Tus Cawm Seej Xav Zam Txim

Thaum lub sij hawm uas peb tus Cawm Seej ua hauj lwm qhuab qhia hauv ntiaj teb ntau tus nrog Nws mus, tsis hais cov xib hwb thiab cov Falixais los yog, “tuaj hauv txhua lub nroog ntawm Kalilais, ... Yudas, thiab hauv lub nroog Yeluxalees tuaj.”¹ Muaj qee leej muab pam qhwv ib tug txiv neej tuag tes tuag taw uas xav txais kev kho mob raug kwv tuaj nrog rau ib co neeg coob coob, tiam sis vim lawv tsis tau kev kwv kom mus ze rau tus Cawm Seej, lawv txawm kwv nws nce mus rau saum ruv tsev thiab muab nws tso dauv mus rau ntawm Yexus hauv ntej. Nws pom hais tias lawv muaj kev ntseeg heev, ces txawm cov uas mloog Nws hais tseem tsis paub muaj lub ntsiab dab tsi los, tus Cawm Seej hais tias, “Phooj ywg, kuv zam txim rau koj tej kev txhaum lawm.”²

Tej zaum qhov no ua rau tus txiv neej no xav tsis thoob, thiab txawm yog vaj lug kub tsis qhia dab tsi txog nws txoj kev xav, tej zaum nws xav tias tus Cawm Seej tsis to taub yog vim li cas nws tuaj.

Tus Cawm Seej paub hais tias neeg coob nrog Nws mus vim Nws ua tej txuj ci tseem ceeb heev. Nws twb muab cov dej txia ua cawv txiv hmab,³ ntiab cov ntsuj plig phem tawm,⁴ thiab kho tus nom tus tub,⁵ ib tug mob ruas,⁶ Petus niam tais⁷ thiab coob tus ntxiv.⁸

Tiam sis rau tus neeg tuag tes tuag taw no, tus Tswv muab pov thawj rau cov uas ntseeg Nws thiab cov tsis ntseeg Nws txog Nws txoj hauj lwm ua tus Cawm Seej ntawm neeg ntiaj teb. Thaum lawv hnov tus Cawm Seej tej lus, cov xib hwb thiab cov Falixais pib sib tham hais tias Nws hais lus saib tsis taus Vajtswv thiab lawv xav tias tsuas yog Vajtswv xwb muaj cai zam txim rau tej kev txhaum. Tus Cawm Seej paub lawv xav dab tsi, thiab hais lus rau lawv tias:

“Ua li cas nej yuav xav li ntawd?

Lo lus uas hais tias, ’Kuv zam txim rau koj tej kev txhaum lawm,’ los sis lo lus uas hais tias, ’Koj cia li sawv tsees mus kev!’ Ob lo lus no, lo twg yuav yooj yim hais dua?”⁹

Nws tsis tau tos lawv teb Nws, ces tus Cawm Seej hais ntxiv hais tias: “Kuv yuav ua li no qhia rau nej paub tias Neeg Leej Tub muaj hwj chim hauv ntiaj teb no zam txim rau neeg tej kev txhaum, [Nws txawm tig mus rau tus neeg tuag tes tuag taw], kuv hais rau koj hais tias, Cia li sawv, thiab nqa koj daim pam pua chaw mus tsev.”¹⁰ Ces nws ua li ntawd tiag!

Los ntawm kev kho neeg mob ntawm sab nqaij daim tawv no, tus Cawm Seej qhia rau peb txhua tus txog qhov tseeb ntawm sab ntsuj plig uas yeej muaj lub hwj chim tshaj: Neeg Leej Tub zam txim rau neeg tej kev txhaum!

Txawm tag nrho cov ntseeg lees yuav qhov tseeb no los, qhov uas nyuaj lees yog qhov tseeb uas txuas rau qhov no hais tias: tus Cawm Seej zam txim “hauv ntiaj teb,” thiab tsis yog thaum Kev Txiav Txim Zaum Kawg xwb. Nws tsis zam txim rau peb nyob hauv peb tej kev txhaum.¹¹ Nws tsis pom zoo cia peb rov qab ua txhaum li qub.¹² Tiam sis thaum peb hloov siab lees txim thiab mloog Nws txoj moo zoo, Nws yuav zam txim rau peb.¹³

Los ntawm kev zam txim no peb pom kev tshav ntuj ntawm txoj Kev Theej Txhoj lub hwj chim uas kom neeg muaj peev xwm thiab lub hwj chim uas txhiv neeg dim. Yog peb rau siab ntseeg tus Tswv Yexus Khetos, Nws txoj Kev Theej Txhoj lub hwj chim uas kom peb muaj peev xwm txhawb peb lub zog thaum peb xav tau,¹⁴ thiab Nws lub hwj chim txhiv dim ua rau peb dawb huv thaum peb “tso tus neeg ntiaj teb tseg.”¹⁵ Qhov no uas rau peb txhua tus cia siab, qhov tseem ceeb yog cov uas xav tias tus Cawm Seej tsis kam pab thiab cawm tib neeg uas muaj tej kev qaug zog.

Kom tus Cawm Seej muaj cib fim qhia peb kom to taub qhov no,¹⁶ muaj ib zaug Petus nug seb nws yuav tsum zam txim rau nws tus kwv tij pes tsawg zaus ces nug hais tias, “Xya zaus los?” Nyaj npaum li ntawd yuav txaus. Tiam sis tus Cawm Seej lus teb ua rau peb nkag siab txog Nws txoj kev siab hlub: “Kuv tsis hais xya zaus xwb: tiam sis yog xya caum zaum.”¹⁷

Tus Tswv hlub peb thiab xav kom peb to taub Nws txoj kev xav zam txim rau peb. 20 tawm zaus nyob hauv phau Lus Qhuab Qhia thiab Kev Khi Lus, tus Tswv hais rau neeg hais tias, “Tus Tswv zam txim rau koj tej kev txhaum,” los yog tej lus zoo li ntawd.¹⁸ Ntawm tej lub sij hawm ntawd, ib nrab yog tus Tswv tej lus Nws hais rau tus Yaj Saub Yauxej Xamiv, tej lub sij hawm Nws hais rau Yauxej Xamiv nws ib leeg, tej lub sij hawm nrog lwm tus.¹⁹ Tau sau txog zaum thib ib thaum xyoo 1830, zaum kawg yog thaum xyoo 1843. Yog li ntawd, tau ntau xyoo, tus Tswv rov qab hais rau Yauxej hais tias, “Tus Tswv zam txim rau koj tej kev txhaum.”

Txawm Yauxej “tsis muaj txim loj los yog kev txhaum phem,”²⁰ peb yuav tsum nco ntsoov tias tshuav ob peb yam xwb, tus Tswv “xya zaus yog xya caum” tsis tau txwv tsis pub zam txim rau tus uas ua txhaum loj heev.

Thaum tus Tswv hais lus rau ib co txwj laug hauv Kirtland, Nws hais tias, “Kuv xav kom nej kov yeej lub ntiaj teb; yog li ntawd kuv yuav muaj kev khuv leej rau nej.”²¹ Tus Tswv paub peb tej kev qaug zog thiab tej yam uas txiv neej thiab poj niam tsis zoo tag nrho yuav raug mus ib txhis los ntawm “lub ntiaj teb.”²² Lo lus yog li ntawd nyob hauv nqe vaj lug kub no yog Nws txoj lus pom zoo tias los ntawm Nws txoj kev khuv leej xwb peb thiaj yuav “kov yeej lub ntiaj teb.” Kev khuv leej tshwm sim li cas? Rau tib cov txwj laug nyob hauv Kirtland Nws hais tias, “Kuv tau zam txim rau nej tej kev txhaum.”²³Tus Cawm Seej xav zam txim.

Tsis tas xav hais tias yuav txais kev zam txim no yog yus tsis hloov siab lees txim. Tus Tswv yeej tshaj hais tias, “Kuv, tus Tswv, zam txim rau tej kev txhaum ntawm cov uas lees lawv tej kev txhaum rau kuv thiab thov kev zam txim,” ces nws hais lus ceeb toom ntxiv hais tias, “cov uas tsis tau ua txhaum kom tuag.”²⁴ Txawm tus Tswv “yeej ntsia tsis taus kev txhaum li txawm yuav yog qhov me dua ntais,”²⁵ los Nws tseem pom tias tej kev txhaum yeej nyias txawv nyias. Nws qhia hais tias yuav tsis pub kev zam txim rau “kev thuam tus Vaj Ntsuj Plig Dawb Huv.”²⁶ Nws hais tias kev tua neeg yog kev txhaum loj npaum li cas²⁷ thiab kev ua txhaum kev sib deev xws li kev deev luag poj luag txiv phem npaum li cas. ²⁸ Thaum twg neeg pheej rov qab ua txhaum kev sib deev, Nws qhia hais tias yuav nyuaj zuj zus txais Nws txoj kev zam txim.²⁹ Thiab Nws hais tia “tus uas ua txhaum rau qhov kaj ci tshaj yuav tau txais txoj kev raug txim loj dua.”³⁰ Tiam sis, los ntawm Nws txoj kev hlub tshua, Nws cia peb ua neeg zoo dua zuj zus mus tsis tas ua neeg zoo tag nrho tam sim no. Txawm muaj tej kev txhaum ntau uas los ntawm tej kev qaug zog hauv lub neej ntiaj teb no, yog peb hloov siab lees txim thiab nrhiav Nws txoj kev zam txim, Nws yuav zam txim, ib zaug dhau ib zaug.³¹

Vim li ntawd, peb txhua tus, tsis hais cov uas sib zog kov yeej tej kev coj cwj pwm uas muaj yees xws li kev haus tshuaj phem los yog saib duab liab qab thiab cov uas nyob ze lawv los yog, txhua tus yuav paub tias tus Tswv pom tej yam peb ua uas ncaj ncees thiab yuav muaj siab hlub zam txim thaum peb hloov siab lees txim tiav lawm, “Mus txog xya zaus xya caum.” Tiam sis qhov no tsis txhais hais tias nws pub yus txhob txwm rov qab ua txhaum dua.³²

Tus Tswv yeej xav paub txog peb tej siab,³³ thiab kev ntseeg cuav tsis ua rau peb muaj cai ua txhaum.³⁴ Nyob hauv lub caij nyoog no tus Tswv ceeb toom Nws ib tug tub qhe txog tej kev xav li no hais tias, “Cia [nws] poob ntsej muag rau Nicolaitane pab neeg thiab rau tag nrho lawv tej kev qias ua ntsiag to.”³⁵ Cov Neeg Nicolaitans yog ib pawg teev ntuj thaum ub uas hais tias lawv muaj cai ua txhaum kev sib deev vim muaj tus Tswv txoj kev tshav ntuj.³⁶ Qhov no tsis ua rau tus Tswv zoo siab.³⁷ Nws txoj kev khuv leej thiab kev tshav ntuj tsis zam txim rau peb thaum “[peb] tsis txaus siab. Thiab [peb] tsis ua raws li qhov tseeb, tiam sis nyiam ua tsis ncaj ncees.”³⁸ Tiam sis, tom qab peb ua txhua yam peb ua tau,³⁹ Nws txoj kev khuv leej thiab kev tshav ntuj yog tej yam uas “muaj ib hnub”⁴⁰ ua rau peb kov yeej lub ntiaj teb dhau ntawm txoj Kev Theej Txhoj lub hwj chim uas ua rau peb muaj peev xwm. Thaum peb txo hwj chim nrhiav lub txiaj ntsim no, “tej uas tsis muaj zog rais los mus muaj zog rau [peb],”⁴¹ thiab los ntawm Nws thiab los ntawm Nws lub zog, peb muaj peev xwm ua tej yam uas peb yeej ua tsis tau nyob peb ib leeg.

Tus Tswv saib txoj kev kaj uas peb tau txais lawm,⁴² tej kev xav hauv peb lub siab,⁴³ thiab tej yam peb ua,⁴⁴ thiab thaum peb hloov siab lees txim thiab nrhiav Nws txoj kev zam txim, Nws cia li zam txim. Thaum peb xav txog peb lub neej thiab lub neej ntawm cov uas peb hlub thiab paub, peb yuav tsum txaus siab zam txim rau peb tus kheej thiab lwm tus.⁴⁵

Preach My Gospel hais txog kev nyuaj kov yeej tej kev coj cwj pwm uas muaj yees thiab yaum cov thawj coj pov thawj hwj thiab cov mej zeej kom lawv “tsis txhob xav tsis thoob los sis poob siab” yog cov kawm txoj moo zoo los yog cov mej zeej tshiab tseem muaj tej teeb meem ntawd. Tiam sis, peb yuav tsum “ntseeg tus neeg ntawd thiab txhob txiav txim rau nws ...[cia li xav] tias qhov teeb meem no yuav nyob tsis ntev thiab yus to taub.”⁴⁶ Puas tsim nyog ua tsawg dua li no rau peb cov me nyuam los yog tsev neeg uas muaj teeb meem zoo li no, uas tau ua yuam kev tsis taug txoj kev tsis ncaj ncees tam sim no? Lawv yeej tsim nyog txais peb txoj kev nyob ruaj khov, kev ua siab ntev, thiab kev hlub—muaj tseeb tiag, peb txoj kev zam txim.

Nyob hauv lub tuam rooj sab laj thaum lub Kaum Hli Ntuj tas los, Thawj Tswj Hwm Monson ntuas hais tias:

“Peb yuav tsum nco ntsoov tias tib neeg muaj peev xwm hloov siab. Lawv muab lawv tej cwj pwm tsis zoo tso tseg los tau. Lawv hloov siab lees txim rau lawv tej kev txhaum los tau....

“... Peb pab tau lawv kov yeej tej yam lawv ua tsis tau. Peb yuav tsum muaj peev xwm txhob saib qhov uas txiv neej zoo li cas tam sim no tiam sis saib qhov uas lawv rais tau los ua neeg zoo li cas.⁴⁷

Nyob hauv ib lub rooj sab laj ntawm lub Koom Txoos yav tas los, zoo ib yam li lub rooj sab laj no, tus Tswv qhia cov mej zeej hais tias:

“Kuv hais tseeb rau nej tias, nej yeej huv lawm, tiam sis tsis yog tag nrho; ...

“Vim txhua tus tib neeg twb liam sij rau ntawm kuv qhov muag. …

“... Vim nej ib txhia muaj txim rau ntawm kuv qhov muag, tiam sis kuv yuav hlub tshua rau nej txoj kev qaug zog.”⁴⁸

Zaj no kuj hais rau nej ib yam thiab.

Tus Tswv paub peb tej teeb meem, thiab peb txhua tus ua txhaum thiab “tsis tau Vajtswv lub yeeb koob”⁴⁹ ib zaug dhau ib zaug. Nws txib Nws Leej Tub, uas “paub neeg txoj kev qaug zog thiab paub pab lawv cov uas raug ntxias.”⁵⁰ Nws qhia peb “thov Vajtswv tas mus li kom [peb] txhob nkag mus rau tej kev ntxias.”⁵¹ Nws hais kom peb “quaj thov nws rau txoj kev tshav ntuj; vim nws muaj hwj chim cawm tau.”⁵² Tus Cawm Seej txib peb hloov siab lees txim⁵³ thiab zam txim rau lwm tus.⁵⁴ Thiab txawm kev hloov siab lees txim tsis yooj yim, thaum peb siv zog ua raws li Nws txoj moo zoo kawg siab kawg ntsws, Nws muab cov lus cog tseg no rau peb hais tias: “Kuv hais tseeb rau nej tias, txawm yog [nej] muaj kev txhaum los, kuv lub siab muaj kev khuv leej puv npo rau [nej]. Kuv yuav tsis muab [nej] pov tseg tag nrho; thiab nyob rau hnub npau taws kuv yuav nco ntsoov txoj kev hlub tshua.”⁵⁵ Tus Cawm Seej xav zam txim.

Txhua lub lim tiam Cov Neeg Maumoos Tsev Kheej Pawg Hu Nkauj qhib lawv txoj kev tshaj tawm nrog William W. Phelps cov lus hauv nws zaj nkauj qhuas Vajtswv “Maj Mam Hu Ib zaj Dawb Huv.” Tiam sis neeg coob tsis tshua paub tej lus ntawm nqe plaub uas nplij peb lub siab hais tias:

Kuv caw nej nco qab thiab ntseeg tus Tswv tej lus thiab rau siab ntseeg Nws kom hloov siab lees txim.⁵⁷ Nws hlub nej. Nws xav zam txim pub rau nej. Kuv ua tim khawv li no los ntawm Yexus Khetos lub npe dawb ceev, amees.