Aika el Tekoi a Kudengei
Aikel rokui el blak chuiu oisechakl e suub, e sel chimo el mekreos er ngii e chedaol klemerang el kbeskemiu a sioning er ngak el kirel Osobel el Jesus Kristo.
Sera 1992, el mlong me etui el rak el ngak a Assistant er a Teruich me a terung e lluich me a eru el rak el kchedal a Teruich me a terung, eng mlo 68 a rekik. Ak mlo omelchesiu soak lomuchel er sel kumekedong er ngii el kmo “Unfinished Composition.” A uchelel tial kuluches er ngii a ua tiakid:
A uldasu a mlei er a uldesuek er a tal kesus,
Klou a belkul luldasu.
Ng mlei er a ksal kora mesaul a bedengek,
Dirrek el kmal mesaul el mo mechiuaiu.
Ak meral mle mechesang er tial sils
El melatk el kirel a klukuk er ngak.
A uldasu a mle tiakid:
Sera kekerei, eng dimlak 68!
Ak mirrael el diak kulchedoi;
Dimlak a ringelel ongelngelek.
Mle sebechek el choiuii a cherrungel tekoi el eru el taem
E lmuut el dulii.
Mle sebechek loureor el kemanget el sikang
Dimlak sal mo mesel.
Tekoi el chelecha eng dikea kruul
A blek meduch er ngii er a kngeasek.
Omko ng sebechek el muut el mo risei el taem,
Omko ng sebechek el melilt,
Ng kmal diak kutechir a cheluodel er a klengeasek,
Ng betok a bok bechei.
E uaia lsoak lomakes el bedul uchei,
E mecherei a klengeasek, a ble le klebokel.
Sel kmetom er ngii omko klmuut lobult
A sel kudengelii.
Teruich el rak ruriul, eng mlo soak el muut el dochelii tial tekoi:
Teruich el rak a mereched el mla chengelakl
Ngii el rak obengkel a betok el ringel.
A deel ngara sengchek a sobecheklii omerollek;
Ng uaia luuta melemalt omerollek.
A tara deel orreked er a iklek—
Klebokel el ruul klalo!
Ng sobecheklak er a secherel a polio;
Ak mla mo teloi er tirkel medecherecher a iiklir el telcheroll.
Ng bleketakl olchotel a cheluodel.
Aika el tekoi a diak lorael mo ungil.
Chimo el tekoi el mukeroul lokiu a klisiich
A sel teletael er a besbes.
Koker, “Ngak ak medengelkau?”
Oi, ke dirk osisiu.
Lak bol kesib a rengum
A bla kubes er a ngklem.
A kongei el kmo ak mla suub a bebil er a tekoi
El dimlak el soak el mo medengei,
Eng di cheleuodel a mla ocholt aika el mekreos el klemerang
El rulii a reng meng mukeroul.
Aikel rokui el klengeltengat el mla mei,
E sel kot lungil er a klengar ngak
A chelmengek me a ongelaod
El kngai er a bechik.
A rengelekam el di mla mo bechiil,
Lobengterir a retelungalek er tir,
A rengelekam me a rengelekir a rengelekam,
Te kmal mereched el mo meklou.
Ng dirkak a tal mengodech a uldesuek
El kirel a klengeasek.
Ng kired el mo mecheuodel, le ngobengkel
A klemedengei er a klemerang.
Koker, “Ng mo uangera klukuk er kid?
Ng mo uangera klengar ngak er a klukuk?”
Ak melemolem e diak kuumondai.
Moker sel bok 88!
Tial mlo merek el rak eak dilechel aikakid el tekoi:
Chelecha eak mla mo 88.
Ng meral mereched a rak.
Ak mirrael, e mo melchedoi, e chelecha kuba skors,
E chelecha eak ngara wheelchair.
Ak blechoel mo ultuil el mechiuaiu,
Ng di klisichel a priesthood a melemolem.
Ng diak el iior er a ikel kloklel a klechad el diak er ngak
Ele ak mla mukeroul er a chedaol tekoi.
Ak mla meliuekl er a beluulechad
El betok er a edei el kilometer.
Lokiu a ngeso er a seng er a melidiul,
Eng di omerollek a dirkak bol merek.
Chelecha eng sebechek el bleketakl el kmo
Ak medengei e betik a renguk er a Rubak.
Ng sebechek louchais lobengterir a ruleak kuchei
Sel kumerk er a chedaol Tekingel.
Ak medengelii sel Ngii a ulemelchesiu er ngii er a Gethsemane
Ng diak el sebeched el smodii.
Ak medengei el kmo Ngii a rirellii el mei er kid el rokui;
Ng diak a ngodech el ngarbab el Sechelid.
Ak medengei el kmo Ngii a lmuut el mei
Loba klisiich me a klebkall.
Ak medengei el kmo ak lmuut el mo Mesang
Sel bo lulebongel er a klengar ngak.
Ak mo outubaruach er a ikel miltemall Lochil;
E melchesuar a klebkellel a Rngedel.
A mengulalu, lomritel el ngerek a kmo,
“Rubak er ngak, Dios er ngak.”1
Ak medengei!
A mado er a rebai er a blimam a chemau a kekerei el sers me a chereomel el ngara tkul omeuachel. A tara kbekbel tial blai a chemau a sers e meleksaked er ngii a dellomel. Chelsel a betok el rak e a ikal meleksakd el dellomel a blil a mekekerei el charm. A luuk el ngara ikal meleksakd a ungil selbechakl er a rua fox me a raccoons me a katuu el merorael sel klebesei.
A tara klebesei eng mlo klou a cherodech er a delul aikal dellomel. A langel me a klou el cherrodech er a charm el mlara ikal dellomel a mlo uchul a dirrek el klou llangel me a cherodech er a ikel charm el mle kmeed er tir. Ak mocha medengelii a uchul tial cherrodech. A bersoech a mla melemiakl er a ikal dellomel e ulekebekabes er a mado el kmal di sebechek el kursii lotebedii. A delel ngika el bersoech a mlarngii a teblo el tebull er ngii—lolchotel a kmo ng mla kma teblo el mekekerei el charm er a lukel. Chelsel okeim el rak el ki mkiei er a blimam eng dirkak a tal ki mesa uai tial teletael. Ngike el de dul kmo ng di ta er a chelsel a klengar teletael duubech— ng uaia ble luldesuam.
Sesei el klebesei ruriul eng liluut el mor ngii a cherodech, el tiaikid el taem eng mlara ikal meleksakd el dellomel er bebul a blil a bilis. Aki rirengesii osisiu langel me a osisiu el delbechel el charm el kiei er tial basio. Aki mle medengelii oldechelak. A ngelekek el sechal a ngilasech er bebul a blil a bilis e kursii a bersoech el dirk korreked er a delal aika el charm el bla le bengchii e mekodir.
Ak dula el kmo, “Ngera ngarngii? Ng kuk mla lmuut el metemall a Sers er a Eden?”
E mlei er a uldesuek a uleklatk lullekoi er ngii a reprofet. Ng blechoel mo diak de ngara selbechakl er a teletelel a cherarou, luldimukl a chelsel a rekeblid. Ng kired lomecheliu er a rengeleked.
Kede kiei er a kmal kengaol beluulechad el melemall aikel ngii a chedaol tekoi. A telungalek, el ngii a kmal klou a belkul chelechad er chelecha me a diak a ulebengelel, a ngara cheungel odechelakl er a meues me a diak el meues el klisiich. A cherarou a kmal klekar. A moktek er ngii a melemall. Alsekum eng sebechel oitechetur e tomellii a telungalek, eng mo kats.
A Ruriul-klebesei el Santo a medengelii sel ngarbab el moktek er a telungalek e melasm el kiei loltirakl er ngii me a cherarou a diak bel siseb er a delengcheklir. Kede metik a selbechakl el teletael mei er kid me a rengeleked sel doltirakl a telbiil el bla deruul e kiei lolngesenges aikel ngerchelir a roltirakl er a Kristo.
A Isaia dilu el kmo, “Le rebek el chad a mo meruul aikel melemalt meng morngii a budech; e mo ungilbeserir el di blechoel.”2
A budech a dirrek el bla le yaksok er ngii er a chelsel ocholt el Rubak a mla kmo alsekum e kede kldmokl eng diak demedakt.”3
A ngarbab el klisichel a priesthood a bla denguu el mo omecheliu a blai me a rechad el ngara chelsel. A chedam a ngarngii a ngerchelel el olisechakl er a rengelekel e omekngeltengat e mesiou er tir er a ikel chedaol ruoll er a ebangkelio me a ikel usbechellel a priesthood el tir ousbech. Ng kirel lolchotel a beltikelreng e oumerang e mengull er a chedil me a rengalek a sebechir el mesa tia lomeruul.
Ak mla mo medengei el kmo a klaumerang a meral klisiich ng diak el kora di olchotel a oumerang. Ng kesai el tekoi a lmuut el mesisiich el uaia mesisiich el nglunguchel a melemalt el chedil
Molisechakl er kau e molisechakl er a rengelekem el kirel Chedaol Reng me a Tngakireng er a Jesus Kristo. Ng diak a lmuut el betook el ureor el bom ruul el melutk el kirel a diak a ulebengelel er a ikel mruul er a chelsel a blim.
Kede medengei el kmo kid a ngalek er a reng er a chedam me a chedil er a babeluades, e ngar tial beluulechad el melai er a bedenged er a tech e ngara skeng. Kid el ngarngii a bedenged er a tech a ngarngii a klisiched el mo mesisiich er tirkel diak a bedengir.4 Kede mimokl el melilt aikel bo doruul me aikel dolilt, eng di diak de mimokl el melilt a mo telmellel ruriul. A telmellel ruriul a di morngii.
A mimokl el melilt a kleuadel er a chelsel chedaol llechukl el kmo ng “lemeltel a chad,” el belkul a kmo ng sebeched el melilt er a delongelel a ungil me a mekngit. A cherarou osiik el mengesuseu er kid el mo meterekakl er a usbechel a mimokl el melilt.
A chedaol llechukl olisechakl el kmo a bek el chad a ngara omeruul loltirakl a suobel me a osisechakl el kirel a ngarmedad, lultuil er a mimokl lomelilt er a chad el Rubak a mla msang, me luchul ea bek el chad a ngerchelir a kngterir er sel sils er a omerritel.”5
A Alma ulsisechakl el kmo a Rubak a diak el sebechel ngmoech osengel er a klengit.”6 A mo klemedengei er kid el kirel tiang, eng kired leklii a klengit er a chad el meruul a mekngit.
El uai, sera lenguu a redil mla ruebet er a laokreng el mora medal Osobel, el mle bleketakl el mekngit, e Ngii a sileldii tial ultutakl lolab a eim el tekoi. “Morael, e lak mluut el meruul a mekngit.”7 Tiaikid a teletelel a Urerel.
A kengei a kldung, eng di, ng uaia rokui el kldung, el sel kuk lesal mo iimis eng mo mekngit. Ng kired el mo kerekikl er a “bedikl er a kengei” me lak desiseb er a chelsel a klengit. A kengei er a buai el ngii a mekedmokl lokiu a mechitechut el llach el kongei a mekngit lomeruul el mo subed a diak el kekeringii a mo telmellel a oiitel a llechul a Dios er a tekoi er a deleboes.
Kid el rokui el mechell loba Llomes er a Kristo, el ngii omekrael er a dersta el chad el mo medengelii a ungil me a mekngit. A omerelled lousbech er tial llomes me otirekled er a odbechel el mo kiei er a melemalt el klengar a telengtengil a skeng er a klechad.
“Kamosang a Reng er a Kristo a mlora rebek el chad, me bo lodengelii a ungil me a mekngit; maleuaise, e kuchotii er kemiu a teletelel omorritel; ele rokui el tekoi el mengesuseu el mo meruul a ungil, e mengetikaik el mo oumerang er a Kristo, a mldurokl el mei loeak a klisichel me a sengk er a Kristo; maleuaisei eng mo sebechemiu el mo medengei loba bleketakl er klemedengei el kmo ng mlara Dios.”8
A dertsa er kid a kired el kldmokl el kirel odbechel Chedaol Reng. A Rubak a ngarngii a teletelel sel lomeskid a klikiid el llomes er a uldesued el odbechid, omekrael er kid, olisechakl er kid, e omeklatk er kid. A bek el ngelekel a Dios el sechal me a redil a sebechir el mo medenge ikel tekoi el kirir el mereched el mo medengei. Mosuub el mo ngmai e oltirakl a odbechel chedaol ocholt.
Aikel rokui el blak chuiu oisechakl e suub, e sel chimo el mekreos er ngii e chedaol klemerang el kbeskemiu a sioning er ngak el kirel Osobel el Jesus Kristo. Ngii a ngar. Ak medengei el kmo Ngii a ngar. Ngak a sioning er Ngii. El Ngii a sebechek louhcias el kirel. Ngii Osobeled, e Olsobel er kid. Aika kmal kudengei el klemerang. Aika kuuchais.