Te Metua e te Tamaiti

To’u mau taea‘e e to’u mau tuahine, ua mauruuru roa vau i te a‘o atu ia outou i teie avatea i roto i te vahi o teie amuiraa rahi faaûruhia !

E paraparau atu vau i te hoê tumu parau mo‘a roa i to’u feruriraa, e ua hinaaro vau na mua roa e faaite atu i to’u mauruuru no te itoito rahi o te mau Keresetiano e rave rahi na roto i te mau tau, oia ho‘i, mai to’u iho hui tupuna, te hoê pae e porosetani farani e te tahi e katolika irelane. No to ratou faaroo e to ratou haamori i te Atua, e rave rahi o ratou tei faatusia i te ti‘araa, te mau tao‘a e to ratou atoa ora no te paruru i to ratou Atua e to ratou faaroo.¹

Ei Feia Mo‘a i te Mau Mahana Hopea Nei e ei Keresetiano ho‘i, hoê â faaroo puai e te hohonu to tatou i te Atua te Metua Mure Ore e i Ta’na Tamaiti ia Iesu Mesia. Te pûpûraa ia’na iho i te Atua, e vai noa ïa ei ohipa mo‘a i rotopu i te taata iho e to’na Hamani, e te reira no tatou tata‘itahi.

Aita ta tatou titauraa i te ora mure ore i te tahi mea ê atu i te titauraa ia maramarama o vai ra te Atua e no tatou te ho‘iraa’tu e ora ia’na ra. Ua pure te Faaora i To’na Metua, « teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai ».²

Noa’tu â te maramarama o teie faahitiraa a to tatou Faaora Iho, ua riro te mana‘o rahi no ni‘a i te natura o te Metua e o te Tamaiti na roto i na tenetere i ma‘iri e i rotopu i te nunaa taata ei mea e aita e tu‘ati roa ra i te mau haapiiraa o te mau papa‘iraa mo‘a.

Te auraro nei tatou ma te faatura atoa e, te aau o te evanelia a Iesu Mesia na reira atoa to te reira mana faaora, o te hoê ïa maramaramaraa ti‘a no te Metua e no te Tamaiti.³

Te faufaa o teie parau tumu ti‘a roa a‘e o te evanelia a Iesu Mesia ua haapapûhia mai na roto i te Orama Matamua a te peropheta Iosepha Semita i te matahiti 1820. Ua papa‘i te peropheta : « Ua ite atura vau e piti taata ; to raua teatea e te hanahana a ti‘a noa’i raua i ni‘a a‘e ia’u i roto i te reva ra. Ua parau mai te hoê o raua ia’u, ma te faatoro atu i to’na rima i ni‘a i te tahi, e ma te faahiti i to’u i‘oa, i te na ôraa mai e—O Ta’u Tamaiti Here Teie. A faaroo Ia’na ! »⁴

Na teie iteraa a te tamaiti ra Iosepha, tei apeehia e te tahi faahou mau orama e mau heheuraa e rave rahi, i heheu mai e, te vai mau nei te Atua ; Te Metua e Ta’na Tamaiti, o Iesu Mesia, e piti na taata taa ê ma te tino taa ê ; e ua hamanihia te taata i te hoho‘a o te Atua ; e to tatou Metua i te Ao ra o te Metua mau ïa o Iesu Mesia ; e te tamau nei te Atua i te faaite Ia’na i te taata ; e mea fatata roa te Atua e te mana‘ona‘o nei Oia ia tatou ; e te pahono nei Oia i ta tatou mau pure.

Noa’tu â e mea varavara teie huru fâraa no te Metua e no te Tamaiti i roto i te mau papa‘iraa mo‘a, te mea faahiahia ra o te Orama Matamua, o te tu‘atiraa ïa e vai ra e te tahi atu mau ohipa i tapa‘ohia i roto i te mau papa‘iraa mo‘a.

I roto i te Faufaa Apî, ei hi‘oraa, te tai‘o nei tatou i te iteraa papû hopea a Setephano a maratirihia ai oia. Ua parau oia, « inaha, te ite atura vau i te ra‘i ua vevetehia, e te Tamaiti a te taata i te tiaraa i te rima atau o te Atua ra ».⁵

I roto i ta’na orama rahi i te motu ra no Patmos, ua ite te aposetolo Ioane i « te Fatu ra to te Atua Mana hope ra »⁶ na reira atoa te Arenio a te Atua, tei « hoo… ia matou… i [To’na] iho na toto ».⁷

I roto i te Buka a Moromona, te ti‘a hanahana nei te haapiiraa tumu no te Metua e no te Tamaiti ei iteraa papû i te pae o te Bibilia Mo‘a. Te faati‘a nei te Buka a Moromona i te fâraa o to tatou Faaora i te mau ati Nephi, i reira te reo o te Metua, i mua i na ati Nephi e 2 500, i omua i te Mesia tei ti‘a faahou mai : « Inaha, o tau Tamaiti here, ua mauruuru roa vau ia’na, ua haamaitai hoi au i to’u i‘oa ia’na ; a faaroo mai ia’na ».⁸

I roto i na buka evanelia e maha, te faahiti nei te Mesia Iho i te parau no To’na Metua i te Ra‘i a 160 taime, tapiri i te reira, i te taime o Ta’na taviniraa poto, toru mahana, i rotopu i te mau ati Nephi, mai faati‘ahia i roto i te Buka a Moromona, e 122 taime To’na faahitiraa i te parau no To’na Metua.

Ei hi‘oraa, i roto i te Mataio, ua na ô Iesu, « e ore te feia e parau mai ia’u ra e, E te Fatu, e te Fatu, e hope paatoa i te tae i te basileia ra o te ao, o te taata râ i haapao i te hinaaro o tau Metua i te ao ra ».⁹

I roto i te Ioane, ua faaite papû Oia, « eita e tia ta te Tamaiti ia rave oia ana‘e ihora, maori râ o ta’na i ite i te Metua i te raveraa ra ».¹⁰

E i roto i te Luka, ua parau Oia, « E tau Metua, te tuu atu nei au i tau varua i to rima na ».¹¹

I te mau taime atoa ua faahiti te Fatu i te i‘oa o To’na Metua i te Ao ra, ua na reira Oia ma te tura rahi roa ino e te auraro papû.

A parau ai au i te reira, e mea maitai e, aita e hape. O Iesu Mesia te Iehova rahi, te Atua no Iseraela, te Mesia i fafauhia ; e no Ta’na Taraehara rahi, o Oia to tatou Faaora e te Ora o teie nei ao. No’na ua parau te aposetolo Paulo, « O te hopea iho â ïa, e pûpû atu ai [te Mesia] i te basileia i t eAtua, i te Metua ra ; ia hope roa te mau hau, e te mana, e te puai i te faa ore hia e [te Mesia] ».¹²

I te pô na mua a‘e i te Taraehara a te Faaora, ua pûpû Oia i Ta’na Pure arai u‘ana i To’na Metua. Ua pure Oia :

« Aore hoi au i pure ia ratou [Ta’na mau aposetolo] ana‘e nei, i te feia atoa râ e faaroo mai ia’u i ta ratou ra haapiiraa.

« Ia riro ratou atoa ei hoê ; mai ia oe, e tau Metua, i roto ia’u nei ra, e mai ia’u hoi i roto ia oe na, ia hoê atoa ratou i roto ia tâua, ia faaroo to te ao e na oe au i tono mai.

« E ua horoa vau i te hinuhinu no ratou i ta oe i ho mai no’u ra, ia riro ratou ei hoê mai ia tâua hoê nei ».¹³

E tino taa ê to te Metua e to te Tamaiti, are‘a râ, ua tahoê maitai roa Raua e ua hoê i roto i te mana e i roto i te opuaraa. E ere teie hoêraa i faaherehere-noa-hia no Raua ; aita, ua hinaaro Raua i teie hoêraa no te mau taata atoa o te pee e o te haapa‘o mai i ta Raua mau faaueraa ma te pûpûraa ia ratou iho.

E mea nahea te taata imi mau i te Atua e mâtau ai i te Metua e i te Tamaiti ? Ua fafau to tatou Faaora, « na te Faaa‘o râ, na te Varua maitai ra… e haapii mai ia outou i te mau mea atoa ».¹⁴

I roto i te Buka a Moromona, a paraparau ai oia no te haapiiraa tumu no te Mesia, ua parau o Nephi e, e riro te Varua Maitai i « te faaite i te Metua raua o te Tamaiti ».¹⁵

Parau mau, e pou mai te mana e aore râ te faaûruraa o te Varua Maitai i te tahi mau taime, ia au i te hinaaro o te Fatu, i ni‘a i te taata atoa noa’tu te huru o ta’na haapa‘oraa. Te faito hope râ o te reira, oia ho‘i te horo‘araa i te Varua maitai, e tae noa mai ïa i muri mai a farii ai te taata « i te aau tatarahapa e te varua mărû »,¹⁶ te mau oro‘a o te bapetizoraa e te horo‘araa i te Varua Maitai¹⁷ na roto i te tuuraa rima. No teie mau oro‘a mo‘a e te tahi atoa, e ravehia ïa te reira i raro a‘e noa i te faatereraa e te mana o te autahu‘araa a te Atua. E no reira, te haapiihia nei tatou e :

« E o teie autahu‘araa rahi a‘e ïa o te haapao i te evanelia e o te mau hoi i te taviri no te mau parau aro no te basileia, oia ïa te taviri no te ite i te Atua.

« No reira, i roto i te mau oro‘a no te reira, te mana no te huru Atua e faaitehia mai ai ».¹⁸

Ia hi‘ohia i roto i to’na maramarama mau, ua riro te haapiiraa tumu no te Metua e no te Tamaiti ei haapiiraa tumu no te utuafare mure ore. I ora na te taata atoa na mua a‘e ei tamarii varua i piha‘i iho i te na metua i te ra‘i,¹⁹ e o te Mesia te Fanau Tahi a te Metua i roto i taua utuafare i te ra‘i ra.²⁰

E no reira, tei ia tatou atoa nei ïa. E mau tamarii tatou na to tatou Metua i te Ao ra.

Ua parau te peresideni Ezra Taft Benson ma te hi‘oraa tohu, « Aore e mea, a haere ai tatou na roto i te paruru i te tahi a‘e pae, e faahitimahuta rahi a‘e ia tatou i te iteraa mai e, ua mâtau maitai tatou i to tatou Metua [i te Ra‘i] e ua mâtau tatou i to’na hoho‘a mata ».²¹

Ua haapii au e, eita e nehenehe e faaite atu na roto i te reo o te taata i teie mau mea o te ite-noa-hia na roto i te Varua Maitai e te mana o te Atua. E e mea na roto i teie varua vau e faaite nei i to’u iteraa papû no te parau mau, no te fatataraa e te maitai o to tatou Metua Mure Ore e o Ta’na Tamaiti mo‘a ra, o Iesu Mesia. I te i‘oa o Iesu Mesia ra, amene.