Te evanelia i to te ao atoa nei

Ua hope roa te taviniraa tahuti a te Faaora. Ua oti To’na mamae i Getesemane e i ni‘a i te satauro. Te haapii nei tatou i roto i Te Ohipa, te pene hoê e : Hau i te 40 mahana to’na taviniraa i muri mai i To’na Ti‘a-faahou-raa, « i te hi’ohi’o-raa-hia » e te mau aposetolo e « te parauraa… i te parau o te basileia o te Atua » (Te Ohipa 1:3).

Ua parau Oia ia ratou e, « E noaa râ to outou mana i te Varua Maitai ia haere mai i ni‘a iho ia outou : E ei ite hoi outou no’u i Ierusalema nei e Iudea’toa hoi e ati noa‘e, e Samaria, e tae noa’tu i te hopea o te fenua ra » (Te Ohipa 1:8).

I reira noa iho, « rave hia’tura oia i ni‘a, e vehia maira oia e te ata moe atura oia i to ratou mata.

« E tei to ratou tiatonu maite raa i ni‘a i te rai i te pee raa’tu oia i ni‘a ra, inaha, te ti‘a noa maira e toopiti pue taata i piha‘i iho ia ratou ma te ahu teatea ;

« O tei parau mai ïa ia ratou e, E te mau taata o Galilea nei, eaha outou i ti‘a noa’i e i tiatonu maro ai i ni‘a i te rai ra ? o Iesu nei â, tei rave hia a‘enei i ni‘a i te rai, e hoi mai ïa mai te reira’toa ra, mai ta outou i ite atu ia’na i te reva raa’tu i ni‘a i te rai ra » (Te Ohipa 1:3).

Oia mau, e ho‘i faahou mai te Faaora i To’na Tae-piti-raa mai, e tae roa’tu i te reira ra taime, e porohia te evanelia a Iesu Mesia « tae noa’tu i te hopea o te fenua ra ».

Mai roto mai ia Mataio te haapii nei tatou i te hoê faaue taa ê i te mau aposetolo ia faatae i te evanelia i te mau nunaa atoa :

« Ua faafatata maira Iesu, na o maira ia ratou, O te mana’toa i te rai e te ao atoa nei ua pupuhia mai tei ia’u ana‘e.

« E teie nei, e haere outou e faariro i te mau fenua’toa ei pipi, a bapetizo atu ai ia ratou i roto i te i‘oa o te Metua, e no te Tamaiti, e no te Varua Maitai » (Mataio 28:18–19).

I te mau mahana matamua o te Ekalesia, i te afa ti‘a o te mau tau ra, ua faataehia te evanelia i te utuafare o Iseraela ana‘e ; e i muri iho ua tae mai ia Petero ra, te aposetolo matahiapo, te heheuraa e, ua tae te taime no te rave i te evanelia i ô atu i te utuafare o Iseraela, i te Etene ho‘i. Te haamaramarama nei te mau pene 10 e te 11 no Te Ohipa i te tereraa e te arata‘iraa na roto i te reira e tupu ai te haaparareraa i te Ekalesia i te tahi atu mau tamarii a te Atua, e ua faaitehia te reira i te mau feia faatere peresideni e i te mau melo atoa.

Ma te faaohipa ia Korenelio, no roto mai i te nunaa Etene, e raatira hanere e e taata maitai ho‘i, ua faatae te Fatu i ni‘a ia Petero i te mana‘o e, e haere atu te evanelia i te mau Etene atoa ra, e mana‘o apî ïa te reira e te faahuru ê atoa i te feia mo‘a i tera ra tau. Te heheuraa no te taui i te faanahoraa i roto i te Ekalesia, ua tae mai ïa ia Petero ra, te aposetolo matahiapo. E ua ite tatou e, ua purara oioi atura te evanelia na roto i te mau nunaa Etene atoa.

Te hoê hi‘oraa no te parareraa o te Ekalesia i tera ra tau, o te faafariuraa ïa o Paulo, tei riro mai ei aposetolo rahi i tonohia i rotopu i te mau Etene. E orama ta’na i farii a tere ai oia i Damaseko, ua ite ho‘i oia i te hoê pou maramarama e ua faaroo oia i te hoê reo, ua tatarahapa atura i ta’na mau hara e ua piihia e te Atua,(hi‘o Te Ohipa 22:6–18) e mai reira mai, ua riro ei puai faahiahia no te haaparare i te evanelia a Iesu Mesia.

I teie nei, e fariu tatou e 1 800 matahiti i muri iho, i te taime no te Faaho‘i-faahou-raa mai i te evanelia, e aore râ te faaho‘iraa i te mau mea atoa hou te Tae-piti-raa mai. Te faaite papû nei au e, e mea na roto i te peropheta Iosepha Semita te Ekalesia i te faaho‘i-faahou-raa-hia mai, e te tamau noa nei te reira i te haere i mua i raro a‘e i te faatereraa a te Peresideniraa Matamua e a te Pŭpŭ no te Tino Ahuru Ma Piti Aposetolo. Te faaue no ratou, oia ho‘i, ia faatae i te evanelia i to te ao atoa nei, tera mau ïa o to te mau aposetolo i tahito ra.

Mai te tau mai â o te faanahoraa o Te Ekalesia a Iesu Mesia i te Feia Mo‘a i te Mau Mahana Hopea Nei i te matahiti 1830, ua nuu tamau noa te Ekalesia i roto i te ao, mai tera fenua i tera fenua, mai tera hiro‘a tumu i tera hiro‘a tumu, mai tera nunaa i tera nunaa ia au i te talena a te Fatu e To’na taime.

I te matahiti ra 1978, ia au i te arata‘iraa tei haamauhia no te heheuraa na roto i te aposetolo matahiapo, oia ho‘i te peresideni Spencer W. Kimball, ua tae mai te hoê heheuraa, i tera taime, no te haamatararaa i te mau haamaitairaa o te autahu‘araa i te mau tane ti‘amâ atoa na te ao atoa nei. Te auraa ra, i to tatou nei anotau, te taatoaraa atura ïa o te mau tamarii a te Metua i te Ao ra i ni‘a i te fenua o te nehenehe e amui mai i roto i te mau haamaitairaa o te evanelia tei faaho‘i-faahou-hia mai. Auê ïa ohipa ti‘a no te basileia o te Atua i ni‘a te te fenua nei i te mau mahana ho‘i fatata i te Tae-piti-raa mai o te Mesia.

No’u iho, no pii-noa-hia mai au ei peresideni misioni, e te faaineine ra maua te tuahine Dickson i te reva e to maua nei utuafare i te fenua Mehiko, tae mai nei Elder Richard G. Scott, e melo no te Hitu ahuru i tera taime, e ua parau mai ia’u no ni‘a i teie heheuraa taa ê. Te haamana‘o ra vau i to’u roimata i te taheraa a faati‘a mai ai oia i te mea i tupu. Aita e nehenehe e parau to’u oaoa, ua ite ho‘i au e, ua tano roa te reira, ua tae mau â te taime no te taata atoa ia fana‘o i te mau oro‘a atoa, te mau fafauraa e te mau haamaitairaa atoa o te evanelia.

A 35 atura matahiti i teie nei teie ohipa, aita re‘a vau i ite i taua taime ra e, tau matahiti au e tavini atu ei Hitu ahuru i roto i te Area no Afirita Too‘a o te ra, i rotopu i te hoê nunaa faaroo e te haapa‘o maitai, o to ratou ho‘i oraraa tei fana‘o mau i teie heheuraa no 1978 no ni‘a i te autahu‘araa. E maha matahiti maua te tuahine Dickson i ô, e ua riro mai te reira ei iteraa faahiahia tei taui i to maua nei oraraa.

Te nunaa no Afirita too‘a o te ra, e nunaa ti‘aturi ïa i te Atua, aore e haamâ to ratou no te parau e no te faaite atu i to ratou ti‘aturiraa ia vetahi ê, e aravihi rahi atoa ho‘i no te faatere. Hanere e hanere ti‘ahapa e tomo nei i roto i te Ekalesia, e mai te huru ra e, i te mau hepetoma atoa e piti paroisa e aore râ piti amaa te faati‘ahia nei i te hoê vahi no te Area no Afirita Too‘a o te ra, e fatata pauroa te taime, e taata tumu no Afirita ihoa no te faatere i te autahu‘araa e te mau pŭpŭ tauturu.

Ahani pai ua nehenehe ta outou e haere mai i te hiero no Aba, i te fenua Nigeria, e aore râ i Accra, i te fenua Ghana, ia ite outou i te itoito o te feia mo‘a e ia farerei outou i te peresideniraa hiero, e mau taata tumu no Afirita ana‘e. E ahani pai ua nehenehe ta’u e faafarerei ia outou i te mau Hitu ahuru area, e mau taata tumu no Afirita atoa, tei ô nei ratou i rotopu ia tatou i roto i teie pû amuiraa, e toro‘a paruru to ratou, e orometua, e faatere taiete, e ahani atoa pai ua mâtau ia outou te feia faatere tĭtĭ e paroisa e to ratou utuafare, e mau taata tumu no Afirita ana‘e.

I Afirita ma, ia haere noa’tu outou i te hoê haapiiraa no te Haapiiraa Sabati, e aore râ no te pŭpŭ tauturu e te autahu‘araa, e putapu atu outou i te hoê iteraa mo‘a, e te peehia ra te faanahoraa haapiiraa a te Ekalesia e ua rahi te maramarama evanelia, te haapiiraa e te aporaa na roto i te Varua.

I Afirita, te porohia nei te evanelia i te hoê nunaa oaoa, aita tera mau herepata e faaapiapi ra i te oraraa o te feia i to tatou nei mau pae fenua i te Too‘a o te ra. Aita to ratou mana‘ona‘oraa i ni‘a i te hororaa hopea ore ia fana‘o i te tao‘a.

Ua parauhia no ni‘a i te taata Afirita e, varavara roa ta ratou mau mea faufaa iti e rahi roa ino ta ratou mau mea faufaa rahi roa a‘e. E mea iti to ratou hiaai no te mau fare rahi e te mau pereoo anaana, are‘a râ, ua rahi to ratou hiaai ia ite i to ratou Metua i te Ao ra e i Ta’na Tamaiti, o Iesu Mesia, e ia faati‘a i te utuafare mure ore. Ei faahopearaa ohie no to ratou faaroo, te faateitei nei te Fatu ia ratou na roto e rave rahi rave‘a.

No teie ite to maua ia ratou, aita maua i maere e, e riro mai ratou ei tufaa faufaa rahi no te haaparareraa i te Ekalesia a Iesu Mesia i roto i te mau mahana hopea nei. Ia au i te orama a Daniela, te peropheta i roto i te Faufaa Tahito, no ni‘a i te basilea o te Atua i te mau mahana hopea nei, te « tere atu [ra] e tae noa’tu i te mau hopea o te ao nei mai te hoê ofai i ootihia no roto mai i te mou‘a ma te rima ore e tere atu ai, e tae noa’tu i te taime i î ai te ao nei i te reira » (PH&PF 65:2), e tano roa ïa ia mana‘o e, e riro mai to tatou mau taea‘e e tuahine no Afirita ei tuhaa faufaa no te faatupu-faaoti-raa i teie parau tohu e e tae atoa mai te mau heheuraa no te faati‘a i te reira ia au i te mau faanahoraa i haamauhia e te Fatu.

Te faaite papû nei au e, ua here to tatou Metua i te Ao ra i Ta’na mau tamarii atoa, e o Iesu te Mesia, e ua matara te evanelia i te mau taata atoa, te feia ora e tei pohe. Na roto i te i‘oa mo‘a o Iesu Mesia, amene.