Kev Kaj Siab Lug: Kev Ncaj Ncees lub Nqi Zog

Tej yam uas tshwm sim tsis ntev tas los tau ua rau kuv xav txog kev kaj siab lug thiab qhov tseem ceeb xav txog Yexus Khetos txoj hauj lwm pab peb txhua tus txais kev kaj siab lug.

Muaj ob yam uas tau tshwm sim ob peb hlis tas los uas tshoov kuv lub siab heev. Yam thib ib, kuv hais lus rau Emilie Parker lub ntees tuag; nws yog ib tug muaj rau xyoo xwb uas tas sim neej nrog 25 tug ntxiv, 19 tug yog me nyuam yaus, thaum ib tug neeg tua phom tua lawv nyob hauv Newtown, Connecticut. Kuv pab nws tsev neeg nyuaj siab thiab pom tias ntau tus tib neeg txoj kev kaj siab lug twb ploj mus lawm. Kuv nrhiav tau kev muaj dag zog thiab kev ntseeg los ntawm nws niam nws txiv, Robert thiab Alissa Parker.

Yam thib ob, kuv ntsib ntau txhiab tus mej zeej ntawm lub Koom Txoos nyob hauv lub nroog Abidjan hauv lub teb chaws Ivory Coast.¹ Lub teb chaws nyob hauv Africa Sab Hnub Poob uas hais lus Fabkis raug kev txom nyem, cov tub rog ntxeev tseem fwv, thiab muaj ob txoj kev ua tsov ua rog thaum xyoo 2011. Txawm li ntawd los kuv muaj kev kaj siab lug thaum kuv nyob nrog lawv.

Ntau zaus muaj tej yam uas ua rau peb tsis muaj kev kaj siab lug thiab ua rau peb xav tias tsis muaj kev ruaj khov.

Leej twg yuav hnov qab tej kev tawm tsam thaum lub Cuaj Hlis Ntuj hnub tim 11, xyoo 2001, nyob hauv lub teb chaws Amelikas no? Tej yam zoo li no ua rau peb nco qab tias qhov uas peb muaj kev kaj siab lug thiab kev nyab xeeb raug puas tsuaj yooj yim.

Wb tus tub hlob thiab nws tus poj niam, uas tsis ntev yuav muaj nkawd thawj tus me nyuam, nyob deb li peb block ntawm World Trade Center nyob hauv New York City thaum thawj lub nyab hoom tsoo lub Tsev Pej Thuam Qaum Teb. Nkawd mus saum nkawd ruv tsev thiab lawv ntshai heev thaum lawv saib qhov xwm txheej ntawd uas nkawd xav tias tsis yog txhob txwm ua. Ces nkawd ho pom nyab hoom thib ob tsoo lub Tsev Pej Thuam Qab Teb. Nkawd paub tseeb tam sim ntawd hais tias qhov no yog txhob txwm ua thiab ntseeg hais tias leej twg tawm tsam qhov chaw Manhattan ntawd. Thaum lub Tsev Pej Thuam Qab Teb vau tag, cov hmoov av los roos nkawd lub tsev tag.

Nkawd tsis paub nkawd pom dab tsi thiab nkawd txhawj yuav muaj kev tawm tsam ntxiv, nkawd thiaj li mus rau ib qho chaw puaj phais ces nkawd mus rau lub tsev ceg txheem ntseeg Manhattan nyob ntawm Lincoln Center. Thaum nkawd tuaj txog, nkawd pom ntau tus mej zeej nyob hauv Manhattan uas tau txiav txim siab mus sib sau ua ke nyob hauv lub tsev ceg txheem ntseeg. Nkawd hu wb dua qhia wb paub tias nkawd nyob qhov twg. Kuv zoo siab uas nkawd tsis raug xwm txheej tiam sis qhov uas nkawd nyob ntawd tsis ua rau kuv xav tsis thoob. Kev tshwm sim hauv lub caij nyoog no qhia tias Xi-oos tej ceg txheem ntseeg yog ib qhov chaw tiv thaiv thiab “ua ib qho chaw nkaum ntawm kob cua daj cua dub, thiab ntawm txoj kev npau taws thaum yuav muab nchuav tawm los tsis tseg hlo rau hauv lub ntiaj teb tag nrho.”²

Tsis pub nkawd rov qab mus tsev tau ib lub lim tiam thiab nkawd nyuaj siab uas muaj neeg coob uas tau tas im neej, tiam sis nkawd tsis tau raug xwm txheej dab tsi.

Thaum kuv xav txog tej xwm txheej no, qhov uas kev kaj siab lug thiab kev thaj yeeb thoob plaws ntiaj teb sib txawv tau tshoov kuv lub siab.³

Thaum tus Cawm Seej yug los, ib tsoom tim tswv saum ntuj ceeb tsheej qhuas Vajtswv thiab hais tias, “Thov kom Vajtswv tus uas nyob saum ntuj tau koob meej, thiab thov kom tib neeg tau zoo nyob kaj siab lug.”⁴

Txawm li ntawd los, tom qab lub caij nyoog tseem ceeb tom qab Vajtswv Leej Tub yug los no, tus vaj ntxwv Helauj tau muab cov me nyuam mos liab tua tuag nyob hauv Npelehees.⁵

Yuav tsum muaj kev ywj siab hauv txoj hau kev zoo siab. Kev ywj siab ua rau peb muaj kev sib hlub, kev txi, kev loj hlob thiab lub peev xwm uas yuav tsum muaj kom vam meej nyob mus ib txhis. Kev ywj siab kuj ua rau peb muaj mob thiab raug txom nyem hauv lub neej no, txawm yog peb raug tej yam uas peb tsis to taub thiab raug tej yam phem uas lwm tus ua rau peb los yog. Muaj txoj Kev Tsov Rog Saum Ntuj Ceeb Tsheej yog los ntawm kev ywj siab xaiv thiab nws tseem ceeb heev kom peb thiaj to taub tus Cawm Seej txoj hauj lwm qhuab qhia hauv lub ntiaj teb.

Raws li hais nyob hauv Mathais tshooj 10, tus Cawm Seej qhia Nws Kaum Ob tug Thwj Tim thiab hais tias Nws txoj hauj lwm yuav tsis ua rau tib neeg muaj kev thaj yeeb nyob hauv lub neej no. Nws hais kom cov Thwj Tim foom koob hmoov rau cov tsev neeg tsim nyog uas lawv mus xyuas tiam sis ceeb toom hais tias lawv yuav nyob nruab nrab pab hma ... thiab txhua tus yuav ntxub nej vim nej yog cov uas ntseeg kuv, tiam sis tus uas ua siab ntev mus txog thaum kawg tus ntawd yuav dim.”⁶ Nws hais tib qho tseem ceeb nyob hauv nqe 34: “Nej tsis txhob xav hais tias, yog kuv coj kev thaj yeeb los rau ntiaj teb.”⁷ Peb paub meej hais tias tsis tau muaj kev thaj yeeb nyob rau hauv lub ntiaj teb thaum tus Khetos ua Nws txoj hauj lwm qhuab qhia, thiab tsis muaj kev thaj yeeb niaj hnub no.

Nyob hauv tus Tswv zaj lus ua ntej phau Lus Qhuab Qhia thiab Kev Khi Lus, Nws qhia ob peb lub ntsiab cai tseem ceeb. Hais txog cov uas tsis hloov siab lees txim, Nws tus Ntsuj Plig (Khetos tus Ntsuj Plig) uas muab rau txhua tus neeg uas los rau hauv lub ntiaj teb no,⁸ “yuav tsis tshoov neeg lub siab tas mus li.”⁹ Thiab “kev thaj yeeb yuav raug muab tshem tawm hauv ntiaj teb no mus.”¹⁰ Cov yaj saub tau hais tias kev thaj yeeb twb raug muab tshem tawm hauv ntiaj teb no mus lawm.¹¹ Tseem tsis tau muab Luxifaws khi thiab nws siv nws lub hwj chim hauv lub ntiaj teb no.¹²

Txhua tus neeg zoo nyob qhov txhia chaw yeej xav tau kev thaj yeeb nyab xeeb nyob hauv lub ntiaj teb. Peb yeej yuav tsum tsis txhob tso lub hom phiaj no tseg. Tiam sis, Thawj Tswj Hwm Joseph F. Smith qhia hais tias, “yeej yuav tsis muaj kev sib hlub thiab kev thaj yeeb nyob rau hauv lub ntiaj teb ... ua ntej tib neeg txaus siab txais Vajtswv qhov tseeb thiab Vajtswv zaj lus ..., thiab lees yuav nws lub hwj chim thiab txoj cai.”¹³

Peb cia siab thiab thov kom muaj kev thaj yeeb, tiam sis peb thiab peb tsev neeg txais tau txoj kev kaj siab lug uas yog lub nqi zog ntawm kev ua ncaj ncees. Kev kaj siab lug no yog ib lub txiaj ntsim ntawm tus Cawm Seej txoj hauj lwm thiab txoj kev theej txhoj.

Phau Lus Qhuab Qhia thiab Kev Khi Lus qhia txog txoj ntsiab cai no hais tias: “Tiam sis kawm hais tias tus uas ua tej hauj lwm ncaj ncees yuav txais nws lub nqi zog, uas yog kev kaj siab lug hauv lub ntiaj teb no thiab txoj sia nyob mus ib txhis hauv lub neej tom ntej.”¹⁴

Thawj Tswj Hwm John Taylor qhia hais tias tsis yog yus xav tau kev kaj siab lug xwb, tiam sis “kev kaj siab lug yog Vajtswv lub txiaj ntsim.”¹⁵

Kev kaj siab lug uas kuv hais txog tsis yog ib qho kev nplij siab uas nyob ib me pliag xwb. Nws yog ib txoj kev zoo siab heev thiab ib txoj kev txaus siab ntawm sab ntsuj plig.¹⁶

Thawj Tswj Hwm Heber J. Grant piav txog tus Cawm Seej txoj kev kaj siab lug li no hais tias: “Nws txoj kev kaj sib lug yuav nplij peb lub siab thaum peb raug txom nyem, kho peb tej lub siab puas tas, ua rau peb txoj kev ntxub ntxaug ploj mus, ”¹⁷ Raws li kuv kawm thaum kuv sib tham nrog Emilie Parker niam thiab txiv, tus Cawm Seej txoj kev kaj siab lug tau nplij lawv txoj kev nyuaj siab thiab pab kho lawv lub siab puas tas. Tom qab tus neeg tua phom tua nws tus ntxhais, Brother Parker hais tias nws zam txim rau tus uas tau ua li ntawd. Raws li Thawj Tswj Hwm Grant hais tias, tus Cawm Seej txoj kev kaj siab lug yuav “ua rau peb txoj kev ntxub ploj mus.” Kev Txiav Txim Yog tus Tswv Li

Haiv Neeg Ntseeg ntawm Ivory Coast, thaum lub sij hawm uas lawv lub teb chaws muaj kev tsov rog, lawv nrhiav kev kaj siab lug thaum lawv tsom ntsoov rau kev ua neej raws li Yexus Khetos txoj moo zoo thiab tsom ntsoov rau kev nrhiav tsev neeg zaj keeb kwm thiab ua hauj lwm hauv lub tuam tsev pab lawv cov poj koob yawm txwv.¹⁸

Peb sawv daws xav muaj kev kaj siab lug. Kev thaj yeeb yog kev nyab xeeb thaum tsis muaj kev ua tsov ua rog, kev tsim txom, kev tsis sib haum, thiab kev sib cav sib ceg. Txoj kev kaj siab lug los ntawm qhov uas tus Cawm Seej paub peb, paub tias peb ntseeg Nws, hlub Nws, thiab ua raws li Nws cov lus txib, txawm yog peb raug kev sim siab thiab kev txom nyem nyob hauv peb lub neej los yog. Tus Cawm Seej cov lus rau tus Yaj Saub Yauxej Xamiv nyob hauv lub Nkuaj Liberty nplij peb lub siab:

“Kuv tus tub, kev kaj siab los rau koj; koj tej kev nyuaj siab thiab koj tej kev txom nyem yuav muaj nyob ib nyuag ntus xwb;

“Thiab tom qab ntawd, yog koj ua tib zoo nyiaj, Vajtswv yuav tsa koj mus nto ntuj.”¹⁹

Nco ntsoov tias, “Vajtswv tsis yog tus uas tsim kev ntxhov siab tiam sis nws yog tus uas tsim kev kaj siab lug.”²⁰ Cov uas xyeej Vajtswv tsis muaj kev kaj siab lug. Peb sawv daws koom tes hauv tej pawg sab laj saum ntuj ceeb tsheej, uas qhia tias peb yuav muaj kev ywj siab xaiv, ua rau peb paub tias yuav muaj kev mob kev nkeeg thiab kev txom nyem vim tej tug neeg yuav xaiv tej yam tsis zoo. Peb to taub hais tias tej no yuav ua rau peb npau taws, xav tsis thoob, tsis muaj kev pov hwm. Tiam sis peb kuj paub tias tus Cawm Seej txoj Kev Theej Txhoj yuav kov yeej txhua yam thiab pab peb muab tag nrho tej yam tsis ncaj hauv lub neej no pauv kom muaj kev kaj siab lug. Txwj Laug Marion D. Hanks muaj ib zaj lus uas nws dai rau ntawm nws phab ntsa los ntawm Ugo Betti: Kev ntseeg Vajtswv yog kev paub tias txhua txoj kev cai yeej ncaj, thiab yuav muaj tej yam ua rau yus xav tsis thoob.”²¹

Tej lub hauv paus ntawm kev kaj siab lug yog dab tsi. Ntau tus neeg nrhiav kev kaj siab lug los ntawm tej kev ua zoo li neeg ntiaj teb, tej ntawd yeej yuav pab tsi tau lawv. Kev kaj siab lug yeej tsis los ntawm kev nplua nuj, lub hwj chim, los yog kev muaj npe nrov.²² Kev kaj siab lug yeej tsis los ntawm kev lom zem los yog kev ua si. Txhua yam no yuav tsis ua rau peb muaj kev zoo siab los yog kev kaj siab lug, txawm peb muaj tej ntawd ntau nplua mias.

Emma Lou Thayne zaj nkauj qhuas Vajtswv hais tias: “Kev kaj siab nyob qhov twg? Chaw nplij siab nyob qhov twg thaum tag nrho lwm txoj hau kev kho tsis tau kuv?²³ Lo lus teb yog tus Cawm Seej, uas yog lub hauv paus thiab tus uas tsim kev kaj siab lug. Nws yog “tus Tub Vaj Ntxwv ntawm Kev Thaj Yeeb.”²⁴

Peb yuav ua li cas kom nyob ze tus Cawm Seej tas mus li? Qhov uas peb txo peb lub hwj chim rau Vajtswv saib, thov Vajtswv tas mus li, hloov siab lees txim txog peb tej kev txhaum, ua kev cai raus dej nrog ib lub siab puas tas thiab lub siab xav ua zoo, thiab kev ua Yexus Khetos cov thwj tim tiag tiag yog tej yam ntxwv ncaj ncees uas ua rau peb txais kev kaj siab lug ua peb lub nqi zog.²⁵ Tom qab tus Vaj Ntxwv Npeyamis hais nws zaj lus txog Khetos txoj Kev Theej Txhoj, cov neeg coob ntawd tau vau rau hauv av. “Tus Tswv tus Ntsuj Plig tau los rau lawv, thiab lawv txawm muaj kev xyiv fab puv npo, tau txais kev zam txim rau lawv tej kev txhaum, thiab tau muaj kev kaj siab lug hauv nruab siab, vim yog txoj kev ntseeg heev txog Yexus Khetos.”²⁶ Kev hloov siab lees txim thiab kev ua neej ncaj ncees tau ua rau lawv muaj kev kaj siab lug; yuav tsum muaj qhov ntawd kom txais kev txaus siab.²⁷ Thaum twg ib tug neeg ua txhaum loj heev, nws yuav tsum lees txhaum kom muaj kev kaj siab lug.²⁸ Tej zaum tsis muaj dab tsi uas piv rau kev kaj siab lug los ntawm ib tug neeg uas ua txhaum muab nws lub nra rau tus Tswv ris thiab txais cov koob hmoov ntawm txoj Kev Theej Txhoj. Raws li ib zaj nkauj qhuas Vajtswv hais tias, “Kuv yuav muab kuv lub nra tso rau nws thiab txais ib zaj nkauj.”²⁹

Kuv zoo siab thaum kuv paub hais tias niaj hnub no muaj ntau tus tub hluas, ntxhais hluas, thiab cov neeg laus uas tau mus ua tub txib ntawm peb tus Tswv thiab Cawm Seej, Yexus Khetos. Lawv coj txoj moo zoo ntawm kev kaj siab lug mus rau lub ntiaj teb---yog ib txoj hauj lwm ncaj ncees kom coj kev kaj siab lug rau Leej Txiv Saum Ntuj Ceeb Tsheej cov me nyuam.

Lub Koom Txoos yog ib qhov chaw tiv thaiv kom cov neeg uas nrog Khetos mus muaj kev kaj siab lug. Tej tug tub hluas ntxhais hluas hauv lub ntiaj teb hais tias lawv ntseeg tias muaj sab ntsuj plig tiam sis lawv tsis teev tiam Vajtswv. Qhov uas lawv ntseeg tias muaj sab ntsuj plig yog ib qho zoo. Txawm li ntawd los, nyob hauv lub Koom Txoos peb ib leeg qhia, pab thiab txhawb nqa ib leeg los ntawm Vajtswv txoj lus zoo. Qhov tseem ceeb tshaj vim lub Koom Txoos muaj txoj cai pov thawj hwj peb thiaj txais tau cov kab ke dawb ceev thiab kev khi lus uas khi tej tsev neeg ua ke thiab ua rau peb tsim nyog rov qab mus nrog Vajtswv Leej Txiv thiab Yexus Khetos nyob hauv lub nceeg vaj xilethi-aus. Cov kab ke no ua rau peb muaj kev kaj siab lug vim tej ntawd yog tej kev khi lus nrog tus Tswv.

Nyob hauv cov tuam tsev no peb ua cov kab ke dawb ceev ua rau peb thiaj muaj kev kaj siab lug tiv thaiv peb ntawm lub ntiaj teb. Cov uas mus xyuas tej tshav tuam tsev los yog los xyuas tej lub tuam tsev thaum tseem qhib rau sawv daws kuj muaj kev kaj siab lug no. Kuv nco ntsoov ib zaj txog kev muab lub Tuam Tsev Suva Fiji qhib thiab fij tseg. Lub tseem fwv muaj teeb meem, cov neeg ntxeev teb chaws muab lub nroog Suva muab hlawv kub hnyiab thiab nyiag khoom, ces nkag mus hauv tej tsev Paliament thiab muab cov neeg tsim cai lij choj txhom. Cov tub rog kav lub teb chaws lawm. Cov tub rog tso cai rau peb lub Koom Txoos muab neeg sib sau ua ke rau kev qhib tsev thiab ib pawg me me rau kev muab lub tuam tsev fij tseg. Caw tsis tau cov mej zeej tuaj vim ntshai hais tias lawv yuav raug xwm txheej. Nov yog tib lub sij hawm uas tau muab ib lub tuam tsev fij tseg thaum muaj kev kub ntxhov li no tom qab tau muab lub Tuam Tsev Nauvoo fij tseg.

Ib tug neeg uas lawv caw tuaj rau lub tuam tsev kev qhib tsev yog ib tug poj niam Hindu uas yog Neeg Indian, ib tug kws tsim cai lij choj uas cov neeg ntxeev teb chaws tau txhom tiam sis lawv tso nws mus vim nws yog ib tug poj niam.

Nyob hauv chav xilethi-aus, vim nws dim tej kev kub ntxhov ntawm lub ntiaj teb, nws los kua muag thaum nws hais tias muaj kev kaj siab lug kawg siab kawg ntsws. Nws hnov tus Vaj Ntsuj Plig Dawb Huv nplij nws lub siab thiab ua tim khawv txog qhov uas lub tuam tsev dawb ceev.

Tus Cawm Seej yog lub hauv paus ntawm txoj kev kaj siab lug uas tseeb. Txawm muaj kev sim siab hauv lub neej los, vim muaj tus Cawm Seej txoj Kev Theej Txhoj thiab Nws txoj kev tshav ntuj, lub nqi zog ntawm kev ua neej ncaj ncees yog kev kaj siab lug. Nyob hauv qhov chaw uas tus Cawm Seej sawv rov los, Nws cog lus rau Nws cov thwj tim hais tias lawv yuav txais “tus Nplij Siab, uas yog tus Vaj Ntsuj Plig Dawb Huv” ces Nws hais tej lus tseem ceeb no hais tias: “Kuv muab kuv txoj kev kaj siab tso rau nej; txoj kev kaj siab uas kuv muab pub rau nej, kuv tsis muab rau nej li neeg ntiaj teb muab”³⁰ Ces ua ntej Nws txoj Kev Thov Vajtswv Pab Tib Neeg: “Kuv qhia tej no rau nej kom nej cov uas nrog kuv yuav muaj kev kaj siab lug. Neeg ntiaj teb yuav tsim txom nej: tiam sis cia li zoo siab, rau qhov kuv twb kov yeej lub ntiaj teb no lawm.”³¹

Eliza R. Snow tau sau txog lub ntsiab cai no:

Kuv hais lus tim khawv li no los ntawm Yexus Khetos lub npe, amees.