Ebangkelio el mora Beluulechad el Rokir

Mla er a Elder John B. Dickson

Er a Seventy


A Ikelsia a mla meleketek er a beluulechad er a chelsel a bek el beluu, siukang el mora siukang, rechad el mora rechad er sel ngii a temel a Rubak.

A urerel Osobel er tial beluulechad a mlo merek. A ringel le blo er ngii er a Gethsemane me a kerus a mlerekui. Kede suuebii er a chelsel a kot el bliongel er a Rrellir el kmo: Ngii a ulsisechakl el okeua el klebesei ruriul er a Okiis er a Kodall, el “mle ues” er a Reapostol e “millekoi a tekoi … el mo dubech el kirel a rengedel a Dios” (Rrellir 1:3).

Ng dilu er tir el kmo “te mo nguu a klisiich, ea uriul ea Chedaol Reng a mei er kemiu: e ko mo sioning er ngak er a beluu er a Jerusalem, me a chelsel a Judea, me a Samaria, me a ikel cheroid el beluu er a beluulechad” ( Rrellir 1:8).

Ea uriul er tiang, “e ngilasech el mo er bab; ea eabed a milertii meng mlo diak lesang.

“Me tia er a le sal lomes el bedul a babeluades e lorael mo er bab, ea, reterung el chad loubail a becheleleu a dilechor bita er tir;

“E dilu el kmo, Kemiu el chad er a Galilee, ngera me kom dechor lomes el bedul a babeluades? Ngika el osisiu el Jesus, el ngosecha el mora babeluades, a lmuut el mei er a osisiu el teletael el kemiu a mla mesang el ngosecha el mora babeluades” ( Rrellir 1:9–11).

Ng klemerang, a Osobel a lmuut el mei er sel Ongeru el Lemei er Ngii, eng di chelecha el taem, ea ebangkelio er a Jesus Kristo a mo oberk el mora “ikel merkelel a beluu er a beluulechad.”

Ngara Mateus e kede suuebii a tokubets el oderuchel el mora Reapostol el nguu a ebangkelio el mora rokui el beluu:

“Me a Jesus a mlei e mengedecheduch er tir el kmo, A rokui el klisiich er a eanged me a chutem a kulab.

“Morael el mong, e molisechakl a rokui el beluu, e molecholb er tir el ngara ngklel a Chedam, me a Ngalek, me a Chedaol Reng” (Mateus 28:18–19).

Sera uchelel a Ikelesia, er a ngara mong el taem, ea ebangkelio a di mlora blai er a Israel e merekong; eng di a ocholt a mlora Petrus, el ngarbab el Apostol, el kmo ng mla mo er sel taem el ebangkelio a mora rechad er a Israel me a dirrek el Gentiles. Sel 10th me a 11th el bliongel er a Rrellir a ngosukid el mo medengelii tial teletael el uchul ea berekel a Ikelesia el mora rokui el ngelekel a Dios a mlo mocholt el mora remerreder me a rechedal a ikelesia.

A Cornelius, el mle Gentile, e merreder er a klsoldau, e ungil chad, ea Rubak a ngilseuir a Petrus el mo medengei el kmo a ebangkelio a kirel mora re Gentiles, el ngii a mle beches e ngodech el teletael el mora re Santo er sel taem. Tial ocholt el kirel a ngeldechel a teletael er a chelsel a Ikelesia a mlei er a Petrus, el ngarbab el Apostol. Kede medengei el kmo a ebangkelio a kmal dim le mereched el mora belurir a re Gentiles.

A olchotel a berekel a Ikelesia er sel taem a sel beltel a Paulus, el ngii a kmal mlo mesisiich el Apostol el mora re Gentiles. Ng milsa ues er a le ngara omerolel el mora Damascus, el milsa llomes e rongesii a ngor, e mlo ouchel a rengul er a kngtil, e mlo kedong er a Dios (mesa Acts 22:6–18) e kmal mlo klou a klisichel lomerk er a ebangkelio er a Jesus Kristo.

Chelecha domakes el bedul uchei e domes er a chelsel a tal teletael me a eai el dart el rak el mo er sel taem er a Olutel ebangkelio, malechub a oulutel a rokui el tekoi ruchei er a Ongerung el Lemei. A kuchais el kmo ngokui a Profet Joseph Smith ea Ikelesia a mla moluut e melemolem el omakes el bedul uchei el ngara cheungel a dereder er a First Presidency me a Chelechad er a Teruich me a Terung el Apostol. A oderchelir el melai er a ebangkelio el omerk er a ebangkelio el mora beluulechad a kmal di osisiu tir me a Reapostol er a recheuodel.

Meng sel taem er a le meteketek a Ikelesia er a Jesus Kristo er a Uriul-klebesei el Santo er a 1830, ea Ikelsia a mla meleketek er a beluulechad er a chelsel a bek el beluu, siukang el mora siukang, rechad el mora rechad er sel ngii a temel a Rubak.

Sera 1978, loltirakl er a mla moterekokl el teletael er a ocholt el mora re ngarbab el Apostol, er a taem er a President Spencer W. Kimball, ea ocholt a mlei el kirel a priesthood el mlo sebechir a rokui el klikiid el sechal er a beluulechad el mo nguu a priesthood me a ikel bek el klengeltengat er a mla moluut el ebangkelio. Tiaikid el taem, e diak el di el betok ng dirrek el rokui el ngelekel a Chedam er a Babeluades a sebechir el mo ngmai aikel rokui el klengeltengat er a ebangkelio. Ng meral tabesul el teletael er a rengedel a Dios el ngara beluulechad ruchei er a Ongerung el Lemei a Kristo.

A kuk ngak, er a ak dirk mlokedong el mo merredel er a mission ea Sister Dickson me ngak a milngedmokl er a telungalek er kemam el mora Mexico ea Elder Richard G. Scott, el tiaikid el taem eng mle chedal a seventy, a silbedak er a ocholt el merael mei. Ak dobedebekak el mlo merael a iuechel a medak er a louchais er ngak er a teletael dilubech. Ng mlo imis el mesubed a renguk e ele kmle medengei el k mo tiaikid a ungil e merema sel taem el rokui el chad a mo er ngii a techellir el ngmai a rokui el chedaol ruoll, telbiil, me a klengeltengat er a ebangkelio.

Tia okedei me a eua el rak er a memong, el dimlak kungil medengei el kmo ak mo chemoit a sesei el rak er a urerek er a Seventy el ngara Africa West Area er a Ikelesia el teloi er a roumerang, blak a rengrir el chad el klengar er tir a mo chelsechusem er sel ocholt el mlocholt er a 1978 el kirel a priesthood. A Sister Dickson me ngak a mla kiei er sei el eua el rak, el klebokel el teletael el mla ngmodech a klengar kemam.

Tirkal chad, er a West Africa a oumerang er a Dios, el kmal diak el merur louchais er a klaumerang er tir el mora rebebil, e kmal klou a techellir el merreder. Te obdois el mei er a Ikelesia, e bek el sandei el mokdubech a beches el wards me a branch er tiaikid el beluu er a Africa West Area, e oumesingd er a taem, e te di rechad er a Africa oba priesthood e ngara omerreder er a chelsel aikel telengtengil a ikelesia.

A kuureng ulekum me kom teloi er a re Santo er sel templo er a Aba, Nigeria, malechub a Accra, Ghana, el mesa sel blakelreng er a re Santo e mo medengelterir a kmal di chad er a Africa el ngara omerreder er a templo malechub a chad er a Africa el chedal a Area Seventy, el teloi er kid er chelechal sils er tial Conference Center el chad er a llach, brobesong, merreder a siobai, malechub a ko mo medengelterir a rechad er a Africa el merreder a stake me a ward me a dirrek el telungalek er tir.

Me a chelsel a Sandei Skuul, telengtengil a ikelesia, malechub a klas er a priesthood a kmal chedaol teletael le te oltirakl er a teletael er a omesuub er a Ikelesia e ngarngii a mesisiich el klemedengei er a ebangkelio, osisechakl, me a omesuub lokiu Chedaol Reng.

A ebangkelio er a beluu er a Africa a loba rungil a rengrir el chad, el diak el sal simbai el kirel a ues er a ikrel el ngii a kuk kmal teletael er a klengar er tirkel ngara Diluches. Te diak el simbai el kirel a betook el kloklel a beluulechad.

Me te melekoi er a rechad er a Africa el kmo “te olab a kesai er a ikel diak el sal meklou a belkul e olab a betok er a ikel meklou a belkul.” Te diak el semeriar a meklou el blai me a ungil mlai e bai semeriar el mo medengelii a Chedam er a Babeluades me a Ngelekel, el Jesus Kristo, me a diak a ulebengelel telungalek. Me a olchotel a klaumerang er tir, ea Rubak a mesebechakl er tir er a merael ngarngii a belkul teletael.

Me sel bo dodengelterir, eng diak el mechas a rengud el kmo te meral meklou a belkrir el kirel a berekel a Ikelesia er a Jesus Kristo er a uriul klebesei. A Doctrine and Covenants a mesaod el kirel a Daniel, el Profet er a Uodel Renged el milsa rengedel a Dios er a uriul klebesei el melitai el mekelkelii a beluulechad, el uaia bad el mla oldengelengel er a risois el diak a chim lorkedii meng melitai el mo ruchei, el di merekmo lokekii a beluulechad el rokir (mesaD&C 65:2), a kmal chatter er tirkal odam me a odos er kid er a Africa a meklou a belkrir el kirel sel ulaoch me a ocholt el uchul eng motirakl a teletael el Rubak a mla kudmeklii.

A kuchais el kmo a Chedam er a Babeluades a betik a rengul er a roklui el Ngelekel, ea Jesus a Kristo, ea ebangkelio a mora rokui el chad, a re ngar me a re mla mad, el ngara chedaol ngklel a Jesus Kristo, amen.