhkuh ke ahkostwen nuh ke masap Lal. Oacna ke Alma el tuh kahs in kahsruh nuh sin wen se nahtuhl suc pa Corianton. Ma koluk uh tiacna pa engan (Alma 41:10).

Ke pacl in Fohlohkihnyuckyak se inge ke fohnlah luhn wosasuc uh, Leum El sifilpac ahkkahlwemye nuh sesr mwe insewowo ma uliyuck nuh sesr ke kuht ahkostwen nuh ke masap Lal.

Ke Doctrine and Covenants 130 kuht riti:

Oasr sie masap, ma oreklac ne tok ma pahtpaht met liki pwelucng luhn facluh se inge, ma mwe insewowo nuh kwewa tuhkuh kac—

Ke kuht eis kuhtwena mwe insewowo sin Leum, ma ke ahkostwen nuh ke masap ma ma inge tuhkuh kac (liye D&C 130:20–21).

Pwacyena lah wacngihn kuhtwena mwe luti ma ahkkahlwemyeyuck fokoko ke ma suhmuhslah liki na masap tiac kuh in eklac luhn Leum ac kuhpahsr luhn ma inge nuh ke engan ac ohiyacn moul wo lasr oacna kais sie mwet, oacna sucu, ac oacna mura uh. Oasr ip yohk wo. Seahkostwen nuh ke masap luhn Leum ac fah kwacna eislah liki kuht mwe ahkinsewowo Lal. Ma inge tiacna eklac.

Ke sie facl ma kampahs luhn ma wo luhn mura uh tihkuclkuclwack, wosasuc ma sifilpac fohlohkihnyuckyak luhn Jisus Kraist tiacna ahlohloh kuh finne stek ac ward la, sucu, kuh kais sie mempucr. Kuht enenuh in tiac sol ac sule lah piyac kac masap ma kuht nuhnkuh muh yohk srihpac in sruokyac tuhsruhk akihlen masap nuh kwewa luhn God. Kuht enenuh in tu na kuh ac insacnweacng, in luhlahlfongi ke ohiyac wo pacl nuh kwewa luhn Leum ac luhlahlfongi suwohs ke olweacng Lal.

Lwelah tuh kuht in kwacna sie kahlwem finohl uh, sie mwe srihkasrak in liyacacng masap ma soenna eklac ac fah tiac eklac. Oacna ke puk srihsrihk se inge ahkkweye solse ma wi alu uh in tu na kuh in wo ke pacl mweun, lwelah kuht in, ke mweun se ke lwen sahflah inge, in sie kahlwem nuh sin facluh nohfohn ac yohkna nuh sin tuhlihk nuhtin God suc suk mwe insewowo luhn Leum. Ke ma inge nga fahkwack ke inen Jisus Kraist, amen.

Mostrar referencias

  1.  

    1. Prestuhnsi Se Met, ke Principles of the Gospel (1943), i.

  2.  

    2. Ke Principles of the Gospel (1943), v, vii, viii.

  3.  

    3. Teachings of Presidents of the Church: Harold B. Lee (2000), 4.

  4.  

    4. Stephen L Richards, ke Principles of the Gospel, 141.

  5.  

    5. “Sucu: Sie Mwe Fahkwack nuh fin Facluh,” Ensign kuh Liahona, Nohfuhmpuh 2010, 129.