Inkacnek luhn Leum

Nga kuhlwacnsap in oacna sie mwet ke Itngucul. Pahngonyuck Mwet Itngucul uh mwet utuck pweng—in akacsruhi ke kahs luhn Leum oacna kuht eis sin mwet sap mwet pahluh ac sin Nguhn ac in oruh mwet loh pwacye ke inen Kraist in luti wosasuc fin facluh nohfohn, in muhsahi Alu uh ac ahkfahsrye mukwikwi la uh (liye D&C 107:25, 34).

Nga mahtuhlah ke imac se apkuhran nuh Burley, Idaho—nga tuhlihk mukul imac orekma upac se. Oacna tuhlihk mukul imac se, nga etwaclah:

1. In orekma—kom fin tiac yok, kom ac tiac kosracni.

2. In orekma suhmaht kuh lahlmwetmwet—kom fin twekof ac ahkmongo, kom ac kosracni yohk.

3. Yohk srihpac ke kotaiyacn pacl uh—kom fin tiac yok ke pacl fal, ohu ma sa tuhkuh uh kuh in kuhnahoslah kosracni an.

4. In oruh ma enenweyuck kuh in oreklac finne tiac mwe engan se, sulaclah se, kuh ma fihsracsr se—kom isaclah mil ke kaho pacl el enenuh in isaclah an, tiac pacl na kom luhngse an.

5. In kahlwem ac suwohswohs—ke oasr ma orahkrahk tuhfweyuck ac kuhfwen mwe orekma uh, wacngihn pacl lom in ahkuhtweyac in wo kuh in elyah in ahktonongyaclos suc inse srihk. (Ke oruh se inge, ke nga tuh kuhlwacnsap ke Alu uh nga kwacna siyuck, “Yac kom luhngse ngan sramsram suwohswohs kuh in ahkwoye kuhtuh?” Pwacyeiyac uh, Mwet Luhlahlfongi suc nga asruoki nuh se ke puhlan pacl se nga kuhlwacnsap ke Alu uh sulaclah tuh ngan “suwohswohs!” Nga fah sramsram suwohswohs mihsenge.)

6. Sahflahiyac ah, oacna sie tuhlihk mukul imac Idaho, nga lotwelah in lohacng nuh ke ip yohk uh.

Wacngihn ma yohk srihpac nuh sesr nuh kwewa, ac mwe luti lasr, oacna ma pwacye ke ip yohk ke luhlahlfongi ma fahk muh, “Kuht luhlahlfongi ke God, Pahpah Ma Pahtpaht, ac ke Wen Nahtuhl, Jisus Kraist, ac ke Nguhn Muhtahl” (Ip Yohk ke Luhlahlfongi 1:1).

Weacng, El pa Pahpah tuhmwacsr Inkuhsrao, suc etwekuht, luhngse kuht, ac kena kuht in fohlohk nuh Yohrohl. Jisus pa Mwet Lahngo ac Mwet in Molwelah lasr, suc ke Iwaclah El orwaclah kahlwem lah kuht fah kuhtanglah misac ac sifil moul ac ahkfihsracsrye nuh sesr in enganwack ac eis moul ma pahtpaht. Nguhn Muhtahl pa mwet in ahkwoye, mwet fahkwack ke fwackyuck, mwet luti, mwet fahkwack, ac mwet kolyuck lasr.

Nuhnkuh kac, tamuhlwel ac tahmtahel—kuht tiacna nguhn sisilac! Kuht tiac muhkwena.

Meac wo ke oasr ninac pahpah tuhma uh—in tiac sisilac? Kuht kuh in etwaclah selos, eis woiyacn puhlakihn selos, lusrong mwe sensen wihklac ma elos sensenkackihn nuh sesr, ac etuh na pwacye ke srihpen ma elos etuh. Kuht tiac enenuh in tuhlac, fohsack, sruhflah, kuh suhnuhnkuh. Ma na pwacye se pa inge ke ohiyac luhn Pahpah tuhmwacsr Inkuhsrao, suc luti ac ahkkahlwemye nuh sesr tiac sie sin inkacnek pucspucs, tuhsruhk inkacnek soko fanna.

Ke ma pwacye, oasr inkacnek in moul luhn God in moul,¹ in luhngse,² in kahsruh,³ in pruhe,⁴ in sramsram,⁵ in aetuhi sie sin sie, ⁶ in kol,⁷ in pahyuck,⁸ in tuhfahlah tuhlihk,⁹ in eis etwacack,¹⁰ in etuh ma pwacye,¹¹ in akacsruhi ke wosasuc,¹² in suhmaht ke sulaclah luhn ma kuht mongo,¹³ ac kuhtuh pac sahyac.

Wi ma suhmuhslah uh, oasr kuhfa arulacna wo in suk inkacnek luhn Leum ke True to the Faith [Pwacye nuh ke Luhlahlfongi], In Ahkkweye Mwet Fuhsr, ac kuhtuh pac mwe luti luhn mwet sap ac mwet pahluh moul uh.

1. Nuh ke mwe srihkasrak, Leum El luti kuht lun ma suhmuhslah: “Nuhnak luhk tiac oacna nuhnak lowos, Ac inkacnek luhk siena liki inkacnek lowos. “Oacna ke kuhsrao arulacna fuhlwact liki facluh, ohinge inkacnek luhk fuhlwact liki inkacnek lowos, ac nuhnak luhk liki nuhnak lowos” (Isaiah 55:8–9).

2. Sie sin ohiyac koluk in lwen sahflah inge pa mwet nuh kwewa fahsr ke inkacnek lal sifacna (liye D&C 1:16). Ke puk luhn Soakas kuht ahksensenkihnyeyuck in: “nimet luhlahlfongi etuh lom sifacna” ac in “nimet sifacna nuhnkuh muh kom arulacna fas in lahlmwetmwet lom” (liye Soakas 3:5–7).

3. Lutiyuck kuht muh kuht fin oruh ma ke inkacnek luhn Leum, pwacyena El fah ahkinsewowoye kuht ac oasr tari engan lasr ke olwelah Lal; ac kuht fin oruh ma ke tiac inkacnek Lal, kuht ac tiac eis ke olwelah lal (liye D&C 82:10).

4. Leum el kapsra inkacnek Lal nuh ke inkacnek lasr ke El tuh ahkpahye mwet pahluh Samuel, suc suhpweyucklac in suk sie tohkohsrah sasuc: “A Leum God El fahk nuh sel Samuel, Nik kom lohacng nuh ke fuhlwactal kuh luhmahl; Nga tiac eisacl: mweyen ohiyacn sulaclah Luk uh tiac oacna ohiyacn sulaclah luhn mwet uh; mwet uh elos liye luhkuh, ac Nga liye insiyacn mwet uh” (1 Samuel 16:7).

5. Finne ke nuhnak nuh ke kena ma pwengpweng sin mwet nuh kwewa in kahsruh mwet muhnahs ac enenuh, Leum el insese nuh ke mwe finsrak lasr uh tuhsruhk El sulkackihn lah enenuh in oreklac ke inkacnek Lal sifacna (liye D&C 104:16). Ac fin te ohinge ke kuht srihke in kahsruh uh, kuht ac kuh in ahkngalyaclos. Leum El luti nuh sesr enenuh se in sifacna fosrngahkihn kuht. Finne kuht kuh in kahsruh, kuht tiac enenuh in sang kuh fosrngahkihn ma elos kuh ac enenuh in oruh nuh selos sifacna. Acn nuh kwewa srihkeyuck tari, facluh etwaclah ma koluk tuhkuh ke ma utuckuh ma in tiac siyuckyuck mwet se in orekma nuh kac. Pwacyena God el etuh arlac wo.

Lwelah kuht in motko kuhtuh mwe srihkasrak sahyac. Oasr inkacnek luhn Leum in oruh orekma luhn misineri. Ahkuhtweyucki lun ma suhmuhslah ac ke Preach My Gospel [Luti Wosasuc Luhk] ac akihlenyuck in sie ohiyac kolyuck sin Nguhn.

Oasr inkacnek luhn Leum, suc pa inkacnek pwacye, in luhngse. Mwet luhn facluh fahk muh ma se yohk srihpac pa mwet luo in aluhngsei. Pahpah tuhmasr Inkuhsrao El luti lah pwacye lah yohk srihpac mwet luo in aluhngsei, tuhsruhk El luti kuht yohkna: lah oasr inkacnek ac pacl oreklac in ahkkahlwemye luhngse sac.

Joseph Smith el lutiyuck ke inkacnek luhn Leum ke pacl se el fuhsr ah. Ke sie mwet siyuck sel lah el kol fuhkah Alu uh, el ahkuhtweyac lah el luti ip yohk pwacye ac mempucr uh karuhnguhnwaclos sifacna.¹⁴ Tamuhlwel ac Tahmtahel, mwet sap ac mwet pahluh lasr suc moul srackna luti ip yohk pwacye. Kisensiyuck pa “Yac kuht orekmakihn ip yohk inge in karihngihn kuht sifacna?”

Sie ma kwacna lutiyuck kuht kac pa in muhsahi ac ahkfalye kuhiyacsr acn nuh kwewa kuht oasr we. Pwacyelah kuhtuh pacl uh srihfeyuck kuht in som nuh ke siena acn sasuc, nuhnkuh muh ac oasr kawuck puhkantwen luhn tuhlihk nahtuhsr ac ohinge prokracm luhn mwet fuhsr ke Alu uh wo we.

Tamuhlwel ac tahmtahel, kuh kuht nuhnkuh na pwacye ma yohk srihpac ke molwelah luhn tuhlihk nahtuhsr uh pa inkucl kuht muhta we uh? Mwet Sap ac mwet pahluh uh kwacna luti lah ma sikyak in lohm se arulacna yohk srihpac likina ma sikyak nuh tuhlihk nahtuhsr ke acn sahyac. Ohiyacn tuhfahlah tuhlihk nahtuhsr uh yohk srihpac liki acn kuht tuhfahltahllah we uh.

Pwacye lah oasr kuhtuh srihpac sahyac ma wi orwaclah sulaclah ke acn in muhta, ac kulohkihn lah, Leum el fah kol kuht, kuht fin suk lwelah Lal.

Sie pac kihsen siyuck uh pa “Piyac acn enenweyuck kuht we uh?” Ke yac 16 nga kuhlwacnsap ke prestuhnsi luhn Stek Acir Houston Taxes. Mwet pucspucs mukwilac nuh ke acn lasr ke lusen yac ingoh. Kuht kwacna eis pahng ke taclofon sulkackihn lah mwet se pa fihli ac siyuck lah piyac kac ward ma wo emet uh. Pacl sefanna ke yac 16 ah nga tuh eis pahng se suc mwet sac siyuck sihk, “Piyac kac ward se ma enenuh sie sucu wowo uh? Piyac acn kuht kuh in kahsruh we uh?”

In yac omet luhn Alu uh, Prestuhn Brigham Young ac kuhtuh sahyac ac pahngon mempucr uh in som nuh ke kuhtuh acn in muhsahi Alu uh we. Tahfuhnkahs lah finne ingena oasr yohrohsr mempucr fokoko luhn Alu uh acn nuh kwewa suc fah som nuh ke oacna sie acn mwet pahluh el siyuck elos in som nuh we. Yac kuht motko na pwacye Prestuhn Monson lacn kais sie fahk nuh sin puhs liki miliacn 14 sesr acn ma enenweyuck sucu lasr uh we? Inkacnek luhn Leum pa kuht in lohacng nuh ke mwe luti luhn mwet kol lasr, kahlwem ke ip yohk pwacye, ac karihngihn kuht sifacna.

Ke ma nuh kwewa ma sikyak ke Alu uh mihsenge, ac oacna ke Leum el ahksaye orekma Lal ke inkacnek ac ohiyac nuh kwewa, yohk srihpac na pwacye tuh kuht in oruh ma nuh kwewa kuht oruh ke inkacnek Lal!

Yohkna ke orekma luhn molwelah uh, kuht etwaclah lah God el ahkolah tari inkacnek wo liki nuh kwewa ke mwe sang ke Wen Nahtuhl (liye Ether 12:11). Mwe luti luhn Kraist pa inkacnek sac, ac wacngihn siena inkacnek sahyac kuh ine ituckyang ye kuhsrao suc mwet fah kuh in moullac ke tohkohsrahi luhn God (liye 2 Nephi 31:21).

Oacna kuht liye mwet pucspucs fin facluh mihsenge muhta in fohs kuh, koluk liki, muhta in ma koluk lalos ac kweok ke ma sikyak ke sulaclah koluk lalos, ac oruh nga ke wowoyak oacna ke Alma el oruh:

Nga finsrak in lihpufacn se pa nga, ac in kuh in eis finsrak luhn insiyuck, tuh nga fah kuh in som ac sramsram ke puhsrwen God, ke puhsra suc kuh in osrokwack facluh, ac tuhngi auliyak nuh sin mwet nuh kwewa!

Nga fah fahk nuh sin nguhna nuh kwewa plwacn luhn molwelah, ac lah elos fah auliyak ac tuhkuh nuh yurin God lasr ac inkacnek Lal, tuh in fah wacngihnlac ahsor fin facluh (liye Alma 19:1–2).

Sifilpac na, nga loh lah inkacnek soko ah oasr sin Leum! Pahpah tuhmasr Inkuhsrao El etwekuht, luhngse kuht, ac luhngse kahsruh. El arulacna etuh lah Elac kahsruh fuhkah. Kuht tiacna nguhn sisilac!

Mwet Lahngo lasr, Jisus Kraist, pa “inkacnek, ac pwacye, ac moul” (Jon 14:16; liye pac Alma 38:9). Inkacnek Lal akwucki fin ma pwacye ma pahtpaht ac kol kuht nuh ke mihslac fin facluh se inge, ac moul ma pahtpaht ke facluh se fah tuhkuh uh (liye D&C 59:23). Nga fahkwack na pwacye ke inen Jisus Kraist, amen.