Leej Txiv thiab Leej Tub

Kuv cov kwv tij thiab cov muam, kuv zoo siab vim yav tav su noj kuv yuav hais lus rau nej hauv lub tuam rooj sab laj zoo kawg nkaus no!

Hnub no kuv xav tias kuv yuav hais lus txog ib yam uas dawb ceev heev, kuv xub xav hais ua tsaug rau txhua tus neeg uas ntseeg Yexus uas rau siab ntso tau ntau xyoo no, kuj hais txog kuv cov poj koob yawm txwv uas yog neeg ntseeg Fab Kis Protestants thiab Irish Txiv Plig. Vim lawv muaj kev ntseeg thiab tau teev tiam Vajtswv, lawv coob leej tau txi ntau yam hauj lwm, khoom ntiag tug, thiab tej thaum lawv txoj sia los pab tiv thaiv lawv tus Vajtswv thiab lawv txoj kev ntseeg.¹

Ua ib Tsoom Haiv Neeg Ntseeg hauv Hnub Nyoog Kawg thiab cov Neeg Ntseeg Yexus, peb los rau siab ntseeg Vajtswv Leej Txiv Saum Ntuj Ceeb Tsheej thiab Nws Tib Leeg Tub, Yexus Khetos. Txoj kev rau siab rau Vajtswv yeej yog ib yam dawb ceev thiab peb sawv daws muaj txoj kev nrog tus uas Tsim peb sib raug zoo.

Qhov uas peb xav tau txoj sia nyob mus ib txhis tsuas yog qhov uas peb xav paub seb Vajtswv yog leej twg thiab kom peb rov qab mus nrog Nws nyob ua ke dua. Tus Cawm Seej thov rau Nws Leej Txiv hais tias, “Txoj sia ntev mus ib txhis ntawd, yog qhov uas neeg paub koj thiab paub hais tias, koj tib leeg yog Vajtswv thiab paub kuv, tus uas yog Yexus Khetos uas koj txib los.”²

Txawm hais tias tus Cawm Seej Kiag tau hais cov lus no los, tau ntau pua xyoo tib neeg feem coob xav yuam kev txog Leej Txiv thiab Leej Tub vim lawv tsis ntseeg raws li tej lus qhia uas muab sau tseg hauv cov vaj lug kub dawb huv.

Peb ua siab mos qhia hais tias qhov nruab plawv Yexus Khetos txoj moo zoo thiab lub hwj chim uas cawm tau tib neeg kom dim yog qhov uas peb paub tseeb hais tias Leej Txiv thiab Leej Tub yog leej twg tiag.³

Peb nrhiav pom hais tias txoj ntsiab cai tseem ceeb tshaj plaws ntawm Yexus Khetos txoj moo zoo muaj tseeb thaum muaj Thawj Txoj Kev Ua Yog Toog Pom uas tus Yaj Saub Yauxej Xamiv pom thaum xyoo 1820. Tus Yaj Saub sau hais tias: “Kuv pom ob tug Neeg uas nkawd qhov kaj thiab qhov yeeb koob piav tsis tau li, thiab nkawd tab tom sawv ntawm ib nta saum kuv lub taub hau. Ib tug hais lus rau kuv, tuav kuv lub npe thiab taw tes rau tus i hais tias—Tus no yog Kuv tus Tub uas Kuv Hlub. Cia Li Mloog Nws Lus!”⁴

Qhov uas tus tub hluas Yauxej pom no, thiab ntau yam kev ua yog toog pom thiab lwm yam kev tshwm sim uas nws txais, qhia tseeb tias Vajtswv muaj sia nyob tiag; Leej Txiv thiab Nws Leej Tub, Yexus Khetos, nyias muaj nyias lub cev; tib neeg muaj tus yam ntxwv ib yam li Vatjswv; peb Leej Txiv Saum Ntuj Ceeb Tsheej yeej yog Yexus Khetos Leej Txiv; Vajtswv tseem niaj hnub tshwm los rau tib neeg pom; Vajtswv yeej nyob ze peb; thiab Nws teb peb cov lus thov.

Txawm tias tsis tshuav muaj tej lub sij hawm hauv cov vaj lug kub uas Leej Txiv thiab Leej Tub tib txhij tshwm los, Thawj Txoj Kev Ua Yog Toog Pom yeej haum nrog lwm yam xwm uas muab sau tseg hauv cov vaj lug kub dawb huv.

Piv xam hais tias, nyob hauv Phau Tim Khawv Tshiab, peb nyeem Xatefanaus cov lus tim khawv kawg thaum lawv tab tom muab nws tua pov tseg hais tias: Nws hais tias, “Nej saib! Kuv pom ntuj ceeb tsheej qhib thiab pom Neeg Leej Tub sawv ntawm Vajtswv sab xis.”⁵

Thaum nyob ntawm lub koog pov txwv Patmos, tus Thwj Tim Yauhas ua yog toog pom “Tus Tswv uas yog Vajtswv tus uas muaj hwj chim loj kawg nkaus”⁶ thiab Vajtswv tus Me Nyuam Yaj, uas “txhiv peb dim ... los ntawm [Nws] cov ntshav.”⁷

Hauv Phau Ntawv Maumoos, txoj lus qhuab qhia txog Leej Txiv thiab Leej Tub yeej ua tim khawv zoo zoo ib yam li nyob hauv Phau Vaj Lug Kuv Npaiv Npaum. Hauv Phau Ntawv Maumoos peb kawm txog peb tus Cawm Seej txoj kev los xyuas cov Neeg Nifais, thaum ntawd Leej Txiv lub suab hu, es 2,500 leej Neeg Nifais hnov, thaum nws qhia txog tus Khetos uas sawv rov los lawm hais tias: “Saib seb kuv tus Tub uas kuv Hlub, tus uas kuv zoo siab heev rau, tus uas ua rau kuv lub npe tau yeeb koob--nej cia li mloog nws.”⁸

Nyob hauv thawj plaub Phau Txoj Moo Zoo hauv Phau Tshiab, Yexus Khetos kiag qhia txog Nws Leej Txiv saum Ntuj Ceeb Tsheej 160 zaus, es hauv peb hnub uas Nws tuaj qhuab qhia cov Neeg Nifais, raws li sau tseg hauv Phau Ntawv Maumoos, Nws qhia txog Nws Leej Txiv 122 zaus.

Piv xam hais tias, hauv Mathais, Yexus hais tias, “Tsis yog txhua tus uas hu kuv hais tias, ’Tus Tswv! tus Tswv,’ ces yuav tau mus Ntuj Ceeb Tsheej; Tiam sis tsuas yog cov uas ua raws li kuv Txiv tus uas nyob saum ntuj lub siab nyiam, thiaj tau mus xwb.”⁹

auv Yauhas, Nws hais lus pov thawj tias, “Leej Tub yeej tsis ua ib yam dab tsi raws li nws lub siab, nws tsuas ua tej uas nws pom nws Txiv ua xwb.”¹⁰

Thiab hauv Lukas, Nws hais tias, “Txiv, kuv muab kuv txoj sia tso rau hauv koj txhais tes.”¹¹

Txhua zaus peb tus Tswv qhia txog Nws Leej Txiv Saum Ntuj Ceeb Tsheej, Nws yeej ua siab mos siab muag thiab saib nws rau nqi.

Thaum hais li no, kuv cia siab tias nej yuav tsis to taub yuam kev. Yexus Khetos yog tus Yehauvas, haiv neeg Ixayees tus Vajtswv, tus Mexiyas, thiab yeej yog vim muaj Nws txoj Kev Theej Txhoj zoo kawg nkaus, Nws yog peb tus Cawm Seej thiab tus Txhiv Dim rau lub ntiaj teb. Hais txog Nws ces tus Thwj Tim Pov Lauj hais tias, “Tom qab uas yog lub sij hawm kawg; thaum [Yexus Khetos] yuav muab txhua tus nom tswv txo hwj chim tsis pub kav teb kav chaw, thiab Yexus yuav muab ib puas tsav yam uas muaj hwj chim cob rau Vajtswv tus uas yog nws Leej Txiv huv tib si.”¹²

Hmo ua ntej tus Cawm Seej txoj Kev Theej Txhoj, Nws hais Nws Zaj Lus Thov Sawv Cev rau Nws Leej Txiv. Nws thov hais tias:

“Tsis yog kuv thov koj pab cov neeg no [los yog Nws cov Thwj Tim] xwb, tiam sis kuv thov koj pab cov neeg uas hnov tej lus uas lawv qhia thiab los ntseeg ku;

“Kom lawv koom ib lub siab; Txiv, thov cia lawv nyob hauv wb, ib yam li koj nyob hauv kuv thiab kuv nyob hauv koj; thov koj pab kom lawv ua tau ib lub siab hauv wb: ntiaj teb thiaj paub hais tias koj txib kuv los.

“Kuv ua rau lawv tau koob meej ib yam li koj ua rau kuv tau koob meej; kuv ua li ntawd kom lawv koom tau ib lub siab ib yam li wb koom tau ib lub siab.”¹³

Leej Txiv thiab Leej Tub nyias muaj nyias tug, tiam sis Nkawd yeej sib koom siab thiab koom ib lub hwj chim thiab txoj ntsiab cai. Nkawd txoj kev sib koom siab tsis yog rau Nkawd nkaus xwb; tiam sis, Nkawd xav kom txhua tus uas rau siab ntso yuav, raws Nkawd qab thiab mloog Nkawd cov lus txib.

Tus uas rau siab nrhiav Vajtswv ua li cas thiaj muaj cuab kav nrog Leej Txiv thiab Leej Tub sib raug zoo? Peb tus Cawm Seej cog lus hais tias, “Tiam sis tus Pab uas yog Vaj Ntsuj Plig tus Dawb Huv, … nws yuav qhia txhua yam rau nej.”¹⁴

Nyob hauv Phau Ntawv Maumoos, Nifais, thaum qhia txog Khetos cov lus qhuab qhia, nws tshaj tawm tias tus Vaj Ntsuj Plig Dawb Huv “ua tim khawv txog Leej Txiv thiab Leej Tub.”¹⁵

Tiag tiag mas muaj tej lub sij hawm uas yus hnov tau tus Vaj Ntsuj Plig Dawb Huv lub hwj chim, raws li tus Tswv lub siab nyiam, txawm yog yus teev ntuj zoo li cas los xij. Tiam sis yog xav tau tag nrho, los sis lub txiaj ntsim, ntawm tus Vaj Ntsuj Plig Dawb Huv tsuas los thaum tus neeg ntawd tau txais “lub siab mob thiab lub siab xav ua zoo ua ib qho kev txi,”¹⁶ txoj kab ke ua kev cai raus dej thiab lub txiaj ntsim ntawm tus Vaj Ntsuj Plig Dawb Huv¹⁷ los ntawm kev tso tes. Tej kab ke dawb ceev no thiab lwm txoj los ntawm kev coj ntawm Vajtswv lub hwj chim ntawm lub pov thawj hwj dawb huv. Hais txog qhov no, peb kawm hais tias:

“Thiab lub pov thawj hwj loj zog no tswj hwm txoj moo zoo thiab tuav tus yuam sij ntawm tej txuj ci uas neeg paub tsis txog ntawm lub nceeg vaj, uas twb yog tus yuam sij ntawm txoj kev paub txog Vajtswv.

“Yog li ntawd, nyob rau hauv tej kab ke ntawd, thiaj pom lub hwj chim ntawm Vajtswv tshwm sim.”¹⁸

Thaum paub qhov tseeb no, txoj lus qhuab qhia txog Leej Txiv thiab Leej Tub no yeej yog txoj lus qhuab qhia txog tsev neeg uas nyob mus ib txhis. Txhua tus neeg tau ua neej nyob ua ib tug me nyuam ntsuj plig muaj niam txiv nyob saum ntuj ceeb tsheej,¹⁹ Khetos yog Leej Txiv Thawj Leej Tub hauv tsev neeg no.²⁰

Peb txhua tus yeej yog li no. Peb yog peb Leej Txiv Saum Ntuj Ceeb Tsheej cov me nyuam.

Thawj Tswj Hwm Ezra Taft Benson uas yog ib tug yaj saub tau hais tias, “Tsis muaj ib yam dab tsi uas yuav ua rau peb xav tsis thoob npaum qhov uas peb hla mus dhau daim ntaub thaiv thiab txawm pom tias peb paub peb Leej Txiv [saum Ntuj Ceeb Tsheej] zoo npaum li cas thiab peb paub Nws ntsej muag zoo npaum li cas.”²¹

Kuv kawm tias tib neeg piav tsis tau txog tej yam uas yus tsuas kawm tau los ntawm tus Vaj Ntsuj Plig Dawb Huv thiab Vajtswv lub hwj chim. Vim kuv muaj tus ntsuj plig no kuv hais lus tim khawv tseeb tseeb hais tias Leej Txiv Saum Ntuj Ceeb Tsheej thiab Nws Leej Tub dawb huv, Yexus Khetos, yeej nyob ze thiab ua siab zoo. Los ntawm Yexus Khetos lub npe, amees.