Omelatk er a Llomes er a Dios

Mla er a President Dieter F. Uchtdorf

Ongerung el Counselor er a Kot el Presidency


Se el dosiik el menglou er a beltkil a rengud el mo er a Dios e dolasm el oubeltik el reng el mo er a tonari er kid, a llomes er a tekingel a Dios a mo illiuekl er kid e mo tikeuid

Tungelel a Llomes

Ngarngii a meringel chad el sunga el ngar obis er ngak el ulengakl el kmoTungelel a Llomes. Tia a lulousunga er ngii a sechelik, el chad er a Denmark el Johan Benthin, ngka a mle kot el stake president er a Copenhagen, Denmark.

Tia el sunga a ochotii a milkolk el delmerab e blok a chesmerel e ngarngii a dichel a llomes. Ng mechas a renguk se el kumes er tia el dichel el ngara tuangel e diak el diiechii a chelsel tia el delmerab—ng kmal di se el medal a tuangel.

A denguu er ngak, ea ilkolk me a llomes el ngar tia el sunga a ngarngii a okesiul er a klengar. Ngarngii a teleteled el chad el bebil er a taem el ngii me a de iiliuekl er a ilkolk. Alta ke de mla metom er a betik er a rengud; ngeleked el mla metuchakl; ngoberaod el rekted; meringel a urered el uldimukl er a rrau er reng me a dakt; me a lechub e ke de sabisi e omsadu el kmo ng diak a betik a rengul er kid.

Me se el do melechesiu er kid el mla mo kekedeb er teletael el de ngara chelsel, a Dios a mla iaksok er kid er se el ometalk er a Llemesel—Ng iaksok el mo melidiich er a rael er medad e mochotii a rael el mo tuobed er a ilkolk.

Delmerab el Mui er a Ilkolk

Ng soak el mo ouchais er a redil el mlukeroul er a chelsel a delmerab el mui er a ilkolk—ak kuleker er ngii el Jane.

A bocha el edei a rekil a Jane, eng di mle blechoel el mechelebed, e blil otuub, me a mekngit el omeruul. Tomektakt e omekakou er ngii. Se el lebekiis er a tutau eng diak el lodengei el kmo ng sebechel el nguu a klukuk. A rechad el mle kirir el omekerreu er ngii a tirkaikid el lomekcharm er ngii e mechei aika a mekngit el omeruul el mo er ngii meng melemolem.

Osiik rolel el mesebechakl er ngii, a Jane a milrael mlo imiis el mesaul a rengul. Ng mlo diak a omelakt er ngii el kmo ng mo suobel, ngulebal a rengul er a diak el mekard el ringel el lulsibeb er ngii. Ng dimlak a llomes er a klechad er ngii, meng mlo mesubed a rengul er tia el ilkolk. Kelteketel me a cherengel el ngar tia el ringel eng mlo diak el lomelechesuar a ngii di el ngerang, e mlo bleketakl er a rengul el kmo ng sebechel el di kedeb el taem eng mad.

Me a, bo el teruich me a eai a rekid, ea Jane a mlo medengelii a Ikelesia er Jesus Kristo er a Uriul-klebesei el Santo. A deu el reng me a omelakt el ngara tekingel a Dios a tiluu er a rengul, meng kilengei el mo metecholb. Me tiang a ketengel el tmuu a llomes er a klengar er ngii, ng milsang a medidiich el rael el ngar medal. Ng mlo ikrii a ilkolk er a beluulechad el lebla er ngii e tibir a rengul el mo er a skuul el kmal cheroid er a rechad el mle mekngit er ngii. Me a uriul eng mlengubet er a ilkolk me a klengit—e mimokl el oldeu er a rengul er a budech me a mengasireng el omekungil er a Osobel.

Eng di, betok el rak ruriul, er a lemad a chad a lulemekcharm er ngii, ea Jane a liluut e mo chemau aika ringel el leba er ngii er a lengeasek. Tia el oberaod el klengit el reng me a klsib el reng a kileid eng tomelii se el llomes el lebiltik er ngii er a tekingel a Rubak. Ng mlo medengei el kmo alsekum eng mechei tia lilkolk meng chelebangel er ngii, eng ke el ulemekcharm er ngii a mo mesisiich.

Ng mlo osiik a ngeseu meng mlo medengei el kmo, a rolel el mo omak a chubs eng mo ngarngii a klemedengei er ngii e mo mesubed a rengul el kmo a ilkolk a ngarngii—eng di ng diak el kiei er ngii. Me chelecha eng medengei, el dirrek el ngarngii a llomes—me tia kid a bo el lengiltii el mo kiei er ngii.

Tia el ilkokl el blo le charm er ngii, ea Jane a mle beot er ngii a mo omtechei a mekngit, mui er a klsib el reng, me a lechub eng merikl. Eng dimlak. Ng milerrob a omengitikaik el mo omerk er a ilkolk lokiu a ngasech reng me a mekngit el omeruul. Ng bai, mlo chemau omelatk el kmo ngokiu a ngeseu er a Dios eng sebechel el mo ungil. Ng ngileltii a llomes e mileltii a klengar er ngii el mo olengeseu er a rebebil er a rechad. Tia el telbilel a rirellii meng mlo sebechel mo mecherei a mla memong e omakes el mo tmuu er a meang el klukuk.

Ng mlo sensei er a skuul, e chelechal sils, lluich el rak er uriul, ea beltkil a rengul a mla remutech a klengar er a redart el ngalk, ngolengeseu er tir el mo medengelii a ultutelir, el kmo ng meklou a ututelir. Ng mlo meringel el mesebechakl er a remechitechut, a re mlara telemall, a re mesula rengrir. Ng uchul a klisiich, e melisiich er tirkel ngara bitar ngii.

A Jane a silubii el kmo a bo el mechubs eng kirel el mo cheroid er a ilkolk e merael el bedul a omelatk el medidiich el llomes. Nga er a omerellel a klaumerang, omelatk, me a bliochel el beltik el reng eng mlo meltii a klengar er ngii e mlo omekngeltengak er a klengar er a rebetok el chad.

A Llomes Obengkel a Llomes

Te ngarngii a teloi er kemiu lomdasu er a ilkolk a mekekokil mocha mengucheb er tir. Ke locha mla mo bekikl, medakt, me a lechub eng rrau a rengum. Ak mo omelekl, el eko er kemiu el rokui, er a klebokel e ultebechel el klemerang: a llemesel a Dios a kmal merang. E ngarngii el mo er kemiu el rokui! Ng msa klengar el mo er a rokui el tekoi.1 Ng klisiich el mo omekungil a meringel el tellemall. Ng mo omekungil er a di tiltang, me a secher er a reng. Se el mngara klengit el reng, eng sebechel dolemii a tane er a medidiich el omelatk. Ng sebechel dmidichii el mo mellomes a dmolech el klengit el reng. Ng sebechel meklemesii a rael er medad e mekrolid er a milkolk el mo er a mochu tutau.

Tiai a Reng er a Jesus Kristo, el msa llomes el mo er a bek el chad el mei er a beluulechad.”2

Eng di, tia el llomes er reng a diak el bo er tirke el di dengchokl er a ilkolk e mengiil er a chad el mo mekerdii olbidel. Ng kirel el ngarngii a klaumerang el mo omok a mad el mo er a Llomes er a Kristo. A llomes er a reng a diak el moues lokiu a medad. A Jesus Kristo a ulsisechakl el kmo, Ngak a llomes el melidiich er a ilkolk, ea ilkolk a diak el lodengelii.”3 Ele “a di chad a diak bolenguu a ngii di el ngerang er a Dios, ele aikang a klebelung el mo er tir: me tir a diak bo lodengei, eleng di reng a mo medengei.”4

Meng mekerang a debok a medad el mo er a omelatk er a llemesel a Dios?

A Kot, komuchel er se el omngarngii.

Ng diak lungil se el dodengei el kmo ng diak dousbech el mo klikiid e mechu ngmai a klengeltengat me a sengk er a Demad er Babluades? Ng diak dongiil el momerek a rurt el mo ngmai a klengeltengat er a Dios. A klemerang, a babluades a omuchel el omeskid a klengeltengat er se el de kot el omakes el mo bedul a llomes.

A kot el ungil basio el domuchel er ngii a se el de ngarngii er chelechang. Ng diak a belkuk omomdasu el kmo ngarngii omolengesonges er ngii me a lechub e ke kmal oeak kuriul. Se el momuchel el osiik er a Demam er Babluades, e seikid ea omelakt er a Llemesel a mo olekiis, oldeu, e omekungil er a rengum.5 A ilkolk a ltang di mereched el mo dibus, eng di ng di uaia leklebesei e lorael el mo mechututau, a llomes a merael mei.

Ongerung, beltii a rengum el mobedul a Rubak.

Modersii a rengum el ngara nglunguuch, e msaod a ngara rengum el mo er a Demam er Babluades. Bom ues a omolengesonges er ngii. Lenga er a rengum el oureng a saul. Mouchais er Ngii aike el ringel el mchelebangel. Molengit er Ngii el ngara ngklel a Kristo me lolisiich e lolengeseu er kau. Molengit me a dingam lobok, me bo el sebechem el rongesii a Ngerel. Molengit me a medam lobok, me bo el sebechem el mesang a Llemesel.

Ongedei, morael er a chelsel a llomes.

A Demam er Babluades a medengei a telemellem. Ng medengei el kmo ke mo mesibas—el locha kmal betok. Tia rulii el mo mekngit a rengul, ele ng betik a rengul er kau. Ng diak el soal el tomelli a rengum. Ng bai blitokl, ng kmal soal obekiis e morael mo ngkel chad el mulbeob el kirem el mo uai ngii.

Tia uchul, e ngulduruklii a Ngelekel el mo omekkellomes e olecholt er kid el kmo ke de mekerang el omakes el imuul a olibesongel el ngara rolel. Ng mla meskid a tekingel, el osisecheklid er a rolir a remesiungel. Ng osisecheklid er a ike el kired el mo medengei, meruul, e mo merael er a Llemesel, el oltirakl a bekesel ochil a Betik er a Rengul Ngelkel, el Osobeled.

A Llomes a Mesisiich er a Ilkolk

Ochoi, ke de mo remuul a mekngit.

Ochoi, ke de mechitechut.

Eng di se el dosiik el menglou er a beltkil a rengud el mo er a Dios e dolasm el oubeltik el reng el mo er a tonari er kid, a llomes er a tekingel a Dios a mo illiuekl er kid e mo tikeuid. A ilkolk a mo nguemd, ele ng diak el sebechel ngara bita er a llomes. Se el dorael el mo kmeed er a Dios, eng merael el me kmeed er kid.6 Ea cherengel a sils, e se el omelatk er a llemesel a Dios a merael el mo klou er a chelsel a rengud, “ng melidiich e medidiich el di merkmo bo el klikiid el sils.” 7

Tirke el lomelechesiu er tir e temerael er a ilkolk, ak mengemedaol er kau el mo ultuil er tia el iaksok el lulekoi er ngii a Osobel: “Ngak a llomes er a beluulechad: ng ke el oltirakl er ngak a diak lorael er a ilkolk, ng mo obang a llomes er a klengar.”8

Llomes el ngara Africa

Tela el rak er a mla memong, e ngak me a bechik er a Harriet, a mla er ngii techellam el mesa tia el iaksok el mo tmaut. A ki mla er a West Africa, ng klebokel beluu el Ikelesia a omechelang ea rechad er a Ikelesia a kmal ungil. Eng di, a West Africa a betok a olibesongel er ngii. Ng mlo mekngit a renguk er a kisa chelebuul er tia el beluu. Te betok a diak el loureor el chad, me a retelungalk a kmal chebuul el osiik a lousbech. Ng mlecham a renguk er a bo kudengei el kmo a rechad er a Ikelesia a kiei er a uasei el meringel chelebuul. Ak dirrek el medengei el kmo tirka el chad er a Ikelesia a kaingeseu meng diak a kmal mo chouarm.

Me a ki mocha er a ikelesia el ngar bita er a klou el mats. Ng dimlak kibetik er a rechad el cheleokl er a ilkolk, a ki bai miltik er a rechad el ungil a rengrir el ngara llomes. A deurreng er tir el mo er a tekingel a Dios a kmal bekoiuiuul e tilekuii a rengmam. A beltik el reng er tir el mle er kemam a ngiluu a rengmam el meriou. A klikmechur er tir a bekoiuiuul.

Ak millebedebek el omdasu el kmo ng sebechel ngarngii a llmuut el lungil a rengrir el chad el ngar tia el beluulechad. Tirka el Santo a illiuekl er a ringel me a ongarm, eng di chelsel a rengrir a mui er a llomes!

A lomuchel a ongdibel, e ak mocha mengedecheduch. Ng di mle telkib eng mad olbidel er a blai, meng di mlo milkolk.

Ng mle telkib el taem el meringel er ngak el mesang a ngii di el chad er tia el ongdibel, eng di mle sebechek el mes e melechesuar aike el klebokel el klikm er tirka el Santo. Ng meral, dmeu a renguk el obenterir tirka el ungil chad.

Ng millemolm el milkolk a chelsel tia el blai, me ak mlo dengchokl er bita er a bechik e milengiil er olbidel el mo kmard. Me a kimongill, eng ngarngii a meang el tekoi el dilubech.

Ngarngii a rebebil er a rechad lulemuchel el mengitakl a cheliteklel Oluut. Ng di mle telkib ea lmuut el bebil a mlo teloi er tir. E te lemuut a rebebil. Ng di mle telkib eng mla mo klou a chelitakl er a chelsel a ikelesia.

Tirka el chad er a Ikelesia a dimlak el ousbech a babier er a chelitakl; te medengei a tekoi er a bek el chelitakl el lulengitalk. Te milngitakl el mo merek e kuk mora tara chelitakl loba mesisiich el reng el kmal rirtechii a renguk.

A uriul, eng mlo kmard olbidel el tiechii tia el delmerab lobang a llomes. A Harriet me ngak a mlo kasoues, e merael a chiuosech er a medemam.

Ngara chelsel a klou el ilkolk, e tirka el klebokel e ungil Santo a ulsekedii tia el blai er a Ikelesia me a rengrir er a llomes.

Tia a kmal mle dmolech el deu el reng el mei er kemam—Harriet me a ngak a diak ki mobes er ngii.

Mei er a Llomes

Ochoi, ngarngii a taem er a klengar er kid a subechii, me a lechub eng illiuekl, er a ilkolk. A lebebil ea milkolk el illiuek er kid a rasechebeab, e mengurt a reng, e omektakt.

Ng kmal imis el mekngit a renguk er kemiu el chelebangel a dmolech el klengit er reng, me a ringel me a dakt el mongarm er ngii.

Me nguaisei, e tia sioning er ngak er a ngar el omelatk el ngara Kristo el Jesus! Ng merang, e klikiid, e mesisiich el siseball el mo er a llomes er a eanged.

Ak sioning el kmo a dobengkel a Kristo, ea ilkolk a diak bo el mesisiich. A ilkolk a diak bo el mesisiich er a llemesel a Kristo.

Ak sioning el kmo a ilkolk a diak el sebechel el dechor er medal a medidiich el llomes er a Ngelekel a ngar el Dios!

Ak mengemedaol er kau el mo mekengii a rengum el mo er Ngii. Bo mosiik er Ngii el lokiu omesuub me a nglunguuch. Mei er a Ikelesia er Ngii, bomosuub er Ngii me a Tekingel, moruul a ruoll, mkaingeseu, e oldeu a rengum el mesiou er a Dios er kid.

Rodam me a rodos, se el lemechubel a ilkolk er a lekebesengei, ea Osobel er a beluulechad a mo orolau el mo er a bekokuii e medidiich el mechututau el mo okiis a rengum.

Me a omorael el mo bedul a omelatk er a llemesel a Dios, e ke mo metik er a klechubechub, me a beltik el reng, me a klungiaol er a bekokuii el Chedam er a Babluades, “el [ngii] eng diak a ilkolk.” 9 Tiang a sioning er ngak el ngara ngklel a Jesus Kristo, amen