Pis blong Yuwan: Praes blong Stret mo Gud Fasin

Blong Kworom blong Olgeta Twelef Aposol


Kwentin L. Kuk
Nomata wetem ol tes blong laef, from Atonmen blong Sevya mo gladhat blong Hem, stret mo gud fasin blong laef blong yumi bae i gat praes, mo praes ia i blong kasem pis blong yumiwan.

Ol eksperiens we i jes pas i mekem mi tingtingbak long doktrin blong pis mo speseli long wok blong Jisas Kraes blong stap helpem wanwan long yumi blong kasem pis blong yumiwan we i stap oltaem.

Tu samting we i bin hapen long ol las manis we i pas i tajem mi bigwan. Faswan, mi givim toktok long fenerol blong Emili Peka, wan gudfala gel blong sikis yia we i ded wetem 25 narafala man, wetem 19 yang pikinini, long wan nogud taem we man i sutum olgeta long Niutaon long Konektikat. Mi bin krae wetem famle blong hem mo mi luksave se plante oli nomo gat pis. Mi faenem paoa mo fet long papa mo mama blong hem, Robet mo Alisa Peka.

Sekenwan, mi bin mitim ol taosen fetful memba blong Jos long Aevori Kos siti long Abijan.1 Kantri ia we i toktok Franis i bin gotru long hadtaem blong mane, mo taem we ami i tekova long gavman, mo afta tu wo insaed long kantri we i finis long yia 2011. Yet, mi bin filim wan spesel pis taem mi bin stap wetem olgeta.

Plante taem sam samting i hapen, mo oli tekemaot pis mo oli mekem yumi nomo strong.

?Huia i save fogetem ol nogud atak blong 11 Septemba 2001, long ol defren ples long Amerika? Ol taem olsem, oli mekem yumi tingbaot olsem wanem nao ol filing blong pis blong yumi mo sefti blong yumi oli save lus kwiktaem.

Bigfala boe blong mitufala mo waef blong hem, we tufala i stap wet long fas pikinini blong tufala, haos blong tufala i stap tri rod afta long Wol Tred Senta long Niu Yok Siti taem fas plen i go sperem Not Taoa. Tufala i go long ruf blong haos blong tufala mo tufala i harem nogud tumas taem tufala i stap luk se i wan nogud aksiden. Afta, tufala i witnesem seken plen i sperem Taoa long Saot. Tetaem ia tufala i luksave se i no wan aksiden mo tufala i biliv se pat blong Manhatan i stap long atak. Taem Saot Taoa i foldaon, klaod blong das i kavremap haos blong tufala mo evri ples long pat ia blong Manhatan.

Oli bin konfius long wanem we oli bin witnesem mo oli wari se bae i gat moa atak, nao oli muv i go long wan eria we i moa sef, mo afta, tufala i go long Manhatan stek Jos bilding long Linkon Senta. Taem tufala i kasem ples ia, tufala i faenem se twelef nara memba blong pat ia blong Manhatan oli mekem semfala desisen blong go long stek senta. Tufala i ringim mitufala blong talem weaples tufala i stap long hem. Mi harem gud se tufala i sef be mi no sapraes long ples we tufala i stap long hem. Ol revelesen blong tedei oli tijim se ol stek long Saeon oli wan ples blong difendem yumi mo wan ples blong haed long strong win, mo long bigfala nogud kros taem bae Lod i kapsaetem i strong long ful wol.2

Tufala i no save gobak long haos blong tufala blong wan wik taem, mo tufala i harem nogud tumas long plante laef we oli no gat rong we oli lus, be tufala i no bin lusum wan samting.

Taem yumi tingtingbak long ol trabol ia, wanem i tajem mi, i wanem i defren long doktrin long saed blong pis long wol mo pis blong yumiwan.3

Taem we Sevya i bon, bigfala grup blong ol pipol long heven oli bin presem God mo talem: “[Glori long God we i stap antap we antap], pis i stap wetem ol man we God i glad long olgeta.”4

Be sore tumas, yumi bin luk tu se long impoten taem ia afta long taem we Pikinini blong God i bon long wol, Herod we i king i givim tok blong kilimded ol smol bebi we oli no save samting long Betlehem.5

Fridom blong save mekem joes i stamba long plan blong hapines. Hem i letem blong i gat lav, i gat sakrifaes, blong yumi gro mo gat eksperiens blong mekem se yumi save progres blong taem we i no save finis. Fridom ia, i letem tu spes i stap, blong evri sobodi mo safaring we yumi gotru long hem long wol ia, iven taem i kamaot long ol samting we yumi no andastanem mo i kamaot long ol nogud joes blong ol nara man. Stret Wo long Heven i bin stat from fridom blong yumi blong save jusum samting mo i stamba blong yumi save andastanem seves blong Sevya long wol ia.

Olsem we Hem i stap long nambaten japta blong Matiu, Sevya i tijim Olgeta Twelef mo i talemaot se misin blong Hem bae i no mekem se i gat pis long wol long laef ia. Hem i bin tijim ol Aposol blong givim pis long ol haos we oli stret mo gud we oli visitim, be Hem i givim woning se bambae oli stap long “medel blong ol wael dog…[Mo evri man] bae oli no laekem yufala from yufala i holem nem blong mi; be man we i stanap strong kasem en, bambae God i sevem hem.”6 Wan impoten toktok we hem i bin mekem long ves 34: “Yu no ting se mi kam blong putum pis long wol.”7 Hem i klia se, pis long ful wol, i no bin stap long wol long taem blong ministri blong Kraes, mo i no gat naoia.

Long fas toktok blong Lod insaed long Doktrin mo Ol Kavenan, Hem i tijim plante impoten prinsipol. Long saed blong olgeta we oli no sakem sin, Spirit blong Hem (Spirit blong Kraes) we i kam long evriwan we i kam long wol,8 bae i no stap oltaem wetem man.9 Mo tu, pis bae i kamaot long wol.10 Ol profet oli talem se, i tru, pis i bin kamaot long wol.11 Lusifa, oli no fasem hem yet mo i stap yusum paoa blong hem blong rul.12

Stret tingting blong ol gud pipol long evri ples, oltaem hem i blong gat pis long wol. Yumi neva mas givap blong kasem gol ia. Be, Presiden Josef F. Smit i tijim: “be neva wol bae i kasem spirit ia blong pis mo lav … kasem taem we evri man oli kasem trutok blong God mo mesej blong God … , mo luksave paoa mo atoriti blong Hem we i tabu.” 13

Yumi hop mo prea strong blong gat pis long wol, be hem i olsem wanwan man mo woman mo famle we yumi save kasem pis ia we i stap long promes blong praes blong stret mo gud fasin. Pis ia, i wan presen we Sevya i promesem tru long misin mo sakrifaes blong Hem we i pemaot sin.

Prinsipol ia, oli kasem gud insaed long Doktrin mo Ol Kavenan we i talem se yumi mas lanem se hem we i mekem ol wok long stret mo gud fasin bae i kasem praes blong hem, we i pis long wol ia, mo laef we i no save finis long wol we bae i kam.14

Presiden Jon Teila i tijim se pis i no wan samting we yumi wantem, be “hem i presen we i kam long God.”15

Pis ia we mi tokbaot, hem i no blong gat kwaet blong sot taem. Hem i wan hapines we i stap mo blong stap glad long saed blong spirit oltaem.16

Presiden Hiba J. Grant i tokbaot Sevya long wei ia: “Pis blong Hem, bae i mekem safaring blong yumi i godaon, i mekem gud ol hat we i brok, i karemaot ol bigfala kros, i putum long jes blong yumi wan lav i go long ol nara man we bae i fulumap sol blong yumi wetem kwaet mo hapines.”17 Long miting blong mi wetem papa mo mama blong Emili Peka, pis blong Sevya i bin mekem safaring blong tufala i godaon, mo i stap help blong mekem gud hat blong tufala. I gud blong luk se stret afta long taem we boe ia i sutum ol pikinini, Brata Peka i talemaot fogivnes blong hem long boe ia we i sut. Olsem Presiden Grant i bin talem, pis blong Sevya i save karemaot ol bigfala kros. Jajmen i blong Lod.

Olgeta Sent long Aevori Kos, long taem blong wo insaed long kantri blong olgeta, oli bin faenem pis taem oli lukluk nomo blong laef folem gospel blong Jisas Kraes wetem strong wok long saed blong famle histri mo tempol wok long bihaf blong ol bubu blong olgeta.18

Yumi evriwan i wantem pis tumas. Pis i no blong gat sefti nomo, o i nomo gat wo, strong faet, raorao mo agens. Pis i kam taem wan i save se Sevya i save huia yumi, i save se yumi gat fet long Hem, yumi lavem Hem, mo obei long ol komanmen blong Hem, nomata mo speseli long medel blong ol tes we i prapa spolem laef mo ol trabol. Ansa blong Lod long Profet Josef Smit long Libeti Kalabus i tekem harem gud i kam long hat blong yumi.

Lod i talem long Josef se bae pis i stap long sol blong hem; ol samting we oli kam agensem hem mo ol hadtaem blong hem, oli blong smol taem nomo;

Mo afta, sapos hem i mekem gud blong stap strong, God bae i leftemap nem blong hem long heven.19

Tingbaot. God i no man we i mekem tingting i fasfas, be Hem i mekem pis.20 Long olgeta we oli sakemaot God, i no gat pis. Yumi evriwan i bin tekpat long ol kaonsel blong heven we i givim fridom blong joes, mo yumi bin save se bae i gat wan plan long wol ia, mo bae i gat ol bigbigfala trabol from se man i no yusum gud fridom ia. Yumi bin andastanem se hemia bae i mekem yumi kros, tingting i fasfas, i no save difendem yumi mo yumi nomo strong. Be tu, yumi bin save se Atonmen blong Sevya bae i winim mo pembak evri nogud samting blong laef long wol ia mo i tekem pis i kam long yumi. Elda Marion D. Hanks i bin gat wan toktok long frem mo i hangem long wol blong hem, we i kam long Yugo Beti: “Blong biliv long God i blong save se evri rul bae oli stret, mo bae i gat ol gudgudfala sapraes.”21

?Wanem nao ol ples blong kasem pis? Plante oli stap lukaotem pis long ol wei blong wol, we i neva wok mo bae i neva wok. Pis i no stap taem yumi kasem bigfala mane, paoa, o posisen.22 Pis i no stap long taem we yumi stap lukaotem gud taem, entetenmen, o pleiplei. I no gat wan samting ia, nating we yumi gat fulap we i fulap, we i save krietem wan hapines o pis we i stap oltaem.

Ol toktok hym blong Ema Lu Ten oli askem ol stret kwestin: “?Wea nao mi faenem pis? ?Wea nao mi faenem help taem nara samting i stop blong mekem mi hapi?”23 Ansa hem i Sevya, we i stamba mo krieta blong pis. Hem nao, Hem i “Prins blong Pis”. 24

?Olsem wanem nao yumi stap kolosap long Sevya? Taem yumi putum tingting i stap daon long fes blong God, stap prea oltaem, stap sakem ol sin, stap go insaed long wota blong baptaes wetem wan hat we i fulap long sore mo wan spirit we i wantem sakem sin, mo kam ol tru disaepol blong Jisas Kraes; olgeta samting ia oli ol bigfala eksampol blong stret mo gud fasin we praes blong hem, hem i pis we i stap.25 Afta we King Benjamin i bin givim bigfala mesej blong hem long saed blong Atonmen blong Kraes, bigfala grup i foldaon long graon. “Spirit blong Lod i bin kam long olgeta, mo oli bin fulap long glad, from oli bin kam klin aot long ol sin blong olgeta, mo oli bin kasem pis long tingting, from bigfala fet we oli bin gat long Jisas Kraes.”26 Fasin blong sakem sin mo laef long stret mo gud fasin i letem pis long tingting i stap, we i stamba blong stap glad.27 Taem man i bin brekem ol bigfala loa, i nid blong konfes blong save gat pis.28 Ating i no gat wan samting we i gud moa bitim pis we i kam long sol blong wan we i fulap long sin we i talemaot ol sin long Lod mo i askem ol blesing blong Atonmen. Olsem we wan nara hym blong Jos i talem: “Bae mi sakem trabol blong mi long leg blong yu mo sing wan singsing i go.”29

Hat blong mi i glad taem mi luksave se long tedei, plante plante yang man, yang woman, mo senia misinari oli akseptem koling ia blong stap olsem ol mesenja blong Lod mo Sevya blong yumi, Jisas Kraes. Oli stap tekem gospel we i kambak we i givim pis i go long wol, wan man mo wan famle afta narawan—wan wok blong stret mo gud fasin blong tekem pis ia i go long ol pikinini blong Papa long Heven.

Jos i wan ples blong haed, wan ples we ol man blong Kraes oli kasem pis. Sam yang pipol long wol oli talem se oli gat spirit be oli no ol man blong relijin. Blong filim se yu gat spirit i wan gud fas step. Be, insaed long Jos nao yumi gat fren; oli tijim yumi mo oli givim gud kaekae tru long gudfala toktok blong God. Moa impoten long hemia, hem i tru long prishud atoriti nao, insaed long Jos we i givim ol tabu odinens mo kavenan we i joenem ol famle tugeta mo i mekem yumi wanwan i kwalifae blong gobak long God Papa mo Jisas Kraes long selestial kingdom. Ol odinens ia, oli tekem pis i kam from se oli ol kavenan we yumi mekem wetem Lod.

Ol tempol, oli ol ples we oli mekem ol tabu odinens mo oli wan ples blong pis blong haed long wol. Olgeta we oli visitim ol graon blong tempol o tekpat long ol tempol open haos, oli filim pis ia tu i stap. Wan eksperiens i stap strong long maen blong mi, i Suva Fiji Tempol open haos mo dedikesen blong hem. I bin gat wan politik problem, we i mekem se ol rebel oli stap bonemdaon ol ples, mo damejem taon blong Suva, tekova long ol haos blong Palamen mo holem ol man blong gavman i stap. Kantri i stap andanit long loa blong ami. Ami i givim smol taem long Jos blong mekem ol pipol oli kam wanples blong open haos mo wan smol grup nomo i gat raet blong stap long dedikesen. Ol memba, oli no save kam from sefti blong olgeta. Hem i wan tempol ia nomo we oli dediketem afta long fas Nauvu Tempol, we i bin stap long hadtaem.

Wan we oli bin invaetem hem long open haos, i wan naes Hindu woman we i kamaot long laen blong ol Indien, mo i wan Memba blong Palamen we, fastaem, oli bin holemtaet hem, be oli lego hem from hem i wan woman.

Insaed long selestial rum, we i fri long ol noes blong wol, hem i krae taem hem i stap talemaot ol filing blong pis we i kavremap hem. Hem i bin filim Tabu Spirit i kamfotem hem mo i testifae long hem se tempol i wan tabu ples.

Sevya i stamba blong tru pis. Nomata wetem ol tes blong laef, from Atonmen blong Sevya mo gladhat blong Hem, stret mo gud fasin blong laef blong yumi bae i gat praes, mo praes ia i blong kasem pis blong yumiwan. Insaed long praevet rum blong Pasova, Sevya i bin promesem ol Aposol blong Hem se bae oli kasem blesing blong gat “Spirit blong Givhan we hem i Tabu Spirit”, mo afta, i talem ol impoten toktok ia: “Naoia we klosap mi mi gowe long yufala, mi mi putum pis blong mi i stap wetem yufala. Mi nomo mi givim pis ya long yufala. Mo pis ya we mi mi givim, i no olsem pis we ol man blong oli save givim.”30 Afta long Prea blong Hem long Bihaf blong Ol Nara Man, Hem i talem: “Mi mi talemaot ol samting ya finis long yufala blong bambae tingting blong yufala i save stap kwaet, from we yufala i stap joen gud long mi. Long wol ya bambae yufala i harem nogud tumas. Be yufala i no fraet. Mi mi winim paoa blong olgeta samting blong wol ya finis.”31

Ilaesa R. Sno i raetemdaon tingting ia long wan naes wei:

Leftemap hat blong yufala blong presem God;
Letem gladhat blong yufala i no stop,
Nomata ol hadtaem oli blo strong long ples,
Kraes i talem: “Bae yufala i gat pis blong mi.”32

Mi testifae long nem blong Jisas Kraes, amen.

Show References

  1.  

    1. Oli bin holem 2 konfrens long Abijan long Sandei 10 Febwari 2013; 9,693 pipol i bin kam—619 long olgeta oli bin olgeta pipol we oli no memba blong Jos yet. Totol namba blong ol membasip blong Jos long Aevori Kos hem i samples 19,000.

  2.  

    2. Luk long Doctrine and Covenants 115:6.

  3.  

    3. Toktok ia, pis, i gat ol defren mining. Long stret lanwis blong Gris, hem i tokbaot fasin blong samting i stop, i nomo gohed, o fasin we i nomo gat raorao bitwin tu grup. Long lanwis blong Hibru, toktok ia i gat wan mining we i moa fulwan, mo samtaem hem i wan wei nomo blong talem halo. Pis, hem i minim tu “fasin blong stap, blong wan man, we i kam nomo long hem folem ol toktok mo ol kondisen we God i putum i stap” (Howard W. Hunter, insaed long Conference Report, Okt. 1966, 14–17).

  4.  

    4. Luk 2:14; oli ademap italik.

  5.  

    5. Luk long Matiu 2:16; luk tu long Ross Douthat, “The Loss of the Innocents,” New York Times, 16 Disemba 2012, 12.

  6.  

    6. Matiu 10:16, 22.

  7.  

    7. Matiu 10:34.

  8.  

    8. Luk long Doctrine and Covenants 84:46.

  9.  

    9. Luk long Doctrine and Covenants 1:33.

  10.  

    10. Luk long Doctrine and Covenants 1:35.

  11.  

    11. Presiden Wudrof i bin talem samting ia long 1894 mo bakegen long 1896. Luk long The Discourses of Wilford Woodruff, ed. G. Homer Durham (1946), 251–52; luk tu long Marion G. Romney, insaed long Conference Report, Epr. 1967, 79–82.

  12.  

    12. Luk long Joseph Fielding Smith, The Predicted Judgments, Brigham Young University Speeches of the Year (21 Maj 1967), 5–6. Be, olsem we Elda Nil A. Makswel i bin talem: “Yumi save gat pis insaed long yumi nomata we pis i lus long wol ia … [mo] ‘evri samting oli stap muvmuv olbaot’ ” (“Behold, the Enemy Is Combined,” Ensign, Mei 1993, 79).

  13.  

    13. Luk long Teachings of Presidents of the Church: Joseph F. Smith (1998), 400.

  14.  

    14. Luk long Doctrine and Covenants 59:23.

  15.  

    15. Luk long Teachings of Presidents of the Church: John Taylor (2001), 151.

  16.  

    16. Stat long ol man Gris blong bifo i kam kasem tedei, ol toktok ia—hapines mo stap glad inaf—oli bin tantanem, lukluk long evri saed blong hem long saed blong mining blong tufala, be tu, long saed blong olsem wanem nao, tufala i stap lidim yumi long laef blong yumi. Luk long David Malouf, The Happy Life: The Search for Contentment in the Modern World (2011). Luk tu long riviu blong buk blong Masta Malouf, insaed long R. Jay Magill Jr., “How to Live Well,” Wall Street Journal, 26–27 Jen., 2013, C6.

  17.  

    17. Teachings of Presidents of the Church: Heber J. Grant (2002), 226.

  18.  

    18. “Tri o faef stek blong Aevori Kos oli stap long ol top 25 insaed long Jos, long saed blong namba blong ol adalt we oli stap sendem nem blong famle i go blong kasem ol tempol odinens, Stek blong Kokodi Kot Divoa, hem nao i karem namba we i moa hae (C. Terry Warner and Susan Warner, “Apostle Visits Ivory Coast, Is ‘Impressed with Exceptional Spirit,’” Church News, 3 Maj, 2013, 4, 14). Long stat blong wan sivil wo mo wetem tempol we i moa kolosap i stap long 12 aoa long bas long Akra, Gana, namba ia i soem se hem i wan gudfala pruf blong fet, mo hemia i mekem se wanwan man mo woman, mo famle oli gat pis.

  19.  

    19. Luk long Doctrine and Covenants 121:7–8. Presiden Harold B. Li i bin tijim: “Mekem se, bae God i mas mekem yumi kam smut moa; Hem i mas testem yumi blong mekem se yumi save pruvum paoa blong tingting mo paoa blong bodi we i stap insaed long bodi blong yumi” (Teachings of Presidents of the Church: Harold B. Lee [2000], 208).

  20.  

    20. Luk long Fas Korin 14:33.

  21.  

    21. Insaed long Marion D. Hanks, “A Loving, Communicating God,” Ensign, Nov. 1992, 63.

  22.  

    22. Luk long Jeffrey R. Holland, For Times of Trouble (2012), 79. Elda Holan i tijim se” tru fasin blong stap pua, ating i stap prapa spolem gud spirit blong man bitim eni nara situesen, be i no bitim sin.” Be stret mo gud fasin blong yusum mane i save mekem pis i kam antap.

  23.  

    23. “Where Can I Turn for Peace?” Hymns, no. 129.

  24.  

    24. Aesea 9:6.

  25.  

    25. Jon Grinlif Waetia i talem long simpol wei: “Mekem folem fasin we yu laef long hem. Long deitaem, yu no mekem olgeta samting we bae i mekem se bae i ronemaot pis blong yu long naet taem” (“Conduct [From the Mahabharata],” insaed long The Complete Poetical Works of John Greenleaf Whittier [1802], 484).

  26.  

    26. Mosaea 4:3; oli ademap italik; luk tu long Marion G. Romney, insaed long Conference Report, Epr. 1967, 79–82.

  27.  

    27. Blong gat tingting, hem i wan kampas blong gud fasin we i stap poenem rod i go long pis. Hem i wok tru long tufala samting ia: Laet blong Kraes, wan raet we yumi gat taem yumi bon we i kam long Papa blong yumi long Heven (luk long Doctrine and Covenants 88:6–13; 93:2), mo presen we i Tabu Spirit (luk long Doctrine and Covenants 39:6).

  28.  

    28. “I nidim tufala kaen fogivnes blong mekem pis i kam long man we i brekem loa—one from the proper authorities of the Lord’s Church, and one from the Lord himself. [See Mosiah 26:29.]” (Teachings of Presidents of the Church: Spencer W. Kimball [2006], 41).

  29.  

    29. “How Gentle God’s Commands,” Hymns, no. 125.

  30.  

    30. Jon 14:26–27.

  31.  

    31. Jon 16:33.

  32.  

    32. “Though Deepening Trials,” Hymns, no. 122.