2010–2019
Paoa blong Prishud we I Stap long Boe
Epril 2013


Paoa blong Prishud we I Stap long Boe

Prishud we i stap long boe, i gat paoa semmak long prishud we i stap long man taem hem i yusum long stret mo gud fasin.

Long 1878, bubu blong bubuman blong mi, Joj F. Rijad i bin gat 17 yia. Olsem i stap hapen long taem ia, oli bin odenem hem i kam elda finis. Wan Sandei, mama blong hem i krae bigwan from i harem bodi i soa. From se papa blong hem i no stap, bisop mo sam nara man i kam blong givim wan blesing long hem, be hem i harem i soa semmak. Nao, mama i lukluk long boe blong hem Joj mo askem Joj blong putum han antap long hed blong hem. Hem i raetem long jenol blong hem se: “Taem mi stap krae from mi sore long mama mo from mi mekem wan wok we mi neva mekem bifo, mi go long nara rum, mo mi krae mo prea.”

Afta we Joj i filim gud, i putum han antap long hed blong mama blong hem mo givim wan simpol blesing. Hem i raetem afta: “Mama blong mi i nomo filim soa ia mo hem i harem gud bakegen taem han blong mi i stap yet antap long hed blong hem.” Afta hem i raetem tingting ia long jenol. Hem i talem se hem i bin filim se risen from wanem mama blong hem i no kam gud afta blesing blong bisop i no from Lod i no wantem mekem blesing blong bisop i kamtru, be from Lod i holemtaet blesing ia i stap blong wan boe, blong tijim hem wan lesen, se prishud we i stap long boe i gat paoa semmak long prishud we i stap long man taem hem i yusum long stret mo gud fasin.

Long naet ia, mi wantem tokbaot paoa ia. Nomata bae mi stap tokbaot ol presiden blong kworom blong ol dikon, ol prinsipol we bae mi tokbaot i blong evri yut we i kasem Aronik Prishud mo lida blong olgeta, wetem tija blong kworom, mo ol pris asisten blong kworom presiden.

Taem mi bin stap olsem misin presiden, mi luk se fasin blong gat Spirit mo gat lidasip skil long yang man i kam antap bigwan taem oli stap long misin. Sapos yumi komperem namba blong kwaliti ia taem oli gat Aronik Prishud mo taem oli stap long misin, ating bae i luk olsem laen ia we yu luk long pikja ia. Long maen blong mi, i gat tri ki samting we i mekem wan i gro kwik long ol yia blong misin: (1) yumi trastem moa yang man ia bitim bifo, (2) yumi wantem olgeta i mekem wan samting mo lavem olgeta, mo (3) yumi tren mo trenem olgeta bakegen blong oli save mekem gud olgeta samting ia we yumi wantem.

Wan i save askem stret: “?From wanem yumi no save yusum sem prinsipol ia wetem kworom presiden blong ol dikon?” Sapos yumi mekem hemia, ating bae oli gro eli moa mo bae oli moa olsem ia. Blong sot taem bae mi tokbaot olsem wanem ol prinsipol ia, kworom presiden blong ol dikon bae i yusum.

Faswan—tras. Yumi save gat tras lo kworom presiden blong ol dikon mo givim bigfala responsabiliti long olgeta. Lod i mekem—olsem we Hem i soem taem Hem i glad blong givim ol ki long olgeta, we i minim raet blong prisaed ova mo lidim wok insaed kworom blong olgeta. Olsem pruf blong tras ia, yumi singaotem kworom presiden blong ol dikon tru long revelesen, i no folem yia o eni nara kwaliti. Evri lida long Jos ia, wetem kworom presiden blong ol dikon, i gat raet blong save, mo i mas save, se oli singaotem hem tru long revelesen. Stret save ia, i helpem hem i save se God i trastem mo sapotem hem.

Seken mo nambatri fasin i joen tugeta—wanem we yumi wantem long olgeta mo givim trening from, blong kasem olgeta samting ia. Mi bin lanem wan bigfala lesen long misin: ol misinari i kasem o i no kasem wanem we misin presiden i wantem olgeta i mekem, mo semmak wetem kworom presiden blong ol dikon. Sapos yumi ting se bae oli lidim kworom miting mo go long bisoprik yut komiti miting nomo, nao, bae oli mekem hemia nomo. Be yufala, lida, i save givim visen we i go moa—visen blong Lod. ?Mo from wanem visen ia i impoten tumas? From se taem visen i kam antap, tingting blong mekem samting i kam antap.

Wanem i kam wetem evri koling insaed long Jos, i raet blong kasem revelesen. From hemia, kworom presiden ia blong ol dikon i nidim blong save se i gat raet blong kasem revelesen blong hu i ol kaonsela blong hem, raet blong kasem revelesen long saed blong sevem man we i lus, mo raet blong kasem revelesen blong trenem memba blong kworom long wok blong olgeta.

Wan waes lida bae i tijim kworom president blong ol dikon long ol prinsipol ia we bae i helpem hem blong kasem revelesen. Bae i tijim klia promes blong Lod we i talem se sapos yu askem, bae yu kasem wan revelesen folem nara revelesen (luk long D&C 42:61). Lod i wantem tumas blong givim revelesen. ?Hemi no mekem Josef mo Oliva i tingbaot se from tufala i bin askem Hem, nao tufala i bin kasem instraksen we i kam long Spirit blong Hem. (luk long D&C 6:14)? Mo, i save semmak long yufala, ol kworom presiden blong ol dikon. Lod i lavem yu mo wantem blong talemaot wanem i stap long maen mo tingting blong Hem. ?Yu biliv se Lod i gat wan problem we Hem i no save stretem? Mi no biliv. From se yu gat raet long revelesen, Hem i save helpem yu stretem evri wari we yu gat olsem wan kworom presiden sapos yu lukaotem blong kasem help blong Hem.

Yufala ol gudfala lida i save tijim ol kworom presiden blong ol dikon ia se revelesen i no tekem ples blong hadwok mo homwok. Presiden Henri, wan taem i askem Presiden Li: “?Olsem wanem bae mi save kasem revelesen?” Presiden Li i ansa: “Sapos yu wantem kasem revelesen, mekem homwok blong yu.”1 Waes lida i save tokbaot long kworom presiden blong ol dikon sam homwok we hem i save mekem mo rere blong givim nem blong ol kaonsela blong hem. Ating bae i nidim blong askem mo ansarem sam kwestin olsem: “?Hu nao bae i wan gud eksampol blong save sapotem ol nara boe? ?O hu bae i save gud long nid blong olgeta we i fesem ol spesel jalenj?

Mo laswan, waes lida ia i save tijim presiden ia wei blong luksave mo tekem aksen folem revelesen taem i kam. Yumi laef long wol we aksen i fulap, i spid, long ples we laet i kalkala, mo miusik i laod tumas. Be yang man ia, i nid blong save se hemia i fasin blong wol, be i no fasin blong Lod. Sevya i bon long wol ia long wan ples blong animol we man i no save; Hem i mekem wan aksen we i bigwan we man i no save mekem semmak olsem long wan kwaet garen, mo Josef i bin kasem Fas Visen insaed long wan bus. Ol ansa blong God oli kam tru long kwaet, smol voes—ol filing blong pis mo kamfot, ol tingting blong mekem gud, blong kasem save—samtaem i kam olsem ol smosmol sid blong tingting, we, sapos yumi respektem, mo fidim, bae i gro i kam big stamba blong fasin blong Spirit. Samtaem, tingting ia i save mekem wan kworom presiden blong ol dikon i givim wan nem blong kaonsela blong hem, o givim wok long wan yang man we i lesaktiv i stap.

Sam yia i pas, olsem wan stek presidensi, mifala i filim blong singaotem wan gudfala man olsem stek klak. Long taem ia hem i stap traehad blong kam gud long Jos. Be, mifala i save se, sapos hem i akseptem koling ia, bae hem i mekem wan gudfala wok.

Mifala i givim koling, be hem i ansa: “No. Mi no ting se mi save mekem.”

Nao wan tingting i kam. Mi talem: “Okei. Mi luk se Glendel stek bae i no save gat wan stek klak nao.”

Hem i sek, hem i ansa: “?Yu stap talem wanem?—i mas gat wan stek klak.”

Mi ansa: “?Yu yu wantem se mifala i singaotem nara man blong stap stek klak taem Lod i talemaot long mifala blong singaotem yu?”

“Okei” hem i talem. “Bae mi mekem.”

Mo yes, hem i mekem. I gat plante man, be tu, i gat plante boe we bae oli ansa long wan koling taem oli save se Lod i stap singaotem olgeta, mo we Lod i nidim olgeta.

Nekiswan, letem dikon kworom presiden i save se wan samting we Lod i wantem blong hem i mekem, hem i blong sevem wan we i lus, tugeta inaktiv mo hem we i no memba. Lod i talem stamba misin blong Hem wetem toktok ia: “Mi, Pikinini blong Man, mi kam blong sevem olgeta we i lus” (Matiu 18:11). Sapos hem i fas wok blong Sevya blong sevem wan we i lus, sapos i fas wok blong Presiden Tomas S. Monson blong mekem olsem we i bin soem long ful laef blong hem, ?bae i no fas wok blong evri lida, evri kworom presiden blong ol dikon insaed Jos ia blong mekem semmak? Stamba samting olsem wan lida, olsem wan stamba pat long seves blong yumi, i bonem man olsem faea, i mas pusum man, i mas strong blong go from olgeta we i lus mo tekem olgeta i kambak.

Wan yang man we ol kworom memba blong hem i visitim hem, i talem: “Mi bin sapraes tedei taem 30 pipol i jes kam long haos blong mi. I mekem mi wantem go long jos nao.” ?Olsem wanem nao wan yut i save stanap agensem wan lav mo kea olsem?

Mi glad tumas taem mi harem fulap stori blong kworom presiden blong ol dikon we i kasem visen ia, mo wanwan taem i stap tijim evriwan o pat blong lesen long kworom miting blong olgeta. Sam wik i pas, mi go long klas blong kworom blong ol dikon. Wan boe blong 12 yia i givim wan lesen blong 25 minit long saed blong Atonmen. Hem i stat blong askem ol nara dikon wanem nao tingting blong olgeta long Atonmen. Afta, hem i serem sam skripja mo askem kwestin we i mekem man i tingting, mo oli ansa. Taem hem i luk se taem i finis mo i no save tijim haf lesen, wetem gud tingting, mo ating sam tingting we i kam long papa blong hem blong askem ol lida we oli bin stap long sam kwestin we oli bin kasem abaot Atonmen taem oli stap long misin mo wanem ansa blong olgeta. Afta, hem i endem wetem testemoni blong hem. Mi lisin, mi glad tumas. Mi tingting long miwan: “Mi no tingbaot se mi bin tijim wan impoten pat blong wan lesen taem mi wan Aronik Prishud yut.” Yumi save leftemap standet mo visen blong yumi from ol yang man ia, mo bae oli folem.

Yufala ol lida. Sapotem kworom presiden blong ol dikon ia long bes wei taem yu letem olgeta i tekem lid, mo yu step i go biaen. Yufala i bin wok strong long koling blong yufala, i no taem yufala i givim wan gud lesen, be taem yufala i helpem olgeta blong givim wan gud lesen; i no taem yufala i sevem wan ia, be taem yufala i helpem olgeta blong sevem wan we i lus.

I gat wan toktok we i talem: Yu no ded mo tekem miusik blong yu i go wetem yu. Semmak, bae mi talem long yufala, adalt lida, yufala i no rilis wetem lidasip skil blong yufala be i stap yet wetem yufala. Tijim yut blong yumi long evri samting; tijim olgeta olsem wanem blong mekem wan ajenda, olsem wanem blong lidim miting wetem respek mo gud fasin, olsem wanem blong sevem wan we i lus, olsem wanem blong rere mo givim lesen wetem insperesen, mo olsem wanem blong kasem revelesen. Hemia bae i mak blong sakses blong yu—wanem fasin blong wan lida mo spirit bae i stap insaed long hat mo maen blong ol yang man ia.

Sapos yufala, kworom presiden blong ol dikon i wok strong long koling blong yufala, bae yufala i stap ol tul long han blong God, naoia, from se prishud we i stap long boe i gat paoa semmak long prishud we i stap long man taem hem i yusum long stret mo gud fasin. Mo afta, taem yufala i kam misinari mo fiuja lida blong Jos ia, bae yufala i save olsem wanem blong kasem revelesen, olsem wanem blong sevem man we i lus, mo olsem wanem blong tijim doktrin blong kingdom wetem paoa mo atoriti. Afta, bae yufala i kam ol yut blong wan king. Long hemia, mi testifae long nem blong Jisas Kraes, we i Sevya mo Ridima blong wol, amen.

Not

  1. Insaed long Henry B. Eyring, “Waiting upon the Lord,” insaed long Brigham Young University 1990–91 Devotional and Fireside Speeches (1991), 17.