2010–2019
“Oqo na iNaki kei na Lagilagi ni Noqu Cakacaka”
Epereli 2013


“Oqo na iNaki kei na Lagilagi ni Noqu Cakacaka”

Sa solia wale kina na Kalou na Nona kaukauwa kivei ira era na ciqoma ka rokova na Nona matabete, ka na veimuataki ki na veivakalougatataki yalataki ni tawamate rawa kei na bula tawamudu.

I Peresitedi Packer, keimami sa vakanamata tu ki na ika 98 ni ivakadewa ni serekali vakasakiti oya. Sa dua na idusidusi vakasakiti e solia vei keda o koya.

Ena vica na macawa sa oti, ena dua na bogi batabata, ka buto, au a qoroya cake vata tiko kei Barbara, na watiqu, na lomalagi. E vaka mera ramase sara ka rairai totoka na milioni na veikalokalo. Au a mani cega na Mataniciva Talei ka wilika tale ena qoroqoro na ka a kaya na Turaga na Kalou vei Mosese: “Raica au sa bulia e vuqa na vuravura, ka sa sega ni wili rawa; ia sa tu na inaki ni noqu buli ira; a sa buli ira na Luvequ e Duabau Ga” (Mosese 1:33).

Ena siga nikua sa mai vakadeitaka kina na vakadodorairai kaukauwa na Hubble ni maliwa lala na veika vakaitamera a raica o Mosese. Era kaya na dauvakadidike ni Hubble ni sa laurai ena noda vuravura buli na Milky Way, ka rau sa kena tikina somidi sara na noda vuravura kei na matanisiga, ni sa dua ga vei ira na 200 na bilioni na vuravura buli vakataki keda. Oqo sa bau dredre sara ga vei au meu vakasamataka rawa, sega ni rawa me kilai, ni sa vakaitamera ka rabailevu na ibulibuli ni Kalou.

Kemuni na taciqu kei na ganequ, na kaukauwa rau a buli kina na lomalagi kei na vuravura sa ikoya na matabete. Kivei keda eda sa lewe ni Lotu eda sa kila tiko ni ivurevure ni kaukauwa ni matabete oqo sa mai vua na Kalou sa Cecere Sara kei na Luvena, o Jisu Karisito. E sega walega ni kaukauwa ni matabete a buli kina na lomalagi kei na vuravura, ia sa kaukauwa talega ni iVakabula a vakayagataki ena gauna ni Nona cakacaka vakalotu e vuravura me caka mana kina, vakalougatataka ka vakabulai ira kina na tauvimate, ka ra vakabulai kina na mate, ka vakakina, me vaka ni Luvena Duabau na Tamada, me vosota na rarawa levu e Kecisemani kei Kalivari—sa yaco kina me vakadeitaki na lawa ni lewa dodonu ena loloma veivueti, ka vakarautaka e dua na Veisorovaki tawamudu ka valuta rawa na mate vakayago ena Tucaketale.

Na idola ni lewa ni matabete oqo kei na kaukauwa sa solia o Koya kivei Pita, Jemesa, kei Joni kei ira na Nona iApositolo tale eso me ra vakalougatataki ira na tamata ka vauca mai lomalagi na veika sa vauci e vuravura.

Sa ka tabu na kaukauwa ni matabete ka sa isolisoli bibi ni Kalou. E duidui mai na lewa ni matabete, ni sai koya na veivakadonui me ia na cakacaka ena yaca ni Kalou. Na veivakadonui se veitabaki e soli ena veitabaki ni liga. Na kaukauwa ni matabete e yaco ga mai ena gauna era bula kilikili ka cakava na loma ni Kalou o ira era taura tu. Me vaka a vakaraitaka o Peresitedi Spencer W. Kimball, “Na Turaga sa solia kivei keda kece, na lewe ni matabete, na nona lewa eso, ia eda na rawa ga ni taura na kaukauwa mai lomalagi ena vuku ni noda ivalavala dodonu vakai keda yadua” (“Boys Need Heroes Close By,” Ensign, Me 1976, 45).

Ena siga lagilagi ni Veivakalesuimai kei na kena tauyavutaki tale na Lotu i Jisu Karisito e vuravura ena gauna oqo, e ratou a tadu mai ki vuravura o Joni na Dauveipapitaisotaki; Pita, Jemesa, kei Joni; Mosese; Ilaisa; kei Ilaija ka vakalesuya mai vua na Parofita o Josefa Simici na idola kei na lewa taucoko ni matabete me baleta na cakacaka ni Kalou ena iotioti ni gauna oqo.

Mai na idola kece oqo, na lewa oqo, kei na kaukauwa oqo sa mai tauyavutaki kina na Lotu i Jisu Karisito edaidai, ka sa mai liutaka kina na Karisito ena nona dusimaka e dua na Nona parofita bula, o Thomas S. Monson, ena nodra veivuke na iApositolo era sa kacivi ka tabaki.

Mai na nona ituvatuva ni matabete vakaedaumeni nei Tamada Vakalomalagi, sa nodra kina na tagane na ilesilesi cecere ni kena qaravi na matabete, ia era sega ni matabete. E duidui na nodra itavi na tagane kei na yalewa ia sa tautauvata ga na yaga ni nodra itavi. Me vaka ga ni sega ni kunekune rawa na yalewa ke sega na tagane, sa vakakina na tagane ni na sega ni rawa me taucoko na nona cakacakataka na kaukauwa ni matabete me tauyavutaka kina e dua na matavuvale tawamudu ke sega o yalewa. Sa kena ibalebale, ena ituvatuva tawamudu, na kaukauwa ni vakatubu kawa kei na kaukauwa ni matabete sa wasei vei tagane kei yalewa vakawati. Vei rau na veiwatini, o tagane kei yalewa me rau na sasagataka me rau muria na Tamada Vakalomalagi. Na bula dodonu Vakarisito ni loloma, yalomalua, kei na vosota me rau sa na vakaliuca ni rau sasagataka tiko na veivakalougatataki ni matabete ena nodrau bula kei na nodrau matavuvale.

Sa ka bibi sara vei keda meda na kila vakavinaka ni sa vakarautaka vei keda na Tamada Vakalomalagi e dua na sala kivei ira kece na Luvena tagane kei na yalewa mera na rawata na veivakalougatataki ka vaqaqacotaki ena kaukauwa ni matabete. Sa iusutu ki na ituvatuva ni Kalou me baleti ira na luvena vakayalo na veika sa vakaraitaka oqo o Koya: “Oqo na inaki kei na lagilagi ni noqu cakacaka—me ra tucaketale mai na mate na tamata kecega ka rawata na bula tawamudu” (Mosese 1:39).

Mai na ivakatakila a soli vua na Parofita o Josefa Simici ena wase 81, ni Vunau kei na Veiyalayalati, e vakamacalataka kina na Turaga ni dodonu me vakayagataki na kaukauwa ni matabete mera “vukei ira sa malumalumu, vakaukauwataka na liga sa wadamele, kei na duru sa malumalumu” (tikina e 5).

“Raica mo vunau yani mo vukei ira vakalevu kina na wekamu, io me vakarokorokotaki tikoga kina na nomu Turaga” (V&V 81:4).

Ni da vakasamataka na nodra vukei yani na malumalumu, vakaukauwataka na liga sa wadamele, ka vakaukauwataka na duru sa malumalumu, e votu sara vei au na nona vakaraitaka tiko e dua na goneyalewa talei yabaki vitu vei tukana e dua na itei ni tomata a bocina taumada na sorena me tiki ni nona cakacaka vakavuli ni kalasi rua.

A vakamacalataka o koya ni na tekivu mai na dua na sorena lailai me dua na itei. Kevaka me qai qaravi vinaka na itei oqo, ena yaco me vuataka mai kina e vuqa na tomata ka na lako mai kina e vuqa tale na sorena.

A kaya, “Kevaka mera qai tei taucoko na sorena o ya ka vuataka e vuqa tale na tomata, ka teivaka na sorena taucoko tale o ya, ena yaco ga ena loma ni vica na vula sa na milioni na nomu tomata.”

Na kena kece oqo,” e kurabui ni kaya, “ni tekivu mai na dua na sorena lailai.”

Ia a kaya, “E voleka sara meu vakamatea na noqu itei o ya. Au a biuta tu ga ena dua na rumu butobuto ka guilecava meu vakasuasuataka. Niu nanuma rawa na noqu itei oqo, sa malumalumu sara ga ka vaka me sa mate. Au tagi niu vakasamataka na milioni na tomata o ya ni ra sa na sega ni bula.”

Ni oti o ya sa mani maqusa sara me tukuna vei tukana na “cakamana” sa mai yaco.

A vakamacalataka, “E kaya o Na ni rairai sega ni mate na itei. E rairai gadreva ga me vakasuasuataki ka me cilava na rarama me bula tale kina.

“E dina sara o koya. Au a qai vakasuasuataka na itei, kau biuta e katubaleka me cilava na rarama. Kila na cava a yaco?” a taroga. “Sa tekivu bula tale, ka sa na vakarau vuataka oqo e milioni na tomata!”

Sa vakaukauwataki na nona vu ni tomata lailai, a nuitaki sara tu vakalevu ia a malumalumu mada ka malai sara ni a vakawaleni vakacala-ka, ka sa mai bula tale ena kena qaravi ena wai kei na rarama mai na ligana dauloloma ka veikauwaitaki na goneyalewa lailai.

Kemuni na taciqu kei na ganequ, me vaka ni da sa luvena vakayalo vakaidina na Tamada dauloloma Vakalomalagi—sa sega kina ni yalani, na noda gugumatua vakalou. Ia kevaka meda sega ni qaqarauni, eda na rawa ni vakataka na vu ni tomata malumalumu o ya. Eda na rawa ni kuitaki mai na ivakavuvuli dina ni kosipeli i Karisito ka yaco meda walokai vakayalo ka malumalumu, ka yaco meda sa vagalalataki keda mai na rarama vakalou kei na wai ni bula ni nona loloma tawamudu na iVakabula kei na kaukauwa ni matabete.

Kivei ira na lewe ni matabete era guce mera dau doka tikoga na matabete mera qarava na nodra matavuvale kei ira na tamata era na vakataki ira era sega ni ciqoma na veivakalougatataki sa kovuti tu ena kaukauwa ni matabete era na malumalumu vakayalo, ka vakuwai ira mai na gacagaca vakayalo bibi, rarama, kei na kaukauwa ni Kalou ena nodra bula—me vakataka ga na vu ni tomata sa nuitaki tu vakalevu ia a mai vakawaleni ka malumalumu kina.

Na kaukauwa ni matabete vata ga a bulia na vuravura, kei na vuravura tale eso, kei na lomalagi me sa tiki ni noda bula me vukea, vaqaqacotaka, ka vakalougatataka na noda matavuvale, noda itokani, kei ira na wekada voleka—sa kena ibalebale, meda sa cakava na veika ena cakava na iVakabula kevaka mada ga e veiqaravi tiko ena keda maliwa edaidai.

Sa inaki taumada ni matabete oqo me vakalougatataka, vakasavasavataka, ka vakadodonutaki keda me rawa ni da laki bula vata kei ira na noda matavuvale vata kei rau na noda itubutubu vakalomalagi, kovuti ena veivauci ni matabete, vakaitavi ena cakacaka veivakurabuitaki ni Kalou kei Jisu Karisito ena kena vakatetei tawamudu yani na Nodrau rarama kei na lagilagi

Ena vuku ni ka oqo, ena vica na vula sa oti a noqu madigi meu vakaitavi ena kena caka e dua na vidio-ni veituberi ni veiliutaki e vuravura raraba e vakatokai na Vaqaqacotaki na Matavuvale kei na Lotu ena Matabete.

Na DVD veivakauqeti ka veivakasalataki oqo a vakadewataki ki na 66 na mataqali vosa. E vakavulica na sala e rawa ki na matabete me veivakalougatataki, soli kaukauwa, ka vakaukauwataka tale na noda bula, nodra bula na noda matavuvale, kei na nodra bula kece na lewe ni Lotu.

Sa vakaraitaka kina vei keda kece na—tagane, yalewa, gone; vakamau, yada, se sega ni vakamau; se cava ga na keda ituvaki—na sala eda na rawa ni votai kina ena veivakalougatataki ni matabete. E tiko e vica na vidio 8- ki na 12- na miniti na kedra balavu e vakamatatataki tu kina na idola, lewa, kei na kaukauwa ni matabete kei na sala e vaqaqacotaka kina na tamata yadua, matavuvale, kei na Lotu.

E dua na tikina taleitaki a vakaraitaki kina e dua na vuvale lailai ni ivuvu nei buqu vakarua o Mary Fielding Smith. E yada nei Hyrum, na tuakai Parofita Josefa Simici. Me vaka ni itubutubu dua, a dau kerea ka vakararavi ena kaukauwa o ya mai na kaukauwa ni nona vakabauta na matabete me susuga cake ka vakalougatataki ira kina na luvena ena loloma kei na rarama ni kosipeli. Nikua era sa mai vakavinavinakataka tiko e udolu na nona kawa era iliuliu yalodina ka lewe ni Lotu na nona vakabauta, yaloqaqa, kei na ivakaraitaki.

Na veituberi vou oqo ni veiliutaki sa vakarautaki tu ena Initaneti ena LDS.org meda raica taucoko ka vuli-ka kina (wwlt.lds.org). Sa rawa mo sarava ena LDS.org, se sa rawa mo lavetaka ki na nomu kompiuta, talevoni vuku, se kompiuta lalai veikauyaki.

E ratou sa kerea kina na Mataveiliutaki Taumada ki na “mataveiliutaki ni iteki kei na matabisopi mera vakayagataka e dua se sivia na soqoni ni matabose ni iteki se tabanalevu mera sarava kina [vakaoti] na DVD oqo. E dodonu me veivosakitaka na matabose ni iteki kei na tabanalevu na sala mera vakayacora kina na vuli sa vakaraitaki tiko” (iVola ni Mataveiliutaki Taumada, 1 ni Feperueri, 2013).

Na lewenivuli ena veivakauqeti ka veivakayaloqaqataki vei ira na lewe ni matabete ena kuoramu, iSoqosoqo ni Veivukei, Matawilivola ni Sigatabu, Goneyalewa, Cauravou (vakabibi vei ira era sa vakarau tiko ki na kaulotu), vakakina ena soqoni ni Lalai, se na soqoni cokovata ena ikalima ni Sigatabu. Sa qai rawa talega kina vei ira na lewe ni matabose mera veivakauqeti vei ira na tamata yadua kei na itubutubu mera vakayagataka na vuli oqo vata kei ira na nodra matavuvale. Kemuni na taciqu kei na ganequ, na veituberi ni veiliutaki oqo sa baleti ira yadudua na lewe ni Lotu. Kemuni na itubutubu, ni raicalesu, wasea, ka veivosakitaka na veika ko ni sa vulica ka vakila vata kei ira na luvemuni, ka mera sarava ka vakayacora vakakina vata kei kemuni me na qaqaco na matavuvale ena matabete.

E kaya o Jisu:

“Kevaka e dua sa viagunu, me lako mai vei au ka gunu” (Joni 7:37).

“Ia ko koya sa gunuva na wai kau na solia vua ena sega sara ni viagunu ka tawa mudu; ia na wai kau na solia vua, ena tu e lomana me mata-ni-wai sa tovure ki na bula tawamudu” (Joni 4:14).

“Oi au na rarama kei vuravura: ko koya sa muri au … ena tu ga vua na rarama ni bula” (Joni 8:12).

Kevaka e dua vei kemuni sa vakila ni sa vaka me lailai sobu na nomuni vakabauta se ivakadinadina mai na kena e dodonu me tiko me baleta na ituvatuva nei Tamada Vakalomalagi, mo ni sa saumaki ga vakataucoko ki vua na iVakabula. Ni vakatara na Nona rarama kei na Nona mataniwai tovure ni bula me vakayaco-ka vei iko kei na nomuni matavuvale na veika a vakayacora e dua na tuturu ni wai kei na rarama me bula rawa tale kina na vu ni tomata malumalumu o ya.

Ia, au a tekivu ena noqu qoroqoro ka galu me baleta na veika sa bulia na Kalou ena kaukauwa ni matabete. Au mai tu oqo ka vakataroga, kau vakabauta ni vakakina e vuqa vei kemuni, de na rawa beka meda kila taucoko vakavinaka na kaukauwa ni Kalou me veivakasalataki ka vakalougatataki keda. Sa rui ka cecere, ka lagilagi sara, ka qaqa dina.

E kaya o Josefa Simici, “Na Matabete sa dua na ivakavuvuli tawamudu, ka a bula kei koya na Kalou mai na tawamudu, ki na tawamudu, ka sega na kena itekitekivu se itinitini vakayabaki” (Nodra iVakavuvuli na Peresitedi ni Lotu: Josefa Simici [2007], 104).

Sa solia wale kina na Kalou na Nona kaukauwa kivei ira era na ciqoma ka rokova na Nona matabete, ka na veimuataki ki na veivakalougatataki yalataki ni tawa mate rawa kei na bula tawamudu.

Au sa vakadinadinataka ni sa vakayacori tiko na cakacaka i Jisu Karisito ena matabete. Oqo na kaukauwa a bulia kina na vuravura oqo na Tamada Vakalomalagi kei na Luvena Daulomani ka sa mai yaco kina na yavu cecere ni bula marau ena vukuda. Meda sa qai vuku sara ka vakasaqara me vaqaqacotaki kina na noda dui bula, na nodra bula na noda matavuvale, kei na Lotu i Jisu Karisito ni Yalododonu Edaidai ena kaukauwa ga ni matabete ni Kalou sa noqu masu malumalumu ena yaca i Jisu Karisito, emeni.