Finsrak ke Kahlwem luhn God

Sel Prestuhn Dieter F. Uchtdorf

Mwet in Kahsruh Ahkluo ke Prestuhnsi Se Met


Ke kuht suk in ahkyohkye luhngse lasr nuh sin God ac kwacfeacng in luhngse mwet tuhlan lasr, kahlwem ke wosasuc ac fah raunikuhtlac ac ahkkweye kuht.

Motonwac nuh ke Ohiyacn Etwacack

Oasr sroal na wowo se lun ohfohs luhk ah ma pahngpahng Motonwac nuh ke Ohiyacn Etwacack. Oreklac sin kawuck se luhk, Johan Benthin mwet sroal petsac Danish se, suc pa prestuhn luhn stek se emet fin acn Copenhagen, Denmark.

Sroal sac ahkkahlwemye infuckihl lohsr se ma oasr sruhnguhl se ikacklah kac suc ma kahlwem srweyac. Tahfuhn kahs nuh sihk lah kahlwem tuhkuh ke sruhnguhl sac tiac srweyac nohfohn infuckihl sac—muhtuhn motonwac sac muhkwena.

Nuh sihk, lohsrlohsr ac kahlwem ke sroal se inge pa luhmweyacn moul se. Pa ip ke atacn moul luhn mwet uh in kuhtuh pacl uh puhla lah in sruhluhn kuht rauniyuckyak ke lohsrlohsr. Ac kuh in wacngihnlac sie mwet kuht luhngse; tuhlihk se kuh forfor wel; ac kuh in oasr mas upac se sun kuht; ac kuh in upac kuht in sokwack orekma ac toasrlah ke suhlahlahlfongi kuh sahngweng; kuh kuht ac kuh in puhla muhkahimtacl kuh sruhngwacyuck.

Tuhsruhk kuht finne puhla tuhlac inmahsrlon ma sikyak nuh sesr in pacl inge uh, God El olwelah finsrak ke kahlwem Lal—El olwelah in tohlwack inkacnek soko met liki kuht ac ahkkahlwemye nuh sesr inkacnek soko liki lohsrlohsr.

Infuckihl Sesseslah ke Lohsrlohsr

Nga luhngse fahk nuh suwos ke sie muhtwacn suc mahtuhlah ke sie infuckihl sesseslah ke lohsrlohsr—ngwac pahnglol Jane.

Ke pacl se Jane el matwac yac tolu ah, el tiac tui ke suhsahkyak uh, srihkkihnyuck, ac ahkkolukyeyuck. El ahksahngwengyeyuck ac isrucnyuck. El tuhkahkwack ke kais sie lututacng tiac etuh lah el ac moullac sun lwen tok ah. Mwet ma enenuh in liyaclwacng uh pa ahkkohsyacl uh kuh lwelah ahkkoluk in tuhtahflah na.

In kuh in liyaclwacng sifacna, Jane el etwaclah in tilac puhla. Wacngihn finsrak in pain moullac lal, oruh el ahkupacye nuh sel sifacna nuh ke sahngweng ke pwacyeiyacn moul lal. Wacngihn kahlwem ke facluh lal uh, oruh el fuhlweack nuh ke lohsrlohsr. Ke tilac kuh in puhla se ma kuh in tuhkuh muhkwena ke kwac sun ma koluk uh, el inseselac ke muh oacna sie pacl kuh in oruh pacl sahflah lal.

Na, ke el yac 18, Jane el konwacack Alu luhn Jisus Kraist luhn Mwet Luhlahlfongi ke Lwen-sahflah. Engan ac finsrak ke fohlohkyak luhn wosasuc moklweack insiyacl, ac el inseselac nuh ke solsol se in pacptaislac. Ke pacl se emet, kahlwem ilyak nuh in moul lal, ac el liyacack inkacnek kahlwem soko met luhkwel. El som liki lohsrlohsr ke facluh lal ac sulaclah in som wi lutlut loessuhlah liki tuhlihk orwacl koluk ah. Sahflahiyac ah el puhla sukohsohklah liki sie inkucl luhn lohsrlohsr ac ma koluk—sukohsohk in engankihn mihslac wowo luhn Mwet Lahngo ac onwelah usrnguck.

Tuhsruhktuh, yac puhs tohkoh, tukun mwet se ma orwacl koluk ah misac ah, Jane el maskuhnwack ma sikyak nuh sel ke el fuhsr ah. Suhpwacr ac ahngyahng upac oruh in kuhnahoslah kahlwem wolacna se el konwacack ke wosasuc uh. El akihlacnwack lah el fin lwelah lohsrlohsr in apuhnuhllah, mwet lokoalok lal kuh in kuhtanglah sahflah.

El sukok kahs in kahsruh ac kahsruh ke ono ac muhtwacwacack in akihlen lah, nuh sel, inkacnek se ma wo emet nuh ke onwelah pa in etuh ac insese lah oasr lohsrlohsr—tuhsruhk in tiac ilyak nuh kac. Ke el inge etuh uh, oasr pac kahlwem—ac pa acn el sulaclah in ilyak nuh we uh.

In sang nuh sel pacl somlah lohsrlohsr, Jane el kuhna in suk in fohlohk sahk, sesseslah ke inse koluk, kuh finne koluk. Tuhsruhk el tiac. El kutong mwe sruhf in suhpwaclihk lohsrlohsr in furok ke ahngyahng, ngal, kuh nakantwen. Sahyac na, el sruokwacni wo nuh ke finsrak lah ke kahsruh luhn God el kuh in onweyucklac. El sulaclah in orwaclah kahlwem ac moniyuck nuh ke moul lal in kahsruh mwet sahyac uh. Sulaclah se inge oruh elan sislah ma somlah ac falke sie pacl wolacna fahsruh uh.

El orwaclah sie mwet luti, ac mihsenge, yac pucspucs tohkoh, luhngse lal moklweack moul luhn tuhlihk srihsrihk foko, kahsrwelos in etuh sacohkiyaclos, lah elos yohk srihpac. El orwaclah sie mwet tiac tui in loangwelah mwet muhnahs, mwet orek koluk, ac mwet ahkmuhnahsyeyuck. El muhsahi, ahkkweye, ac mokle mwet nuh kwewa yohrohl uh.

Jane el etwaclah lah onwelah tuhkuh ke kuht som liki lohsrlohsr ac fahsr nuh ke finsrak luhn sie ma kahlwem liki. Pa ke ohiyacn orekmakihnyacn luhlahlfongi, finsrak, ac luhngse pwacye ma el tiac eklac muhkwena ke moul lal tuhsruhk el ahkinsewowoye ne tok moul luhn mwet na puhkantwen sahyac.

Kahlwem Sruokwacni Kahlwem

E kuh in oasr inmahsrlowos suc puhla lohsrlohsr nwekkowoslac. Kowos kuh in puhla toasr in elyah, sahngweng, kuh suhmuhngnguh. Nuh suwos ac nuh sesr nuh kwewa, nga sifil fahk ma pwacye wolacna ac suwohs se: kahlwem luhn God pwacye. Oasr nuh sesr nuh kwewa! Ac sang moul nuh ma nuh kwewa.1 Oasr kuh se in ahkfihsracsrye isrisr luhn kihnet loal. Ac kuh in oruh sie lun paho in onweyuck nuh ke muhkahimtacl ac mas luhn nguhnasr. Ke ikeyacn fuhlweack, ac kuh in yoki fihtac luhn finsrak kahlwem liki soko. Ac kuh in ahkkahlwemyeack fahlfahl loal soko ke ahsor. Ac kuh in tohlwack inkacnek soko met liki kuht ac kol kuhtlac liki fong lohsrlohsr nuh ke olwelah luhn sie kuhsruhn lwen sasuc.

Pa inge “Nguhn luhn Jisus Kraist,” suc use “kahlwem nuh sin mwet nuh kwewa ma tuhkuh nuh ke facluh se.” 2

Ne ohinge, kahlwem ke ip luhn nguhn suhkwac tuhkuh nuh selos suc kwac muhta in lohsrlohsr tuhpan sie mwet in ahkosack lahm sac. Enenuh se nuh sesr in oruh ke luhlahlfongi in suk ac akihlen Kahlwem luhn Kraist. Kahlwem ke ip luhn Nguhn tiac kuh in liyeyuck ke sie ngwetngwet luhn facluh. Jisus Kraist El sifacna luti lah El pa kahlwem se ma tohlwack acn lohsrlohsr, ac acn lohsrlohsr tiac kuh in motko kac.3 Nuh sin “mwet el koflahna eis mwe sang ma tuhkuh sin Nguhn luhn God. El suc ohinge koflahna kahlwem kac; ma inge ma lahlfon nuh sel, mweyen sacohkiyacn ma inge akihlenyuck ke nguhn muhkwena.”4

Kuht ac suk ac akihlen fuhkah finsrak ke kahlwem luhn God uh?

Ma se met, muhtwacwacack ingena ke ohiyac sikyak lom an.

Wolacna in etuh lah kuht tiac enenuh in suwohswohs in puhla mwe insewowo ac mwe sang luhn Pahpah tuhmasr Inkuhsrao. Kuht tiac enenuh in tuhpan ne ke kuht ahksahfye in eis mwe insewowo luhn God. Ke ma pwacye, God el muhtwacwacack in ahkinsewowoye kuht ke kuht muhtwacwacack in suk ke kahlwem in srwekuhti.

Acn wo se in muhtwacack pa acn kowos oasr we an ingena. Tiac elyah luhpan suhfal lowos kowos nuhnkuh kac an kuh fuhkah pahtlaciwos nuh sin mwet sahyac kowos puh kac an. Pacl se na kowos muhtwacwacack in suk Pahpah tomowos Inkuhsrao, ke pacl sacn, finsrak ke kahlwem Lal fah muhtwacwack in tuhkahkwack, moulyak, ac ahkfuhlwactye nguhnuwos.5 Lohsrlohsr kuh in tiac pacl sefanna wacngihnlac, tuhsruhk kahlwem uh fah tuhkuh, oacna ke fong uh sahflah ke kuhsruhn lwen uh.

Ahkluo, furohklah insiyom nuh yurin Leum.

Ahkkahlwemye puhla loal lowos an ke pruhe ac ahkuhtweyac nuh sin Pahpah tomowos Inkuhsrao ma kowos puhla an. Akihlen fototolac lowos an. Ahkkahlwemye puhla ac kena loal lowos an ac ahkkahlwemye kulohkihn lowos an. Lwelah Elan etuh ke ma upac lowos an. Siyuck Sel ke inen Kraist nuh ke kuh ac tahpuhkyuck. Siyuck tuh insroewos in ikacklah, tuh kowos in lohng puhsrwacl. Siyuck tuh motowos in ikacklah tuh kowos in kuh in liye kahlwem Lal.

Ahktolu, fahsr ke kahlwem.

Pahpah tomowos Inkuhsrao etuh lah kowos ac tahfonglac. El etuh lah kowos ac tikuclkucl—sahp ke pacl pucspucs. Ma inge Ahksuhpwacryacl, tuhsruhk El luhngse kowos. El tiac ke kuhnahoslah finsrak ac kena lowos in wolac. In kapsra nuh kac, El kena tuh kowos in tuyak ac oruh mwet se ma kowos motkweyuck in oacna uh.

In ahkfalye ma se inge, El suhpwacma Wen Nahtuhl in tohlwack inkacnek soko ac ahkkahlwemye nuh sesr ohiyacn tuhpallah acn tikuclkucl fihliyucki ke inkacnek lasr uh. El use nuh sesr wosasuc, suc luti ohiyac nuh ke mwet tuhma lutlut. Luti kuht ma kuht enenuh in etuh, oruh, ac oacna in fahsr ke kahlwem Lal, ukwe falken niyacn Wen Kuloh Nahtuhl.

Kahlwem Kuhtanglah Lohsrlohsr

Ahok, kuht ac tahfonglac.

Ahok, kuht ac tikuclkucl.

Tuhsruhk ke kuht suk in ahkyohkye luhngse lasr nuh sin God ac srihke in luhngse mwet tuhlan lasr uh, kahlwem luhn wosasuc fah raunikuhtyak ac sruhkkuhtyak. Lohsrlohsr ac fah wacngihnlac, ke srihpen ac tiac kuh in oasr ke oasr kahlwem uh. Ke kuht fototoyang muh yurin God, El ac fah fototo me nuh yohrohsr.6 Ac lwen nuh ke lwen, finsrak nuh ke kahlwem luhn God fah kapwack yohrohsr, kahlwemi na ne ke kahlwem in lwen uh.7

Nuh suwos nuh kwewa ma puhla muh fahsr ke lohsrlohsr uh, nga suli kowos in luhlahlfongi olwelah se inge ma fwackyuck sin Mwet Lahngo luhn mwet uh: “Nga kahlwem luhn facluh. Kuhtwena mwet suc fahsr tukuk fah oasr kahlwem luhn moul yohroh, ac el fah tiacna fahsr in lohsr.”8

Kahlwem se fin acn Africa

Yac pucspucs somlah ah, nga ac muhtwacn kiyuck, Harriet oasr puhla acsmakihn se suc kuht liyacack olwelah ahkfalyeyucklac se. Kuht muhta West Africa, sie ip kahto fin facluh ma Alu uh kapwack we ac Mwet Luhlahlfongi ke Lwen-sahflah we ah engan. Tuhsruhktuh, West Africa puhkantwen pac ma upac we. Ma oacna, nga ahsor ke kwacoh ma nga liyacack ah. Ke siti ah, puhslac mwet tiac orekma, ac sucu uh kwacna upac nuh se in eis ke enenuh lalos ke kais sie lwen ac in moullac. Kuhnahoslah insiyuck in etuh lah puhs sin mempucr sacohk lasr ke Alu uh moulkihn kain kwacoh se. Tuhsruhk nga etwaclah pac lah mempucr wowo inge akacsruhi sie sin sie in wacngihn mwet masrinsracl.

Kuht tuhkuh ne tui ke sie lohm in toeni siskacn siti luhlahp se. Tuhsruhk sahyacn sokwack sie mwet toasr ac apihnyucki ke lohsrlohsr, kuht konwacack mwet engan suc pihkapak ke kahlwem! Ohiyacn engan elos puhla ke wosasuc uh sun kuht ac sruhkwack nguhnasr. Luhngse elos ahkkahlwemye nuh sesr ah puhsisacl. Isracsr srihsrihk lalos wo ac ahkisracsrye kuht.

Nga esam motko ke kuhtuh pacl uh fin oasr mwet engan yohk liki fin facluh se. Finne Mwet Luhlahlfongi wolacna inge rauniyuckyak ke ma upac, elos sesseslah ke kahlwem!

Miting sac muhtwacwacack, ac nga muhtwacwacack in sramsram. Tuhsruhk tiac path sahrom ah kunlac ke lohm sac, ac kuht muhta in lohsrlohsr.

Ke kihtin pacl nga tiac kuh in liye sie mwet ke un mwet ah, tuhsruhk nga kuh in liye ac puhla kahlwem ac isracsr kahto luhn Mwet Luhlahlfongi ah, Nga luhngse na pwacye wi mwet wolacna inge!

Lohsrlohsr lun lohm in alu ac srackna lohsr, na nga pihtucki muhta siskacn muhtwacn kiyuck ah ac tuhpan sahrom ah in fohlohkoh. Ke kuht tuhpan ah, sie ma usrnguck sikyak.

Sie puhsra muhtwacwacack onkihn soko sin on in alu ke Fohlohkyak sac. Ac kuhtuh welah. Na kuhtuh pac. Tiac paht, puhsrwen on kahto ac wolacna nwacklah lohm in alu sac.

Mempucr luhn Alu uh inge tiac enenuh puk in on; elos etuh kahs nuh kwewa ke kais soko on in alu elos yuck ah. Na elos yuck kais soko on ke kuh ac nguhn ma puhsrallah nguhnihk.

Elos on na ne, sahrom ah fohlohk ac nwacklah run sac ke kahlwem. Nga ac Harriet angwetwacni, lihkihn tuhpahsr sroksroki ke sronin muhta.

Infulwacn lohsrlohsr upac sac, Mwet Luhlahlfongi kahto, wolacna inge nwacklah lohm in alu se inge ac nguhnasr ke kahlwem.

Puhla na loal ac yohk srihpac se nuh sesr—sie ma nga ac Harriet ac fah tiac muhlkuhnlah.

Tuhkuh nuh ke Kahlwem

Ahok, pacl nuh ke pacl moul lasr uh ac kuh in moklweyuck kac, kuh finne nuklac lun, lohsrlohsr. Kuhtuh fong ma raunikuhtyak uh fah sikyak upac, ahkmuhnahs, ac ahksahngweng.

Insiyuck tuhngiyac ahsor pucspucs ma kuhtuh suwos sun, ke muhkahimtacl ngal ac sahngweng ma iskowosi ma kowos puhlakihn an.

Ne ohinge, nga fahkwack ke lohoh lah finsrak moul lasr uh pa ke Kraist Jisus! El pwacye, nwacsnwacs, ac motonwac na kuh se nuh ke ohiyacn kahlwem muhtahl.

Nga fahkwack lah ke Kraist, lohsrlohsr tiac kuh in oreklac wo. Lohsrlohsr tiac kuh in kuhtanglah kahlwem luhn Kraist.

Nga oruh lohoh kac lah lohsrlohsr uh tiac kuh oasr ke pihkapakiyacn kahlwem luhn Wen nuhtin God moul se!

Nga suli kais sie suwos in ikacslah insiyowos nuh Sel. Sohkuhl ke lutlut ac pruhe. Tuhkuh nuh ke Alu lal uh, lutlut Kacl ac ke wosasuc Lal, wi in wo, akacsruhi, ac engankihn in kuhlwacnsapuh God lasr.

Tamuhlwel ac tahmtahel an, finne tukun fong lohsrlohsr se, Mwet Lahngo luhn facluh fah kol kowoslac nuh ke tahfuhn lutu wo, kahlwem ma fah takwack yuruwos.

Ke kowos fahk nuh met ke finsrak ke kahlwem luhn God, kowos fah konwacack pahkotwen, luhngse, ac woiyacn luhngse luhn Pahpah Lucng, “ma [Sel] wacngihn lohsrlohsr.”9 Ke ma inge nga fahkwack ke inen Jisus Kraist, amen.