Kau ni Kosipeli ki Vuravura Taucoko

Na veiqaravi vakatamata ni iVakabula e sa cava. Na nona vakararawataki e Kecisemani kei na kauveilatai sa oti. Eda vulica mai na Cakacaka 1 ni: A veiqaravi tu o Koya me 40 na siga ni oti na Nona Tucaketale mai na Mate, ka “vakaraitaki koya” vei ira na iApositolo ka “vosataka na veika ni matanitu ni Kalou” (Cakacaka 1:3).

A tukuna vei ira o Koya ni “dou na rawata na kaukauwa ni sa lako mai vei kemudou na Yalo Tabu: dou na qai dautukuni au mai Jerusalemi, kei Jutia taucoko, kei Samaria, ka yacova na iyalayala kei vuravura” (Cakacaka 1:8).

Ni oti vakalekaleka toka ga, “sa qai kau cake; a sa dua na o sa tabonaki koya mai na matadra.

“Ia ni ra sa rai matua ki lomalagi, ni sa lako yani ko koya, raica, e le rua na tamata sa tu voleka vei ira erau vakaisulu vulavula;

“A rau sa kaya, Oi kemudou na kai Kalili, dou sa tu ka rai matua ki lomalagi ena vuku ni cava? ko Jisu oqo ko koya sa kau tani cake vei kemudou ki lomalagi, ena lako tale mai vakakina me vaka dou sa raici koya ni sa lako ki lomalagi” (Cakacaka 1:9–11).

Ena lako tale mai vakaidina na iVakabula ena iKarua ni Nona Lako Mai, ia ena gauna oqo, me na vakau yani na kosipeli i Jisu Karisito ki na “iyalayala kei vuravura.”

Eda vulica e dua na ivakaro bibi mai vei Maciu ena nodratou kauta na iApositolo na kosipeli ki vuravura taucoko:

“A sa lako mai ko Jisu ka vosa vei ira, ka kaya, Sa soli mai vei au na lewa kecega mai lomalagi kei vuravura.

“O koya mo dou qai lako ka vakalotutaki ira na lewe ni veivanua kecega, ka papitaisotaki ira ena yaca ni Tamamudou, kei na Luvena, kei na Yalo Tabu” (Maciu 28:18–19).

Ena gauna e tekivu kina na Lotu, enagauna ni nona bula vakayago na Turaga, e a kau na kosipeli kivei ira walega na kawa ni Isireli; ka qai vakatakilai vei Pita, na iliuliu ni iApositolo, ni sa yaco mai na gauna me sa na kau kina na kosipeli mai na taudaku kei Isireli ki vei ira na Matanitu Tani. Na ika 10 kei na ika 11 ni wase ni Cakacaka e vukei keda meda kila deivaki na iwalewale kei na ituvatuva a gadrevi taumada me vakarabailevutaki kina na Lotu vei ira e vuqa na luve ni Kalou ka sa vakatakilai kivei ira na kena veiliutaki kei na lewenilotu raraba.

Ena vakayagataki nei Konilio, e dua na kai Matanitu Tani, ka sotia, ka tamata vinaka, a vukei Pita na Turaga me kila ni kosipeli ena vakau kivei ira na Matanitu Tani, e dua na vakanananu vou ka dua tani vei ira na Yalododonu ni siga oya. A lako mai vei Pita, na iliuliu ni iApositolo, na ivakatakila ni kena caka na veisau ena cicivaki ni Lotu. Eda kila ni a qai curumaki vakatotolo sara na kosipeli ki vei ira na Matanitu Tani.

Na ivakaraitaki ni rabailevu ni Lotu ena gauna oya na nona saumaki o Paula, ka a yaco me dua na iApositolo cecere ki vei ira na Matanitu Tani. A yacovi koya e dua na raivotu ena nona ilakolako ki Tamasiko, ka raica kina e dua na rarama ka rogoca e dua na domo, veivutunitaka na nona ivalavala ca, ka qai kacivi mai vua na Kalou (raica na Cakacaka 22:6–18) ka yaco me dua na veivakaukauwataki vakaiyanaqa ena vakatetei ni kosipeli i Jisu Karisito.

Meda toso mada ena 1,800 na yabaki ki liu ena gauna ni Veivakalesuimai ni kosipeli, se na vakalesui tale ni veika taucoko ni se bera na iKarua ni Lesumai. Au vakadinadinataka ni ena vuku ni Parofita o Josefa Simici sa vakalesui mai kina na Lotu ka tomani tiko na kena tosoi ki liu mai na veidusimaki ni Veiliutaki Taumada kei na Kuoramu ni iApositolo Le Tinikarua. Na nodratou ivakaro ena kau ni kosipeli ki na vuravura e tautauvata saraga kei ira na iApositolo ena gauna makawa.

Mai na gauna a tuvalaki kina na Lotu i Jisu Karisito ni Yalododonu Edaidai ena 1830, sa toso vakusakusa tiko na Lotu ena takosovi ni vuravura mai na matanitu ki na matanitu, itovo ni vanua ki na itovo ni vanua, tamata ki na tamata ena gauna ga ni Turaga.

Ena 1978, salamuria na tauyavutaki ni ituvatuva ni ivakatakila mai vua na iApositolo liu, ena gauna oqo o Peresitedi Spencer W. Kimball, a lako mai kina na ivakatakila ena gauna o ya me soli na veivakalougataki ni matabete vei ira kece na tagane bula kilikili taucoko e veiyasai vuravura. Sa kena ibalebale nikua oira taucoko na luvena na Tamada mai Lomalagi e vuravura raraba sa na rawa ni ra vakaitavi ena cakacaka taucoko ni veivakalougataki ni kosipeli vakalesumai. Sa na veiganiti dina ki na matanitu ni Kalou e vuravura ena veisiga rorova tiko na iKarua ni Lesumai i Karisito.

Ena rai vakatamata, au a se qai kacivi ga me’u peresitedi ni kaulotu ka a vakavakarau tiko o Sisita Dickson kei au me keirau kauta na neitou matavuvale ki Mexico ni sa tukuna vei au o Elder Richard G. Scott, ka lewe tiko ni Vitusagavulu ena gauna oya, na kena yaco mai na ivakatakila bibi oqo. Au vakananuma na tuturu ni wai ni mataqu ni a tukuna tiko vei au na ka a yaco. E sega na vosa me vakaraitaka na noqu marau ka ni’u kila ni sa dodonu ka ni sa basika mai na gauna mera na vakayagataka kina na tamata kecega na veicakacaka vakalotu, veiyalayalati, kei na veivakalougatataki ni kosipeli.

Oya ena 35 na yabaki sa oti, ka’u a sega ni kila vakamatata tu ena gauna oya ni’u na mai vakayagataka e vica na yabaki ni noqu veiqaravi vaka-Vitusagavulu ena iWasewase ni Lotu ni Ra kei Aferika ena kedra maliwa na tamata vakabauta ka yalodina ka na yaco me na rawai sara na nodra bula mai na ivakatakila ni 1978 ena matabete. Au a vakaitikotiko kei Sisita Dickson mai kea me va na yabaki, kei na veika e sotavi mai kina e sa totoka dina ka veisau bula baleti keirau.

Vakatamata, era vakabauta na Kalou na kai Ra ni Aferika, ka sega saraga ni ra madua laka na vakatakilai kei na wasei ni nodra vakabauta kivei ira tale eso, ka tiko vei ira na igu ni veiliutaki gugumatua. Era sa lako vakayadrau tiko mai ki na Lotu ka ra vakaduri ena veimacawa se vaka eso na tabanalevu se tabana ena dua na vanua ni iWasewase e Ra kei Aferika vata, ni volekata na vei kisi yadua, na veiliutaki taucoko vaka-Aferika ena matabete kei na mataisoqosoqo.

Na noqu vakanuinui me rawa ni ko curu vata kei ira na Yalododonu ki na valetabu e Aba, Nigeria, se Accra, Ghana, na vanua o na vakila kina na nodra yalayala na Yalododonu ka mai kilai iratou na taucoko na mataveiliutaki vaka-Aferika ena valetabu. Se meu na rawa ni vakatakilai iko ki na Vitusagavulu ni iWasewase e Aferika, ka ra tiko vata kei keda oqo ena Vale ni Koniferedi edaidai ka ra vunilawa, parofesa, ka manidia vakabisinisi, se o ni sa veikilai beka kei ira na iliuliu ni iteki kei na tabanalevu vaka-Aferika kei na nodra matavuvale.

Mai Aferika raraba ni ko curu ena mataisoqosoqo ni Matawilivola ni Sigatabu, se kalasi ni matabete sa dua na ka tabu me sotavi ka ni ra vakamuria donu tu na lewenivuli ni Lotu ka levu sara na nodra kila deivaki na kosipeli, ivakavuvuli, kei na veivakavulici mai na Yalotabu.

Sa vagolei tiko na kosipeli e Aferika ki na dua na matatamata mamarau, ka sega ni vakaogai mai na veidai ka ra_wa e levu sara na bula ena Ra. Era sega ni kauwaitaka soti na iyau vakavuravura tawayalani.

Sa dau tukuni tu me baleti ira na kai Aferika ni “tiko vakalailai sara vei ira na ka e sega soti na betena kei na veika e levu sara ka vakabetena cake.” Era sega soti ni taleitaka na vale lelevu kei na motoka totoka ia e taleitaki vakalevu cake na nodra kila tiko na Tamadra Vakalomalagi kei na Luvena, o Jisu Karisito, kei na taukeni ni matavuvale tawamudu. Me ivakatakilakila dina ni nodra vakabauta, sa laveti ira cake tiko na Turaga ena veisala sa vakaibalebale.

Na nodra kilai me vakataki keitou, keitou sega ni kurabui ni na yaco mera tiki bibi ni kena vakarabailevutaki na Lotu i Jisu Karisito ena iotioti ni gauna. Me vaka ga e kaya o Taniela, na parofita ni Veiyalayalati Makawa, ena nona raitayaloyalotaka na matanitu ni Kalou ena iotioti ni gauna “ni na qiqi yani me vaka e [dua]na vatu sa kavida mai na ulunivanua ka sa [sega ni ta ena liga], io ena roboti vuravura taucoko” (V&V 65:2), e sa veisotari vakavinaka dina ni o ira na tacida kei na ganeda ni Aferika mera na dua na tiki bibi ni kena vakasinaiti na parofisai oya kei na ivakatakila me yaco vakakina ena salamuria na ituvatuva sa tauyavutaka na Turaga.

Au vakadinadinataka ni lomani ira kece na Luvena na Tamada Vakalomalagi, ni o Jisu na Karisito, ka sa soli rawa tu na kosipeli vei keda kece, vei ira na bula kei ira na mate. Ena yaca tabu i Jisu Karisito, emeni.