Kev Cia Siab ntawm Vajtswv txoj Kev Kaj
Los ntawm Thawj Tswj Hwm Dieter F. Uchtdorf
Tus Pab Cuam thib Ob hauv Thawj Pawg Thawj Tswj Hwm
Thaum peb xav kom peb txoj kev hlub Vajtswv loj tuaj thiab xav hlub peb tus neeg zej zog ces txoj kev kaj ntawm txoj moo zoo yuav nyob ib puag ncig peb thiab txhawb nqa peb.
Qhov Rooj rau txoj Kev Kaj
Kuv muaj ib daim duab nyob hauv kuv hoob kas hu ua Qhov Rooj rau txoj Kev Kaj. Kuv ib tug phooj ywg, ib tug kos duab hu ua Johan Benthin, tau kos daim duab no; nws yog thawj ceg txheem ntseeg tus thawj tswj hwm nyob hauv Copenhagen, Denmark.
Daim duab no yog ib chav uas tsaus ntuj nti tsuas pom txoj kev kaj los ntawm lub qhov rooj uas qhib xwb. Kuv pheej xav txog qhov uas txoj kev kaj los ntawm lub qhov rooj tsis ua rau yus pom kev rau tag nrho chav ntawd---tsuas pom rau ntawm ib ncig ntawm lub qhov rooj xwb.
Kuv xav tias kev tsaus ntuj nti thiab txoj kev kaj nyob hauv daim duab no yog ib qho piv txwv ntawm lub neej. Vim nyob hauv peb lub neej hauv lub ntiaj teb no, tej lub sij hawm peb xav tias kev tsaus ntuj nti nyob ib puag ncig peb. Tej zaum ib tug uas peb hlub tas sim neej; ib tug me nyuam ua loj leeb; tej zaum peb raug mob; tej zaum nyuaj rau peb nrhiav hauj lwm thiab peb ua xyem xyav los sis ntshai; los yog tej zaum peb nyob ib leeg los sis xav tias tsis muaj leej twg hlub peb.
Tiam sis txawm peb xav tias peb poob zoo hauv lub ntiaj teb no, Vajtswv cog lus tias yuav muaj kev cia siab ntawm Nws txoj kev kaj---Nws cog lus tias nws yuav ua rau peb kom pom kev ntawm peb hauv ntej thiab coj peb tawm ntawm kev tsaus ntuj mus.
Chav uas Muaj Kev Tsaus Ntuj Puv Npo
Kuv xav qhia nej txog ib tug poj niam uas loj hlob hauv ib chav tsaus ntuj nti---kuv yuav hu nws ua Jane.
Txij thaum Jane muaj peb xyoos los, nws pheej raug ntaus, cem thiab tsim txom. Nws raug hem thiab thuam. Txhua hnub nws sawv tsis paub nws puas yuav ua neej nyob mus txog tag kis. Cov neeg uas yuav tsum tiv thaiv nws yog cov uas tau tsim txom nws los yog cia kom nws raug tsim txom.
Xwv kom nws tiv thaiv tau nws tus kheej, Jane kawm tsis muaj lub siab hlub. Nws tsis muaj kev cia siab, nws thiaj li ua siab tawv kom tsis xav txog tej kev phem no. Tsis muaj txoj kev kaj hauv nws lub ntiaj teb, nws thiaj li swm nyob hauv kev tsaus ntuj. Nws tsis muaj kev xav hauv nws lub siab vim nws niaj hnub pheej raug kev phem, nws cia li lees yuav qhov uas tsis paub lub sij hawm twg yog lub sij hawm kawg ntawm nws lub neej.
Ces thaum nws muaj 18 xyoo, Jane nrhiav tau Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Kev xyiv fab thiab kev cia siab ntawm txoj moo zoo nkag rau hauv nws lub siab thiab nws txaus siab ua kev cai raus dej. Yog thawj thawj zaug uas muaj txoj kev kaj hauv nws lub neej thiab nws pom ib txoj kev ci ntsa iab tom hauv ntej. Nws tso kev tsaus ntuj nti tseg thiab txiav txim siab mus kawm ntawv deb deb ntawm tus uas tsim txom nws. Nws cia li dim kev tsaus ntuj thiab kev phem---nws muaj kev ywj siab txais tau tus Cawm Seej txoj kev kaj siab lug thiab kev kho mob.
Tiam sis, ntau xyoo tom qab ntawd, tom qab tus uas tsim txom nws tuag lawm, Jane rov qab ntxhov siab txog tej yam phem uas nws raug thaum nws tseem hluas. Ntshe kev tu siab thiab kev chim siab loj yuav ua rau txoj kev kaj uas nws nrhiav tau lawm nyob hauv txoj moo zoo yuav raug puas tsuaj. Nws paub tias yog nws cia kev tsaus ntuj nti ntawd tswj nws lub siab, ces tus uas tau tsim txom nws yuav kov yeej.
Nws nrhiav kev pab kho mob thiab pib to taub hais tias, txoj kev kho mob kom zoo uas zoo tshaj plaws rau nws yog kev to taub thiab lees hais tias muaj kev tsaus ntuj nti--tiam sis nws yuav tsum tsis txhob nyob ntawd. Vim nws kuj paub tias muaj txoj kev kaj---thiab nws xaiv nyob ntawd.
Vim nws lub neej tsaus ntuj nti dhau los, yuav yooj yim rau Jane nrhiav kev pauj, ntxub lwm tus, los yog ua lim hiam. Tiam sis nws tsis tau ua li ntawd. Nws tsis ua raws li kev ntxias kom nws ua rau kev tsaus ntuj loj tuaj, nws tsis kam npau taws, tu siab los yog tsis kam tso kev ntseeg tseg. Tiam sis nws cia siab ntsoov hais tias nrog Vajtswv txoj kev pab ces nws txoj kev mob yuav zoo. Nws xaiv kev ci ntsa iab thiab rau siab pab lwm tus tas nws lub neej. Qhov kev txiav txim no pab nws muab yav tas los tso tseg thiab pib ua lub neej tshiab uas ci ntsa iab.
Nws los ua ib tug kws qhia ntawv, thiab hnub no, nws txoj kev hlub tau pab cov me nyuam coob heev, pab lawv paub tias lawv muaj nqi, thiab lawv tseem ceeb. Nws tiv thaiv cov qaug zog, cov uas raug kev tsim txom thiab cov uas poob siab tsis tu tsis tseg. Nws txhawb nqa thiab tshoov txhua tus lub siab nyob ib puag ncig nws.
Jane kawm hais tias txoj kev kho mob yuav los thaum peb txav deb ntawm kev tsaus ntuj nti thiab taug kev mus rau kev cia siab ntawm qhov kaj uas ci ntsa iab. Los ntawm nws txoj kev ntseeg, kev cia siab thiab kev siab hlub, nws tsis tau hloov nws lub neej xwb tiam sis nws kuj foom koob hmoov rau ntau tus lub neej tas mus li thiab.
Kev Kaj Npuab rau Kev Kaj
Tej zaum ib txhia ntawm nej xav tias kev tsaus ntuj nti nyob ib puag ncig nej. Tej zaum nej nyuaj siab txhawj xeeb, ntshai los yog ua xyem xyav. Kuv xav qhia ib qho tseeb rau nej thiab rau peb txhua tus: Muaj Vajtswv txoj kev kaj tiag tiag. Txhua tus txais tau! Nws txoj kev kaj ua rau txhua yam muaj txoj sia.1 Nws muaj hwj chim pab kho qhov mob uas sab tshaj plaws. Nws yog ib cov tshuaj kho txoj kev kho siab thiab txoj kev mob ntawm peb sab ntsuj plig. Thaum peb nyuaj siab heev, Vajtswv txoj kev kaj cog tej noob ntawm kev cia siab. Nws ua rau tej hav tu siab tshaj plaws ci ntsa iab. Nws ua tshav ntuj rau txoj kev uas peb taug thiab coj peb dhau tej hmo tsaus ntuj nti mus txog thaum kaj ntug tshiab.
Nov yog “Yexus Khetos tus Ntsuj Plig” uas “ci rau txhua tus neeg uas los rau hauv lub ntiaj teb.”2
Txawm li ntawd los, txoj kev kaj ntawm sab ntsuj plig tsis los rau tus uas zaum hauv kev tsaus ntuj thiab tos kom leej twg qhib teeb. Yuav tsum muaj kev ntseeg kom qhib peb lub qhov muag pom Khetos txoj Kev Kaj. Tej qhov muag ntawm sab nqaij daim tawv pom tsis tau kev kaj ntawm sab ntsuj plig. Yexus Khetos qhia hais tias, “Kuv yog txoj kev kaj uas ci tuaj rau hauv qhov tsaus, thiab qhov tsaus tsis to taub txoj kev kaj ntawd.”3 Vim “tus neeg ntiaj teb yeej tsis tau txais tej uas Vajtswv tus Ntsuj Plig pub, rau qhov lawv pom hais tias tej ntawd tsis muaj qab hau dab tsi, thiab lawv tsis to taub txog tej ntawd, rau qhov lawv tsis muaj Vaj Ntsuj Plig lawv thiaj tsis to taub tej ntawd.”4
Yog li ntawd peb yuav ua li cas qhib peb qhov muag pom kev cia siab ntawm Vajtswv txoj kev kaj?
Qhov ib, pib qhov ntawm nej nyob.
Qhov uas peb paub tias peb tsis tas ua neeg zoo tag nrho kom txais tau peb Leej Txiv Saum Ntuj Ceeb Tsheej cov koob hmoov thiab cov txiaj ntsim yog ib qho zoo puas yog? Peb tsis tas tos mus txog qhov kawg kom txais tau Vajtswv cov koob hmoov. Rooj ntug qhib thiab peb txais cov koob hmoov los saum ntuj los txij thaum peb pib taug kev mus rau qhov kaj.
Qhov zoo tshaj plaws pib yog qhov ntawm nej nyob tam sim no. Nej xav tias nej tsis tsim nyog los sis nej nyob puag tom qab lwm tus npaum li cas tsis ua li cas. Lub sij hawm uas nej pib nrhiav nej Leej Txiv Saum Ntuj Ceeb Tsheej, ces thaum ntawd, txoj kev cia siab ntawm Nws txoj kev kaj yuav pib ua rau nej ntsuj plig sawv muaj sia muaj zog.5 Tej zaum kev tsaus ntuj nti yuav tsis ploj mus tag nrho, tiam sis ib yam li hmo ntuj hloov ua kaj ntug, ces qhov kaj yeej yuav los.
Qhov ob, tig nej siab mus rau tus Tswv.
Cia li thov Vajtswv kawg siab kawg ntsws thiab piav rau nej Leej Txiv Saum Ntuj Ceeb Tsheej tias nej xav dab tsi. Lees hais tias nej ua yuam kev. Qhia txog tej yam hauv nej lub siab thiab ua Vajtswv tsaug. Qhia Nws paub tias nej muaj kev nyuaj siab dab tsi. Tuav Khetos lub npe thov kom nej muaj dag zog thiab kev txhawb nqa. Thov kom nej lub pob ntseg yuav qhib, kom nej hnov tau Nws lub suab. Thov kom nej lub qhov muag yuav qhib, kom nej yuav pom Nws txoj kev kaj.
Qhov peb, taug kev raws li qhov kaj.
Nej Leej Txiv Saum Ntuj Ceeb Tsheej paub hais tias nej yuav ua yuam kev. Nws paub tias nej yuav ntog---tej zaum ntau zaus. Qhov no ua rau Nws tus siab, tiam sis Nws hlub nej. Nws tsis xav kom nej poob siab. Tsis yog li ntawd, Nws xav kom nej sawv thiab ua tus neeg uas nws xav kom nej ua.
Kom pab nej, Nws txib Nws Leej Tub los rau hauv lub ntiaj teb no qhia txoj kev rau peb thiab pab peb paub kov yeej tej kev cov nyom uas tav peb kev. Nws tau muab txoj moo zoo rau peb, uas qhia txog kev ua tib tug thwj tim. Txoj moo zoo qhia peb txog tej yam peb yuav tsum paub thiab ua kom taug kev raws li Nws txoj kev kaj, coj tus yam ntxwv ntawm Nws Leej Tub uas Nws hlub, peb tus Cawm Seej.
Qhov Kaj Kov Yeej Kev Tsaus Ntuj Nti
Peb yeej yuav ua yuam kev.
Peb yeej yuav ntog.
Tiam sis thaum peb xav kom peb txoj kev hlub Vajtswv loj tuaj thiab xav hlub peb tus neeg zej zog ces txoj kev kaj ntawm txoj moo zoo yuav nyob ib puag ncig peb thiab txhawb nqa peb. Kev tsaus ntuj nti yuav ploj mus, vim nws nyob tsis tau nrog txoj kev kaj. Thaum peb txav los nyob ze Vajtswv, Nws yuav txav los nyob ze peb.6 Thiab ib hnub dhau ib hnub, Vajtswv txoj kev kaj yuav loj tuaj nyob hauv peb, “ci kaj zus kaj zus mus txog hnub zoo tag nrho.”7
Thiab rau nej cov uas xav tias nej taug kev hauv kev tsaus ntuj nti, kuv caw nej ua raws li lo lus cog tseg uas tus Cawm Seej hais rau noob neej hais tias: “Kuv yog qhov kaj rau neeg ntiaj teb. Tus uas raws kuv qab yuav tsis taug txoj kev uas tsaus ntuj nti, tiam sis nws yuav tau lub neej tshav ntuj nrig.”8
Qhov Kaj Hauv Africa
Ob peb xyoos tas los, kuv tus poj niam, Harriet, wb pom qhov uas muaj raws li lo lus cog tseg no. wb nyob hauv West Africa, ib qhov chaw zoo nkauj ntawm lub ntiaj teb thiab lub Koom Txoos loj tuaj thiab Haiv Neeg Ntseeg hauv Hnub Nyoog Kawg zoo siab. Tiam sis, West Africa muaj tej kev cov nyom ntau thiab. Ua rau kuv nyuaj siab thaum kuv pom lawv pluag heev. Nyob hauv tej lub nroog muaj neeg coob uas tsis ua hauj lwm, thiab nyuaj rau tej tsev neeg nrhiav noj nrhiav haus thiab muaj kev puaj phais. Ua rau kuv tu siab kawm hais tias peb cov mej zeej ntawm lub Koom Txoos uas muaj nqi raug txom nyem li no. Tiam sis kuv kuj kawm hais tias cov mej zeej no ib leeg pab ib leeg ris lawv tej nra hnyav.
Wb tuaj txog ib lub tsev sib ntsib nyob ze ib lub nroog loj. Tiam sis wb tsis pom ib cov neeg uas nyuaj siab nyob hauv kev tsaus ntuj nti, wb pom ib haiv neeg xyiv fab uas ci ntsa iab! Lawv txoj kev zoo siab vim lawv muaj txoj moo zoo yeej ua rau wb zoo siab thiab txhawb wb lub siab. Lawv txoj kev hlub wb ua rau wb txo hwj chim heev. Thaum lawv luag nyav ua rau wb xav luag nyav thiab.
Thaum ntawd kuv tau xav paub seb puas muaj ib cov neeg zoo siab tshaj nyob thoob plaws lub ntiaj teb. Txawm Haiv Neeg Ntseeg no raug kev nyuaj siab thiab kev txom nyem, lawv muaj kev kaj puv npo!
Kev sib ntsib pib, thiab kuv tab tom hais lus. Tiam sis hluav taws xob raug tua hauv lub tsev ntawd, thiab peb nyob hauv kev tsaus ntuj nti xwb.
Tau ib me pliag kuv tsis pom leej twg, tiam sis kuv pom tau thiab hnov tau peb Haiv Neeg Ntseeg txoj kev luag nyav uas zoo nkauj kawg. Kuv hlub cov neeg no heev!
Nws tseem tsaus ntuj nti hauv chav teev ntuj, ces kuv thiaj li zaum nrog kuv tus poj niam thiab tos kom lawv qhib hluav taws xob. Thaum peb tseem tos, ib qho zoo kawg tau tshwm sim.
Ob peb lub suab pib hu nkauj ib zaj nkauj qhuas Vajtswv. Ces ob peb tug ntxiv koom nrog lawv hu nkauj. Thiab muaj neeg ntxiv. Tsis ntev ces ib pawg hu nkauj tsa suab nrov puv chav teev ntuj ntawd.
Cov mej zeej ntawm lub Koom Txoos tsis tas saib lawv tej phau nkauj; vim lawv paub txhua lo lus. Thiab qhov uas lawv hu ib zaj tas ces lawv hu ib zaj ntxiv kawg siab kawg ntsws tshoov kuv lub siab.
Thaum kawg, teeb rov qab taws ua rau chav ntawd pom kev sov so. Harriet thiab kuv wb ib leeg saib ib leeg, wb ob leeg los kua muag.
Nyob hauv kev tsaus ntuj, Haiv Neeg Ntseeg zoo kawg nkaus no tau muab txoj kev kaj puv lub tsev Koom Txoos thiab peb sab ntsuj plig.
Yog ib lub sij hawm uas tshoov wb lub siab---Harriet thiab kuv wb yeej yuav nco ntsoov.
Los rau Qhov Kaj
Tej lub sij hawm hauv peb lub neej kev tsaus ntuj yuav nyob ib puag ncig peb. Tej lub sij hawm kev tsaus ntuj nti nyob ib puag ncig yuav tsim txom peb, ua rau peb poob siab, thiab ua rau peb ntshai.
Kuv pab nej nyuaj siab vim nej ib txhia raug tej kev txom nyem loj heev, thiab nej ib txhia kho siab thiab ntshai heev.
Txawm li ntawd los, kuv ua tim khawv tias peb cia siab rau tus uas muaj txoj sia uas yog Yexus Khetos! Nws yog lub qhov rooj rau txoj kev kaj ntawm ntuj ceeb tsheej.
Kuv ua tim khawv hais, nrog tus Khetos, kev tsaus ntuj kov tsis yeej peb. Kev tsaus ntuj yeej yuav tsis kov yeej Khetos txoj kev kaj.
Kuv ua tim khawv hais tias kev tsaus ntuj yeej yuav tsum ploj mus thaum Leej Tub ntawm tus Vajtswv uas muaj txoj sia nyob txoj kev kaj ci ntsa iab!
Kuv caw nej txhua tus qhib nej lub siab rau Nws. Nrhiav Nws los ntawm kev kawm vaj lug kub thiab kev thov Vajtswv. Los rau Nws lub Koom Txoos, uas yog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Kawm txog Nws thiab Nws txoj moo zoo, rau siab koom tes pab, sib pab, thiab xyiv fab ua hauj lwm rau Vajtswv.
Cov kwv tij thiab cov muam, txawm yog hmo uas tsaus ntuj tshaj plaws, tus Cawm Seej ntawm lub ntiaj teb yuav coj nej mus rau kaj ntug ci ntsa iab uas yeej los ntawm nej lub siab.
Thaum nej taug kev mus rau kev cia siab ntawm Vajtswv txoj kev kaj, nej yuav nrhiav tau kev hlub tshua thaib kev zoo ntawm nej Leej Txiv Saum Ntuj Ceeb Tsheej uas “tsis muaj kev tsaus ntuj hlo li.”9 Kuv ua tim khawv txog qhov no los ntawm Yexus Khetos lub npe dawb ceev, amees.