Kajoor eo an Priesthood ippān juon Likao

Ilo 1878 jemen jim̧aō George F. Richards eaar 17 an iiō. Āinwōt ilo jekjek in tōre ko, em̧ōj kadede kar kapiti n̄an elder. Juon Jabōt jinen eaar lam̧ōj kōn an lukkuun metak. Kōnke jemen George F. Richards eaar jab pād, bisop eo im ro jet raar maron̄ in leļo̧k n̄an e juon kōjeram̧m̧an, bōtaab eaar jab em̧m̧anļo̧k. Kōn menin, eaar oktakļo̧k n̄an George ļaddik eo nejin im kajjjitōk bwe en likūt pein ioon bōran n̄an leļo̧k n̄an e juon kōjeram̧m̧an. Eaar je ilo jōnōōļ eo an, ke Ij jan̄ kōn metak eo an jinō, im kōnke ewōr jerbal eo ippa n̄an kōjeram̧m̧an e (leļo̧k juon kōjeram̧m̧an an priesthood), eo me Ijjan̄in kar kōm̧m̧ane, Iaar etal n̄an bar juon ruum̧ ijo Iaar jan̄ im jar.

Ke ej em̧m̧anļo̧k an en̄jake, eaar likūt pā ko pein ioon im leļo̧k n̄an e juon kōjeram̧m̧an. Tokālik eaar ba, “Eaar jako an jinō metak im eaar bōk ājmour jān an metak ke pā ko peiū raar pād wōt ioon bōran.” Innām eaar je ilo jōnōōļ eo an kōn meļeļe juon in. Eaar ba eaar aolep iien ej en̄jake bwe unin an jinen jab bōk kōjeram̧m̧an in kemour jān bisop eo ejjab kōnke Irooj elikjab n̄an kile kōjeram̧m̧an eo an bisop eo ak kōnke Irooj eaar kepooj kōjeram̧m̧an in n̄an likao ro, n̄an katakin e juon ekkatak bwe priesthood eo ippān ļaddik ro ej juon kajoor āinļo̧k wōt priesthood eo ippān em̧m̧aan ro n̄e rej kōjerbal e ilo jim̧we.

Jotenin Ikōņaan kōnono kōn kajoor jab in. Ijo wōt ke Inaaj kōnono n̄an būreejtōn ro an doulul eo an tikōn ro, pedped ko kar kōnono naaj jerbal n̄an aolep jodikdik ro ilo Priesthood eo an Aaron im ritōl ro aer, ekoba būreejtōn ro ad ilo doulul eo an rūkaki ro im rijipan̄ ro an pris.

Ke Iaar jerbal āinwōt juon mijen būreejtōn, Iaar lo bwe eaar wōr juon eddōkļo̧k eo ekabwilōn̄lōn̄ ilo jetōb im kapeel ko ilo tōl ippān likao ro ilo iiō ko raar jerbale juon mijen. Eļan̄n̄e jemaron̄ in kar bwine jon̄an jetōb im kapeel ko ilo aolepen iiō ko aer ilo Priesthood eo an Aaron im ilo juon mijen, bōlen bōnbōn eo emaron̄ in kar āinwōt juon lain ilo juon lain in. Ij tōmak bwe, emaron̄ wōr jilu kii ko me rajeej n̄an kain eddōkļo̧k in eaorōk ilo iiō ko an juon likao ej ilo juon mijen. (1) jej leke likao rein eļapļo̧k jān m̧okta, (2) ewōr ad kōtmene eutij ej em̧m̧an jān er, im (3) jej kaminene im bar kamineneik er bwe ren kakūrm̧ool kōtmene ko kōn em̧m̧an tata.

Juon emaron̄ in jejjet an kajjitōk, “Ewōr ke unin bwe ejja pedped kein ren jab jerbal ippān būreejtōn ro an doulul eo an tikōn ro?” Bwe eļan̄n̄e en ekar dedeļo̧k, bōlen eddōkļo̧k eo aer ilo (jetōb) en ijjino̧ m̧oktaļo̧k im eļapļo̧k oktak. Ikōņaan kōnono jidik, kōn an pedped kein maron̄ jerbal n̄an juon būreejtōn ilo doulul eo an tikōn ro.

M̧oktata—leke. Jemaron̄ leke būreejtōn ro ad ilo doulul eo an tikōn ro kōn juon jerbal eļap. Aaet Irooj ej barāinwōt—āinwōt kar kōmeļeļeik jen kōņaan eo An n̄an leļo̧k kii ko n̄an er, meļeļein jim̧we eo n̄an tōl ioon im tōl jerbal eo ilo doulul eo aer. Āinwōt juon kam̧ool kōn leke in, jej kūr būreejtōn ro ilo doulul eo an tikōn ro kōn revelesōn, im jab pedped ioon ro etto aer pād ilo doulul eo, ak jabdewōt jekjek ko reinļo̧k wōt. Kajjojo ritōl ro ilo Kabun̄ in, ekoba būreejtōn eo ilo doulul eo an tikōn ro, ewōr juon jim̧we n̄an jeļā, im aikuj jeļā, bwe eaar kūr kōn revelesōn. Enaan in ejipan̄ e jeļā bwe Anij ej bar leke im rejetak e.

M̧wil eo kein karuo im kajilu rej epaake doon—kōtmene ko reutiej im kaminene eo eiookļo̧k n̄an kakūrm̧ooli. Iaar katak juon katak eļap ilo mijen eo: kijejeto ko an juon mijenede reinjuon ilo lapļo̧k ak dikļo̧k n̄an jon̄e eddo eo an juon mijen būreejtōn, im ejja ippān ļo̧k wōt būreejtōn ro ilo doulul eo an tikōn ro. Eļan̄n̄e rej eddo wōt n̄an tōl kweilo̧k ko ilo doulul eo im pād ilo kweilo̧k ko an jodikdik ippān bisoprik eo, innām en̄in ej men eo aolep rej kōm̧m̧ane. Ak kom̧ ritōl kom̧ maron̄ leļo̧k n̄an er juon ereļo̧k emeram—visōn eo an Irooj. Im etke visōn in elukkuun in aorōk? Kōnke n̄e eļapļo̧k visōn eļapļo̧k im̧we.

Maron̄ eo n̄an bōk revelesōn ej juon m̧ōttan ilo aolep kūr ilo Kabun̄ in. Kōn menin, būreejtōn ro ilo doulul eo an tikōn ro reaikuj in jeļā bwe ewōr aer jim̧we n̄an bōk revelesōn n̄an leļo̧k etan rikakpilōklōk ro an, jim̧we eo n̄an bōk revelesōn ikkijen lo̧mo̧o̧ren ro rej jabwābwe ilo (jetōb), im jim̧we eo n̄an bōk revelesōn ej n̄an kaminene membōr ro ilo doulul eo kōn eddo ko aer.

Juon ritōl eo emeļetļet enaaj katakin būreejtōn eo ilo doulul eo an tikōn ro kōn pedped ko me naaj jipan̄ n̄an bōk revelesōn. Emaron̄ katakin e kallim̧ur eo ealikar jān Irooj me eļan̄n̄e jenaaj kajjitōk (revelesōn im jeļāļo̧kjeņ eo an Irooj), jenaaj bōk revelesōn ioon revelesōn (laleD&C 42:61). Irooj ej lukkuun m̧ōņōņō in letok revelesōn. Eaar kakememej Joseph im Oliver bwe toon wōt aer kajjitōk (ippān Irooj), bwe renaaj bōk katakin jān jetōb eo An (laleD&C 6:14). Im emaron̄ ejja in wōt n̄an kom̧ būreejtōn ro ilo doulul eo an tikōn ro. Irooj ej iakwe kom̧ im ej kōņaan kwaļo̧k n̄an kom̧ lōmņak ko An im ankilan. Kwon ke kōtmene bwe Irooj ewōr juon an inepata im Ejjab maron̄ jolo̧k e? Ijjab maron̄. Kōnke kom̧ij karbab n̄an revelesōn, Emaron̄ jipan̄ kom̧ julo̧k aolep n̄ūrbōktak eo ewōr ilo kom̧ ilo jerbal eo am̧ āinwōt būreejtōn in doulul eļan̄n̄e konaaj lukkuun pukot jipan̄ eo An.

Kom̧ ritōl ro rem̧m̧an kom̧ maron̄ katakin būreejtōn eo an doulul eo an tikōn ro bwe revelesōn ejjab bōk jikin buuļ jerbal im kijejeto eo am̧ make. Būreejtōn Henry B. Eyring eaar kajjitōk juon iien ippān Būreejtōn Harold B. Lee juon iien, “Ekōjkan aō bōk revelesōn?” Būreejtōn Lee eaar uwaak, “Eļan̄n̄e kwoj kōņaan bōk revelesōn, im kōm̧m̧ane jerbal eo am.”¹ Juon ritōl eo emeļetļet emaron̄ kōnono ippān būreejtōn in doulul eo an tikōn ro jet iaan jerbal in jetōb, emaron̄ kōm̧m̧an ilo keppopo n̄an rie rikakpilōklōk ro an. Emaron̄ aikuj n̄an kajjitōk im uwaaki kajjitōk ko āinwōt: Wōn emaron̄ in juon waanjon̄ak em̧m̧an me emaron̄ im̧we ļaddik ro jet? Ak wōn emaron̄ kile aikuj ko an ro rej jelm̧ae apan̄ ko?

Im āliktata ritōl in emeļetļet emaron̄ katakin būreejtōn eo an tikōn ekōjkan kile im jerbal kōn revelesōn n̄e ej itok. Jej mour ilo juon laļ eo eobrak kōn m̧akūtkūt ko rem̧ōkaj im kaitoktok limo, ijo meram ko remeram im ainikien ko reļļap rej jab oktak. Ak likao in eaikuj in jeļā bwe en̄in ej iaļ eo an mour in, ejjab ilo iaļ eo an Irooj. Rilo̧mo̧o̧r eaar lo̧tak ilo juon jikin ijo ejjeļo̧k jabdewōt ejeļā E. Eaar kōm̧m̧ane men eo eaorōktata im ekabwilōn̄lōn̄ ilo aolep tōre ilo juon jikin kallibim Joseph Smith eaar bōk M̧adenļo̧k eo Kein Kajuon ilo bukwōn wōjke ko. Eaar itok uwaak ko an Anij kōn juon ainikien edik im emera—en̄jake aenōm̧m̧an im inem̧m̧an, im̧we n̄an kōm̧m̧an men ko rem̧m̧an, kōmeram̧ ļo̧k—jet iien ilo juon jekjek in lōmņak ko me redik (āinwōt ine ko), ak maron̄, eļan̄n̄e rej kōļmenļo̧kjeņ kake im kōm̧m̧ane kōn utiej. Jet iien en̄jake ak lōmņak kein remaron̄ im̧we būreejtōn ro ilo doulul eo an tikōn ro n̄an rie āinwōt juon rikakpilōklōk ak leļo̧k juon ijjitōn̄ n̄an juon likao eo ejaniknik.

Jet iiō rem̧ootļo̧k ke Iaar jerbal āinwōt juon stake būreejtōnji, stake būreejtōn eo am̧ ar im̧we n̄an kūr juon em̧m̧aan em̧m̧an n̄an juon stake clerk. Ilo tōre eo eaar juon em̧m̧aan etijem̧ļo̧k bōtaab eaar jab juon eo ekkā an pād ilo Jar. Kōm kar jeļā, mekarta, bwe eļan̄n̄e enaaj bōk kūr eo, enaaj kōm̧m̧ane juon jerbal ekabwilōn̄lōn̄.

Kōm̧ ar leļo̧k kūr eo, bōtaab eaar uwaak, “Jaab, Ijjab ļōmņak imaron̄ kōm̧m̧ane.”

Innām juon en̄jake eaar itok. Iaar ba, “Ekwe, Glendale stake eo eban wōr juon an stake clerk.”

Kar ļo̧jeņ an, eaar uwaak, “Ta eo kwoj ba? Ej aikuj wōr juon am stake clerk.”

Iaar uwaak, “Kwoj kōņaan ke bwe kōm̧in bar kūr juon n̄an jerbal āinwōt juon stake rijeje n̄e Irooj ar im̧we kōm̧ n̄an kūr eok?”

“Em̧m̧an,” eaar ba, Inaaj kōm̧m̧ane.”

Im āindein eaar kōm̧m̧ane. Ejjab lōn̄ wōt em̧m̧aan ro ak ļaddik ro ro renaaj uwaak n̄an juon kūr n̄e rejeļā bwe Irooj ej kūr er im bwe Irooj ej aikuji er.

Tokālik komaron̄ karon̄ būreejtōn eo an doulul eo an tikōn ro bwe juon iaan kōtmene ko an Irooj jān e ej n̄an lo̧mo̧o̧ren eo ejabwābwe, jim̧or eo ejaniknik im eo ejjab membōr. Irooj ar kwaļo̧k io̧lep in jerbal eo An ilo naan kein: “Bwe Nejin armej ej itok n̄an lo̧mo̧o̧ren eo ejabwābwe” (Matu 18:11). Eļan̄n̄e ej juon jerbal an Rilo̧mo̧o̧r n̄an lo̧mo̧o̧ren eo ejabwābwe, ej juon jerbal an Būreejtōn Thomas S. Monson n̄an kōm̧m̧ane, āinwōt an waļo̧k ilo aolepen mour eo an, eaikuj ke barāinwōt juon jerbal an kajjojo ritōl, kajjojo būreejtōn ro ilo doulul eo an tikōn ro ilo Kabun̄ in? Jibadbad in tōl eo ad, āinwōt juon m̧ōttan in io̧lepen kwaļo̧k in ad, eaikuj in m̧ōkaj n̄an lo̧mo̧o̧ren (jetōb) eo ejabwābwe, im kōro̧o̧ltok er.

Juon likao eo kar lolo̧k jen ro uwaan doulul eo an eaar ba: “Eaar juon raan ekabwilōn̄lōn̄ ke … 30 armej raar itok n̄an m̧weo im̧ō. … Ekōm̧m̧an bwe in etal n̄an jar kiiō.” Ekōjkan an juon jodikdik maron̄ rādpij iakwe im pokake rot in?

Iaar m̧ōņōņō ke ij ron̄ elōn̄ bwebwenato ko būreejtōn ro an doulul eo an tikōn ro rej kōm̧m̧ani im meļeļeki im ekkā aer katakin aolep ak m̧ōttan ekkatak ko ilo kweilo̧k in doulul ko aer. Jet wiik rem̧ootļo̧k Iaar pād ilo juon kūlaj an doulul eo an tikōn ro. Juon ļaddik 12 iiō dettan eaar kwaļo̧k juon katak 25-minit aetokan kōn Pinmuur eo. Eaar jino ilo an kajjitōkin tikōn ro m̧ōttan ta kar lōmņak eo aer kōn Pinmuur eo. Innām eaar kwaļo̧k jet eoon ko rejipan̄ im kar kajjitōk kajjitōk ko, eo me raar uwaaki. M̧ool eo ej lap wōt iien n̄an katak eo, ebwe an meļetļet im bōlen jet iaan kōmeļeļe ko raar itok jān jemen n̄an kajjitōk ippān ritōl ro ro raar pād kōn ta kajjitōk ko ewōr aer kajjitōkin er kōn Pinmuur eo ilo mijen ko aer im kar ta uwaak ko aer n̄an kajjitōk kein. Innām eaar kōjem̧ļo̧k kōn naan in kam̧ool eo an. Iaar bwilōn̄ ke Iaar ron̄jake. Iaar ba ippa make, “Ijjab kememej aō leļo̧k juon m̧ōttan eo eaorōk ilo juon katak ke Iaar juon jodikdik ilo Priesthood eo an Aaron.” Jemaron̄ ļōn̄aj lōn̄ļo̧k jon̄ak im reim̧aanļo̧k eo n̄an likao rein, im renaaj uwaak.

Kom̧ ritōl ran jipan̄ būreejtōn ro ilo doulul eo an tikōn ro ijo em̧m̧an tata ilo kom̧ n̄e kwoj kōtļo̧k bwe ren tōl. Kwoj kōm̧m̧ane kūr eo am em̧m̧an tata ejjab wōt n̄e kwoj leļo̧k juon katak ak n̄e kwoj jipan̄ er boktok juon katak, ejjab n̄e kwoj lo̧mo̧o̧ren an kajjojo (jetōb), ak n̄e kwoj jipan̄ er kōm̧m̧ane āindein.

Ewōr juon jabōn kōņņaan ej ba: jab mej m̧okta jen am kōm̧m̧ane ta eo eaorōk ippam̧. Āinwōt ta eo inaaj ba n̄an kom̧ ritōl ran rōm̧m̧an ded, jab kōtļo̧k eok (jān kūr) eo am. Katakin jodikdik ro ad ilo kajjojo jerbal; katakin er ewi wāween kepooj juon kweilo̧k, ewi wāween kōjeikik kweilo̧k ko kōn em̧m̧an im iakwe, ewi wāween n̄an lo̧mo̧o̧ren eo juon, ewi wāween kepooj im leļo̧k juon katak eo eim̧we, im ewi wāween n̄an bōk revelesōn. En̄in enaaj ewi wāween am jon̄e tōprak eo am̧—bwebwenato in tōl im jetōb eo kwoj likit ej deiil bōro ko im ļōmņak ko an likao rein.

Eļan̄n̄e kom̧ būreejtōn ro an doulul eo an tikōn ro naaj kōļapļo̧k kūr eo am̧i, kom̧ naaj juon kein jerbal ilo pein Anij ilo kiiō, kōnke priesthood eo ilo ļaddik ro ej kajoor in wōt priesthood eo ilo em̧m̧aan n̄e ejim̧we kōjerbal e. Innām, n̄e kom̧ij kōm̧m̧ani bujen ko an tampeļ imerom mijenede ro im ritōl ro ilju im jeklaj an Kabun̄ in, kwonaaj jeļā ewi wāween n̄an bōk revelesōn, ewi wāween lo̧mo̧o̧ren eo juon, im ewi wāween n̄an kwaļo̧k katak eo ilo aelōn̄ in kiin̄ in kōn kajoor im mālim. Innām, kwonaaj erom jodikdik eo em̧ōj kālet n̄an lo̧tak ilo laļ in. Ilo āindein Ij kam̧ool ilo etan Jisōs Kraist, eo ej Rilo̧mo̧o̧r im Ripinmuur eo an laļ, amen.