Sawv Ruaj Nrees hauv tej Qhov Chaw Dawb Huv

Cov kwv tij, zoo siab nrog nej cov uas tuav Vajtswv lub pov thawj hwj nyob. Peb nyob hauv lub caij nyoog kawg, hauv “lub caij nyoog uas muaj kev kub ntxhov.”¹ Vim peb tuav lub pov thawj hwj, peb muaj kev lav ris sawv ruaj khov nrog kev ntseeg thaiv tus yeeb ncuab xib xub hluav taws. Peb yog cov yam ntxwv rau neeg ntiaj teb, uas pov hwm tej txoj cai thiab kev ywj siab uas Vajtswv pub rau peb. Peb sawv tiv thaiv peb tej tsev thiab tsev neeg.

Thaum kuv kawm qib cuaj, yog thawj thawj zaug uas kuv tau tawm kuv lub zos mus ntaus pob. Thaum kuv caij npav rov qab los kuv txiv paub hais tias kuv tau hnov thiab pom tej yam uas tsis tsim nyog raws li txoj moo zoo tej kev cai. Vim nws yog ib tug uas txawj kos duab, nws zaum thiab kos ib daim duab ntawm ib tug tub rog txheej thaum ub—ib tug tub rog uas muaj peev xwm tiv thaiv tsev vaj ntxwv thiab tej nceeg vaj.

Thaum nws kos duab thiab nyeem los ntawm cov vaj lug kub, kuv kawm ua ib tug rau siab ntseeg tuav lub pov thawj hwj---kom tiv thaiv thiab pov hwm Vajtswv lub nceeg vaj. Tus Thwj Tim Povlauj cov lus pab kuv:

“Yog li ntawd, cia li muab Vajtswv tej cuab yeej los hnav tag nrho kom nej kov yeej thaum txog lub caij uas nej raug phem, thiab thaum nej tau ua txhua yam tiav, nej tseem nyob ruaj nrees.

“Yog li ntawd cia li sawv. Cia li muab txoj lus tseeb los ua siv sia, muab kev ncaj ncees los ua daim hlau thaiv hauv siab;

“Thiab cia li muaj lub siab kub lug mus qhia txoj moo zoo uas hais txog txoj kev kaj siab los ua khau rau.

“Nej yuav tsum niaj hnub tuav txoj kev ntseeg thaiv nej ib yam li nej tuav daim hlau thaiv hniav ntaj. Yog nej ua li ntawd, nej yuav tua tau dab Ntxwg Nyoog xib xub hluav taws uas nws tua tuaj.

“Cia li muab txoj kev dim txim coj los ua kaus mom hlau ntoo thiab tus Ntsuj Plig coj los ua rab ntaj, uas yog Vajtswv txoj lus.”²

Cov kwv tij, yog tias peb rau siab ntseeg siv lub pov thawj hwj, Vajtswv yuav pub tej cuab yeej ua rog no los ua txiaj ntsim rau peb. Peb yuav tsum muaj tej cuab yeej no!

Cov tub hluas, nej txiv thiab nej yawg thiab yawm txiv yeej tsis tau raug ntxias li nej raug niaj hnub nim no. Nej nyob hauv lub caij nyoog kawg. Yog nej txiv xav raug teeb meem, lawv yuav tsum mus nrhiav. Nim no tsis yog li ntawd! Niaj hnub no kev ntxias nrhiav tau nej! Thov nej nco ntsoov qhov ntawd! Dab Ntxwg Nyoog xav tau nej, thiab “kev txhaum nyob ntawm qhov rooj.”³ Nej yuav ua li cas tiv thaiv kom txhob raug nws tej kev phem? Cia li muab Vajtswv tej cuab yeej tag nrho los coj thiab hnav.

Cia kuv qhia nej los ntawm ib lub sij hawm ntxiv hauv kuv lub neej:

Thaum xyoo 1982, kuv hais lus hauv kev sib ntsib hawm Vajtswv nyob ntawm BYU hauv Provo, Utah. Kuv caw cov tub ntxhais kawm ntawv xav txog qhov uas lub Koom Txoos nyob ntawm lub sam thiaj ib sab, thiab lub ntiaj teb nyob sab tod deb li ob peb feet xwb. Qhov no piv txog “qhov uas tej yam uas neeg ntiaj teb ua thiab lub Koom Txoos tej kev cai nyob tsis deb heev” thaum kuv kawm ntawv qib siab. 30 xyoos tom qab ntawd thaum kuv hais lus rau cov tub ntxhais kawm ntawv, kuv tsa tes zoo ib yam li yav tas los thiab kuv piav hais tias, “Neeg ntiaj teb twb txav mus deb lawm; [ua rau yus pom tsis tau;] zoo nkaus li nws twb tawm lub tsev no mus puag tim ub deb deb heev [thoob plaws lub ntiaj teb]. ... Qhov uas peb thiab peb cov me nyuam thiab cov xeeb leej xeeb ntxwv yuav tsum nco ntsoov yog qhov uas lub Koom Txoos yuav nyob ruaj khov kho, [nws tseem nyob no; tiam sis] neeg ntiaj teb yuav txav mus tas mus li—qhov chaw nyob nruab nrab yeej dav zuj zus tuaj. ... Yog li ntawd, yuav tsum xyuam xim heev. Yog tias nej txiav txim rau tej yam nej ua thiab txog lub Koom Txoos tej kev cai raws li tej yam uas neeg ntiaj teb ua, ces nej yuav kawm tias nej tsis ua raws li qhov yog.”⁴

Thaum lub sij hawm ntawd, kuv yeej tsis tau xav tias neeg ntiaj teb yuav khiav deb thiab sai npaum li cas ntawm Vajtswv mus; yeej tsis muaj peev xwm to taub li ntawd thaum muaj tej lus qhuab qhia, tej ntsiab cai, thiab lus txib. Tiam sis Khetos tej kev cai thiab Nws lub Koom Txoos tsis tau txav mus li. Thiab Nws hais tias, “Qhov tseeb yuav nyob mus ib txhis.”⁵ Thaum peb to taub thiab lees yuav qhov no, peb npaj siab tiv thaiv peb tus kheej tsis ua raws li neeg ntiaj teb thiab tej tug neeg uas hais tias lawv yog peb cov phooj ywg tej kev ntxias, kev thuam, thiab kev saib tsis tau peb.

Peb feem coob paub ib tug neeg uas hais tias, “Yog koj xav ua kuv tus phooj ywg, koj yuav tsum ua raws li kuv txoj kev cai.” Ib tug phooj ywg zoo yuav tsis hais kom peb xaiv nws txoj kev ua phooj ywg thiab muab txoj moo zoo tso tseg. Raws li Povlauj hais tias, “Txhob nrog cov neeg zoo li ntawd.”⁶ Ib tug phooj ywg zoo txhawb nqa peb kom peb taug txoj kev ti thiab nqaim.

Yog peb ua raws li txoj moo zoo tej kev khi lus, cov lus txib, thiab cov kab ke ces tej ntawd pov hwm peb thiab npaj peb ua Vajtswv tej hauj lwm nyob hauv lub ntiaj teb no. Thaum peb ua raws li Lo Lus Txawj Ntse, qhov ntawd tiv thaiv peb kom tsis raug kev muaj yees xws li cawv, tshuaj phem, thiab luam yeeb. Thaum peb them ib feem kaum, kawm vaj lug kub, thiab ua kev cai raus dej thiab txais kev pom zoo, ua neej kom muaj tus Vaj Ntsuj Plig Dawb Huv nrog nraim peb nyob, ua neeg tsim nyog txais lub cim nco txog, ua raws li txoj kev cai coj dawb huv, npaj txais lub Pov Thawj Hwj Mekixedes, thiab ua tej kev khi lus hauv lub tuam tsev, ces peb thiaj npaj siab ua hauj lwm.

Nyob hauv lub tuam tsev peb npaj siab thiab cog lus tias peb yuav ua raws li txoj kev cai fij siab. Cov tub hluas pib ua raws li txoj kev cai no thaum lawv xav mus ua tub txib---lawv them nqi ob xyoos ntawm lawv lub neej ua hauj lwm rau tus Tswv. Qhov kev txi no txhawb lawv lub dag zog mus tom ntej ua raws li kev khi lus siab tshaj hauv lub neej—sib yuav thiab ua kev sib khi hauv lub tuam tsev pib muaj ib tsev neeg nyob mus ib txhis.

Thaum peb thawb mus lawm tom hauv ntej taug txoj kev ti thiab nqaim, peb muaj zog ntawm sab ntsuj plig zuj zus tuaj—muaj zog ua raws li peb txoj kev ywj siab xaiv. Rau cov tub hluas thiab cov ntxhais hluas, nej yuav loj hlob li no thaum nej kawm cov lus qhuab qhia thiab hais lus tim khawv dhau los ntawm cov ntaub ntawv kawm nyob online hu ua Come, Nrog Kuv Mus.

Tsis tas li ntawd xwb, cia li siv nej txoj kev ywj siab xaiv pab nej tus kheej. Thaum nej kawm txog nej tej txiaj ntsim thiab tej txuj ci, cia li nco ntsoov tias cov niam txiv thiab cov xib hwb pab tau nej, tiam sis nej yuav tsum cia tus Ntsuj Plig coj nej kev. Xaiv thiab ua nej tus kheej. Cia li mob siab ntawm nej tus kheej. Npaj rau nej lub neej, thiab kawm ntawv los yog kawm ua hauj lwm. Sim seb nej nyiam ua dab tsi. Ua hauj lwm thiaj pab tau nej tus kheej. Cuab hom phiaj, kov yeej kev ua yuam kev, kawm ua tej yam, thiab ua kom tiav txhua yam uas nej ua.

Thaum nej ua li ntawd, cia li koom tes nrog nej tsev neeg, nej pawg, hoob kawm thiab nrog cov tub hluas ntxhais hluas. Cia li muaj kev lom zem ua ke. Los ntawm tej yam no nej ib leeg yuav saib tau ib leeg thiab pom tias Vajtswv cov tub thiab ntxhais nyias muaj nyias tej txiaj ntsim ntawm sab ntsuj plig.

Qhov tseem ceeb, cia li ntseeg tus Cawm Seej! Txhob ntshai! Thaum peb rau siab ua raws li txoj moo zoo, tus Tswv ua rau peb muaj zog. Nrog Nws lub dag zog peb txawj ntiab tus neeg uas tawm tsam Khetos tawm uas hais tias, “Yeej meem noj, yeej meem haus, thiab cia li zoo siab,” vim Vajtswv “yuav tsis xav li cas rau tej kev txhaum me uas peb ua; ... tej no ua yeej tsis ua cas li ..., vim tag kis peb yuav tuag.”⁷ Thaum peb muaj tus Tswv lub zog peb yeej sawv tau tiv thaiv peb tus kheej kom txhob raug neeg ntiaj teb tej kev ntseeg uas hais tias tsis muaj tus Cawm Seej thiab tawm tsam Vajtswv txoj kev zoo siab nyob mus ib txhis rau tag nrho Vajtswv cov me nyuam.

Peb tsis muaj cai hloov tej yam hauv txoj hau kev nyob mus ib txhis ntawd. Cia li nco ntsoov txog Nehemis uas Vajtswv txib ua ib sab phab ntsa tiv thaiv Yeluxalees. Ib txhia xav kom nws rov los thiab txhob ua ntxiv, tiam sis Nehemis tsis kam. Tsis yog nws saib tsis tau lwm tus; nws cia li piav hais tias, “Kuv tab tom ua hauj lwm tseem ceeb kawg, kuv thiaj tuaj tsis tau. Ua cas peb yuav tso hauj lwm tseg ... ?”⁸

Tej lub sij hawm peb yuav tsum ua zoo li tus pas txais hluav taws xob, thiab peb yuav tsum “raug kev kub ntxhov” vim peb ua raws nraim li Vajtswv txoj kev cai thiab ua Nws txoj hauj lwm. Kuv ua tim khawv tias peb tsis tas ntshai yog tias peb ua raws li Nws cov lus qhuab qhia. Tej zaum lwm tus yuav tsis to taub peb, thuam peb, los yog liam peb, tiam sis peb tsis nyob peb xwb. Peb tus Cawm Seej kuj raug “neeg saib tsis taus nws thiab muab nws tso tseg.”⁹ Peb txoj hauj lwm dawb ceev yog kom sawv nrog Nws!

Tiam sis, tej lub sij hawm kev sawv ruaj nrees txhais hais tias peb yuav tsum tsis txhob koom nrog neeg ntiaj teb. Tus Cawm Seej hais tias, “Dab Ntxwg Nyoog, koj cia li khiav ntawm kuv mus.”¹⁰ $Yauxej los ntawm Iyiv Teb khiav ntawm Pautifas tus poj niam tej kev ntxias,¹¹ thiab Lihais tawm ntawm Yeluxalees mus coj nws tsev neeg mus hauv roob moj sab qhua.¹²

Cia li paub zoo tias txhua tus yaj saub thaum ub tau sawv ruaj nrees hauv lawv tej lub caij nyoog:

Nifais tau ua tus Tswv txoj hauj lwm txawm yog Dab Ntxwg Nyoog thiab nws ob tug tij laug Lamas thiab Lemu-ees tsim txom nws.¹³

Anpinadais ua tim khawv txog Khetos txawm nws raug kev liam, kev thuam thiab raug tua tuag.¹⁴

2,000 tug tub rog hluas tiv thaiv lawv tsev neeg kom txhob raug cov neeg uas ntxub tej kev cai ntawm txoj moo zoo.¹⁵

Maulaunais tsa tus chij ntawm kev ywj pheej kom tiv thaiv nws cov neeg tej tsev neeg thiab txoj kev ywj siab ntseeg Vajtswv.¹⁶

Xamuyees sawv saum ib sab phab ntsa thiab hais txog qhov uas Khetos yuav los thaum neeg txawb pob zeb thiab tua xub rau nws.¹⁷

Tus Yaj Saub Yauxej Xamiv muab tus Cawm Seej txoj moo zoo txum tim rov qab los, muab nws cov ntshav ua lub cim rau nws zaj lus tim khawv.¹⁸

Thiab cov Neeg Maumoos cov pioneer sawv ruaj nrees txawm lawv raug kev tsim txom thiab kev txom nyem, lawv ib tug yaj saub qab thaum lawv mus rau sab hnub poob.

Cov tub qhe thiab Vajtswv Haiv Neeg Ntseeg no muaj peev xwm sawv ruaj nrees vim lawv sawv nrog tus Cawm Seej. Cia li xav txog tus Cawm Seej sawv ruaj nrees li cas:

Thaum nws yog ib tug tub hluas, Yexus rau siab ua Nws Leej Txiv tej hauj lwm, tshaj tawm txoj moo zoo rau cov neeg txawj ntse nyob hauv lub tuam tsev.¹⁹ Thaum Nws ua hauj lwm qhuab qhia, Nws tau ua tej hauj lwm pov thawj hwj---qhia, kho neeg mob, ua hauj lwm pab, thiab foom koob hmoov thiab txhawb nqa lwm tus. Thaum lub sij hawm tsim nyog, Nws sawv ruaj nrees tawm tsam kev phem, nws twb ntiab neeg phem tawm ntawm lub tuam tsev.²⁰ Thiab Nws yeej sawv ua ncaj ncees—txawm nws hais lus los yog tsis hais lus los yog. Thaum cov pov thawj liam nws ntawm Kaiyafas, Yexus muaj tswv yim thiab ua siab loj tsis kam teb thiab nyob ntsiag to.²¹

Nyob hauv lub Vaj Khexemanes, peb tus Cawm Seej thiab tus Txhiv Dim tsis tau tso nws txoj hauj lwm Theej Txhoj tseg.²² Thiab nyob saum ntoo khaub lig Nws raug txom nyem kom ua raws li Nws Leej Txiv lub siab nyiam, mus txog thaum Nws hais tias, “Tiav lawm.”²³ Nws tau nyiaj kom mus txog thaum kawg. Vim tus Cawm Seej mloos lus thiab sawv ruaj nrees, peb Leej Txiv Saum Ntuj Ceeb Tsheej tshaj hais tias, “Saib seb, kuv Leej Tub uas kuv Hlub, tus uas ua rau kuv zoo siab, tus uas ua rau kuv lub npe tau yeeb koob.”²⁴

Kuv cov kwv tij ntawm lub pov thawj hwj uas hluas thiab laus huv tib si, cia peb ua rau Vajtswv lub npe muaj yeeb koob los ntawm qhov uas nej sawv ruaj nrees nrog peb tus Cawm Seej, Yexus Khetos. Kuv ua tim khawv hais tias Nws muaj txoj sia nyob thiab Nws hu peb “nrog ib txoj kev dawb huv”²⁵ ua Nws txoj hauj lwm. “Yog li ntawd, sawv hauv tej qhov chaw dawb huv, thiab txhob txav mus li.”²⁶ Peb mloog lus thiab sawv ruaj nrees ntseeg peb tus Vajtswv cov lus qhuab qhia, peb sawv hauv tej qhov chaw dawb huv, vim Nws cov lus qhuab qhia dawb ceev thiab yuav tsis hloov txawm tej tseem fwv thiab sawm fem hloov npaum li cas los yog. Kuv tshaj tawm hais tias, raws li tus Thwj Tim Povlauj, “Nej yuav tsum ceev faj, sawv ruaj nrees ntawm kev ntseeg, ua lub siab tuab li txiv neej thiab cuab zog khov kho.”²⁷ Kuv thov Vajtswv pab nej li no, los ntawm Yexus Khetos lub npe dawb huv, amees.