O Nei Mea Ua Ou Iloa

Saunia e Peresitene Boyd K. Packer

Peresitene o le Korama a Aposetolo e Toasefululua


O mea uma ua ou faitauina ma aoao atu ma aoao mai, o le upumoni aupito taua ma paia ou te ofoina atu o la’u molimau faapitoa lea ia Iesu Keriso.

I le 1992, ina ua ma’ea le tautua ai mo le iva tausaga o se Fesoasoani i le Toasefululua ma le 22 o tausaga o se tasi o le Toasefululua, na ou aulia ai le matua e 68. Na ou lagonaina le uunaiga e amata le mea na ou ta’ua o se “Galuega E Le’i Ma’ea.” O le vaega muamua o lena galuega e faapenei:

Sa oso a’e so’u manatu i se tasi po,
Se manatu loloto ma o’oo’o.
Na oo mai a’o ou vaivai lava,
O le le lavā tele na le mafai ai ona moe mata.
O mea fai o le aso sa anoanoai
Na ou mafaufau loloto ai i lo’u lumanai.
O le manatu lenei:
A o o’u talavou, e le’i atoa lo’u 68!
Na lelei lava e le’i etu la’u savali;
Le’i tiga se tauau.
Fo’i faalua la’u faitau
Ma toe faamatala atu.
Galue mo le tele o itula
Tau le malōlō mo se mānava.
O mea ua ou le toe mafai nei ona fai
Na pei o le selo le faigofie sa i ai.
Ana mafai na ou liliu nei le taimi,
Pe ana o sa’u filifiliga lena e fai,
O le a ou le suia le toeaina i le taulealea,
Ona o le a tele nauā mea ou te misi ai.
Ua ou malie lava e agai i luma,
Ae tuua le talavou, e ui e manaia.
O le mea e misi pe a ou fo’i i tua
O lo’u malamalama lea.

O le sefulu tausaga mulimuli ane, sa ou filifili ai e faaopoopo ni nai isi laina i lena solo:

Sefulu tausaga ua sola e leiloa po o i fea
Ma le tele o tiga ua nā avea.
Sulugatiti metala ua aveese ai le etu;
Ua tau sa’o ai la’u savali.
O se isi u’amea ua mau lelei ai ivi o le ūa—
Oka se gaoioiga ina a ofoofogia!
Le ma’i pipili na ia tineia;
Le au ūa malolō ua ou i ai i le latou vaega.
O faailoga ia o le matua ua vaaia.
E le toe foi na mea i se lelei.
Pau le vaega ua faateteleina
O le le mafai lea ona ou manatuaina.
E te fesili mai, “Pe ou te manatua oe?”
Ae a, e le o tele lava sou suiga.
Ia se aua e te ita
Pe afai o lou igoa ua ou le manatuaina.
Ioe e i ai mea ua ou iloa
Ou te le’i manao i ai,
Ua aumaia na upumoni taua ona ua loa le soifua
Ua faapea ona ola ai le agaga.
Mai faamanuiaga uma ua oo mai,
O le mea aupito matagofie i lo’u olaga
O le mafutaga ma le mafanafana
Ou te maua mai i si a’u ava faapelepeleina.
Ua faaipoipo lelei le ma fanau uma,
Ma i ai o latou lava auaiga,
O fanau ma a latou fanau,
E le’i umi ae matutua uma i latou.
E le’i i ai lava sina suiga o lo’u mafaufau
I le toe foi i aso o le talavou.
E tatau lava ona tatou toeaiina ma olomatutua, aua foi
E oo mai faatasi ma se malamalama o le upumoni.
E te fesili, “O le a se mea o i ai i le lumanai?
O le a ea lo’u faasinomaga?”
O le a ou mulimuli atu pea ae lē faasēā.
Ae toe fesili mai pe a 88 o’u tausaga!

Ma o le tausaga na te’a nei sa ou faaopoopoina i ai laina nei:

O lenei la ua atoa lo’u 88.
O tausaga ua televave le alu.
Sa ou savali, etuetu, sa ou tautootoo,
A e o le tietie lea ua oo i ai la’u faasolo.
E fai sina a’u miti mai lea taimi i lea taimi,
Ae o le mana o le perisitua e tumau pea ona i ai.
E ui i mea faaletino uma ou te le o maua
Ae ua tele lo’u tuputupu ae faaleagaga.
Ua soo le lalolagi i la’u fealuai
I le mamao i ni maila e tele.
Ma satelite e fesoasoani mai,
O a’u malaga ua le o gata ai.
E mafai ona ou fai atu ma le mautinoa i le taimi nei
Ua ou iloa ma ou te alofa i le Alii.
E mafai ona ou molimau atu faatasi ma i latou anamua
A o o’u tala’i atu Lana afioga paia.
Ua ou iloa le mea sa Ia lagonaina i Ketesemane
E faigata ona malamalama i ai.
Ua ou iloa na Ia faia uma mo i tatou;
E leai se isi a tatou Uo e sili atu.
Ua ou iloa o le a toe afio mai o Ia
I le mamalu ma le mana.
Ua ou iloa o le a ou toe vaai ia te Ia
Pe a ou tuua lenei olaga.
O le a ou tootuli i luma o Ona aao na tu’itu’ia;
O le a ou lagona le mamalu o Lona Agaga.
I se leo vaivai o le a ou musumusu atu ai faapea,
“Lo’u Alii, lo’u Atua, ua ou iloa.”1

Ma ua ou iloa!

O faamalama pito i tua o le matou fale e iloa ai se togalaau o fugalaau laiti ma ni laau tetele e si’o ai se auvai laitiiti. O le tasi puipui o le fale e sosoo ma le togalaau ma ua lilofia i le mafiafia o le fue sosolo Peretania. O le tele o tausaga sa fai ai lenei fue ma faamoega o segasegamauu. O faamoega i totonu o fue sosolo e saogalemu mai luko ma rakuni ma pusi e feoai solo.

I se tasi aso sa tupu ai se vāvāo tele i totonu o le fue sosolo. O le fetagisi atuatuvale i le mafatia na o mai ai le 8 po o le 10 o segasegamauu mai le togalaau tetele lata mai e auai i lenei fetagisiga tele. E le’i umi ae ou vaaia loa le pogai o le vāvāo. O se gata na aliali mai se vaega o lona tino i fafo o le fue sosolo ma tautau i luma o le faamalama, na lava lava lona umi ou te tosoina mai ai i fafo. O le ogatotonu o le tino o le gata na i ai ni patu se lua—o se faamaoniga mautinoa e faasala ai o ia ona o le aveeseina o tamai segasegamauu mai le faamoega. E le’i i ai se taimi o le 50 tausaga na matou nonofo ai i le matou fale na matou vaai ai i se mea faapena. Sa o se aafiaga e faatasi i le olaga—ia pe o le matou manatu lena.

O ni nai aso mulimuli ane, sa i ai foi se isi vāvāo, o le taimi la lenei i totonu o fue na sosolo i le pa e nofo ai le matou taifau. Na matou faalogoina foi ia lava feei e tasi o faailo, o le faapotopoto mai o segasegamauu tuaoi. Na matou iloaina lava le faaoosala. Na pe’a atu se tama a le ma tama i luga o le pa ma toso ese mai se isi gata lea sa ū mauina pea le manulele fafine lea sana maua i totonu o le faamoega ma tapeina.

Sa ou faapea ifo ia te a’u lava, “O le a le mea ua tupu? Pe ua toe osofaia foi le Faatoaga i Etena?”

O iina na oo mai ai i lo’u mafaufau lapataiga na tulei saunoa ai perofeta. E le faapea o taimi uma o le a tatou saogalemu ai mai faatosinaga a le fili, e oo lava i totonu o o tatou lava fale. E manaomia ona tatou puipuia a tatou fanau laiti.

Ua tatou ola i se lalolagi ua sili ona matautia ua faamata’uina ai na mea e sili ona faaleagaga. O le aiga, o le faalapotopotoga aupito taua i le olaga nei ma le faavavau, ua osofaia e fili vaaia ma fili e le vaaia. O loo fealuai solo le fili. O lona faamoemoega o le faamanu’alia. Afai e mafai ona ia faavaivaia ma faataumaoia le aiga, o le a manuia o ia.

Ua silafia e le Au Paia o Aso e Gata Ai le taua tele o le aiga ma taumafai ai e ola i se tulaga ia le mafai ai e le fili ona sao faagaoi atu i totonu o o tatou fale. Tatou te maua le saogalemu ma le puipuiga mo i tatou lava ma a tatou fanau i le faamamaluina o feagaiga ua uma ona tatou faia ma ola e tusa ai ma faatinoga masani o le usiusitai lea e manaomia mai i soo o Keriso.

Fai mai Isaia, “O le mea e tupu i le amiotonu o le manuia lea; e tupu mai foi i le amiotonu le filemu ma le saogalemu e faavavau.”2

O lena manuia o loo folafola mai foi i faaaliga lea o loo tautino mai ai le Alii, “Afai ua outou saunia o le a outou le matatau.”3

O le mana atoatoa o le perisitua ua tuuina mai e puipuia ai le aiga ma ona tagata e mau ai. Ua i ai i le tama le pule ma le tiutetauave e aoao lana fanau ma ia faamanuia ma tuuina atu mo i latou sauniga o le talalelei ma isi puipuiga uma faaleperisitua e tatau ai. E tatau ona ia faaalia le alofa ma le faamaoni ma ava i le tina ina ia mafai ona vāai le la fanau i lena alofa.

Ua ou iloa o le faatuatua o se mana moni ae e le na o se faaupuga po o se talitonuga. E itiiti lava ni mea e sili atu le mamana nai lo o tatalo faamaoni a se tina amiotonu.

Ia aoao oe lava ma aoao lou aiga e uiga i le meaalofa o le Agaga Paia ma le Togiola a Iesu Keriso. E leai se galuega e sili atu ona faavavau o le a e faia nai lo o totonu lava o puipui o lou lava maota.

Ua tatou iloa o i tatou o fanau agaga o ni matua faalelagi, ua tatou i ai iinei i le lalolagi ia maua ni tino faaletino ma ina ia tofotofoina. O i tatou o e ua i ai tino faaletino ua i ai le mana i tagata o e e le o i ai [ni tino faaletino].4 Ua tatou saoloto e filifili po o a ituaiga tagata o le a tatou avea ai ma ia ilo ma filifili a tatou amioga, ae tatou te le saoloto e filifili ia taunuuga. E le mafai ona suia taunuuga.

O le faitalia o loo faamatalaina i tusitusiga paia o se “faitalia e filifili ai,” o lona uiga e mafai ona tatou filifili i le va o le lelei ma le leaga. O loo saili le fili e faaosooso i tatou e faaaoga sese o tatou faitalia.

Ua aoao mai tusitusiga paia ia i tatou “ina ia mafai e tagata taitoatasi ona faia e tusa ma mataupu faavae ma mataupu autu e faatatau i le lumanai, e tusa ma le faitalia ua ou tuu atu ia te ia, ina ia mafai e tagata taitoatasi ona tali mo ana lava agasala i le aso o le faamasinoga.”5

Na aoao mai Alema “e le mafai ona silasila o le Alii i le agasala ma se tikeri itiiti o le taliaina.”6 Ina ia malamalama lenei mea, e ao ona tatou tuueseeseina le agasala ma le tagata agasala.

Mo se faataitaiga, ina ua latou aumaia i luma o le Faaola se fafine na molia i le mulilua, ua mautinoa lava le ta’usalaina, sa Ia faaleaogaina le faamasinoga i upu e valu: “Alu ia oe, aua e te toe agasala.”7 O le agaga lena o Lana auaunaga.

O le faapalepale o se uiga mama, ae, e pei foi o uiga mama uma, ae talavale loa ona suia ai lea i se mea leaga. E tatau ona tatou faaeteete i le “mailei o le faapalepale” ina ia le pu’uina ai i tatou. O le faapalepele lea e maua mai ona o le faavaivaia o tulafono o le laueleele e faapale i faatinoga o amioga le mama ia ua faatagaina faaletulafono, e le tuuitiitia ai taunuuga ogaoga faaleagaga ona o le taunuuga lena o le solia o le tulafono a le Atua o le ola mama po o le legavia.

E fananau mai tagata uma ma le Malamalama o Keriso, o se faatosinaga taiala lea e faataga ai tagata taitasi ia iloa le sa’o mai le sese. O le mea tatou te faia i lena malamalama ma le auala tatou te tali atu ai i na uunaiga ia ola amiotonu o le vaega lea o le suega o le olaga faaletino.

“Aua faauta, ua tuuina mai i tagata taitoatasi le Agaga o Keriso, ina ia mafai ona iloa e ia le lelei mai le leaga; o le mea lea, ou te faaali atu ai ia te outou le ala e faamasino ai; ona o mea uma e valaau mai ia fai le lelei, ma faatauanau mai ia talitonu ia Keriso, ua auina mai i le mana ma le meaalofa a Keriso; o le mea lea e mafai ai ona outou iloa ma le malamalama atoatoa ua mai le Atua.”8

E tatau ia i tatou taitoatasi ona tutu i tulaga e tali atu ai i musumusuga ma uunaiga a le Agaga Paia. O loo i ai se ala a le Alii e liligi mai ai le poto mama i totonu o o tatou mafaufau e uunaia ai i tatou, e taitai ai i tatou, e aoao ai i tatou, ma e lapatai ai i tatou. E mafai ona iloa e atalii po o afafine taitasi o le Atua mea e ao ona latou iloa i le taimi lava lea. Aoao ia maua ma galue i musumusuga ma faaaliga.

O mea uma ua ou faitauina ma aoao atu ma aoao mai, o le upumoni aupito taua ma paia ou te ofoina atu o la’u molimau faapitoa lea ia Iesu Keriso. O loo soifua o Ia. Ua ou iloa o loo soifua o Ia. O a’u o Lana molimau. O Ia e mafai ma ou te molimau i ai. O Ia o lo tatou Faaola, lo tatou Togiola. Ou te mautinoa lenei mea. Ou te molimau atu i lenei mea i le suafa o Iesu Keriso, amene.

Show References

  1.  

    1. Boyd K. Packer, “Unfinished Composition,” 2012.

  2.  

    2. Isaia 32:17.

  3.  

    3. Mataupu Faavae ma Feagaiga 38:30.

  4.  

    4. Tagai Aoaoga a Peresitene o le Ekalesia: Iosefa Samita (2007), 211.

  5.  

    5. Mataupu Faavae ma Feagaiga 101:78.

  6.  

    6. Alema 45:16.

  7.  

    7. Ioane 8:11.

  8.  

    8. Moronae 7:16.