2010–2019
Mwet Lahngo El Luhngse in Nuhnak Muhnahs
April 2013


Mwet Lahngo El Luhngse in Nuhnak Muhnahs

Leum El luhngse kuht ac kena kuht in kahlwem ke kena in nuhnak muhnahs Lal.

Puhlan pacl se Mwet Lahngo lasr El luti ke El moul, mwet pucspucs fahsr Tohkohl weacng mwet sihm ac mwet Facrisi, “tuhkuh liki siti nuh kwewa fin acn Galilee,… Judea, ac Jerusalem.”1 Sie mwet muhta in lohm, ul kena kwelac utuckuh nuh ke tuhkweni luhlahp se, tuhsruhk koflah fototo nuh yurin Mwet Lahngo, kawuck lal ah usaclwack nuh fin lohm se Mwet Lahngo El muhta loac ac kukunilyac nuh ten. Liye orekma luhn luhlahlfongi se inge, ke srihpac yohk ma soenna etweyuck selos suc El luti, Mwet Lahngo El fahk, “Mukul, ma koluk lom nuhnak muhnahs nuh sum.”2

Ma se inge sahp ahklutyeack mukul sac, ac finne ma suhmuhslah uh tiacna fahk ke fusrwacl, sahp el motko fin Mwet Lahngo El kahlwem na pwacye lah efuh el tuhkuh.

Mwet Lahngo El etuh lah mwet pucspucs Ukwacl ke srihpen mwenmwen pucspucs Lal. El ekuhllah tari kof nuh ke wain,3 sislah nguhn fohkfohk,4 ahkkweyelah wen se nuhtin mwet fuhlwact se,5 mwet lepa se,6, ninac kiyacn muhtwacn kiyacl Peter7 ac ma puhs sahyac. 8

Tuhsruhk ke mukul ul se inge, Leum El sulaclah in sang mwe lohoh nuh sin kwewana mwet tuhma lutlut ac mwet lain ke kunohkohn wolacna Lal oacna Mwet Lahngo luhn facluh. In lohng kahs luhn Mwet Lahngo, mwet sihm ac Facrisi uh muhtwacwacack in asramsrami inmahsrlolos sifacna, tiacna etuh ma elos sramsram kac ke ahksahfye in fahk lah God muhkwena kuh in nuhnak muhnahs ke ma koluk. In etuh nuhnak lalos, Mwet Lahngo El fahk nuh selos, fahk:

“Efuh kowos kuh asiyucki insiyowos?

“Finne fihsrwacsr, in fahk, Ma koluk lom fah nuhnak muhnahs nuh sum; kuh in fahk, Tuhkahkwack ac fahsr?”9

Tiac sano top lalos, Mwet Lahngo el tahfwelah, “Tuhsruhk elos in etuh lah Wen nuhtin mwet oasr kuh nuh facluh in nuhnak muhnahs ke ma koluk, [na El foracng nuh sin mwet ul sac] Nga fahk nuh sum, Tuyak, ac sruhkwack mwe oan kiyom, ac som nuh lohm sum.”10 Na el oruh!

Ke usrnguckiyacn ahkkweyelah luhn mahno se inge, Mwet Lahngo El ahkpwacyei nuh sesr kwewa kuh fuhlwactlacna luhn nguhn pwacye: Wen nuhtin Mwet El nuhnak muhnahs ke ma koluk uh!

Ke ma pwacye se inge etweyuck tari sin mwet luhlahlfongi nuh kwewa, ma se tena etweyuck uh pa yohk srihpac in oasr ma pwacye: Mwet Lahngo El nuhnak muhnahs ke ma koluk “fin facluh” ac tiac ke Nuhnuhnkuh Sahflah muhkwena. El tiac fihli kuhtlac ke ma koluk lasr.11 El tiac lwelah kuht in fohlohk nuh ke ma koluk lasr met ah.12 Tuhsruhk ke kuht auliyak ac ahkos wosasuc Lal, El nuhnak muhnahs nuh sesr.13

Ke nuhnak muhnahs se inge kuht liye lwelah ac kuh luhn molwelah ke Iwaclah wolacna ac pahkotwen orekmakihnyuck. Kuht fin orekmakihnyuck luhlahlfongi in Leum Jisus Kraist, kuh luhn Iwaclah Lal ahkkweye kuht in pacl kuht enenuh,14 ac kuh luhn molwelah Lal ahkmuhtahlye kuht ke kuht forlah liki ma koluk lasr.15 Ma se inge use finsrak nuh sin mwet nuh kwewa, yohkna nuh selos ma puhla muh sifil onwelah muhnahs luhn mwet uh ahluhkwelah ma Leum El luhngse in kahsruh ac in molwelah.

Use sie pacl wowo nuh sin Leum nuh ke kahlwem ke etuh lasr,16 Peter el lohlngohk sie pacl ah lah pacl ekahsr el enenuh in nuhnak muhnahs nuh sin tamuhlwel lal ac siyuck, “Yac pacl itkohsr?” Ma na pwacye se lah puhslaclac. Tuhsruhk top luhn Mwet Lahngo ikacslah inkacnek se nuh sesr in etuh inse pahkotwen Lal: “Moh, tiac pacl itkohsr, tuhsruhk itngucul pacl itkohsr.”17

Leum El luhngse kuht ac kena kuht in kahlwem ke luhngse Lal in nuhnak muhnahs. Kepacl puhs liki 20 lunDoctrine and Covenants, Leum El fahk nuh selos suc El sramsram nuh se ah lah ma koluk lalos nuhnakmuhnahs nuh selos kuh kahs apkuhran nuh kac.18 Apkuhran in tahfuh pacl ma sikyak ingoh, kahs luhn Leum som yohkna nuh sel Mwet Pahluh Joseph Smith, kuhtuh pacl uh sramsram nuh sel muhkwena, kuhtuh pacl uh nuh sin mwet sahyac.19 Ma se emet ke ma inge sihmlac ke 1830, ma sahflah sac ke 1843. Ohinge, ke yac pucspucs, Leum El kalweni in fahk nuh sel Joseph lah ma koluk lal nuhnak muhnahsyeyuck.

Ke Joseph el tiac puhla suhfal ke kuhtwena ma yohk kuh ma koluk upac,20 ma wo se nuh sesr in esam lah ke wacngihn ma tulokihn, “itngucul pacl itkohsr” luhn Leum tiac sruokyac nuhnak muhnahs wiwina upac ke ma koluk sac.

Ke El sramsram nuh sin elder tuhkweni fin acn Kirtland, Leum el fahk lah el kena elos in kuhtanglah facluh; ke srihpac se el ac fah pahkomuhtahlos.21 Leum El etuh muhnahs lasr ac ma e sikyak ne tok nuh facluh nuh sin mukul ac muhtwacn sesuwohs.22 Ke fuhs se inge kahs se ke srihpac se pa mwe ahkpwacye Lal lah ke moul nwacsnwacs ke pahkotwen Lal muhkwena kuht kuh in sahflahiyac kuhtanglah facluh. Fuhkah tuh pahkomuhta orwaclah kahlwem? Nuh sin elder pacna Kirtland inge El fahk muh El nuhnak muhnahs nuh selos ke ma koluk lalos.23Mwet Lahngo El luhngse in nuhnak muhnahs.

Wacngihn mwet nuhnkuh muh nuhnak muhnahs se inge tuhkuh ke tiac auliyak. Pwacyena, lah Leum El fahk muh El, Leum, El nuhnak muhnahs ke ma koluk lalos suc fahkuhltahlwack ye Muhtahl, ac siyuck ke nuhnak muhnahs, na sensenkihn nuh selos sie ma enenweyuck yohk ma koluk nuh ke misac.24 Finne Leum El tiac kuh in liye ma koluk muh pihlacni srihklac,25 El ahkuhtweyac upaciyacn kuhtuh ma koluk uh. El fahk na pwacye lah wacngihn nuhnak muhnahs in fahk koluk ke Nguhn Muhtahl.26 El fahkwack kolukiyacn ahkmas27 ac ahkuhtweyac wo kolukiyacn ohsun luhn mahno oacna kosro.28 Ke kalweniyuck upaciyacn kosro uh, El orwaclah in etweyuck yohkwelihk upac in eis nuhnak muhnahs Lal.29 Ac el nuh fahk muh mwet ma orekma koluk lain kahlwem luhlahp sac fah eis mwacta luhlahp.30 Tuh, ke pahkotwen Lal, El fuhlwelah pacl loeloes in oasr eklac likina sap kuh in suhlahklahk ahkwoyelah. Finne ke ma koluk pucspucs suc tuhkuh ke muhnahs ke moul in ikoac, ke kuht auliyak pacl puhs ac suk nuhnak muhnahs Lal, El nuhnak muhnahs ke pacl nuh kwewa.31

Ke srihpac se inge, kuht nuh kwewa, weacng elos pac suc srihke in kuhtanglah ohiyac elos pahlah kac ma oacna orekma suhfal kuh liyeyuck petsac koluk ac mwet ma fototo nuh selos, kuh in etuh lah Leum el kuh in akihlen kuhiyacn suwohswohs lasr ac fah engan in nuhnak muhnahs ke auliyak uh pwacye uh, “ne ke pacl itngucul pacl itkohsr.” Tusruhk tiac kalmac pa sie mwet kuh in luhngse na lal fohlohklac nuh ke ma koluk ac e tiac ahkkohsyeyuck.32

Leum El kwacna luhngse insiyacsr,33 ac ahkuhtweyac luhlahlfongi suhtuhuh tiac kahsruh ma koluk.34 Ke we se inge, Leum El sensenkackihn mwet kuhlwacnsap Lal ke kain ahkuhtweyac se inge in fahkwacng lah El tiac enenuh in mwekihn sin u sritacl on luhn Nicolaitane ac ke ma koluk lukmac lalos.35 Nicolaitan uh pa un mwet luhlahlfongi in pacl met ah suc orwaclah muh oasr lwelah nuh selos in orek kosro in moul nwacsnwacs ke luhng kuhlwacng luhn Leum.36 Ma inge tiac wo ye muhtuhn Leum.37 Pahkotwen ac luhng kuhlwacng Lal tiac kahsrwe kuht ke insiyacsr tiac wo ac kuht tiac ahkos ma pwacye, tuhsruhk luhngse mwe engan ke ohiyac.38 Sahyacna, tukun oruh ma nuh kwewa kuht kuh in oruh,39 pahkotwen ac luhng kuhlwacng Lal pa srihpac se pwacnwacng ke oruh luhn pacl uh40 kuht ac kuhtanglah facluh ke kuh luhn Iwaclah. In puhsisacl in suk mwe sang sacohk se inge, ma muhnahs uh fokokoi nuh sesr41 ac ke kuh Lal, oreklac kuht in kuh in oruh ma kuht tiac kuh in muhkwena oruh.

Leum El liye ke kahlwem se utuckuh nuh sesr,42 kena luhn insiyacsr,43 ac orekma lasr uh,44 ac ke kuht auliyak ac suk nuhnak muhnahs Lal, El nuhnak muhnahs. Ke kuht motko moul lasr sifacna ac moul luhn mwet sacohk sesr ac mwet asruoki lasr, kuht nohfohn enenuh in sulaclah in nuhnak muhnahs nuh sesr sifacna ac mwet sahyac uh.45

Preach My Gospel sramsram ke upac luhn kuhtanglah ohiyac kom pahlah kac ac ahkkweye mwet kol luhn pristut ac mempucr in “tiac lut kuh toasrlah” fin mwet lohlngohk kuh mempucr sasuc uh srwackna tikuclkucl ke kain ohiyac inge. Sahyac na, lutiyuck kuht in “ahkkahlwemye luhlahlfongi lasr ke mwet sacn ac tiac nuhnuhnkwacl… [oruh oacna] ma kahlwem muh ma nuh ke kihtin pacl na.”46 Yac kuht kuh in oruh fihsrwacsr nuh sin tuhlihk nahtuhsr sifacna kuh mwet in sucu lasr ma tikuclkucl ke kain ohiyac se inge, kuhflah liki inkacnek luhn ohiyac suwohswohs ke kihtin pacl? Pwacyena eltahl enenuh okak, muhtweng, ac luhngse lasr—ac ahok, nuhnak muhnahs lasr.

Ke toeni luhlahp kena Ohktohpa tari ac, Prestuhn Monson el luti:

“Kuht enenuh in fihliyac in mwe nuhnak uh lah mwet uh kuh in eklac. Eltahl kuh in sislah ohiyac koluk. Eltahl kuh in auliyak liki ma koluk….

“… Kuht kuh in kahsrweltahl in kuhtanglah fototolac lalos. Kuht enenuh in ahkyohkye luhpah se in liye mwet uh tiac ke ohiyacltahl ingena tuhsruhk lah elos ac eklac mwet fuhkah.” 47

Ke sie toeni met luhn Alu uh, apkuhran nuh ke teoni se inge, Leum el fahk nuh sin mempucr uh:

Pwacyena El fahk nuh selos lah elos nwacsnwacs, tuhsruhk tiac nohfohn.

Tuh ikoac nuh kwewa fohkfohk ye Muhtuhk. …

“… Tuh pwacyena kuhtuh selos suhfallac ye Muhtuhk, tuhsruhk nga fah pahkomuhta muhnahs lom.48

Pweng Lal oacpacna mihsenge.

Leum El etuh ma oan ye muhtahsr, lah kuht nohfohn orekma koluk ac “tiac sun luhpan wolacna se luhn God”49 pacl nuh kwewa. El etuh muhnahs luhn mwet uh ac ohiyacn kahsruh mwet ma sruhflah.50 El luti kuht in “pruhe pacl nuh kwewa kuht in tiac ilyak nuh ke mwe sruhf.51 Fwack nuh sesr in pruhe nuh Sel ke luhng kuhlwacng, tuh El fuhlwactlacna in molwelah.52 El sapkihn kuht in auliyak53 ac in nuhnak muhnahs.54 Ac finne auliyak uh tiac fihsrwacsr, ke kuht kwacfweacng ke insiyacsr kwewa in ahkos wosasuc Lal, El use olwelah se inge: El fahk na pwacye nuh sesr, finne ke ma koluk lasr, Insiyacl sesseslah ke pahkotwen nuh sesr. El ac fah tiac siskuhtlac; ac ke lwen in kasrkuhsrak El ac esam luhng kuhlwacng.55 Mwet Lahngo El luhngse in nuhnak muhnahs.

Kais sie wik, Mormon Tabernacle Choir muhtwacwacack suhpwaclihk luhn puhsra mokleyuck kac ke kahs wolacna ke on etweyuck soko lal William W. Phelps “Gently Raise the Sacred Strain.” Tiac arlac kahlwem oacna kahs in ahkkweye ke fuhs ahkahkosr:

Leum El muhtahl.

Kahs Lal sacohk: …

Auliyak ac moul;

Finne ma koluk lom sruhsrah sahromrom,

O, auliyak, ac el fah nuhnak muhnahs.56

Nga suli kowos in esam ac luhlahlfongi kahs luhn Leum ac in ahkyohkye luhlahlfongi ke El nuh ke aliyak.57Mwet Lahngo El luhngse kom. El luhngse in nuhnak muhnahs. Nga fahkwack na pwacye ke ine muhtahl luhn Jisus Kraist, amen.