2010–2019
Sounkomouro Kupwuriki Mahk
April 2013


Sounkomouro Kupwuriki Mahk

Kauno ketin poakohng kitail oh kupwurki kitail en wehwehki Kupwure en mahk.

Erein ansou me atail Sounkomouro kalohk pohn sampah, tohto me idawehn Ih, iangahki sounnting oh Parisi kan “sang nan kahnimw koaros en Kalili oh Sudia oh pil sang Serusalem.”1 Ohl mwoator men men mwahula oh wisikdohng pokon lap ehu, ahpw sohte kak karanih Sounkomouro, iengehkan wahdahla ih pohn ihmwo wasa me Sounkomouro ketiketie oh kadaredi ih nan ihmwo. Ni eh mahsanih kasansal en pwoson wet, ni kahrepe me saikinte dehde ong me rongorong Ih, Sounkomouro mahsanih, “Lao! dipomw kan lapwasanguhkehr.”2

Met mweinte kapwuriamwei ong ohlo, ahpw mendahte pwuhk sarawi kan ahr sohte mahsanih duwen me ohlo nda, E mwein medewe ma Sounkomouro uhdahn wehwehki dahme e kohkihla.

Sounkomouro mwahngih me aramas tohto kin idawehn Ih pwehki Sapwellime manaman kapwuriamwei kan. E kawikilahr pihl ong wain,3 kausala ngehn saut kan,4 kakehlada nein kaun men pwutak,5 toktok men,6 soulap en Piter,7 oh tohtohn mehteikan.8

Ahpw ong ohl me mwoatoro, Kauno pilada en kasalehiong irail me kin idawehn oh pil irail me sohte kamehlele duwen ah pwukoa tohrohr ni duwen Sounkomour en sampah. Ni arail rong mahsen en Sounkomouro, sounnting oh Parisi kan tepida mahsenpene, re koasoaia lahlahwe ni ahr sawehwe oh re lemehda me Koht kelehpw kak mahkong dihp. Ni eh mwahngih arail mengimengiloal kan, Sounkomouro mahsenohng irail:

“Dahme kumwail mengimengloalki?

Dahme mengei rehn nda, ‘Dipwomw kan lapwasanguhkehr,’ oh nda, ‘Uhda oh aluhwei?9

Ni eh sohte awih irail en sapeng, Kauno doula, “Eri pwe kumwail en ese me Nein-Aramas sapwellimanki manaman en lapwahda dihpnin sampah [E ketin sohpeilahng ohl mwoatoro] Lao I ndaiong uhk, uhda, ale kihomwen oh kohkohwei ni imwomwo.10 Eri ih me ohlo wia!

Sang ni manaman wet en kamwahuiala ni paliwar, Sounkomouro kamehlel ong kitail koaros mehlel en pali ngehn me ahpwete manaman: Nein Aramas kin mahkala dihp!

Me kamehlele kin mengeiki alehda mehlel wet, ahpw sohte kin nohn mengeiki pohnese pelien mehlel wet me iei: Sounkomouro kin mahkehng dihp kan “nin sampah” oh kaidehnte ni Keimwseklahn Kadeiko. E sohte kin itarki kitail en doulahte nandipatail kan. 11 E sohte kin mweidehng kitail en pwuralahng dipen mahs akan.12 Ahpw ni atail kin koluhla oh peikiong Sapwellime rongamwahuo, E kin mahkohng kitail.13

Nan mahk wet kitail kin kilang manaman en Tomwo ong kakehlada oh doarehla ni ahr doadoahkpene ni limpoak. Sang ni doadoahngki pwoson Kauno Sises Krais, manaman en Sapwellime Tomwo kin kakehlailih kitail nan atail ansoun anahn,14 oh Sapwellime manaman en doareikitailla kin kasarawihkitailla ni atail kin pwilikihdi nin duwen aramas.15 Met kin kihong koaros koapwoaroapwoar, ahpw mehlel ong irail me pehm me luwet en aramas mih likin me Sounkomouro men sewese oh doarehla.

Pwe Sounkomouro en kamarainih atail madamadau,16 ehu pak Piter idek ma pak depe e konehng mahkohng rie pwutak oh pil idek, “E itar ma I pahn mahkohng pak isuh?” Udahn met pahn mwein itar. Ahpw pasapeng en Sounkomouro kasalehda Sapwellime mohngiong en mahk: “Soh, e sohte itar pahn pak isipak, ahpw pahn pak isuh wad isihsek.”17

Kauno ketin poakohng kitail oh kupwurki kitail en wehwehki Kupwure en mahk. Tohtohsang pak 20 nan Doctrine and Covenants, Kauno mahsanih ong aramas me e mahkohngehr diparail.18 Pali laud en ansou pwuko mahsen en Kauno doke Soukohpo Joseph Smith, ekei pak doke ih kelehpw, ekei pak iangahki mehteikan.19 Keieu en ansou pwukat ntingdi nan 1830, keimwseklahn ansou nan 1843. Eri, erein sounpar tohto, Kauno kin mahsanihong Joseph kapwkapwurehiong me dipe kan mahklahr.

Mendahte Joseph eh sohte dipikihda dihp laud de suwed douluhl,20e mwahu kitail en taman me ong kereniong dihp koaros, malaulau me soh, sapwellimen Kauno “pak isuh wad isihsek” sohte kin lipilipilki dihp tikitik de lapala.

Ni eh mahsen ong elder kan me pokonpenehr nan Kirtland, Kauno mahsanih me E kupwurki irail en powehdi sampah; kahrepeo E pahn mahkohng irail.21 Kauno ketin mwahngih atail luwet oh lipw poatoatoapoat en sampah rehn ohl oh lih me sohte unsek.22 Lepin mahsen kahrepeonan ire wo iei Sapwellime kamehlel me ihte sang Sapwellime mahk me kitail pahn kak en powehkihdi sampah. Ia duwen mahk wet eh kin sansalda? Ong irail elder kan te nan Kirtland E mahsanih me E mahkohng irailehr diparail ko.”23} Kauno kupwurki mahk.

Sohte mehmen anahne medemedewe me mahk wet kin kohdo ni sohte koluhla. Ni mehlelo, Kauno mahsanihier me Ih, Kauno, kin mahkohng dipen irail akan me kin koluhkihla diparail ong Ih oh peki mahk, oh eri pil kapatahieng ehu ire, ma irail sohte dipadahr lao lel mehlahn pali ngehn.”24 Kauno eh sohte kak mweidada ekiste kisin dihp,”25 ahpw E kin kasawihada doar mehlel en ekei dihp kan. E mahsanih me sohte mahk pahn mie ong lahlahwe Ngehn Sarawi.”26 E mahsanih duwen doar en dipen kam aramas27 oh katamanki doar en dipen nenek me rasehng kamwahl.28 Ong me kin kapwkapwurehiong dipen nenek, E kasalehda lalaudlahn apwal en alehdi Sapwellime mahk. 29 Oh E mahsanih me aramas me dipadahr uhwong marain lapo pahn alehdi kalokolok laudo.”30 Ahpw, ni Sapwellime kalahngan, E mweidada kamwahula ni ekis ekis oh kaidehn anahne unsekla ansouohte. Lella kidelepen dihp kan me wia lipwen sampah, uwen tohtohn atail pahn koluhla oh rapahki Sapwellime mahk, E kin mahkohng kitail, pwurehng oh pwurehng.31

Pwehki mepwukat koaros, kitail koaros, iangahki irail akan me nannanti en powehdi kemwekid kan me rasehng kang wini en kasahliel de kilang kilel en nenek kan oh iangahki me poakohng irail kan, kak ese me Kauno pahn tehk atail nannanti kan oh pahn mahk ni limpoak ansou me koluhla kin unsek, “lao lel pak isuh wad isihsek.” Ahpw met sohte wehwehki me aramas en pein pilada en pwuralahng dihp ni eh pahn sohte kalokepe.32

Kauno ansou koaros tetehk mohngiongitail,33oh pwoson likamw sohte kin kaitarala dihp.34 Nan irair en ansou wet, Kauno kairehki emen Sapwellime ladu kan pwehki met oh mahsanih me e konehng namenengki pwihn en Nicolaitan oh diparail rir kan koaros.”35 Nicolaitan kan wia ehu pwihn me kin mwomwehda me irail ahniki pwuhng en doadoahngki dipen nenek pwehki mahk en Kauno.36Met Kauno sohte kupwurpereniki.37Sapwellime limpoak oh mahk sohte kin mahkohng kitail ansou me mohngiongitail kan sohte kin nsenamwahukihier dah me miehier oh kitail kin sapeikiong mehlelo, ahpw kin pereniki wia dihp.”38Ahpw, mwurin atail kin wia uwen atail kak koaros,39 sapwellime limpoak oh mahk iei wiepe kan me kitail kin lao”40 powehkihdi sampah sang ni manaman en Tomwo ong kakehlada. Sang ni rapahki ni aktikitik kisakis kesempwal wet, atail luwet akan kin wiahla mehkot kehlail ong kitail,41 oh sang ni Sapwellimekehlail, kitail kin kak kapwaiada soahng kan me kitail sohte kin kak kelehpw kapwaiada.

Kauno mwahngih uwen marain me kitail alehdier,42 ineng en mohngiongitail kan,43 oh atail mwekid,44 oh ansou me kitail kin koluhla oh rapahki Sapwellime mahk, E kin mahk. Ni atail pahn medewe pein atail mour, oh mour en kompoakepahtail kan oh aramas teikan me kitail ese, kitail konehng en pil ahniki soangen inengohte en mahkohng pein kitail oh mehteikan.45

Kalohk Ahi Rongamwahu kin koasoaia duwen apwal en powehdi ekei tiahk oh kangoange kaun en priesthood oh towe kan en dehr pwuriamwei de nsensuwedla ma me ropirop kan de towe kapw kan kin wie apwahpalikihte soangen kahpwal kan. Kitail kaweidki en “kasalehda atail koapwoaroapwoariki aramaso oh en dehr kadeik …[medewehki] duwen mehkot me wia sapwungalahn ansou me kitail wehwehki.46 Kitail kak wia tikitiksang met ong pein neitail seri de atail peneinei me kin ahniki soangen kahpwal pwukat, me kin sapwungala wetsang nan ahl pwung? Mehlel te re konehng alehdi atail kehlail, kanengamah, oh limpoak—oh ehi, pil atail mahk.

Nan tiepene lap me pweida nan Oaktohpe samwalahro, President Monson kaweidki:

Kitail anahne tamataman me aramas kak wekila. Irail kak soikala tiahk suwed kan. Irail kak koluhkihla diparail kan …

…Kitail kak seweseirail en powehdi wasa kan me irail sohte itar. Kitail anahne kaiahnehda koahiek en kilang aramas kaidehn ni me re wia ansou wet ahpw me irail kak wiahla.47

Ni ehu tiepenehn Mwomwohdiso, me duwehte tiepen wet, Kauno mahsanihiong towe kan:

Mehleleo E mahsanih ong irail me irail mwakelekel, ahpw kaidehn koaros …

Pwedihp koaros dipadahr reh.…

Pwe mehlel ekei irail dipadahr mwowe, ahpw E pahn mahkohng arail luwet. 48

Sapwellime iren kalohk rahn wet duwduwehte.

Kauno mwahngih dah me kitail sosohpai, me kitail koaros pahn dipada oh “dohsangehr sapwellimen Koht lingan”49 kapwkapwurehiong. E mwahngih luwet en aramas oh duwen sewese irail me kin alehdi kasongosong.50E padahkihieng kitail en kapakap ansou koaros pwe kitail dehr lohdieng nan kasongosong.51 Kitail alehdier kaweid en likuweriong Ih pwehn alehdi mahk; pwe Ih me sapwellimanki manaman koaros en mahk.52E ketin poahngoangki kitail en koluhla53oh en mahk.54Oh mendahte koluhla eh sohte mengei, ni atail kin nantihki mohngiongitail koaros en peikiong Sapwellime rongamwahuo, E ketkihda inou wet: E mahsanih me, mendahte dipatail kan, E ketin direki mahk ong [kitail].E sohte pahn likidmelieikitailla; oh ni rahn en kadeiko E pahn taman mahk.55Kauno men mahk.

Ehuehu wihk Pwin en Koul en Mormon Tabernacle kin tepikihda arail kalohk mahsen kamarain kan en koul en sarawi sang William W. Phelps, “Gently Raise the Sacred Strain.” Sohte me kin nohn ese lepin mahsen kamwahu kan en ire kapahieuo:

Kauno me sarawi.

Sapwellime mahsen me keneinei: …

Koluhla oh mourla;

Mendahte ma dipwamwail kan weitahta,

Koluhla, oh e pahn mahk.56

I lukei kumwail en tamataman oh kamehlele mahsen en Kaouno oh pwoson Ih pwehn keluhla.57 E ketin poakohng kumwail. E kupwuriki mahk. I kadehde duwen met ni mwahr sarawi en Sises Krais, ahmen.