Lohm uh: Lohm Lutlut luhn Moul

Sel Elder Enrique R. Falabella

Luhn Mwet Itngucul


Lesin inge ac ma puhs pac sahyac lutiyuck lun sie lohm—acn se ma kuh in oacna inkuhsrao fin facluh.

Kuhtuh pahpah ac ninac uh fahk muh oasr srihpen tahfonglac elos orwaclah in lohm selos, pa lah wacngihn lohm lutlut luhn pahpah ninac.

Ke ma pwacye uh, kain lutlut sacn oasr ac kuh in pa lohm lutlut wo se emet uh. Lohm lutlut se inge pahngpahng lohm.

Ke nga esam ma ke moul luhk met, nga esam kuhtuh pacl sacohk nga puhlakihn yurin muhtwacn kiyuck uh. Ke nga akacsruhi mwe esam inge yuruwos, kowos ac sahp esam ma kowos sifacna puhlakihn—kwewana ma engan ac ahsor; kuht etwaclah ke ma nuh kwewa.

1. Tempuhl Pa Acn Wo uh

Ke nga fohlohk liki mission luhk ah, nga sun sie muhtwacn fuhsr kahto suc insifacl sralsral ac loes nuh ke infulwacl. Muhtahl yohk, kahto ac isrwacsr lal oruh mwet sahyac in isrwacsr pac. El oruh nga in luhngse el ke pacl se emet nga liyacl.

Muhtwacn kiyuck el tuh orwaclah finsrak in pahyuck lun tempuhl, tuhsruhk ke pacl sacn tempuhl se ma fototo emet uh enenuh kuht in som mael 4,000 (6,400 km).

Kuht engan ac ahsor kwewana ke kuht macruhtlac, mweyen kuht macruht ke moul se inge muhkwena. Mwet se suc orwaclah macruht ah fahk “Ac inge nga fahk komtacl mukul ac muhtwacn pahyuck,” tuhsruhk tohkoh na, el fahk, “nuh ke misac kowos fahsrwelihk.”

Na ke kihsackuhnlah kuht sefiyac mani fal in molwelah tiket in som nuh ke Mesa Arizona Temple.

Lun tempuhl ah, ke kuht sikuck muhtuhnte ke mwe loang, mwet kuhlwacnsap oasr wal la se fahk kahs nga kena lohng uh, suc fahk muh kuht mukul ac muhtwacn pahyuck ke pacl ac ma pahtpaht.

Kawuck se el us kuht nuh ke Sacnri Skul. Ke pacl in toeni ah, el tuyak ac ahkkahlwemye kuht nuh sin kuhlahs ah. Ke toeni ah sahflah, tamuhlwel se el sunyuc ac usrukyac pouk, likiyac tala longoul se nuh loac. Tiac paht tohkoh, sie pac tamuhlwel el tahfwema pahol, ac ke lut luhk, el likiyac pac sie pwepuh in mani nuh in pouk. Nga suhlahklahk suk muhtwacn kiyuck ah, suc oasr pac infuckihl ah, ac wowo fahk, “Blanquy, srukyac poun mwet nuh kwewa!”

Kuht sa na eis mani fal kuht in fohlohk nuh Guatemala.

Doctrine and Covenants luti kuht lah ke wolacna celestial oasr kuhsrao tolu, kuh ip tolu;

In fal nuh ke acn se ma fuhlwact emet, kuht enenuh in wi akwuck se inge luhn pristut.1

2. In Akuhkuhin, Kom Enenuh Mwet Luo

Sie fahk luhn muhtwacn kiyuck uh pa “In akuhkuhin, kom enenuh mwet luo, ac ngwac tiacna sie selos.”

Leum El ahkuhtweyac ohiyac ma enenuh in kol oruh lasr yurin mwet sahyac. Pa inge kai, mongfihsrwacsr, kuhlwacng, fakpahp, ac luhngse tiac kikiacp.2

Ohiyacn ahkngal luhn mahno in sucu uh tilac arlac fusus ke kuhtuh muhtuhn facl uh, ac kuht engan kac. Tuhsruhk, kuht srwackna loes liki pacl se ma ac wacngihnlac ohiyacn ahkngal luhn nuhnak uh. Ngal ma oreklac ke kain ahkngal inge muhta na ke nuhnak lasr, ahkkolukye ohiyacsr, oruh insiyacsr in sruhnga, ahkkolukye nuhnak lasr kacsr sifacna, ac nwekkuhtlac ke sahngweng.

In wi akwuck luhn celestial macruht muhkwena tiac fal. Kuht enenuh pac in moulkihn sie moul celestial.

3. Sie Tuhlihk Suc On El Tuhlihk na Engan se

Pa inge sie pac fahk ma muhtwacn kiyuck uh kwacna fahk.

Mwet Lahngo El kahlwem ke yohk srihpen on muhtahl. Tukun El oraclah Kuhfa Ahluhkwelah yurin mwet sap Lal, ma suhmuhslah uh sruhmuhn, “Na ke elos yuck soko on in kaksyak, elos illac ac som nuh Finohl Olive.”3

Ac sramsram sel Mwet Pahluh Joseph, Leum el fahk muh El engankihn on ke insiyac uh, ac lah on luhn mwet suwohswohs uh oacna sie pruhe nuh Sel, ac elos ac fah ahkinsewowoyeyuck kac.4

Ma na wowo se in lohng on luhn tuhlihk se suc lutiyuck sin pahpah ninac kiyacl in onkihn, “Nga tuhlihk nuhtin God.”5

4. Nga Enenuh Kom in Sruokyucwi

Kahs “Nga luhngse kom,” “Kuloh na ma luhlahp,” ac “Nuhnak muhnahs nuh sihk” oacna ono se nuh ke nguhna uh. Kahs inge ekuhllah sronin muhta uh nuh ke engan. Ac ahkmihsye nguhna toasr, ac ahkpwacyelah puhla kuhlwacng luhn insiyacsr. Oacna ke mahsrihk muhnahslac ke wacngihn kof, luhngse lasr muhnahslac ac misac ke kuht tilac orekmakihn kahs kuh mukwikwi ke luhngse.

Nga esam ke kuht suhpwaclah lwacta ke post kuh ke kuht oracni kuhtuh sacn uh in pahngon mwet kuht luhngse ke sie booth in tacluhfon kuh ke kuht sroalwelah ac suhmuhslah kihsen luhngse uh ke pwepuh uh.

Mihsenge ma inge nohfohn oacna ma mahtuh uh!

Ma sasuc Technology ke pacl inge lwelah kuht in oruh ma usrnguck. Fihsrwacsr na in suhpwaclah sie text message ke luhngse ac srui! Mwet fuhsr uh oruh pacl nuh kwewa. Nga motko lah ma inge ac kuhtuh pac ohiyac kahto ac kalweniyuck ke lohm sesr uh akwucki uh. Sie text message sasuc nga eis sin muhtwacn kiyuck ah fahk angwe: “Asruhi se oacna kuhsrao, kiss se oacna faht, ac ekuh se oacna mahlwem. Lwen engan, nga luhngse kom.”

Nga tiac kuh in kahingkuhnlah puhla luhk muh nga oasr inkuhsrao ke nga eis kain pweng inge.

Pahpah tuhmwacsr Inkuhsrao El srihkasrak suwohswohs in ahkkahlwemye luhngse. Ke El ahkkahlwemye Wen Nahtuhl, El orekmakihn kahs: “Pa inge Wen kuloh nuhtihk, suc nga insewowo kacl.”6

5. Nga Luhngse Puk luhn Mormon ac Mwet Lahngo Luhk, Jisus Kraist

Nga emtucng ke nga liye muhtwacn kiyuck ah riti Puk luhn Mormon lwen nuh kwewa. Ke el oruh, nga kuh in puhla luhlahlfongi lal ke nga liye engan in ngwetngwet lal ke el riti kahs ma fahkwack ke ma kunen Mwet Lahngo.

Lahlmwetmwet na pwacye kahs luhn Mwet Lahngo: “Suk ma suhmuhslah uh; mweyen kowos nuhnkuh muh oasr moul ma pahtpaht lowos kac: ac ma suhmuhslah inge pa fahkwack keik.”7

Mokleyuck ke ma inge, nga siyuck nuh sin tuhlihk nuhtin nuhtihk Raquel, suc tuhfahna etuh rit, “Fuhkah nuhnak lom in orwaclah sie finsrak in riti Puk luhn Mormon?”

Top lal ah pa “Tuhsruhk, Pahpah mahtuh, arlac upac. Puk na luhlahp se.”

Na nga siyuck sel in riti sie sra puk. Nga is stopwatch se ac liye lah ac puhtahkah. Nga fahk, “Kom eis na minit tolu, ac ke Puk luhn Mormon Kahs Spanish sac oasr sra puk 642, na kom ac enenuh minit 1,926.”

Sahp ma inge ahksahngwengyacl kuhtuh, oruh nga srwaclihk nacmpuh se ke minit 60 ac fahk nuh sel muh el ac enenuh ao 32 in riti—srihk liki lwen se tahfuh!

Na el fahk nuh sihk, “Fihsrwacsr na pwacye, Pahpah mahtuh.”

Sahflahiyac ah, Raquel, tamuhlwel mahtuh wiyacl, Esteban, ac tuhlihk sahyac nuhtin nahtuhsr eis pacl yohk kuhtuh mweyen puk se inge enenuh in ritiyuck ke nguhnin pruhe ac nuhnak.

Ke pacl, ke kuht etwaclah in engankihn ma suhmuhslah uh, kuht ac fahk oacna mwet suhmuhslah Sam ah: “Kahs lom arulacna emwem! ahok, emwem liki na honey nuh ke oaclihk!”8

6. Tiacna Fal Kuht in Etuh na Ma Suhmuhslah uh; Kuht Enenuh in Moulkihn

Nga esam ke nga sie suc ahksahfyelah mission se, ac nga tuh suk ma suhmuhslah uh ke oaru, nga pahngon muh nga etuh ma nuh kwewa. Ke kuht ahko in pahyuckyak ah, Blanquy ac nga tuhkweni lutlutkihn ma suhmuhslah uh. Nga orekmakihn ma nga suhmuhslah ac riti tari in akacsruhi etwacack luhk ke wosasuc nuh sel. Tukun kuht pahyuck ah nga akihlen lah oasr lesin na yohk se nga etwaclah sel: sahp nga srihke in lotwel ke wosasuc, tuhsruhk el lutiyuc in moulkihn.

Ke Mwet Lahngo El ahksahfyelah Luti Finohl ah, El sang mwe luti lahlmwetmwet sac: “Ohinge kuhtwena mwet suc lohng kahs luhk inge, ac ahkos, el oacna sie mwet lahlmwetmwet, suc muhsahi lohm sel fin yot.”9

Elos suc moulkihn ip yohk celestial ma oasr in ma suhmuhslah ah ahkmihsyaclos suc kweok. Elos ahkpwacryaclos suc ahsor, kohlohlos suc tuhlac, ahkmihsyaclos suc inse toasr, ac kol suwohs elos suc suk ma pwacye.

In ahksahf:

  1. 1.

    Tempuhl pa acn wo uh

  2. 2.

    In akuhkuhin, kom enenuh mwet luo, ac nga ac tiac wi sie selos.

  3. 3.

    Sie tuhlihk suc on el tuhlihk na engan se.

  4. 4.

    Nga enenuh kom in sruokyucwi.

  5. 5.

    Nga luhngse Puk luhn Mormon ac Mwet Lahngo luhk, Jisus Kraist.

  6. 6.

    Tiac fal kuht in etuh na ma suhmuhslah uh; kuht enenuh in moulkihn.

Lesin inge ac ma puhs pac sahyac lutiyuck lun sie lohm—acn se ma kuh in oacna inkuhsrao fin facluh.10 Nga fahkwack lah wosasuc luhn Jisus Kraist ac plwacn luhn Pahpah tuhmwacsr Inkuhsrao uh sang kolyuck pwacye ke moul se inge ac olwelah ke moul ma pahtpaht, ke inen Jisus Kraist, amen.

Mostrar las referencias

  1.  

    1. Liye Doctrine and Covenants 131:1–2.

  2.  

    2. Liye Doctrine and Covenants 121:41.

  3.  

    3. Mark 14:26.

  4.  

    4. Liye Doctrine and Covenants 25:12.

  5.  

    5. “Nga Tuhlihk Nuhtin God,” Onac On luhn Tuhlihk Srihsrihk, nacmpuh 58.

  6.  

    6. Mattu 3:17; oacyacpac liye Mark 1:11; 3 Nephi 11:7.

  7.  

    7. Jon 5:39.

  8.  

    8. Sam 119:103.

  9.  

    9. Mattu 7:24.

  10.  

    10. Liye Teachings of Presidents of the Church: David O. McKay (2003), 43, 150.