Na Vuvale, Na Koronivuli ni Bula

Au a sotava e dua na goneyalewa totoka ena noqu lesu mai vakaulotu ka yaco sara i tolona na loaloa balavu ni drauniuluna. E totoka na kalevu vakaoni ni matana kei na nona matadredredre veirawai. A rawai au okoya ena imatai ni gauna au raici koya kina.

A sa tuvana tu na nona nakinaki na watiqu me na vakamau ena valetabu, dina ga ena gauna oya, na valetabu voleka duadua ena taura e dua na ilakolako ka sivia e 4,000 na maile (6,400 na kilomita).

A vakatubu marau kei na rarawa na soqo ni neirau vakamau vakalawa, ni keirau a vakamautaki ena dua na icavacava ni tikinisiga. E tukuna na turaga ka qarava na vakamau na vosa “Ia oqo au sa vakadeitaki kemudrau mo drau sa veiwatini,” ka muria mai na nona kaya, “me yacova ni tawasei kemudrau na mate.”

Ia ena yalo ni solibula keirau a tadu yani ka volia e dua na tikite ni ilakolako vakataudua ga ki na Valetabu e Mesa Arizona.

Ena valetabu, ni keirau a tekiduru sobu tiko ena icabocabo ni soro, a kaya e dua na italai vakadonui na vosa au a gadreva tu mai, ka mai vakadeitaki keirau me veiwatini ena gauna oqo kei na bula tawamudu talega.

A kauti keirau e dua na itokani ki na Matawilivola ni Sigatabu. Ni vakacagau tiko na soqoni, a tucake ka vakatakilai keirau ki na kalasi. Ni sa mai cava na soqoni, a basika mai e dua na taciqu ka keirau lululu, ka biuta ki ligaqu e dua na noti 20 na dola. Vakalailai ga, a torovi au talega mai e dua na taciqu, ka vakurabuitaki au ena nona biuta talega ki ligaqu e dua na noti. Au a vakasaqarai watiqu sara vakusakusa, ka a tiko takoso mai na rumu, ka kailavaka yani, “Blanquy, lululu vei ira taucoko!”

Sega ni bera ni keirau sa kumuna vata na ilavo ka rawa ni kauti keirau lesu tale ki Guatemala.

“Raica sa tolu na ivakatagedegede ni lagilagi se lomalagi ena matanitu vaka-silesitieli;

“Sa kilikili me vakayacori vua na tamata na cakacaka tabu vakabete, me rawata kina na ivakatagedegede e cake sara.”¹

E dua vei ira na ibole i watiqu oya na “Me rawa ni yaco na veiba, o gadreva e rua na tamata, ia au na sega ni dua vei rau.”

Sa vakamacalataka vakamatata tu na Turaga na ituvaki eso ka dodonu me na tubera na noda vakayaco-ka vata kei ira tale eso na tamata. Oqo na cikecike, vosota vakadede, yalomalua, yalomalumalumu, kei na loloma e sega ni veivakaisini.²

Na veivakacacani vakayago ena matavuvale sa dua na itovo ka sa lailai tiko mai na kena vakayacori ena so na isoqosoqo, ka da marautaka oya. Ia, eda se yawakalia tiko ga mai na vakawabokotaki ni veivakacacani vakayago. Na leqa e vu mai na ivakarau ni veivakacacani vakaoqo ena tikora na noda vakanananu, vakamavoataka na keda ituvaki, bucina na yaloca e lomada, vakalolovirataka na noda marau e loma, ka vakatawani keda ena rere.

E sega ni rauta na noda vakaitavi tiko ena soqo bibi ni vakamau vakasilesitieli. Sa dodonu meda bulataka talega e dua na bula vakasilesitieli.

Oqo e dua tale na ibole ka dau tukuna wasoma na watiqu.

Sa kila deivaki tu na iVakabula na bibi ni sere vakatabui. Ni oti na Nona vakananuma vata kei ira na Nona tisaipeli na Lakosivia, e vakaraitaka na ivolanikalou, “Ia ni ra sa sere oti, era sa lako yani ki na ulunivanua ni Veiolive.”³

Ni vosa tiko vua na Parofita o Josefa, a tukuna o Koya: “Raica au sa rekitaka sara na sere sa lagati ena yalodina; io na nodra sere na yalododonu sa nodra masu vei au, ka’u na vakalougatataki ira kina.”⁴

E veivakauqeti dina me rogoci na sere ni dua na gone lailai ka sa vakatavulici mai vua na nona itubutubu me lagata, “Au luve ni Kalou.”⁵

Na veivosa “Au lomani iko,” “Vinaka vakalevu,” kei na “Vosoti au” sa vaka na ilumu ki na yagoda. Era veisautaka na wainimata ki na yalomarau. Era vu ni vakacegu ki na bula e lomaocaoca, ka ra vakadeitaka na vakanananu malumu ni lomada. Me vaka ga na vuca ni itei mai na lailai ni wai mareqeti, ena malumu sobu yani na noda loloma ka ciba sara ni da biuta vakatikitiki na vosa kei na ivakaraitaki ni loloma.

Au vakananuma na siga eda dau vakau ivola ni dodomo kina ena posi se na noda rawa ilavo me da qirita kina na noda daulomani mai na talevoni vakavale se na noda droinitaka ka vola eso na vosa ni dodomo ena pepa rawarawa tu ga.

Edai sa vaka me iyau makawa tu na kedra irogorogo!

Na tekinoloji ni siga kei na gauna oqo esa vakatarai keda meda cakava eso na ka veivakurabuitaki. Sa vakarawarawataki na vakau itukutuku ni loloma kei na vakavinavinaka ena tex! Era cakava wasoma na itabagone. Au vakananuma ke na tomani tikoga na totoka ni ivakarau oqo kei na so tale ni sa tauyavutaki oti na noda itikotiko. E vaka oqo na itukutuku ni tex au a qai ciqoma wale tikoga mai vua na watiqu: E dua na veimoko vakalomalagi, e dua na iregu vaka na siga, kei na dua na bogi vaka na vula. Siga marautaki, au domoni iko.”

Ni’u ciqoma e dua na itukutuku vakaoqo, au tarova dredre me’u vakila niu sa tiko mai lomalagi.

E sa ivakaraitaki uasivi na Tamada mai Lomalagi ena vakatakilai ni loloma. Ena Nona vakatakila na Luvena, e a vakayagataka o Koya na vosa: “O koya oqo na noqu gone ni toko, au sa dau vinakata vakalevu.”⁶

E vakasinaiti na yaloqu ena marau ni’u raica na watiqu ni vakawilika na iVola i Momani ena veisiga. Au rawa ni vakila na nona ivakadinadina ni cakava vakakina mai na kena raici tiko na reki e matana ena nona wilika voli na veitikina ka vakadinadinataka na veiqaravi ni iVakabula.

Sa ka ni vuku vakaidina na vosa ni noda iVakabula: “Dou sa vakasaqaqara ena i Vola Tabu; ni dou sa nanuma dou sa rawata kina na bula tawamudu: ia na ivola oqo sa tukuni au.”⁷

Ena veivakauqeti ni ka oqo, au a tarogi Raquel, na makubuqu ka se qai vulica toka ga na wilivola, “Na cava o na tukuna me baleta na tuvai ni inaki me wiliki na iVola i Momani?”

A sauma okoya, “Ia, Tukaqu, e sa rui dredre. E sa ivola levu.”

Au a qai tukuna vua me wilika vei au e dua na draunipepa. Au taura mai e dua na kaloko vakaitarovi ka taura nona gauna. Au kaya, “Iko a taura ga e tolu na miniti, ia na iVola i Momani ena vosa vaka-Sipeni e tiko kina e 642 na draunipepa, o sa na gadreva e 1,926 na miniti.”

Oqo ena rawa ni vakarerei koya vakalevu cake, ka’u mani wasea na iwiliwili mai na 60 na miniti ka tukuna vua ni na gadreva ga o koya e 32 na aua me wilika kina, lailai mai na dua veimama na siga!

A qai kaya o koya vei au, “Oqori esa rui rawarawa, Tukaqu.”

Me kena itini, era a taura vakalevu cake na gauna mai na kena oqo o Raquel, na tuakana o Esteban, kei na so tale na makubui keirau baleta oqo e dua na ivola ka gadrevi me na dau wiliki ena yalo ni masumasu kei na vakasama titobu.

Ni da vulica meda taleitaka na ivolanikalou vata na gauna, eda na tukuna me vaka na Daunisame: “A kena kamikamica na nomuni vosa ki na gusuqu! Io, na oni sa sega ni kamikamica e na gusuqu!”⁸

Au vakananuma na gauna au a kaulotu oti kina, ka vakasaqara vagumatua tiko na ivolanikalou, au nanuma ni’u sa kila taucoko. Ena gauna ni neirau veidomoni, au na dau vulica vakatautauvata kei Blanguy na ivolanikalou. Au a vakayagataka e levu sara na noqu ivola lalai kei na yavu duri ni ivolanikalou me’u wasea vata kei koya na noqu kila-ka ni kosipeli. Ni oti na neirau vakamau, a tarai au e dua na vakanananu bibi ena noqu vulica e dua na lesoni levu mai vua. Au a rairai saga beka me’u vakatavulici koya ena kosipeli, ia a vakatavulici au okoya ena sala me’u bulataka kina.

Ni mai vakacavara na iVakabula na iVunau mai na Ulunivanua, a solia o Koya na ivakasala matua oqo: “Ia oqo, ko koya yadua sa rogoca na noqu vosa oqo, ka cakava, ka’u na vakatautauvatataka kei na tamata vuku, sa tara na nona vale ena dela ni vatu.”⁹

O ira era bulataka na ivakavuvuli vakasilesitieli ka kune ena ivolanikalou, era soli vakacegu kivei ira ka rarawa tu. Era kauta mai na reki kivei ira na yalolailai, veidusimaki vei ira era yali, vakacegu vei ira na lomaocaoca, kei na veituberi vakaidina kivei ira ka ra vakasaqara na dina.