Na Tamada kei na Luvena

Kemuni na taciqu kei na ganequ lomani, au vakavinavinaka ni’u mai vosa vei kemuni ena ituvaki veivakauqeti ni koniferedi raraba oqo ena yakavi nikua!

Ni’u vosa tiko ena dua na ulutaga e ka tabu sara ki na noqu vakasama, au vinakata me’u vakatakila taumada ena vakavinavinaka na nodra yalodina e vuqa na Lotu Vakarisito ena veitaba gauna sa oti, oka kina o ira na noqu kawa Lotu Totaki Ira ni Varanise kei na Katolika ni Arisi. E vuqa vei ira a solibulataka na nodra itutu baleta na nodra vakabauta kei na sokalou, na ka era taukena ka vakakina na nodra bula ena taqomaki ni nodra Kalou kei na nodra vakabauta.¹

Me vaka na Yalododonu Edaidai ka Vakarisito vakakina, eda taukena vakatalega kina e dua na vakabauta kaukauwa ka titobu me baleta na Kalou na Tamada tawamudu kei na Luvena, o Jisu Karisito. Na yalodina vua na Kalou e sa dau ka tabu tu ga vei keda yadua kei na noda Dauveibuli.

Na noda sasaga ki na bula tawamudu esa vakatauvatani ki na sasaga meda kila deivaki o cei na Kalou ka tovolea meda lesu tale me da laki bula vata kei Koya. A masu na iVakabula vua na Tamana, “Ia sai koya oqo na bula tawamudu, me ra kilai kemuni na Kalou dina duadua ga, kei Jisu Karisito o koya ko ni a tala mai.”²

Me vaka na rarama ni veivakatakilai oqo mai vua na iVakabula Vakatakikoya, na raici vakatudei ni ituvaki ni Tamana kei na Luvena ena vuqa na senitiuri kei na itabatamata eso e sa duidui vakaoti vata kei na ivakavuvuli ni ivolanikalou tabu.

Eda vakaraitaka ena yalovakarokoroko ena uto ni kosipeli i Jisu Karisito kei na kena kaukauwa ni veivakabulai e koto kina na kilai donu vinaka ni Tamada kei na Luvena.³

Na bibi ni ivakavuvuli momona oqo ni kosipeli i Jisu Karisito esa vakadeitaki ena iMatai ni Raivotu ni Parofita o Josefa Simici ena 1820. A vola na Parofita: “Au sa qai raica e rua na tamata, ia na kedrau iserau kei na iukuuku sa sega ni vakamacalataki rawa, raica e rau sa tucake tu ena maliwa lala donuya na mataqu. A sa kacivi au e dua vei rau, dusi koya na kena ikarua ka kaya—Oqo na noqu Gone ni Toko. Mo rogoci Koya!”⁴

Na ka a sotakaya oqo na cauravou o Josefa, salavata e vuqa tale na raivotu kei na ivakatakila, sa vakadinadinataka ni sa bula dina tiko na Kalou; na Tamada kei na Luvena, o Jisu Karisito, esa rua na tamata duidui; na tamata esa buli ena ituvaki ni Kalou; na Tamada Vakalomalagi esa Tamai Jisu Karisito vakaidina; e se tomana tikoga na Kalou na nona vakatakilai Koya vua na tamata; esa dau voleka tu ga na Kalou ka dau kauwaitaki keda; ka dau sauma o Koya na noda masu.

Dina ga ni dau vakavudua sara tu na rairai vakaoqo ni Tamada kei na Luvena ena sala ni veidokai, na ka e totoka vakaidina kina na iMatai ni Raivotu oya ni a veidonui vakavinaka saraga kei na veika a yaco ka volai tu ena ivolanikalou tabu.

Eda wilika ena Veiyalayalati Vou, me ivakatauvatani, na iotioti ni vakadinadina nei Sitiveni me baleta na nona yaloqaqa: A kaya vaqo, “Raica, au sa qai kunea sa wase rua na lomalagi, ka sa wavu tu na Luve ni tamata ena liga imatau ni Kalou.”⁵

Ena nona raivotu kaukauwa koto ena yanuyanu o Patemo, a raica na iApositolo o Joni na “Turaga na Kalou Kaukauwa”⁶ ka vakakina na Lami ni Kalou, ka “voli keimami ena [Nona] dra.”⁷

Ena iVola i Momani, e tu tikiva na iVola Tabu na ivakadinadina cecere ni vunau ni Tamada kei na Luvena. E volai ena iVola i Momani na veisiko ni iVakabula kivei ira na Nifai, ka a vakatakilai kina na tucake tale i Karisito mai na vosa i Tamana vei ira na lewe 2,500 na Nifai: Raica, oqo na noqu Gone ni Toko, ka’u sa dau vinakata vakalevu, sa i Koya sa vakacaucautaki kina na yacaqu, mo dou rogoci koya.”⁸

Ena Kosipeli e va, a vakatakila na Tamana mai Lomalagi na Karisito Vakaikoya vaka 160, ia ena gauna ni Nona veiqaravi vakalekaleka me tolu na siga vei ira na Nifai, me vaka e volai ena iVola i Momani, a vakatakilai Tamana o Koya vaka 122.

Me kena ivakaraitaki, ena Maciu, a tukuna o Jisu, “Ena sega ni curu ki na matanitu vakalomalagi o ira kecega sa kaya vei au, Turaga, Turaga; ko koya ga sa cakava na lomai Tamaqu sa tiko mai lomalagi.”⁹

Ena Joni, a vakadinadinataka o Koya, “E sega ni rawata vakaikoya ga e dua na ka na Luvena, na ka ga sa raica ni kitaka ko Tamana.”¹⁰

E na Luke, a tukuna kina o Koya, “I Tamaqu, au sa solia na yaloqu ki na ligamuni.”¹¹

Ena veigauna kece e dauvakatakilai Tamana mai Lomalagi kina na noda Turaga, a dau cakava o Koya ena yalovakarokoroko sara kei na yalomalumalumu.

Au nuitaka ni na sega na nanuma cala, ena kena tukuni, ni sa i o Jisu Karisito o Jiova sa cecere sara, na Kalou ni Isireli, na Mesaia yalataki, ka ni baleta Nona Veisorovaki tawamudu, sa yaco kina me noda iVakabula ka Dauveivueti kei Vuravura. A kaya kina me baleti koya na iApositolo o Paula, “Sa qai muri na kenai vakataotioti ni sa solia ko koya [Karisito] na lewa vua na Kalou, ko Tamana; ni sa vakaotia ko koya [Karisito] na lewa kecega kei na veitalia kecega, kei na kaukauwa.”¹²

Ena yakavi bogi ni se bera na Veisorovaki ni iVakabula, a cabora cake o Koya na Nona Masu bibi ni Veivakaduavatataki ki vua na Tamana. A masulaka o Koya:

“Ia ka’u sa sega ni masu ena vukudra [ena dua tale kedratou itukutukuni, na Nona iApositolo] walega oqo, ia ena vukudra talega era sa vakabauti au ena vuku ni nodra vosa;

“Me ra duabau kecega; me vaka kedaru sa duabau, Tamaqu, me ra duabaukei kedaru: me vakadinata ko vuravura ni Kemuni sa talai au mai.

“Ia na vakarokoroko ko ni a solia mai vei au ka’u sa solia vei ira; me ra duabau, me vaka edaru sa duabau.”¹³

Na Tamada kei na Luvena e rau sa duidui tamata, ia e rau sa duavata vakaoti ka duabau ena kaukauwa kei na inaki. Na nodrau duavata e sega ni vakatabakidua kivei Rau ga; ia, e Rau gadreva na duavata vakaoqo vei ira taucoko era gadreva, ena yalodina, era vakamuria ka talairawarawa ki na Nodrau ivakaro.

Ena rawa vakacava vua e dua e dau vakasaqara vakagumatua na Kalou me na vakatakilai vua na Tamada kei na Luvena? A yalataka na noda iVakabula, “Ia na dauveivakacegui, na Yalo Tabu, ena vakavulici kemudou ena ka kecega.”¹⁴

Ena iVola i Momani, o Nifai, ni a vosa ena ivunau i Karisito, a vakaraitaka ni Yalo Tabu “e vakadinadinataka na Tamada kei na Luvena.”¹⁵

E sa dina ni dau vakilai ena so na gauna na kaukauwa se veivakauqeti ni Yalo Tabu, me vaka na loma ni Turaga, mai vua e dua ga na tamata se mani vakacava na lotu e lewena. Ia e dau lako walega mai na taucoko ni ivakarau, se iloloma, ni Yalo Tabu ni sa ciqoma oti e dua na tamata, ena “yalo e raramusumusu ka bibivoro,”¹⁶ na itavi tabu vakalotu ni papitaiso kei na isolisoli ni Yalo Tabu¹⁷ mai na veitabaki ni liga. E rawa ni qaravi walega na ka oqo kei na veicakacakavakalotu tabu tale eso ena veidusimaki kei na kaukauwa ni matabete ni Kalou. Ena ka oqo eda vulica kina:

“Raica sa ilesilesi ni matabete levu me vakayacora na cakacaka kecega vakalotu, ia sa tu kina na kaukauwa me vakatakila na veika vuni ni matanitu kei na kaukauwa me kilai kina na loma ni Kalou.

“Ia na ilesilesi oqo, sa vakatakilai mai kina na kaukauwa vakalou.”¹⁸

Ni raici ena kena rarama dina, na ivunau ni Tamada kei na Luvena e sa ivunau ni matavuvale tawamudu. Era a bula taumada na tamata kecega vakaisolisoli vakayalo ni itubutubu vakalomalagi,¹⁹ vata kei Karisito na Ulumatua ni Tamada ena matavuvale vakalomalagi oqo.²⁰

Sa vakakina vei keda kece sara. Eda sa luvena na Tamada Vakalomalagi.

A kaya na Peresitedi o Ezra Taft Benson ena nona rai vakaparofita, “E sega na ka ena vakidacalataki keda vakalevu sara tu ni da lako curuma na ilati ki na yasana kadua me da qai raica ni da kila vinaka tu na Tamada [mai lomalagi] kei na noda kila vakavinaka na kena irairai.”²¹

Au sa vulica ni na sega ni rawa ni vakaraitaki ena vosa vakatamata na veika ka rawa duadua ga vua na Yalo Tabu kei na kaukauwa ni Kalou me vakaraitaka. Sa ikoya oqori na yalo au cavuta kina niu sa vakadinata ka vakadinadinataka vakalou, ena nona dina, voleka kei na vinaka na Tamada Vakalomalagi kei na Luvena vakalou, o Jisu Karisito. Ena yaca i Jisu Karisito, emeni.