Jutak Pen ilo Jikin ko Rekwojarjar

Em̧m̧aan ro jeiū im jatū, ej juon utiej n̄an pād ippāmi rikabwijer ro an priesthood eo eutiej an Anij. Jej mour ilo raan ko āliktata, ilo “iien ko re nana.” ¹ Ilo jerbal eo ad āinwōt rikabwijer ro an priesthood eo, ewōr juon jerbal n̄an jutak pen kake kōn kein tōrak kune m̧ade kijeek eo an rikapo. Jej riwaanjon̄ak n̄an laļ in, im jej dāpij jim̧we ko im anemkwoj ko me rej itok n̄an kōj jen Anij eo me ejjab maron̄ bōk e. Jej bōbrae kapijuknen ko im baam̧le ko ad.

Ke Iaar pād ilo kūlaj ratumjuon, Iaar ro̧o̧l jān ikkure in iakiu eo kein kajuon aō me kumi in ikkure an high school eo aō im n̄a kar ikkure ilo bar juon bukōn. Jema eaar jeļā bwe kōn to̧o̧ļļo̧kin ro̧o̧l n̄an kapijuknen ilo baaj eo em̧ōj aō ioon kajin im m̧wil me raar jab jokkon wōt juon ilo jon̄ak ko̧jpeļ in. Kōnke eaar juon rikkure eo em̧ōkade, eaar jijet tok ippa im jotok juon pijain knight—juon ritariņae eo ej jurake jikin kweilo̧k ko im aelōn̄ ko.

Ke eaar jin̄aik pija eo im riit jān jeje ko rekwojarjar, Iaar katak ekōjkan erom juon rikabwijer an priesthood eo etiljek—n̄an kōjparok im jurake aelōn̄ in kiin̄ eo an Anij. Naan ko an Rijilōk Paul raar tōl eō:

“Kōn men in kwom̧win bōk n̄an kom̧ aolepen kein tariņae an Anij, bwe kom̧win maron̄ in jum̧ae ilo raan eo e enana, im m̧ōjen kōm̧m̧an otemjej,stand.

Innām kom̧win “Stand, ke em̧ōj kan̄ūrn̄ūr ipimi kōn m̧ool, im em̧ōj kōņak wānōk āinwōt kein pejān ob;

“Im em̧ōj kōņak juj in kapojak in gospel in aenōm̧m̧an;

“Ioon otemjej em̧ōj kōtake kein tōrak in tōmak, ilo e kom̧ naaj maron̄ kune m̧ade kijeek otemjej an ri nana eo.

“Im kom̧win bōk helmet in lo̧mo̧o̧r, im jāje an Jetōb, eo naan in Anij.”²

Em̧m̧aan ro jeiū im jatū, eļan̄n̄e jej tiljek ilo priesthood eo, kein tariņae in naaj letok āinwōt juon menin letok jān Anij. Jej aikuji kein tariņae in!

Likao ro, ro jemāmi im jim̧m̧ami rejjan̄in kar ioon kapo ko me kom̧wij iooni raan otemjej. Kom̧wij mour ilo raan ko āliktata. Eļan̄n̄e jemam̧ eaar kōņaan jorrāān, ej aikuj kōjerbal kijejeto eļap n̄an kōm̧m̧ane. Ejako an āindein! Kiiō kapo ej pukōt kom̧! Jouj kememej menin! Satan ej ikdelel n̄an bōk kom̧, im jerawiwi ej pād im̧aan ami kōjem.³ Ekōjkan ami jum̧ae kapo ko an rekajoor? Kōņak aolepān kein kattōrak ko an Anij.

In katakin kom̧ jān bar juon en̄jake ilo mour eo aō:

Ilo Jānwode 1982, Iaar kōnono ilo juon jar in jota ilo campus eo an BYU ilo Provo, Utah. Iaar kūr rijikuul ro n̄an kōtmene bwe Kabun̄ in ar pād iturejet in lo̧katok eo, im bwe laļ in eaar juon ak ruo nee ettoļo̧k iturejet eo juon. Menin eaar jutak kōn “kōtaan eo ekadu” ijo jon̄ak ko an laļ in repād ie im ijo jon̄ak ko an Kabun̄ in repād ie” ke Iaar pād ilo college. Ke Iaar jutak im̧aan rijikuul 30 iiō ko rem̧ootļo̧k, Iaar ba, “jon̄ak ko an laļ in raar lukkuun ettoļo̧k jān ijo jon̄ak ko an Kabun̄ in rej pād ie; [ej jon̄ak ko an laļ in relukkuun in ettoļo̧k jān jon̄ak ko an Kabun̄ in me jar maron̄ in loe;] … Ta eo kōj im ajri ro nejid im ajri ro jibwid reaikuj in kememej ej bwe Kabun̄ in enaaj jejjet wōt, [lo] laļ in enaaj etal wōt—bwe ettoļo̧k (kōtaan ko an laļ in im jon̄ak ko an Kabun̄ in) ej jino kilepļo̧k im kilepļo̧k. … Kōn men in, lukkuun kōjparok e. Eļan̄n̄e konaaj kowaan m̧akūtkūt ko am im jon̄ak ko an Kabun̄ kōn pedped eo an laļ im ijo ej etal ie, kwonaaj lo bwe kwojjab pād ijo kwoj aikuj pād ie.”⁴

Ilo tōre eo iaar jab maron̄ pijaikļok ewi ettoļo̧k in im ewi m̧ōkaj in an laļ in naaj kar ilo̧k ettoļo̧k jān katak, peped ko, im kien ko Anij eaar litok. Im aaet jon̄ak ko an Kraist im Kabun̄ eo An rejjan̄in em̧m̧akūt. Eaar ba bwe m̧ool eo pād wōt n̄an indeeo im indeeo.⁵ N̄e jej meļeļe im bōk menin, jej m̧aanjappopo n̄an jelm̧ae ankeke eo an ikitōltōl, kajirere, im em̧ool kalijōkļo̧k me naaj itok jān laļ in im jet ro rej ņae etaer make ro m̧ōttad.

Elōn̄ iadwōj ejeļā juon emaron̄ in ba, “Eļan̄n̄e kwoj kōņaan bwe kwon m̧ōtta, kwon bōk jon̄ak kein aō.” Juon m̧ōttā eo em̧ool ejjab kajjitōk ippād n̄an kālet ikōtaan ko̧jpeļ im jem̧jerā eo an. Ij uwaak ilo naan ko an Paul, “Kwōn ilo̧k.”⁶ Juon m̧ōttā eo em̧ool ej kōkajoor kōj n̄an pād wōt ilo iaļ eo erānin̄ im eaidik.

Pād ilo iaļen ko̧jpeļ eo an kien ko, kain̄i ko, im bujen ko naaj kōjparok kōj im kōpooj kōj n̄an kōm̧m̧ane jerbal eo an Anij ilo laļ in. N̄e jej pokake Naan in Māļetļet, kālet eo ad ej kōjparok kōj jān an̄ūrlep ko āinwōt dānin kadōk, uno ko rekajoor, im jikka. N̄e jej kōļļā juon m̧ōttan jon̄oul eo ad, ekkatak jen jeje ko rekwojarjar, bōk peptaij im kapene, mour ilo juon wāween eo me maron̄ bōk jem̧jerā eo an Jetōb Kwojarjar, erreeo n̄an bōk m̧ōttan kwojkwoj eo, pokake kien erreo eo, m̧aanjappopo n̄an im bōk Melkisedek Priesthood eo, im kōm̧m̧ani bujen ko rekwojarjar an tampeļ, jej m̧aanjappopo n̄an jerbal.

Ilo tampeļ eo jej m̧aanjappopo im kallim̧ur n̄an mour kōn kien ajeļo̧k eo. Likao ro rōkeke jino mour kōn kien in kōn pukōt n̄an erom juon mijenede—juon likao ej jerbal ium̧wi ruo iiō in iiō ko ron̄oul an ej leļo̧k 10 bōjāān in mour eo an ilo jerbal in jipan̄ an Irooj aolep raan. Karmejet ej kōkajoorļo̧k er n̄an wōnm̧aanļo̧k n̄an bujen eo eutiej tata ilo mour—n̄an m̧are im liāp ilo tampeļ im jino juon baam̧le indeeo.

Ilo ad bun̄ m̧aanļo̧k ilo iaļ in, jej kalōk eļapļo̧k kajoor ilo jetōb—kajoor eo ilo kōjerbal anemkwoj eo ad n̄an jerbal n̄an kōj make. Jim̧or likao im jiron̄ ro, eddōkļo̧k in ej jipan̄ ilo ami katak katak eo im kwaļo̧k naan in kam̧ool ko ami kōn laajrak in kein katakin eo ekāāl ilo online, Come, Follow Me.

Ilo kakobaba, kōjerbal anemkwoj eo n̄an kōļapļo̧k kōn kwe make. N̄e kom̧ij lo menin leļo̧k im tōļan ko am̧, kememej bwe ro jinemi im jemāmi im rūkaki ro am̧ remaron̄ jipan̄ eok, bōtaab kom̧ij aikuj kōtļo̧k bwe Jetōb eo en tōl kwe. Kālet im jerbal kōn kom̧ make. Ellowetak jān itulowa. Kōm̧m̧ane juon karōk n̄an mour eo am̧ make, ekoba jeļāļo̧kjeņ ak kaimnene in jikuuļ in kapeel in pā, bōk jeļā, im kadedeļo̧k ta eo kwe kar jino.

Ilo am etal ilo iaļ in, kanooj lale n̄an am̧ bōk kuņam̧ ilo baam̧le eo, doulul, kūlaj, im m̧akūtkūt in Jemdoon an Jodikdik ro. Bōk limo ilo m̧akūtkūt ko ippān doon. Kōn en̄jake kein konaaj jeļā kautiej im kam̧oolol doon kōn menin letok ko an jetōb im m̧wil ko indeeo an ļaddik im jiron̄ ro nejin Anij.

Ilubwiljin aolep men, en wōr tōmak ilo Rilo̧mo̧o̧r! Jab mijak! Ilo ad mour tiljek ilo ko̧jpeļ eo, jej erom kajoor ilo Irooj. Kōn kajoor eo An jemaron̄ in jutak ņae jabdewōt ri jum̧ae Kraist eo enaaj ba, “M̧ōn̄ā, idaak, im lan̄lōn̄,” bwe Anij “enaaj kōtļo̧k [am̧] kōm̧m̧an jidik jerawiwi; … ejjeļo̧k kōmetak ilo men in …, bwe ilju jej mej.”⁷ Ilo kajoor eo an Irooj jej maron̄ in jutak ņae jabdewōt tōmak ak dōkwa me ej karmejete Rilo̧mo̧o̧r eo im ej jum̧ae karōn in lo̧mo̧o̧r indeeo eļap, n̄an aolep ajri ro nejin Anij.

Jej jab mālim n̄an kōnono kake jekjek ko an karōk indeeo in. Kememej Nihimaia eo eaar bōk eddo in kalōk oror eo n̄an kōjparok Jerusalem. Jet raar kōņaan bwe en wanlaļļo̧k im kwaļo̧k jerbal eo an, bōtaab Nimimaia ar m̧akoko. Eaar jab pedped ioon ro jet; eaar ba, “N̄a ij kōm̧m̧an juon jerbal eļap, innām Iban wanlaļwōj, etke en jokwōd jerbal in ke ij likūte im wanlaļļo̧k n̄an ippemi …?”⁸

Jet iien jej erom jibadbad an im aikuj “bōk kōrraat im kajirere eo” kōnke jej kijin̄en̄e n̄an jon̄ak ko im kōm̧m̧ane jerbal eo An. Ij kam̧ool bwe jejjab aikuj in mijak eļan̄n̄e jej pedpedi mour ko ioon katak eo An. Maron̄ jab meļeļe, im ioon kōnana, im em̧ool riab ņae kōj, bōtaab jejjab make ļo̧k. Ad Rilo̧mo̧o̧r eaar “Armej raar kajekdo̧o̧n im joļok.” ⁹ Ej jim̧we eo ad ekwojarjar n̄an jutak Ippān!

Ejerata, jet iien jutak pen meļeļe joļo̧k im em̧ool ilo̧k jān laļ in. Rilo̧mno̧o̧r ar ba, “Kwōn kabun̄ n̄an am̧ Anij.”¹⁰ Joseph in Ijipt eo ar ko jān kapo eo an kōrā eo ippān Potiphar,¹¹ im Liai eaar likūt Jerusalem im bōk baam̧le eo an n̄an āne jem̧aden.¹²

Kwon jeļā bwe aolep rikanaan ro m̧okta jen kōj raar jutak pen ilo tōre ko aer:

Nipai eaar kōm̧m̧an oktak ilo jerbal in an Irooj n̄an jum̧ae Satan im jum̧ae ko an Leman im Lemuel, ļōm̧aro jein.¹³

Abinadai ar kam̧ool kōn Kraist ilo an jelm̧ae en̄taan, metak, im aaet mej.¹⁴

2,000 likao em̧m̧aan ded raar jurake baam̧le ko aer ņae ro rej jum̧ae jon̄ak ko an ko̧jpel eo.¹⁵

Moronai ar kotak taitōļ in anemkwoj eo n̄an kōjparok baam̧le ko an armej ro an im anmkwoj in kabun̄ eo.¹⁶

Samuel ar jutak ioon oror eo im kanaan kōn itok eo an Kraist, men̄e kar kade im lipo̧ņe.¹⁷

Rikanaan Joseph Smith ar kōjepļaaktok ko̧jpeļ eo an Rilo̧mo̧o̧r eo, liāpe naan in kamool eo an kōn bōtōktōkin.¹⁸

Paineer Mormon ro raar jutak pen men̄e raar ioon elōn̄ en̄taan ko aer, ļoor juon rikanaan ilo iaļ eo aer im jikrōkļo̧k ilo West.

Rikarejeraņ rein rem̧m̧an im Armej ro Rekwojarjar an Anij raar maron̄ in jutak pen kōnke rej jutak ippān Rilo̧mo̧o̧r eo. Ļōmņak ekōjkan an Rilo̧mo̧o̧r eo jutak pen:

Ke eaar em̧m̧an ded, Jisōs ar tiljek ilo an kōm̧m̧ane jerbal eo An Jemen, kwaļo̧k ko̧jpeļ eo n̄an armej ro remeļetļet ilo tampeļ eo.¹⁹ Ilo jerbal in kwaļo̧k eo An, E ar kadedeļo̧k jerbal eo ilo priesthood—katakin, kemour, jerbal, im kōjeram̧m̧an ro jet. N̄e em̧m̧an, Ej jutak peran ak kōn ainikien emera.²⁰ Ke pris eo eutiej ej ketak e im̧an Caiaphas, Jisōs ar jab uwaak n̄an jab m̧ool eo im dāpij aenōm̧m̧an eo An.²¹

Ilo jikin Kallib Gethsemane, ad Rilo̧mo̧o̧r im Ripinmuur ar jab bōbraik n̄an kakūrm̧ool jerbal eo epen kōn Pinmuur eo.²² Im ioon debwāāl eo E ar bar en̄taan n̄an kōm̧m̧an ankilan Jemen, m̧ae āliktata Ar ba, “Ededeļo̧k.”²³ Ilo uwaak eo etinwadik in pokake eo an Rilo̧mo̧o̧r ilo jutak kajoor, Jemedwōj Ilan̄ ar kwaļo̧k “Lo in Nejū Jitenbōro, eo ilo E, Ebun̄buruō; ilo E Iaar kaiboojoj Eta.”²⁴

Priesthood ro reddik im rōrūtto rejitenbōro ippa, jen kaiboojoj etan Anij n̄an jutak pen kōn ad Rilo̧mo̧o̧r, Jisōs Kraist. Ij kwaļo̧k aō kam̧ool bwe Ej mour im bwe jaar “kūr kōn juon kūr ekwojarjar”²⁵ n̄an bōk kuņad ilo jerbal in An.Jej aikuj jutak ilo jikin ko rekwojarjar im jab m̧akūtkūt.²⁶ Dim im pen ilo katak eo an ad Anij, jen jutak ilo jikin ko rekwojarjar, bwe An katak ej kwojarjar im eban oktak kōnke oktak in tōmak ko. Ij kwaļo̧k, āinwōt kar Rijilōk Paul, “Kom̧win ekil, jutak pen ilo tōmak, [m̧akūtkūt] āinwōt em̧m̧aan ro, [im] kom̧win kajoor.”²⁷ En̄in ej jar eo aō epen n̄an kom̧, ilo āt eo ekwojarjar etan Jisōs Kraist, amen.