2010–2019
Kuv Paub tej Yam No
April 2013


Kuv Paub tej Yam No

Tag nrho tej yam uas kuv tau kawm, nyeem thiab qhia, qhov uas muaj nqi thiab dawb ceev tshaj yog qhov uas kuv ua tim khawv tshwj xeeb txog Yexus Khetos.

Thaum xyoo 1992, tom qab kuv tau ua hauj lwm cuaj xyoo ua tus Pab Cuam rau Kaum Ob tug Thwj Tim thiab 22 xyoos kuv ua ib tug mej zeej hauv Kaum Ob tug Thwj Tim, kuv twb muaj 68 xyoos. Kuv txais kev tshoov siab sau ib zaj paj lug uas kuv hu ua “Zaj Tsis Tau Sau Tiav.” Feem ib ntawm zaj no hais li no tias:

Muaj ib hmo kuv xav,

Ib qho tseem ceeb uas muaj nqi heev.

Tej kev xav no los thaum kuv muaj kev nyuaj siab,

Kuv tsis tsaug zog txawm kuv nkees.

Hnub ntawd kuv muaj hauj lwm ntau

Thiab xav txog kuv txoj hmoov.

Kuv xav hais tias:

Thaum kuv tseem hluas, kuv tsis tau muaj rau caum yim xyoo!

Thaum ntawd kuv mus tau kev;

Kuv xwb pwg tsis muaj mob hlo li.

Kuv nyeem ib qho ob zaug xwb

Thiab txawj nco ntsoov tas mus li.

Kuv txawj ua hauj lwm ntev heev

Tsis tas nres kom ua tau pa.

Thiab tej yam kuv ua tsis tau nim no

Thaum ntawd kuv txawj ua kom tag nrho.

Yog kuv yuav rov qab ua hluas dua,

Yog kuv xaiv tau qhov zoo li no,

Kuv yeej yuav tsis xav ua li ntawd,

Muaj ntau dhau ntshe kuv yuav poob.

Kuv txaus siab mus tom ntej,

Cia kev ua hluas rau yav dhau lawm.

Qhov kuv yuav poob yog kuv rov qab mus

Yog tej uas kuv to taub lawm.

Kaum xyoo tom qab ntawd, kuv txiav txim siab ntxiv ob peb kab lus rau zaj paj lug no:

Kaum xyoo twb dhau mus lawm

Nrog txoj kev mob kev nkeeg.

Qij pob txha hlau pab kuv mus kev;

Kuv rov qab txawj mus kev ncaj heev.

Ib daim ntxiv pab cov pob txha caj dab---

Yog ib qho zoo kawg nkaus!

Nws pab kho mob tuag tes tuag taw;

Kuv zoo li tiam neeg tawv ncauj.

Saib kuv zoo li laus laus heev.

Kho tsis tau tej yam ntawd hlo li.

Tsuas muaj tib qho uas muaj dag zog

Yog qhov kuv tsis nco qab dab tsi

Koj nug, “Puas nco qab kuv?”

Kuv nco mas, qhov no muaj tseeb.

Tiam sis tsis txhob npau taws

Yog kuv tsis nco koj lub npe.

Kuv twb kawm tej yam uas

Kuv yeej tsis xav paub hlo li,

Tiam sis txhua xyoo kuv kawm tej yam tseeb

Uas txhawb nqa yus tus ntsuj plig.

Ntawm txhua yam koob hmoov uas kuv txais,

Qhov zoo tshaj hauv kuv lub neej

Yog kev ua khub thiab kev nplij siab

Ntawm kuv tus poj niam zoo heev.

Wb cov me nyuam yuav poj niam yuav txiv,

Lawv txhua tus nyias muaj nyias tsev neeg,

Muaj me nyuam muaj xeeb leej xeeb ntxwv,

Lawv txhua tus loj hlob sai heev.

Kuv tsis tau hloov kuv lub siab hlo li

Txog kev rov muaj cov hluas lub neej.

Peb yuav tsum laus zuj zus, vim los ntawm qhov no

Peb thiaj kawm tau qhov tseeb.

Koj nug seb “Yav tom ntej yuav zoo li cas?

Xav paub txog kuv txoj hmoov.”

Kuv yuav mus tom ntej thiab txhob yws yws.

Nug thaum kuv muaj yim caum yim xyoo!

Thiab xyoo tas los kuv ntxiv ob peb kab lus no:

Nim no kuv muaj 88 xyoo lawm.

Ntau xyoo dhau mus sai sai.

Kuv taug kev, ceg tawv, tuav tus pas

Thiab txog sij hawm kuv yuav tsum caij.

Tej lub sij hawm kuv yuav tsum so,

Tiam sis tseem muaj lub hwj chim pov thawj hwj.

Txawm tsis muaj zog ntawm sab nqaij daim tawv

Sab ntsuj plig muaj zog dua qhov qub.

Kuv twb mus thoob plaws lub ntiaj teb

Mus ib plhom mais ob peb zaug.

Thiab nrog tshuab xa xov xwm kev pab,

Kuv tseem yuav mus zoo li yav dhau los.

Nim no kuv paub tseeb hais tias

Kuv paub thiab hlub tus Tswv.

Kuv ua tim khawv nrog cov puag thaum ub

Thaum kuv qhia Nws txoj lus dawb huv.

Tej yam Nws raug hauv Khexemanes

Tsis muaj peev xwm to taub kom tag.

Kuv paub Nws tau ua li no rau peb;

Tsis muaj ib tug Phooj Ywg zoo tshaj.

Kuv paub Nws yuav rov qab los

Nrog hwj chim thiab yeeb koob lawm.

Kuv paub kuv yuav pom Nws ib zaug ntxiv

Thaum txog sij hawm kuv lub neej kawg.

Kuv yuav txhos caug ntawm Nws ko taw;

Nws tus Ntsuj Plig yuav ci ntsa iab.

Kuv lub suab yuav ntxhi lus hais tias

“Kuv tus Vajtswv, kuv yeej paub tiag.”1

Thiab kuv yeej paub qhov no tiag!

Tom qab peb lub tsev muaj tej lub qhov rais saib ntsoov rau ntawm ib lub vaj paj thiab koob ntoo ze ib tug dej me me. Ib sab phab ntsa nyob ntawm lub vaj paj ntawd thiab ib co hmab nce ntawm phab ntsa ntawd. Ntau xyoo muaj cov noog ua zes nyob hauv cov hmab nce tsev no. Tej lub zes nyob hauv cov hmab no tsis raug xwm txheej los ntawm cov hma liab thiab cov mab thiab cov miv.

Muaj ib hnub cov noog quaj nrov nyob hauv cov hmab. Cov noog quaj quaj li no ua rau 8 los sis 10 tus noog tuaj lwm koog ntoo tuaj koom ua ke quaj tias muaj xwm txheej. Tsis ntev ces kuv pom vim li cas lawv quaj li no. Ib tug nab tau nyob hauv cov hmab ntawd thiab dai rau ntawm lub qhov rais tab tom ntev txaus rau kuv rub. Qhov nruab nrab ntawm tus nab lub cev muaj ob lub pob---uas qhia meej hais tias nws twb noj ob tug me nyuam noog. Wb nyob rau hauv wb lub tsev 50 xyoos wb tsis tau pom tej yam zoo li ntawd. Wb xav hais tias yuav pom li ntawd ib zaug xwb.

Ob peb hnub tom qab ntawd, cov noog rov qab quaj li qub, lub sij hawm no nyob hauv cov hmab uas nce txoj laj kab. Wb hnov cov noog koom ua ke thiab quaj tias muaj xwm txheej li yav tas los. Wb paub tus tsiaj phem ntawd yog dab tsi. Ib tug tub xeeb ntxwv nce laj kab ntawd thiab rub tau ib tug nab ntxiv uas tseem tab tom noj tus niam noog uas nws twb tom hauv tus noog lub zes.

Kuv hais rau kuv tus kheej tias, “Ua li cas?” Lub Vaj Edees raug txeeb ib zaug ntxiv los?”

Ces ua rau kuv xav txog tej lus ceeb toom uas cov yaj saub hais. Tsis yog peb yeej yuav nyob nyab xeeb tsis raug tus yeeb ncuab tej kev phem, txawm peb nyob hauv peb lub tsev los yog. Peb yuav tsum pov hwm peb cov me nyuam.

Peb nyob hauv ib lub ntiaj teb uas tawm tsam tej yam ntawm sab ntsuj plig. Tsev neeg, uas yog lub koom haum tseem ceeb tshaj tam sim no thiab nyob mus ib txhis, raug tawm tsam los ntawm tej yam uas peb pom tau thiab tej yam peb tsis pom. Tus yeeb ncuab yeej ua hauj lwm. Nws lub hom phiaj yog ua rau neeg raug mob. Yog tias nws ua rau tsev neeg qaug zog thiab puas tsuaj, ces nws ua raws li nws lub hom phiaj.

Haiv Neeg Ntseeg paub tias tsev neeg tseem ceeb npaum li cas thiab sim ua neej kom tus yeeb ncuab tsis muaj kev nyiag hauv peb tej tsev. Peb thiab peb cov me nyuam muaj kev nyab xeeb thiab kev kaj siab thaum peb ua raws li kev khi lus uas peb tau ua thiab ua raws li tej yam uas cov neeg nrog Khetos mus yuav tsum ua.

Yaxayas hais tias, “Thaum ntawd txhua tus yuav ua ncaj ua ncees, yuav muaj kev thaj yeeb thiab nyob kaj siab lug mus ib txhis.”2

Tus Tswv cog lus tias yuav muaj kev kaj siab ntawd nyob hauv kev tshwm sim uas nws hais tias, “Yog hais tias nej npaj txhij nej yuav tsis ntshai.”3

Vajtswv tau muab Nws lub hwj chim pov thawj hwj tau peb kom pov hwm peb tsev neeg. Leej txiv muaj txoj cai thiab kev lav ris qhia nws cov me nyuam thiab foom koob hmoov thiab muab cov kab ke ntawm txoj moo zoo rau lawv thiab txhua yam kev pov hwm uas los ntawm lub pov thawj hwj. Nws yuav tsum hlub thiab hwm thiab ua ncaj ncees rau nws tus poj niam kom nkawd cov me nyuam yuav pom nkawd txoj kev hlub.

Kuv tau kawm hais tias kev ntseeg yog ib lub hwj chim thiab tsis yog ib qho uas peb ntseeg xwb. Tsis muaj ntau yam uas muaj hwj chim loj tshaj ib leej niam ncaj ncees tej kev thov Vajtswv.

Qhia nej tus kheej thiab qhia nej tsev neeg txog lub txiaj ntsim Vaj Ntsuj Plig Dawb Huv thiab Yexus Khetos txoj Kev Theej txhoj. Nej yeej yuav tsis muaj ib txoj hauj lwm nyob mus ib txhis uas tseem ceeb tshaj tej hauj lwm uas nej ua hauv nej tej tsev.

Peb paub tias peb yog cov me nyuam ntsuj plig ntawm ib leej txiv thiab leej niam nyob saum ntuj ceeb tsheej, peb nyob hauv lub ntiaj teb kom txais tau peb lub cev thiab kom sim peb lub siab. Peb cov uas muaj cev nqaij daim tawv muaj hwj chim kov yeej cov uas tsis muaj.4 Peb muaj kev ywj siab xaiv thiab peb xaiv tau tej yam uas peb yuav ua, tiam sis peb tsis muaj kev ywj siab xaiv tej yam uas peb raug los ntawm tej yam peb ua. Tej ntawd yeej yuav los.

Phau vaj lug kub qhia hais tias kev ywj siab xaiv yog “kev ywj siab coj ncaj ncees” uas txhais hais tias peb xaiv tau qhov zoo los yog qhov phem. Tus yeeb ncuab xav ntxias peb kom peb siv peb txoj kev ywj siab coj ncaj ncees raws li qhov tsis yog.

Cov vaj lug kub qhia peb tias “Txhua tus neeg yuav coj raws tej lus qhuab qhia thiab ntsiab cai rau yav tom ntej, raws li txoj kev ywj siab xaiv uas kuv tau muab rau nws, kom txhua tus neeg yuav lav ris rau nws tus kheej tej kev txhaum nyob rau hnub txiav txim.”5

Amas qhia hais tias “tus Tswv yeej ntsis tsis taus kev txhaum li txawm yuav yog qhov me dua ntais.”6 Yog peb yuav to taub qhov no, peb yuav tsum pom tias kev txhaum thiab tus neeg uas ua txhaum txawv li cas.

Piv xam hais tias, thaum lawv muab ib tug poj niam uas muaj txim tiag vim nws tau deev luag txiv coj los rau tus Cawm Seej, Nws hais ob peb los lus xwb: “Mus, thiab txhob ua txhaum ntxiv.”7 Nov yog lub ntsiab ntawm Nws txoj hauj lwm qhuab qhia.

Kev cia tib neeg ua raws li lawv lub siab nyiam yog ib qho zoo, tiam sis txhua yam zoo thaum ua heev dhau ces qhov zoo ntawd hloov los ua ib qho tsis zoo lawm. Peb yuav tsum ceev faj txog “kev cia tib neeg ua raws li lawv lub siab nyiam” kom peb thiaj yuav tsis raug ntxias. Qhov uas peb hloov peb lub teb chaws txoj kev cai kom tsis muaj zog thiaj tso cai rau tib neeg tsis coj dawb huv tsis hloov qhov uas lawv sab ntsuj plig yuav raug xwm txheej vim lawv ua txhaum Vajtswv txoj kev cai coj dawb huv.

Txhua tus muaj Khetos txoj Kev Kaj, ib lub hwj chim uas pab txhua tus tib neeg paub qhov zoo thiab qhov phem. Ib txoj kev sim siab hauv lub neej no yog qhov uas yuav tsum sim seb peb yuav ua li cas nrog txoj kev kaj ntawd thiab peb yuav ua li cas thaum peb txais kev tshoov siab kom ua neej ncaj ncees.

“Vim saib seb, Vajtswv muab Khetos tus Ntsuj Plig rau txhua tus neeg, kom nws yuav paub qhov zoo tawm ntawm qhov phem; yog li ntawd, kuv yuav qhia txoj kev txiav txim rau nej; vim txhua yam uas caw kom ua zoo, thiab yaum kom ntseeg Khetos, yeej raug xa tawm los ntawm lub hwj chim thiab lub txiaj ntsim ntawm Khetos; yog li ntawd nej yuav paub nrog ib txoj kev paub zoo tias tej ntawd yog Vajtswv li.8

Peb txhua tus yuav tsum muaj lub siab ua raws li tej kev tshoov siab ntawm tus Vaj Ntsuj Plig Dawb Huv. Tus Tswv muaj ib txoj kev qhia kev txawj ntse rau peb lub siab kom tshoov, coj, qhia, thiab ceeb toom peb. Vajtswv txhua tus tub thiab ntxhais muaj peev xwm paub tej yam uas lawv yuav tsum paub. Cia li kawm txais thiab ua raws li kev tshoov siab thiab kev tshwm sim.

Tag nrho tej yam uas kuv tau kawm, nyeem thiab qhia, qhov uas muaj nqi thiab dawb ceev tshaj yog qhov uas kuv ua tim khawv tshwj xeeb txog Yexus Khetos. Nws muaj txoj sia nyob. Kuv paub tias Nws muaj txoj sia nyob. Kuv ua tim khawv txog Nws Kuv hais lus tim khawv tias qhov no muaj tseeb. Nws yog peb tus Cawm Seej, peb tus Txhiv Dim. Kuv paub qhov no tiag tiag. Kuv hais lus tim khawv txog qhov no los ntawm tus Tswv Yexus Khetos lub npe, amees.