Kanawo’en Somoel

Igag, gu be pigpig e chiney u lan e ulung e Seventy. Kan pining fapi Seventy ni yad be pi’ e milwol—ni ngad pii’ed e thin rok’ Somol tomuren be pi’ ngomad u apostal nge profet, nge Kan Thothup, ma gamad e gidii’ ni be pi’e mich nib thil nge baga’ fan ngak uringin e gidii’ nu fayleng, ma da toyed nga lang fare Galasia ma da gagyeng nag e murwel rok’ (mu guy D&C 107:25, 34).

Nap’an ni gub pagal, kug par nga chugur e binaw ni Burley, Idaho—gag ku “pagal nu Idaho ko woldug”! Kug fil urom:

1. Nggu murwel—fa’an dab mu yung e awoch, dab mu togbey e ggan.

2. Nggu murwel nib gonop—fa’an gara fogloliy, ra yib bo’or e ggan.

3. Ni baga’ fan a tayim ni ngam yung—fa’an dab mu yung ko tayim nib fel’, sana bay yib e gerbaeb ma ra lii’ pi awotch.

4. Nggu rin e murwel nib t’uf ma dem turug nfa’an ke mom’aw nge dabug re murwel nem—mu fek e milk u garbaw ko tayim ni be pi’ e milk, gathi ko tayim ni gur ga ba adag.

5. Nggu gog e thin nib baga’ fan nga gamanman rog nge machine rog, dab mu non woed kam rus—dariy e tayim ko thin ni be mo’waer. (Nap’an ni kug non ngak chonggin e galasia, kug fith ngorad, “Ba adag ni nggu non ngomed nga owchemed nib gel, fa ba adag ni nggu tay e suga nga thin rog?” Bo’or e ngiyal’, ker roged ngog, “Nga owchemad!” Bay gu non ni arrogon e daba’.)

6. Bin tomur, e n’en ni kug fil nap’an gub pagal u Idaho, kug fil ni bay gu kol e machib ni kenggin nge lik’ngen e gospel.

Baga’ fan e machib rodad ni kan pi’ ngodad u bin ta’areb e Kenggin nge Lik’ngen e Gospel, ni ga’ar, “Bay mich u wun’dad ni bay Got, Chitimangdad nib Manimus, nge Fak, ni Yesus Kristus, nge Fare Kan Thothup.” (Kenggin nge Lik’ngin e Gospel 1:1).

Ma ir e Chitamangdad nu Tharmiy, ma manangdad, ma be tu’ufegdad, ma ba adag ni ngad suled ngak. Yesus e Somol nge Tabiyul rodad, ni u daken e murwel rok’ ni ke biyuliydad, ke pi’ ngodad ni bay da paged e yam’, ni gadadra fas ko yam, ma rayog ni gadadra woed Chitamangdad nu Tharmiy ni ngad pared rok’ en manimus. Fare Kan Thothup e be pi’ e gapas, nge machib, nge mich nge kanawo’ ngodad.

Mu lem naged e beney, piwalageg –bay e galabthir ko ya’al rodad! Gathi yigo’ dad.

Urogon pin’ey be be ayuwegdad ko glabthir—ni bay pi’ be’ ney ni ra ayuwegdad? Rayog ni ngad filed u pa’rad, ni ngad guy e rogon ni ker pared, ni ngad pared to to’orel ko magawan ni yad be machib nagdad riy, ma rayog ni ngad nanged fan nib fael’ nu bochan rayog ni ngar guyed ni palog. Rayog ni ngad pared uro’ ni dab da log gad, ma dab da yib e wagaygay nga tafney rodad, ma dathib waer e murwel rodad. Beney e murwel nge kanawo’ rok’ Chitamangdad nu Tharmiy, ni ke dag ngodad ni bay ke musni ta’areb e kanawo’ ngak’.

Ke pi’ Got ngodad e kanawo’ ni ngad pared,¹ ni ngad tu’ufeged,² ni ngad ayuweged,³ ni ngad meybil gad,⁴ ni ngad noned,⁵ ni ngad pared u ta’abang,⁶ ni ngad pow’iyed,⁷ ni ngad mabgol gad,⁸ ni ngad ayuweged e bitiir rodad,⁹ ni ngad filed,¹⁰ ni ngad nanged e tin nib riyul’,¹¹ ni ngad pi’ e gospe ngak pi fagar rodad ni dariy rorad,¹² ni ngad me’eleged e n’en ni ngad k’ad,¹³ nge ku boch e ben’en.

Bay bo’or e rogon ni rayog ni ngad filed e kanawo’ rok’ Somol, u lan e babyor nib thothup, nge babyor ko galasia ni ken nog e “True to the Faith,” “For the Strength of Youth, nge ku boch e babyor nge thin ni be pi’ e apostal nge profet nib fas ngodad.

1. Fare Somol e ke machib nagdad u lan e babyor nib thothup: “Tafney rog e dathi tafney romed, ma rogog e dathi rogomed, ma ga’ar e Somol. “Woed rogon ni tharmiy eb tolang ko fayleng, rogog eb tolang ko rogomed, ma tafney rog eb tolang ko tafney romed.” (Isaiah 55:8–9).

2. Reb e n’en nib kireb u fayleng e chiney ko bin tomur e rran e “bo’or e gidii’ e be yan u kanawo’ rorad” (D&C 1:16). Reb e thin nib thothup ni ri ba adag President Monson e be ga’ar ngodad ni dab da “pared u fithik’ e llowan’ rodad” nge “dab da koled nga tafney rodad ni yigo’o gadad.” (mu guy Proverbs 3:5–7).

3. Ken machib nagdad ni fa’an gadad ra kol ko rogon e Somol, bay pi’ e tawa’ath ngodad ma rayog ni ngad koled e tin ni kan micheg ngodad; fa’an da paged e rogon, dabiyog ni ngad feked e tin ni ke micheg ngodad. (mu guy D&C 82:10).

4. Somol ke machib nagdad e beney nap’an ni ke skul nag fare profet Samuel, ne ke yog ngak ni nge pire’eg e pilung nib be’ech: “Me ga’ar Somol ngak Samuel, dab mu guy ko owchen, fa fa’an ir e be’ nib ga’ fa chig; ya Somol dathi guy woed rogon e gidii’e be guy; ya gidii’ e be guy ko ya’an e be’ u owchen, machane Somol e be guy ko gur’mirch’uy.” (1 Samuel 16:7).

5. Uringin e be’ ba adag ni ngan ayuweg e gidii’ nib gafgow; fare Somol e ba adag ni ngad ayuweged, machane be ga’ar ngodad “thingar mu rin’ed u daken e rogog” (D&C 104:16). Fa’an dab da fol gad ko rogon e Somol, gadad be athmagil ni ngad ayuweged yad, machane gadad be kireb nagrad. Somol ke yog ngodad ni ngad fil nagrad ni ngar ayuweged yad. Fa’an rayog ni ngar murwel gad, thingar da ayuweged yad ni ngar murwel gad, ma dab da pii’ed e ayuw ngorad nfa’an ker malmal gad. Kireb e n’en e beney ni ngar feked e ayuw nge dariy e murwel rorad, nfa’an rayog ni ngar murwel gad riy. Got e ma nang e kanawo’ ni thabi fael’.

Bay yo’or e rogon ni rayog ni ngad fol gad ko kanawo’ rok Somol. Ke fil ngodad e rogon ni ngad pii’ed e gospel ngak e gidii’ ni dariy rorad. Ke pi’ fil ngodad u daken e babyor nib thothup, ngu daken e Preach My Gospel, ma be fil nagdad e Kan Thothup.

Bay rok’ Somol fare rogon ningad tu’ufeged. Gidii’ nu fayleng e be yog ni fa’an la’agruw e be’ e be tu’ufegew yow, dariy fan nfa’an ker fol gow ko uringin e thin rok’ ko mabgol. Be ga’ar Chitamangdad nu Tharmiy ni baga’ fan ni ker tu’ufegew yow, machane rib baga’ fan ni ngar tu’ufegew yow ni ngar pared u daken e kanawo’ ni ke pi’ morngaagen e mabgol.

Ke fil Josef Smith e rogon e Somol nap’an ir e pagal. Ke fith be’ ngak urogon ni ir be pow’iy e galasia, me ga’ar ngak ni be machib nag e tin nib riyul’, ma aram yad be gagyeg nag yad. ¹⁴ Gamed pi walageg, pi apostal nge profet rodad e be machib nagdad e tin nib riyul’ e daba’. Thingar mu fith nagem, “Gadad be fol ko pi tin ney, ni gadad be gagyeng nag gadad?”

Reb e n’en ni kan machib nagdad e thingar da k’uf u tafen ni ken yungdad. Machane boch e gadad e ba adag ni ngad feked e tabinaw rodad nga tafen nib be’ech ya gadad be lem nag ni bay gidii’ urom nib fael’ ko gidii’ uro’, ma galasia urom eb fael’ ko galasia uro’.

Pi walageg, gabe lem nag ni n’en ni thabi ga’ fan ko bitiir rodad e tafen ni gadad be par? Ke machib nagdad apostal nge profet ni n’en ni be buch u langgin e na’un rom eb ga’ fan ko n’en ni ke buch u wen’ e na’un rom. Urrogon ni ngad fil naged e bitiir rodad eb ga’ fan ko tafen ni ngad filed yad riy.

Boch ngiyal’ thingar da feked e chon tabinaw rodad nga bthil e tafen ni ngad pared urom, ma bay yog e Somol ngodad e ayuw rok’ morngaagen riy nfa’an gadad ra fith ngak’.

Kureb e n’en ni thingar da fithed e “Bu’uw e tafen ni rayog ni nggu ayuweg e chonggin e galasia?” Kug pigpig u presidency ko Houston Texas North Stake ko 16 e duw. Nap’an pi duw nem bo’or e gidii’ e ke yib ngaram. Boch e ngiyal’, ke fith e gidii’ ni be yib ngog, bin ngan e tafen urom e bay e thabi fael’ e tapow’iy e galasia riy, fa thabi fael’ e ayuw ko gidii’ ni fael’ yangren. Ke mus ni ta’areb yay u 16 e duw ke fith be’ ni be yib ngaram ngog, “Bin ngan e ward e rayog ni tabinaw rog e pii’ e ayuw ngak? Bu’uw e rayog ni nggu pii’ed e ayuw ngomed?”

Nap’an ni ir e profet, President Brigham Young e ke pining chonggin e galasia ni ngar ranoed nga tafen nib be’ech, ni ngar tab naged e galasia urom. Bay yo’or e choggin e galasia e daba’ ni fa’an be fith President Monson ngorad ni ngar ranoed nga tafen nib be’ech, bay ngar ranoed. Machane gabe lem nag ni rayog ni President Monson nge yog ngak 14 million e gidii’ ni ngar ranoed nga tafen, nga tafen, nga tafen? Rogon e Somol e gadad be motoyil ngak thin rok’ profet nge tapow’iy e galasia, ni ngad nanged fan e kanawo’, nge mu’, ngad gagyeg naged gadad, ngam gagyeg nagem.

Bay yo’or e ban’en ni be buch u lan e galasia e chiney, ma be gel nag Somol e murwel rok u uringin e tafen. Arfan thabi ga’ fan ni ngad rin’ed e murwel rodad u daken e kanawo’ rok’!

Nap’an ni gadad be un ko murwel rok’ Got, kan fil nagdad ni “u daken e tawa’ath ni ke pi’ Fak, ke fal’eg rogon Got e kanawo’ nib fel’” (Ether 12:11). Machib rok’ Kristus e “fare kanawo’; ma dariy kureb e kanawo’ fa fithngan u tooben tharmiy ni rayog ni gidii’ e ra par ndariy n’umngin nap’an riy.” (2 Nephi 31:21).

Rayog ni ngad guyed bo’or e gidii’ u fayleng daba’ ni be par u fithik’ e wagay u tafney rorad, fa be yan u kanawo’ nib kireb, ma be yib e gafgow ngorad ni bochan. Gu be guy yad, ma gu ba adag ni nggu gog ni woed rogon Alma:

“Gu ba adag ni gub angel, ma bay yib e n’en u gur’mirch’eg ngog, ni rayog ni nggu wan nge non ni non rog e woed e yibul, ni non rog e be rurur e fayleng, ni nggu gog ngak uringin e gidii’ ni ngar kal gad ngan’!

“Arrogon, bay gu non ngak’ uringin bee’, ni non rog e woed e lingan’ e durru’, ni ngar kal gad ngan’, ni ngar fol gad ko kanawo’ nga biyuliy, ni ngar kal gad ngan’ nge sul ngak Got rodad nge rogon, ni dakariy e gafgow u daken e owchen fayleng.” (Alma 29:1–2).

Gube micheg ngomed ni bay Somol fare kanawo’! Chitamangdad nu Tharmiy e ma nangdad, ma be tu’ufegdad, ma ba adag ni nge ayuwegdad. Ir ma nang e rogon ni ngan ayuwegdad nib thabi fael’. Dathi ke mus ni go’o gur urom!

Somol rodad, ni Yesus Kristus, e “fare kanawo’, nge tin nib riyul’, nge yafos” (John 14:6; mu guy Alma 38:9). Kanawo’ rok’ e ken toy u daken tin nib riyul’, ma ra fekdad nga gapas u re fayleng ney, nge yafos ndariy n’umngin nap’an tomuren (D&C 59:23). Gube micheg ngomed ni arrogon, u daken fithngan Yesus Kristus, Amen.