Kahs Kuht Fahk Uh

Sel Rosemary M. Wixom

Prestuhn Luhlahp ke U luhn Tuhlihk Srihsrihk


Ohiyacn sramsram lasr nuh sin tuhlihk nahtuhsr ac kahs kuht orekmakihn uh kuh in ahkkweyaclos ac tahpuhkuhlos ac ahkfokokoye luhlahlfongi lalos.

Sie pahpah fuhsr tuhfahna etwacack ke wacngihnlac luhn mwet luti se lal ke kuhlahs luo. In mwe esam kacl, el suhmuhslah: “ke puhla ac etwacack luhk nohfohn nga esam, puhla se nga esamyac yohk ke nuhnak luhk uh ah pa ‘karihngihn.’ Sahp el lutiyuc sipacl, grammar, ac math, tuhsruhk yohk srihpac liki nuh kewa el lutiyuc in luhngse ke nga tuhlihk. Ke kuhlahsrum lal ah, wona fin tahfonglac sipacliyen kahs; ‘Kuht ac fah orekma kac,’ el fahk. Wona fin kahklac kuh mihsaclihk kuh kuhretyucki; ‘Kuht ac fah oraclah in wolac ac kuht ac fah ahknwacsnwacs yelah,’ el fahk. Wona fin srihke, wona fin srihke kuht in sifacna, wona fin mwemwe, ac wona in engankihn ma tiac yohk srihpac ma tuhlihk srihsrihk uh konwacack pwacr kac.”

Sie mwe kahsruh yohk mwet se kuh in eis fin facl se inge pa in kol sie tuhlihk. Luhlahlfongi luhn tuhlihk ac suwohswohs lalos sikyak sa ke moul fuhsr lalos. Kowos nuh kwewa suc lihpsre ke nga sramsram oasr kuh suwos in ahkyohkye puhlaik luhn tuhlihk mukul se kuh muhtwacn se ac in ahkyohkye luhlahlfongi luhn tuhlihk sin Pahpah Inkuhsrao ac Jisus Kraist ke kahs Elos fahk.

Ke Helaman sapta 5 kuht riti lah mwet pahluh Helaman el luti yohk srihpaciyen in esam lah ke yot in molwelah lasr, Jisus Kraist, kuht fah muhsaheack pwelucng lasr uh.”1

Pa inge kahs ma Helaman el luti wen nahtuhl. Helaman el luti wen nahtuhl ac elos esam kahs lal; ac elos som in luti kahs luhn God inmahsrlon mwet nuh kewa.”2

Finne ke wen nahtuhl Helaman elos pihlesrweyuck ac utuckyak nuh in kapihr, kahs elos lohnglah inge elos tiacna sruhflah kac. Elos karihngihnyuck ac rauniyucklac. Na puhsra se tuhkuh, fahk nuh sin mwet sruohkuhlos ah:

Puhsra se fahk nuh sin mwet srukohkohltahluh ah in auliyak. …

… Puhsra suc elos lohng tiac puhsrwen puhlahl, tiac pac puhsrwen engan sasa, tuhsruhk liye, puhsra na puhsisacl, oacna in puhsra sac mahmah, ac el som finne nuh ke nguhna uh.3

Kuht kuh in lutlut ke puhsra sac sin inkuhsrao. Tiac yohklac, kasrkuhsrak, kuh ahkkolukye; el puhsra na wowo kuhlwacng se, sang inkacnek fokoko nuh ke finsrak.

Ohiyacn sramsram lasr nuh sin tuhlihk nahtuhsr ac kahs kuht orekmakihn uh kuh in ahkkweyaclos ac tahpuhkuhlos ac ahkfokokoye luhlahlfongi lalos in muhtana ke inkacnek in fohlohk nuh yurin Pahpah Inkuhsrao. Elos tuhkuh nuh fin facl se inge ahkolah in lihpsre.

Mwe srihkasrak se ke tuhlihk ahkostwen se sikyak ke stoh in nuknuk se. Stoh sac nwacnwaclah ke mwet moul pacl sac ke mwet nuh kewa muhtwacwacack in etwacack lah ninac sac nikanlah tuhlihk mukul se nahtuhl ah. Ma se met, el pahngon inel. “Connor,” el pahng silahklahk raunweack stoh sac. Tiac paht tohkoh, puhsrwacl muhtwacwacack yohkwaclihk ac luhman fosrngah. Tiac paht na mwet topang sac lohng ma sikyak ah, ac mwet nuh kwewa ke stoh sac wi suk tuhlihk mukul sac. Minit ekahsr ahluhkwelah wacngihn ma sikyak kacl. Ninac kiyacl Connor ah, akihlacnwack, muhtwacwacack in fosrngahyak ke minit sac ac lihksreni pahngon inen tuhlihk mukul se nahtuhl ah kalweni ac sifilpac kalweni.

Sie mwet moul ah, tukun el kahkahsrihk pruhelac, el motko muh sahp Connor el oasr lun stoh sac ac sahp el fosrngah ke el lohng puhsrwen ninac kiacl ah ke el lihksrweni pangon inel ah. El ahkkahlwemye ma se inge nuh sin sie muhtwacn wi sukok sac, ac elos silahklahk oraclah nuhnak se. Elos tuhkweni muhtwacwacack fahsr ke inmahsrlon tepuh in nuknuk, ac kahkahsrihk kalweni kahs se “Connor, fin kom kuh in lohng puhsrwek, fahk, ‘nga pangwe.’” Ke elos kahkahsrihk fahsr nuh ke tukun stoh sac kalweni fahk pohloh kahs se, tiac paht, elos lohng puhsra mwekihn, srihsrihk se fahk, “nga pangwe.” Connor el wihklac inmahsrlon rol in nuknuk ye tepuh sac. Puhsra na puhsisacl mihs se pa ahkkweyacl Connor in topuk ah.

Pruhe in Etuh Enenuh luhn sie Tuhlihk

In sramsram nuh ke insiyacn tuhlihk se, kuht enenuh in etuh enenuh luhn tuhlihk se. Fin kuht pruhe in etuh enenuh ingacn, kahs kuht fahklah ac fah sang kuh nuh ke insiyaclos. Orekma upac lasr ac ahkyohkyeyuck ke kuht ac suk inkacnek luhn Nguhn Muhtahl uh. Leum el fahk:

Kuht enenuh in fahk nuhnak ma el fah sang nuh insiyacsr uh, …

El fah use nuh sesr ma kuht enenuh in fahk ke pacl fal kuht enenuh uh.4

Muhsahlelihk ac Lihpsre ke Luhngse

Pwacnwacng, ma lusrohngtwen ke facl se inge kosrwaclah tuhlihk puhkantwen liki in lohng kahs in ahkkweye ma ac kuh in ahkwoye ngwetngwet lalos sifacna an.

Dr. Neal Halfon, mwet orekma ke UCLA Center for Healthier Children, Families, ac Communities, sramsram ke “ninac pahpah ma tiac liye tuhlihk nahtuh.” Sie srikasrak ma ke sie suc matwac-mahlwem 18 ac ninac pahpah kiyacl an:

“‘Tuhlihk mukul se nahtuhltahl engan atacl, mukwikwi ac kahfofo, arulacna kahlwem lah el engan ke pacl ac pizza wi ninac pahpah kiyacl ah. … Ke sahflah mongo in ekuh ah, ninac sac tuyak in som oruh sie orekma, sang tuhlihk sac pahpah sac in liye.

“Pahpah sac … muhtwacwacack riti sihm ke fon se nahtuhl ah ke tuhlihk sac srihke oruh elan lohacng nuh sel ke el sis kulun pizza ah. Na pahpah sac muhtwacwacack lohacng nuh sin tuhlihk sac ac sritacl nuh sel. Tiac paht, na, el sifilpac muhtwacwacack liyeyuck video ke fon nahtuhl ah wi tuhlihk sac nwe ke muhtwacn kiyacl ah fohlohk.

“… [Dr.] Halfon el konwacack tuh tuhlihk se inge muhtwacwacack luhman suhpwacr, srihkweni kuhpahsr inmahsrlon pahpah se ac tuhlihk se.”5

Top nuh ke pruhe lasr in akihlen enenuh luhn tuhlihk nahtuhsr uh pa sahp in suhkwac orekmakihn electronic uh. Pacl na wowo se in tuhkweni ac sramsram nuh sin tuhlihk nahtuhsr uh tuhlac ke kuht kahfofo ke ma lusrongtwen uh. Efuh kuht tiac sulaclah sie pacl ke kais sie lwen in tulokihnyac technology uh ac sifil tuhkweni sie sin sie? Konwelah na ma nuh kewa. Ke kowos oruh ma se inge, lohm suwos an ac fah mihs ke pacl se emet; kowos ac sahp puhla lah kowos tiac etuh lah meac kowos ac oruh kuh fahk. Na, ke kowos lohacng yohk nuh sin tuhlihk nuhtuwos an, sie sramsram ac fah muhtwacwacack, ac kowos kuh in engan ac lihpsre sie sin sie.

Sihm in Ahkkweye Tuhlihk Nahtuhsr

Kuht kuh pac in ahkkweye tuhlihk nahtuhsr ke kahs kuht suhmuhslah nuh selos. Nephi el suhmuhslah lah kuht enenuh in orekma upac in suhmuhslah, in ahkkweye tuhlihk nahtuhsr uh in luhlahlfongi ke Kraist, ac in tuhkweni yurin God.6

Prestuhn Thomas S. Monson el akacsruhi sie mwe etwacack kacl Jay Hess, paeluht se suc likucskiyucki puhtatlac fin acn North Vietnam ke yac 1960: “Ke yac luo sucu lal ah tiac etuh fin el misac kuh el moul. Mwet suc sruokilyac ah lwelah elan sihm nuh sin sucu lal ah tuhsruhk in te ahluhkwelah pihsen kahs 25.” Prestuhn Monson el siyuck: “Meac kowos ac nga ac fahk nuh sin sucu lasr ah fin kuht puhtatyang nuh ke ohiyac se inge—tiac liyacltahl yac luo ac tiac etuh fin sahp kuht ac sifilpac liyaclos? Ke el kena in sang sie ma sucu lal ah in akihlen lah ma tuhkuh sel me ac oacyacpac ke el luhngse in sang kahsruh wowo, Tamuhlwel Hess el suhmuhslah [kahs inge]: ‘Ma inge yohk srihpac: macruht ke tempuhl, misin, college. Fahsr nuh met, kampare in sun finsrak kowos ke, suhmuhslah ma mahtuh uh, ituck petsac pacl luo ke yac se.’”7

Kahs fuhkah kowos ac suhmuhslah nuh sin tuhlihk nuhtuwos ac fin utuckoht kahs na 25 kuh suhpuhs liki?

Pahpah fuhsr se nga sramsram ke emet ah, suc suhmuhslah mwe acsmakihn lal ke mwet luti se lal ke kuhlahs luo, ingena el tuhfahlah tuhlihk muhtwacn ahwowo se. El puhla luhlahlfongi luhn inkuhsrao fihliyucki facl. Ke tuhlihk muhtwacn sac kapkapwack, meac finsrak lal uh? Meac el ac fah fahk in muh sang ahkkweyacl? Kahs fuhkah ac ahkfokokoyacl, tahpuhkuhl, ac kahsrwel in tu na ke inkacnek fal? Yac ac fah oruh siena fin el kahkahsrihk mahmah, “Kom tuhlihk nuhtin God”? Yac elac esam ke kuhtuh pacl lah pahpah tuhmwacl fahklah pac kahs inge, “Nga luhngse ma nuh kwewa keim”?

Yac tiac pa Pahpah tuhmasr Inkuhsrao el fahk nuh sin Wen Nahtuhl ac nuh sesr kewa ke El fahk, “Pa inge Wen sacohk nuhtihk” ac el sang nuh kac, “suc Nga arulacna engan kac”?8

Nga finsrak tuh kahs kuht fahk kuh sihmihs nuh sin tuhlihk nahtuhsr uh ac oacna luhngse luhn Pahpah tuhmasr Inkuhsrao nuh sin Wen Nahtuhl, Jisus Kraist, ac nuh sesr. Ac lwelah kuht in tui ac lihpsre, tuh sie tuhlihk arulacna kuh in sruhmuhn ma yohk ac wolacna. Nga fahk ma inge ke inen Jisus Kraist, amen.

Mostrar referencias

  1.  

    1. Liye Helaman 5:12.

  2.  

    2. Liye Helaman 5:14; Ahkuhtweyac wo ituckyang.

  3.  

    3. Liye Helaman 5:29–30.

  4.  

    4. Liye Doctrine and Covenants 100:5–6.

  5.  

    5. Lois M. Collins, “Baby’s Development Potentially Harmed by Parents Texting,” Deseret News, June 4, 2012, deseretnews.com/article/print/865556895/Babys-development-potentially-harmed-by-parents-texting.html.

  6.  

    6. Liye 2 Nephi 25:23.

  7.  

    7. Thomas S. Monson, “Finding Joy in the Journey,” Ensign or Liahona, Nohfuhmpuh 2008, 86.

  8.  

    8. Matthew 3:17.