Kuh luhn Pristut yurin Mukul Fuhsr se

Sel Elder Tad R. Callister

Ke Prestuhnsi luhn Mwet Itngucul


Pristut luhn tuhlihk mukul uh fokoko oacpacna pristut luhn mukul uh ke orekmakihnyuck ke ohiyac suwohswohs uh.

Ke yac 1878 pahpah mahtuh tuhmwacl ninac kiyuck ah George F. Richards el tuh matwac yac 17. Oacna ke kuhtuh pacl uh ma sikyak ke pacl sac, el akmuhsralah tari nuh ke elder. Sie Sacnri ah ninac kiyacl ah kweoklac ke ngal uh. Ke srihpen pahpah tuhmwacl George ah wacngihn, pisap ac mukul ekahsr sahyac suliyuck in sang mwe insewowo nuh sel, tuhsruhk tiac wolac. Pwacnwacng, el foracng nuh sin tuhlihk mukul se nahtuhl ah George ac siyuck sel lacn sang mwe insewowo nuh sel. El suhmuhslah ke mwe sihm nahtuhl, “Ke nga tuhng ke srihpen ninac kiyuck ah kweok ac ke srihpen oasr orekma se luhk in sang mwe insewowo nuh sel oacna nga soenna oruh met, nga som nuh ke sie infuckihl ah in tuhng ac pruhe.”

Ke el ami kuhtuh ah, el fihliyac pahol fin sifacl ac sang sie mwe insewowo na fihsracsr. El fahk tohkoh, “Ninac kiyuck ah tui ke saho lal ac eis kahsruh ke kweok lal ke pouk srackna oan fin sifacl ah.” El suhmuhslah tok ke mwe sihm nahtuhl ke ma liyeyuck kahlwem se inge. El fahk lah el puhla pacl nuh kwewa lah srihpac se ninac kiyacl ah tiac wolac ke mwe insewowo luhn pisap ah tiac ke srihpen Leum el tiac ahkfuhlwactye mwe insewowo lal pisap ah tuhsruhk Leum el orwaclah mwe insewowo se inge nuh sin mukul fuhsr se, in lotwel sie lesin lah pristut luhn tuhlihk mukul uh fokoko oacpacna pristut luhn mukul uh ke orekmakihnyuck ke ohiyac suwohswohs uh.

Ofong, nga luhngse sramsramkihn kuh sac. Nga finne ac sramsramkihn prestuhn ke u luhn tikin uh, ip yohk ma sramsramkihnyuck uh ma nuh sin Aaronic Pristut luhn mwet fuhsr nuh kwewa ac mwet kol lalos an, weacng prestuhn lasr ke u luhn titsucr ac mwet in kahsruh luhn prestuhn ke u luhn prist.

Ke nga kuhlwacnsap in ekihn sie prestuhn luhn misin, nga liye lah oasr kapwack yohk ke ip luhn nguhn ac etwacack ke ohiyacn kol luhn mukul fuhsr uh ke yac ma elos kuhlwacnsap ke misin lalos uh. Kuht fin kuh in luhman kotai luhpan ohiyac inge ke yac lalos ke Aaronic Pristut ac ke misin, sahp kotaiyac ac kuh in oacna atacn lain soko ke tahk se ahkkahlwemyeyuck inge. Nga luhlahlfongi lah oasr kain ohiyac tolu ma orwacni ke kain kapwack yohk ke yac ma mukul fuhsr se oruh sie misin. Sie pa (1) kuht luhlahlfongi mukul fuhsr inge yohk liki na luhlahlfongiyuck elos met ah, ahkluo pa (2) oasr enenuh yohk lasr kaclos tuhsruhk ke luhngse pac, ac ahktolu (3) kuht ahkpahye ac sifil ahkpahyelos elos in muh kuh in ahkfalye ma enenweyuck ingacn in arlac wo.

Fal mwet se in siyuck, “Kuh kuht kuh in orekmakihn ip yohk inge ke prestuhn ke u luhn tikin?” Fin oreklac ma ingacn, sahp kapwack lalos uh kuh in sana muhtwacwacack ac oacna atac se inge. Ke kihtin pacl, nga luhngse sramsram ke ohiyacn kuhpahsr luhn ip yohk inge nuh sin prestuhn se ke u luhn tikin.

Ma se met—luhlahlfongi. Kuht kuh in luhlahlfongi prestuhn ke u luhn tikin lasr uh ke kunohkohn yohk. Leum El luhlahlfongi na pwacye—suc ahkkahlwemyeyuck ke inseselac Lal in sang nuh selos ki uh, kalmac pa suwohs se in karihngihn ac kol orekma ke u lalos. In oacna sie mwe ahkpwacyei luhlahlfongi se inge, kuht pahngon prestuhn ke u luhn tikin ke fwackyuck, tiac ke suc wi paht uh kuh kuhtwena ohiyac ma oacna. Mwet kol nuh kwewa ke Alu se inge, weacng prestuhn ke u luhn tikin, oasr suwohs la in etuh, ac enenuh in etuh, lah el pahngonyuck ke fwackyuck. Mwe ahkpwacye inge kahsrwel etuh lah God El luhlahlfongwel ac ahkkweyacl.

Atac ahkluo ac ahktolu uh fototo nuh sie—ma enenweyuck yohk uh ac ahkpah ma fototo nuh kac in ahkfalyelah. Nga etwaclah lesin na wowo se ke misin luhk ah: kuhiyacn misineri uh yohkwelihk kuh srihkweni in falyang nuh ke luhpan ma enenweyuck sin prestuhn luhn misin, ac oacpacna sie nuh sin prestuhn ke u luhn tikin uh. Elos fin enenweyuck muhkwena in ahkfahsrye miting luhn u uh ac wi miting ke kihmiti fuhsr ke u luhn pisap, na pwacna ma elos ac oruh uh. Tuhsruhktuh kowos mwet kol an kuh in sang nuh selos sie finsrak yohk—finsrak luhn Leum. Ac efuh finsrak uh yohk srihpac? Mweyen ke yohkwelihk finsrak uh yohkwelihk moklweyuck.

Suwohs se in eis fwackyuck uh pa sie ip yohk ke pahng nuh kwewa ke Alu se inge. Pwacnwacng, prestuhn ke u luhn tikin inge enenuh in etuh oasr suwohs lalos in eis fwackyuck in nuhnkuh ke mwet in kahsruh lalos, suwohs se in eis fwackyuck nuh ke pain molweloslac suc tuhlac, ac suwohs se in eis fwackyuck in ahkpahye mwet ke u uh ke ma kunaclos.

Mwet kol suhmaht se fah luti prestuhn ke u luhn tikin ip yohk ingacn ma fah kahsruh yohk ke eisyacn fwackyuck. El kuh in lotwel olweacng kahlwem sin Leum lah kuht fin siyuck sin Leum ke fwackyuck ac etwacack, kuht ac eis fwackyuck nuh ke fwackyuck (liye D&C 42:61). Leum el etatwen na pwacye in sang fwackyuck. El ahkacsmakihnyacl Joseph Smith ac Oliver Cowdery lah elos fin sikalweni in suk ke Leum, elos eis ahkuhtweyac sin Nguhn Lal (liyeD&C 6:14)? Ac kuh pac in oacpacna nuh suwos prestuhn ke u luhn tikin an. Leum El luhngse kowos ac ke ahkkahlwemye nuh suwos nuhnak Lal ac luhngse Lal. Kuh kowos kuh in motko lah oasr elyah luhn Leum ma El tiac kuh in kuhtanglah? Nga tiac kuh. Ke srihpen kowos usrui fwackyuck, El kuh in kahsrwe kowos kuhtanglah elyah nuh kwewa ma oasr yuruwos ke kunohkohn in ekihn prestuhn ke u lowos an kowos fin alken in suk kahsruh Lal.

Kowos mwet kol wolacna an kuh in luti prestuhn ke u luhn tikin inge lah fwackyuck tiac aholyacn orekma upac ac kuhiyacn kais sie. Prestuhn Henry B. Eyring el tuh siyuck sel Prestuhn Harold B. Lee, “Ngwac eis fuhkah fwackyuck uh?” Prestuhn Lee el topuk, “Kom fin ke eis fwackyuck, oruh kunohkohn lom an.”1 Mwet kol se ma suhmaht uh kuh in sramsram nuh sin prestuhn ke u luhn tikin lal an ke kuhtuh sin orekma ke ip luhn nguhn el kuh in oruh in ahko in motko ke mwet in kahsruh lal an. El kuh in enenuh in siyuck ac topuk kihsen siyuck ma oacna: Suc ac kuh in oruh mwe srihkasrak wowo se ma kuh in ahkkweye tuhlihk mukul sahyac uh? Kuh suc kuh in puhla ke enenuh luhn mwet ma sun ma upac yohk uh?

Ac sahflahiyac ah mwet kol suhmaht se inge kuh in luti prestuhn ke u luhn tikin lah el ac akihlen ac mukwikwi fuhkah ke fwackyuck ke ac tuhkuh uh. Kuht moul fin facluh se sesseslah ke ma pihsrpihsr, mukwikwi pwacr, ma lahm kahlwem ac tuhkahsruh upac orekma we. Tuhsruhk mukul fuhsr se enenuh in etuh lah pa inge ohiyacn facluh, tiac ohiyacn Leum. Mwet Lahngo el isuslac ke acn se ma apkuhran in wacngihn mwet etwacl we. El oruh mukwikwi ma wolacna emet ac sie liki nuh kwewa ke pacl nuh kwewa ke imac se ma tiac tuhkahsruh; ac Joseph el eis Aruhrruhma Se Emet ke insack se ma srwenglah. Top luhn God uh tuhkuh ke puhsra srihsrihk ac fihsracsr se—puhla ke mihs kuh wo, pihrihkyuck in oruh ma wo uh, ahketuhye—kuhtuh pacl uh ke atacn nuhnak se ma srihk oacna fihtac uh, tuhsruhk kuh, fin motkweyuck ac ahkfalyeyuck, in kapwack orwaclah kuhtuh sahk luhlahp. Kuhtuh pacl uh mokleyuck kuh nuhnak inge kuh in oruh kowos prestuhn ke u luhn tikin an in motko ke sie mwet in kahsruh kuh tahfwelah sie kunohkohn nuh sin sie mukul fuhsr suc ma ingena suhkwac alu.

Yac ekahsr somlah ah ke nga kuhlwacnsap ke prestuhnsi luhn stek, prestuhnsi se lasr ah puhla pihrihkyuck in pahngon mukul se in mwet sihm luhn stek. Ke pacl sac upac nuh sel in wi alu pacl nuh kwewa. Kuht etuh, tuhsruhktuh, el fin insese nuh ke pahng se, el ac kuh in oruh sie orekma na wowo.

Kuht sang pahng sac, tuhsruhk el topuk muh, “Moh, nga tiac motko muh nga kuh in oruh.”

Na nuhnak se tuhkuh. Nga fahk, “Koacl, nga muh ac wacngihn mwet in sihm luhn stek Glendale.”

El lut, el topuk, “Meac kom fahk an? Enenuh in oasr mwet sihm luhn stek.”

Nga tohpohklah, “Kom luhngse kuht in pahngon sie mwet sahyac in oruh mwet sihm luhn stek ke Leum El pihrihk kuht in pahngon kom uh?”

“Koacl,” el fahk, “ngwac oruh.”

Na el oruh. Tiac puhs mukul muhkwena tuhsruhk oacyacpac puhs tuhlihk mukul suc fah topuk ke pahng ke elos etuh lah Leum el pahnglolos ac lah Leum El enenwaclos.

Ma se tok an, kowos kuh in ahkuhtweyac nuh sin prestuhn ke u luhn tikin inge lah sie sin ma enenweyuck sin Leum kacl pa in pain molwelah mwet tuhlac, kwewana mwet suhkwac alu ac mwet tiac mempucr uh. Leum El fahkwack misin yohk srihpac Lal ke kahs inge: “Tuh Wen nuhtin Mwet el tuhkuh in molweloslac suc tuhlac” (Mattu 18:11). Fin pa ma se emet Mwet Lahngo in oruh pa in molwelah mwet tuhlac, fin pa ma se emet Prestuhn Thomas S. Monson el in oruh uh, oacna liyeyuck ke moul nohfohn lal, enenuh in ma se pac emet nuh sin mwet kol nuh kwewa, prestuhn ke u luhn tikin nuh kwewa ke Alu se inge. Lohacng yohk se ke ohiyacn mwet kol lasr uh, oacna ip yohk srihpac se ke luti lasr uh, enenuh in pa sulaclah se in fosrngah, moklweyuck, ac insacnweacng pacl nuh kwewa in som ac sun mwet tuhlac ac usaclos uh.

Sie mukul fuhsr ma mwet ke u lal ah muhtwacta nuh yohroh fahk: “Mwe lut mihsenge ke … mwet 30 tuhkuh nuh lohm sihk uh. … Oruh nga ke som wi alu ingena.” Fuhkah mwet fuhsr uh in kuh in kutong kain luhngse ac lohacng ma oacna ingacn?

Nga pwacrack ke nga lohng sramsram puhs ke prestuhn ke u luhn tikin suc ma eis wo etuh sac ac kuhtuh pacl uh luti nohfohn kuh kuhtuh ip ke lesin ke miting luhn u lalos uh. Wik ekahsr somlah ah nga wi kuhlahs se ke u luhn tikin. Tuhlihk mukul se matwac yac 12 el oruh lesin se ke mihnit 25 ke Iwaclah. El muhtwacwacack in siyuck sin tikin wiyacl ah lah elos nuhnkuh muh meac Iwaclah. Na el akacsruhi ke kuhtuh ma suhmuhslah yohk kalmeyac ac siyuck kihsen siyuck yohk srihpac, ma elos tohpohklah. Ke el akihlen lah pacl uh yohk liki na koanon lesin sac, el etuh fal ac sahp ke kuhtuh ma ahkuhtweyucki met sin pahpah tuhmwacl in siyuck sin mwet kol ma wi lah kihsen siyuck fuhkah ma siyuckyuck selos ke Iwaclah ke misin lalos ac fuhkah top lalos kac. Na el ahksahfyelah ke fahkwack luhlahlfongi lal. Nga lut ke lohngyac. Nga nuhnkuh sihk sifacna, “nga tiac esam lah nga oruh ip yohk se ke lesin se ke nga tuh mwet fuhsr ke Aaronic Pristut ah.” Kuht kuh in ahkyohkye ma motkweyuck ke ac finsrak luhn mukul fuhsr inge, ac elos ac topuk.

Kowos mwet kol an mokle prestuhn ke u luhn tikin inge in wo ke kowos ac fuhlweacng elos in kol an. Kowos ahkfalye pahng lowos an wo tiac ke kowos oruh lesin wowo se uh tuhsruhk ke kowos kahsrwelos in oruh sie lesin wowo, tiac ke kowos molwelah mwet se tuhsruhk ke kowos kahsrwelos in oruh oacna uh.

Oasr fuhfas mahtuh soko: nimet misac met liki kom ahkfalye kuhiyom. In oacna fahk sacn nga luhngse fahk nuh suwos mwet kol mahtuh an, nimet fihlfihllac met liki kowos ahkfalye kuhiyowos in kol. Luti mwet fuhsr lasr an ke pacl wowo nuh kwewa; lotwelos ohiyacn ahkolah sie plwacn in miting an, ohiyacn ahkfahsrye miting ke suhnak ac kuhlwacng, ohiyacn molwelah mwet se, ohiyacn ahkolah ac oruh sie lesin mokleyuck, ac ohiyacn eis fwackyuck. Pa inge ohiyac se ma kowos kuh in srihkeyac orwaclah wo lowos—ke ohiyacn mwet kol ac ke ip luhn nguhn ma kowos kahsrwelah in oruh ip se ke loaliyacn nuhnak ac puhla ke mukul fuhsr inge.

Fin kowos prestuhn ke u luhn tikin an ac ahkfalye pahng lowos an, kowos fah kuhfa nuh in poun God finne ingena, ke srihpen pristut ke tuhlihk mukul uh kuh oacna pristut luhn mukul uh ke orekmakihnyuck ke suwohswohs uh. Na, ke kowos orwaclah olwelah luhn tempuhl ac ekihn misineri uh ac mwet kol ke pacl fahsruh luhn Alu se inge, kowos fah etuh ohiyacn eis fwackyuck, ohiyacn molwelah mwet se, ac ohiyacn luti mwe luti ke tohkohsrahi ke kuh ac wal. Na kowos ac mwet fuhsr fuhlwact. Ke ma inge nga fahkwack na pwacye ke inen Jisus Kraist, suc pa Mwet Lahngo ac Mwet in Molwelah luhn facluh, amen.

Mostrar referencias

  1.  

    1. Ke Henry B. Eyring, “Waiting upon the Lord,” ke Brigham Young University 1990–91 Devotional and Fireside Speeches (1991), 17.