Tu Kuh ke Acn Muhtahl

Sel Elder Robert D. Hales

Ke U luhn Mwet Sap Singucul Luo


Tu kuh ac ahkos mwe luti luhn God lasr, kuht tu ke acn muhtahl, tuh mwe luti Lal pa muhtahl ac fah tiac ikihlyuck ke srihpen ekyek luhn acn ac luhlahlfongi uh.

Tamuhlwel, mwe srui se in wi mwet suleyucklac in oruh orekma wo luhn God. Kuht muhta in lwen sahflah, “in pacl in ongaiyac.”1 Ke kunohkohn lasr in oacna sie mwet sruok pristut, ma kunacsr in tu kuh in us mwe loang luhn luhlahlfongi in sang konwelah pihsr fihrihr nuh kwewa sin el suc koluklacna. Kuht mwe srihkasrak nuh facluh, ac kuht karihngihn ma suwohs ac sukohsohk ma utuckuh nuh sesr sin God ac suc tiac kuh in itucklac. Kuht karihngihn lohm sesr ac sucu lasr.

Ke nga tuh kuhlahs ahk yuc ke High School ah, nga fohlohk ke sritacl yakyu se emet ma nga ac u se luhk ke high school ac som oruh sahyac ah. Pahpah tuhmuhk ah luhmahack lah ke kahsruhsr loeloes wi pas ah nuh lohm ah nga lohoh ke sramsram ac elah ma tiac wo nuh ke akwuck luhn wosasuc uh. Ke srihpen el mwet suhmaht ke sroal se, el pihtucki ac srolwaclah petsac se ke sie solse—mwet mweun se ma kuh in karihngihn kahsuhl ac tohkohsrahi uh.

Ke el sruhluh petsac sac, ac riti ke ma suhmuhslah uh, nga lotwelah lah ngwac oacna sie mwet sruok pristut pwacye fuhkah—karihngihn ac loango tohkohsrahi luhn God. Kahs luhn Mwet Sap Paul pa mwe kol se luhk:

“Ke ma inge, eis nuh fom mwe meun nuh kwewa luhn God, tuh kom fah kuh in kuhtanglah in lwen koluk, ac ke oreklac nohfohn, in tu.

Tuyak inge, oruh insiyom in ahkolah ke pwacye, ac oasr kac mwe loang osra luhn suwohswohs;

“Ac niyom in fahluhkyang ke ahkolah luhn wosasuc luhn mihslac;

“Nuh fin ma nuh kwewa, eis mwe loang luhn luhlahlfongi, fin ohinge kom fah kuh in tulokihnyac kuhtasrihk luhn ma koluk.

“Ac kowos in eis helmet luhn molwelah, ac katlas luhn Nguhn, suc kahs luhn God.”2

Tamuhlwel, kuht fin pwacye nuh ke pristut, mwe mweun se inge fah utuckuh nuh sesr oacna sie mwe sang sin God. Kuht enenuh mwe mweun se inge!

Mwet fuhsr, pahpah ac pahpah mahtuh tomowos tiacna sun mwe sruhf ma kowos puhla in pacl ac nuh kwewa uh. Kowos muhta in lwen sahflah uh. Fin pahpah tomowos sulaclah sel in puhtatyang nuh ke ma upac kuh orek fohs, el enenuh in srihke kuhiyacl nohfohn in oruh ohinge. Ma se inge tiac sulpac orek! Mihsenge mwe sruhf uh konwekomyak! Nuhnak muhnahs esam ma se inge! Setuhn el luhngse kom in ma lal, ac ma koluk oan ke motonoac uh.3 Kom ac kutong fuhkah sruasra in oruh lal uh? Kowos in nokomwacng mwe mweun nuh kwewa luhn God.

Lwelah ngan luti kowos ke sie pac ma sikyak in moul luhk:

Ke Jacnweri yac 1982, Nga tuh sramsram ke toeni muhtahl ke inkucl in lutlut luhn BYU fin acn Provo, Utah. Nga tuh ngihsre sin tuhlihk lutlut ac in luhmahlah muh Alu uh an sisken la potium se nga tulac sramsram kac ah, acn se inge, ac facluh fit se kuh luo nuh ke siskac se sahyac ah. Ma se inge ahollah “upaclaciyacn fototo inmahsrlon akwuck luhn facluh nuh ke akwuck luhn Alu uh” ke nga tuh college ah. Na, ke nga tuh tulac ye muhtuhn tuhlihk lutlut ingoh tukun yac 30 ac nga ahkuhtweyac lah, nga sruhkwack pouk ke ohiyac oanca sie ac ahkuhtweyac, “Akwuck luhn facluh eklac arulacna loesaclihk nuh ke akwuck luhn Alu uh, luhmweyuck muh eltahl koflah in liyeyuck mweyen arlac loeslac suhlah. … Ma kuht ac tuhlihk nahtuhsr ac nuhtin nahtuhsr uh enenuh in esam pa Alu uh ac srackna oacyac ah, [srackna ohinge; tuh] facluh ac srackna fahsr—inmahsrlon akwuck luhn facluh ac akwuck luhn Alu uh yohkyohkwelihk na. … Ke ma inge, liyekomyang in wo. Kom fin lihklihki mukwikwi lom an ac akwuck luhn Alu uh in suk met lah piyac ma luhn facluh ac som nuh oyac, kom fah konwacack lah kom wacngihn liki acn kom enenuh in oasr we.”4

Pacl somlah nga tiac kuh in motko lah fuhkah lusac ac fuhkah muhiyacn facluh fah fahsr liki mwe luti, ma yohk ac masap utuckuh sin God, ma se tiac kuh in kahlwemyucklac met ah. Ac tuh akwuck luhn Kraist ac Alu Lal tiacna mukwilac. El nuh fahk muh ma pwacye fah oan ne tok ma pahtpaht.5 Ke kuht kahlwem ac insese nuh kac, kuht ahkoekuhtlac in lain ahkkoluk sin mwet, ahksruhksruhk, kuh finne srisri ma tuhkuh sin facluh ac kuhtuh mwet ma pahngpahng kawuck lasr.

Puhs inmahsrlosr etuh sie mwet fah fahk, “fin kom luhngse kawuck luhk, kom ac enenuh in ukwe ohiyac luhk uh.” Kawuck pwacye se el tiac siyuck kuht in sulaclah inmahsrlon wosasuc ac kawuck lalos. Nga orekmakihn kahs lal Paul in topuk, “Ke kain fohs inge.”6 Sie kawuck pwacye el ahkkweye kuht in muhta na ke inkacnek suwohs ac oasrihksrihk.

Tu inkacnek in wosasuc luhn masap, akwuck, ac olweacng lihsrihng kuhtyak ac ahko kuht lac in oruh orekma luhn God fin facluh se inge. Ke kuht ahkos Kahs In Lahlmwetmwet, sukohsohk in sulaclah lasr fah lihsrihng kuhtyak liki pahlah luhn ma koluk oacna mwe sruhi, ono upac, ac paip. Ke kuht moli sie tahfuh singucul, lutlutkihn ma suhmuhslah, eis pacptais ac ahkkweyeyucklac, muhta ke sie ohiyac ma Nguhn Muhtahl ac wi kuht pacl nuh kwewa, nwacsnwacs in eis kuhfa luhn Leum, ahkos masap ke tiac kosro, ahkolah ac eis Melchizedek Pristut, ac oruh olweacng muhtahl lun tempuhl an, na kuht ahkolah in kuhlwacnsap.

Lun tempuhl kuht ahkolah tari in olwelah in moulkihn masap luhn kihsackuhnlah. Mukul fuhsr ma kuh muhtwacwacack in moulkihn masap se inge suk in oruh sie misineri—sang yac luo ke yac longoul kuh kuhtuh emet ke yac luhn moul lalos in kuhlwacnsuhpuh Leum ke pacl na fohn se inge. Kihsackuhnlah se ingoh ahkkweyaclos in fahsr nuh met nuh ke olweacng fuhlwactlacna luhn moul—nuh sin puhs, ma yohk se lalos pa in sil in tempuhl ac sramtweack sie sucu ma pahtpaht.

Ke kuht kwacfweacng nuh met ke inkacnek suwohs ac oasrihksrihk soko ah, kuht ahkyohkye nguhn pacl nuh kwewa—kuh in orekmakihn sukohsohk in sulaclah lasr in oruh nuh sesr sifacna. Nuh sin kwewana mukul fuhsr ac muhtwacn fuhsr, kapwack se inge kahsruh ke elos lohacng nuh ke mwe luti ac akacsruhi ke luhlahlfongi lalos ke prokracm sasuc ke internet, Come, Follow Me.

In tahfwelah, orekmakihn sukohsohk in sulaclah lom in muhsahi kom sifacna. Ke kuht konwacack mwe sang ac talan lasr uh, esam lah pahpah ninac ac mwet luti uh kuh in kahsrwekom, tuhsruhk kom enenuh in lwelah Nguhn in kol kom. Sulaclah ac oruh keim sifacna. In oasr ma moklwe insiyom. Orwaclah sie plwacn nuh ke moul lom an, weacng lutlut kuh ahkpah nuh ke orekma. Suk ma wo ac talan. Orekma ac kuh in sifacnalac. Akiyac mwe finsrak uh, kuhtanglah tahfonglac, yohkwelihk etuh lom, ac ahksahfyelah ma kom sramtweack.

Ke kom fahsr nuh met ke inkacnek uh, esam in wi mukwikwi luhn sucu, u, kuhlahs, ac tuhkweni nuh sie luhn Sie sin Sie. Luhngse tuhkweni nuh sie in. Ke ma sikyak inge kom fah muhtwacwacack in ahkfuhlwactye ac srui mwe sang luhn nguhn in kais sie ac ohiyac ma pahtpaht luhn mukul ac muhtwacn nuhtin God, ac ohiyacn elos ahkwoye sie sin sie.

Yohk liki nuh kwewa, in oasr luhlahlfongi ke Mwet Lahngo! Ke kuht oaru in moulkihn wosasuc uh, kuht eklac fokoko in Leum. Ke kuh Lal kuht kuh in lain mwet tiac luhlahlfongi ke Kraist suc sap kuht in mongo, nihm, ac pwacr, mweyen God elac nuhnak muhnahs ke ma koluk srihsrihk kuht oruh, ac wacngihn ma kuht ac fosrngah kac mweyen kuht nohfohn ac misac lutu.7 Ke kuh luhn Leum kuht kuh in lain kuhtwena nuhnak kuh luhlahlfongi ma lahfwekihn Mwet Lahngo ac tiac insese ke plwacn luhn engan ma pahtpaht nuh sin tuhlihk nuhtin God nuh kwewa.

Tiac lwelah nuh sesr in sramsramkihn ohiyac luhn plwacn ma pahtpaht se ingacn. Esamuhl Nimaia suc ituckyang kuh lal in muhsahi sie pot in kuhlasack Jerusalem. Kuhtuh selos kena elan fuhlweack wal luhlahp lal, tuhsruhk Nimaia el srahngwesr. El tiac na foloyak selos; el ahkuhtweyac kahlwem, “Nga oruh sie orekma yohk, oruh nga tiac kuh in fuhlweack: efuh kuh orekma se inge in tui … ?”8

Kuhtuh pacl uh kuht oruh liye se kac ac kuht enenuh in eis pihlesreyuck ac isrucnyuck mweyen kuht moul fal nuh ke kahs Lal. Nga fahkwack lah kuht tiac enenuh in sahngweng kuht fin akiyac moul lasr ke mwe luti Lal. Kuht ac kuh in fohsack ac puhla mwe ahkkoluk, ac finne ke ahkkoluk tiac pwacye, tuhsruhk kuht tiac muhkuh. Mwet Lahngo lasr el “ahkkolukyeyuck ac sruhngwacyuck sin mwet.”9 Pa inge mwe srui muhtahl lasr in Weluhl tu!

Tahfuhn kahsiyac, kuhtuh pacl uh kalmacn tu na kuh pa kahingkihn ac finne ahkloesye kuht liki ma luhn facluh se inge. Mwet Lahngo el fahk, “Fahlac likiyuc, Setuhn.”10 Joseph luhn acn Egypt el kahingkuhnlah mwe sruhf luhn muhtwacn kiyacl Potifar,11 ac Lehi el som liki acn Jerusalem ac us sucu lal nuh acn mwesis.12

In ahkpwacyei lah mwet pahluh nuh kwewa met liki kuht tu na kuh in lwen lalos:

Nephi el oruh orekma luhn Leum finne nuh ke mwe sruhf lal Setuhn ac ahkkweok luhn tamuhlwel wiyacl, Laman ac Lemuel.13

Abinadi el fahkwack ke Kraist finne pwacye lah mwet sahyac kalyei kacl ac ahkkasrkuhsrakyacl ac otwelah muh elac acnwucki.14

Mukul in mweun fuhsr 2,000 ah kuhlasack sucu lalos liki mwet ma lain akwuck luhn wosasuc.15

Moroni el kohlwack nuh lucng fuhlwack in sukohsohklah in karihngihn sucu luhn mwet lal ac sukohsohk luhn alu.16

Samuel el tuyak fin sie pot ac palyei ke tuhkuh luhn Kraist, finne ke yot ac pihsr tolyuck nuh yohrohl.17

Mwet Pahluh Joseph Smith el fohlohkohnwack wosasuc luhn Mwet Lahngo, siliyac luhlahlfongi lal ke srah lal.18

Ac payonir luhn Mormon tu kuh ke pacl elos puhla upaciyen lainyaclos ac mwe kweok, fahsr tukun sie mwet pahluh ke fuhfahsryucsr loeloes lalos ac akwucki lalos in acn Rohtoh.

Mwet kuhlwacnsap wowo ac Mwet Luhlahlfongi luhn God inge kuh in tu kuh mweyen elos tu wi Mwet Lahngo. Motko lah Mwet Lahngo El tu kuh fuhkah:

Ke El mwet fuhsr, Jisus El moniyuck in som oruh orekma luhn Pahpah Tuhmwacl, luti wosasuc nuh sin mwet lahlmwetmwet in tempuhl.19 Ke lusen pacl El luti, El ahksahfyelah orekma luhn pristut—luti, ahkkweye, kuhlwacnsap, ac ahkinsewowoye ac ahkkweye mwet sahyac. Ke pacl fal, El puhlaik in tuyak lain ma koluk, finne ahknwacsnwacsye tempuhl.20 El oacyacpac na wi ma pwacye—finne ke kahs kuh ahkfuhlwactye mihslac. Ke sifen prist el ahkkolukyacl ye muhtahl Caiaphas, Jisus El etuh ac puhlaik in tiac topuk ma tiac pwacye ac sruokyacna mihslac Lal.21

Ke Imac luhn Gethsemane, Mwet Lahngo ac Molwelah lasr tiacna fuhlweack kunohkohn upac luhn Iwaclah.22 Ac fin sahkseng soko ah El sulpac kweok elan muh ahksahfyelah orekma luhn Pahpah Tuhmwacl, ne ke sahflahiyac El kuh in fahk, “sahflah.”23 El muhtweng nuh ke sahflah. In topuk ahkostwen yohklacna luhn Mwet Lahngo in tu kuh, Pahpah tuhmasr Inkuhsrao El tuhkahkuhnlah Mwet Lahngo oacna Wen Sacohklacna Nahtuhl, suc El insewowo Kacl, suc El ahkmuhtahlye Inel.”24

Tamuhlwel sacohk wiyuck ke pristut fuhsr ac mahtuh, lwelah kuht in ahkfuhlwactye inen God in tu kuh wi Mwet Lahngo lasr, Jisus Kraist. Nga fahkwack loh luhk lah El moul ac lah kuht pahngonyuck ke sie pahng25 muhtahl in oruh orekma Lal. Kuht enenuh in tu ke acn muhtahl ac tiac mukwikwi.26 Tu kuh ac ahkos mwe luti luhn God lasr, kuht tu ke acn muhtahl, tuh mwe luti Lal pa muhtahl ac fah tiac ikihlyuck ke srihpen ekyek luhn acn ac luhlahlfongi uh. Nga fahkwack, oacna Mwet Sap Paul, “Liye Komyang, tu kuh in luhlahlfongi, [mukwikwi] oacna mukul, [ac] in fokoko.”27 Pa inge pruhe pwacye luhk nuh suwos, ke ine muhtahl luhn Jisus Kraist, amen.

Mostrar las referencias

  1.  

    1. 2 Timote 3:1.

  2.  

    2. Mwet Efesus 6:13–17; ahkuhtweyac wo ituckyang

  3.  

    3. Liye Moses 5:23.

  4.  

    4. Robert D. Hales, “This Is the Way; and There Is None Other Way,” in Brigham Young University 1981–82 Speeches (1982), 3–4; oasr ke speeches.byu.edu.

  5.  

    5. Liye Doctrine and Covenants 1:39; ahkuhtweyac wo ituckyang.

  6.  

    6. 2 Timote 3:5.

  7.  

    7. Liye 2 Nephi 28:8.

  8.  

    8. Niemaia 6:3.

  9.  

    9. Isaia 53:3; Mosiah 14:3.

  10.  

    10. Luk 4:8.

  11.  

    11. Liye Genesis 39:7–12.

  12.  

    12. Liye 1 Nephi 2.

  13.  

    13. Liye, mwe srihkasrak, 1 Nephi 18.

  14.  

    14. Liye Mosiah 11–17.

  15.  

    15. Liye Alma 53, 56–58.

  16.  

    16. LiyeAlma 46:11–13.

  17.  

    17. Liye Helaman 13–16.

  18.  

    18. Liye Doctrine and Covenants 135.

  19.  

    19. Liye Luk 2:46–49.

  20.  

    20. Liye Mattu 21:12–13.

  21.  

    21. Liye Mattu 26:57, 59–63.

  22.  

    22. Liye Doctrine and Covenants 19:16–19.

  23.  

    23. Jon 19:30.

  24.  

    24. Liye 3 Nephi 11:7.

  25.  

    25. Liye Alma 13:3; oacyacpac liye 2 Timote 1:9.

  26.  

    26. Liye Doctrine and Covenants 87:8.

  27.  

    27. 1 Mwet Corinth 16:13.