“Nov Yog Kuv txoj Hauj Lwm thiab lub Yeeb Koob”

Thawj Tswj Hwm Packer, peb sawv daws tos ntsoov koj zaj paj huam thib 98 ntawd. Koj tau hais lus zoo kawg rau peb.

Ob peb lim tiam tas los, thaum ib hmo no no thiab tsaus ntuj nti, kuv poj niam, Barbara, thiab kuv saib saum nruab ntug. Tej txhiab txhiab vam vam hnub qub yeej ci lug zoo nkauj kawg nkaus. Ces kuv txawm nthuav saib hauv phau Hlaws uas Muaj Nqi thiab nyeem dua qhov uas tus Tswv hais rau Mauxes hais tias: “Thiab kuv tau tsim ntiaj teb uas suav tsis txheeb; thiab kuv kuj tau tsim tej no rau kuv tej hauj lwm lub ntsiab; thiab kuv tau tsim tej no dhau los ntawm Leej Tub, uas yog kuv Tib Leeg Tub” (Mauxes 1:33).

Niaj hnub nim no lub tshuab tsom ntuj Hubble tau qhia tias qhov uas Mauxes pom ntawd muaj tseeb tiag. Raws li cov kws txuj Hubble hais, txoj kab lig ntuj galaxy Milky Way, uas peb lub ntiaj teb thiab lub hnub koom ib qho me me aiv xwb, lawv kwv yees tias muaj ntau tshaj 200 txhiab phlom tej galaxy. Rau kuv mas yeej nyuaj to taub, nkag siab, saib tej yam Vajtswv tau tsim loj thiab ntau npaum li cas.

Cov kwv tij thiab cov muam, lub pov thawj hwj yog lub hwj chim uas lub ntuj lub teb raug tsim. Peb cov uas yog mej zeej ntawm lub Koom Txoos paub hais tias lub hauv paus ntawm lub hwj chim pov thawj hwj no yog Vajtswv Huab Tais Ntuj thiab Nws Leej Tub, Yexus Khetos. Tsis yog lub pov thawj hwj lub hwj chim uas tsim lub ntuj lub teb xwb, tiam sis lub pov thawj hwj kuj yog lub hwj chim uas tus Cawm Seej siv thaum Nws ua neej nyob kom ua txuj ci tseem ceeb, foom koob hmoov rau thiab kho cov neeg mob, tsa cov neeg tuag sawv rov los, thiab, ua Vajtswv Tib Leeg Tub, tau nyiaj tej kev mob hnyav heev ntawm Khexemanes thiab Roob Khauj Khaum Taub Hau—es ua li ntawd ua kom haum tej kev cai ntawm txoj kev txim lij ua ke nrog txoj kev hlub tshua thiab npaj ib txoj kev Theej Txhoj nyob mus ib txhis thiab kov yeej txoj kev tuag dhau ntawm txoj kev Sawv Rov Los.

Yog cov yawm sij ntawm lub pov thawj hwj txoj cai no thiab lub hwj chim uas los ntawm qhov ntawd uas Yexus muab pub rau Petus, Yakanpaus, thiab Yauhas thiab Nws cov Thwj Tim i kom foom koob hmoov rau lwm tus neeg thiab khi saum ntuj tej yam uas khi hauv lub ntiaj teb no.

Lub hwj chim ntawm lub pov thawj hwj yog ib qho txiaj ntsim dawb ceev thiab tseem ceeb uas los ntawm Vajtswv los. Lub hwj chim ntawm lub pov thawj hwj yog txawv ntawm txoj cai ntawm lub pov thawj hwj, uas yog qhov uas Vajtswv pom zoo rau yus tuav nws lub npe ua ib yam dab tsi. Txoj cai ntawd yog muab rau ib tug neeg dhau los ntawm txoj kev tso tes saum taub hau. Lub hwj chim ntawm lub pov thawj tsuas yog los ntawm thaum cov neeg uas tsim nyog siv lub pov thawj hwj tsim nyog thiab coj raws li Vajtswv lub siab xav. Ib yam li Thawj Tswj Hwm Spencer W. Kimball hais hais tias, “Tus Tswv tau muab qee rau peb sawv daws, ua cov uas tuav lub pov thawj hwj, ib feem ntawm nws txoj cai, tiam sis peb tsuas txuas tau rau lub ntuj lub hwj chim thaum peb ua neeg ncaj ncees” (“Boys Need Heroes Close By,” Ensign,, Tsib Hlis Ntuj 1976, 45).

Thaum lub sij hawm uas txoj moo zoo Txum Tim Rov Qab Los thiab tau rov qab txhim tsa Yexus Khetos lub Koom Txoos hauv lub ntiaj teb niaj hnub nim no, Yauhas tus Muab Neeg Ua Kev Cai Raus Dej; Petus, Yakanpaus, thiab Yauhas; Mauxes; Elias; thiab Eliyas rov qab los rau lub ntiaj teb thiab txum tim rov qab los dhau los ntawm tus Yaj Saub Yauxej Xamiv tag nrho tej yawm sij thiab txoj cai ntawm lub pov thawj hwj kom thiaj khiav tau Vajtswv tej hauj lwm hauv hnub nyoog kawg no.

Yog los ntawm tej yawm sij no, tej txoj cai no,, thiab lub hwj chim no uas Yexus Khetos lub Koom Txoos yog txhim tsa niaj hnub no, es muaj tus Khetos ua tus coj kev rau Nws tus yaj saub, Thomas S. Monson, thiab nws txais kev pab los ntawm tej Thwj Tim uas raug hu thiab raug tsa los mus pab.

Nyob hauv peb Leej Txiv Saum Ntuj txoj hau kev no, txiv neej muaj txoj kev lav ris kom saib xyuas thiab tuav lub pov thawj hwj, tiam sis lawv tsis yog lub pov thawj hwj. Txiv neej thiab poj niam nyias muaj nyias lub luag hauj lwm sib txawv tiam sis muaj vaj huam sib luag. Ib yam li ib tug poj niam xeeb tsis tau me nyuam yog tsis muaj ib tug txiv neej, ib yam li ntawd ib tug txiv neej siv tsis tau lub hwj chim ntawm lub pov thawj hwj kom txhim tsa ib tse neeg nyob mus ib txhis yog tias tsis muaj ib tug poj niam. Hais lwm yam lus, saib qhov ntev mus ib txhis, lub hwj chim tsim noob neej thiab lub hwj chim pov thawj hwj yog ib txij nkawm koom tuav. Ua ib txij nkawm, ib tug txiv neej thiab ib tug poj niam yuav tsum rau rau siab ua raws li peb Leej Txiv Saum Ntuj Ceeb Tsheej hais. Tej yam muaj nuj nqi ntawm txoj Kev Ntseeg Khetos xws li kev hlub, kev txo hwj chim, thiab kev rub siab ntev yuav tsum yog tej yam uas ib txij nkawm tsom ntsoov thaum nkawd nrhiav kom tau tej koob hmoov ntawm lub pov thawj hwj hauv nkawd lub neej thiab rau nkawd tsev neeg.

Yeej tseem ceeb rau peb to taub hais tias Leej Txiv Saum Ntuj tau npaj ib txoj kev rau tag nrho Nws cov tub thiab cov ntxhais txais tau tej koob hmoov thiab muaj zog ntawm sab ntsuj plig los ntawm lub hwj chim ntawm lub pov thawj hwj. Lub ntsiab ntawm Vajtswv txoj hau kev rau Nws cov me nyuam yog qhov uas Nws tshaj tawm hais tias: “Nov yog kuv txoj hauj lwm thiab kuv lub yeeb koob—ua kom tib neeg tsis txawj tuag thiab txais tau lub neej nyob mus ib txhis” (Mauxes 1:39).

Hauv ib zaj lus tshwm sim muab rau tus Yaj Saub Yauxej Xamiv hauv tshooj 81 ntawm phau Lus Qhuab Qhia thiab Kev Khi Lus, tus Tswv piav hais tias lub hwj chim ntawm lub pov thawj hwj yog siv kom “pab cov uas qaug zog, tsa tej txhais tes uas tsaug lawm, thiab ua rau lub hauv caug uas tsis muaj zog kom mus taus kev” (nqe 5).

“Thiab ua li no [nej] yuav qhov zoo tshaj rau [nej] cov neeg zej zog, thiab yuav ua tau rau tus Tswv tau yeeb koob” (Q&K 81:4).

Thaum peb xav txog qhov uas pab cov uas qaug zog, tsa tej txhais tes uas tsaug lawm, thiab ua rau lub hauv caug uas tsis muaj zog kom mus taus kev, ua rau kuv xav txog ib tug me nyuam ntxhais xya xyoo uas muab ib tsob txiv lws suav qhia rau nws yawg saib es tsob ntawd tus ntxhais xeeb ntxwv ntawd tau tu loj hlob los ntawm ib lub noob uas nws cog thaum nws kawm qib ob.

Nws piav hais tias los ntawm ib lub nyuag noob ib tsob txiv lws suav yuav loj hlob tuaj. Thiab yog tias leej twg tu tsob ntawd, tsob ntawd yuav txi txiv lws suav ntau es txhua lub txiv lws suav ntawd nyias muaj nyias noob thiab.

Nws hais tias, “Thiab yog tias peb cog tag nrho tej noob ntawd thiab tu lwm cov txiv lws suav loj hlob, thiab peb rov qab cog tag nrho cov noob ntawd, ces tsuas yog ob peb cim xwb es peb yuav muaj txiv lws suav ntau plhom.”

Ces tus ntxhais ntawd hais tais, yam xav tsis thoob li, hais tias, “Tag nrho tej no, los ntawm ib lub nyuag noob xwb.”

Tiam sis tus ntxhais ntawd hais tias, “Kuv yuav luag ua rau kuv tsob txiv lws suav tua tuag thiab. Kuv tseg kuv tsob ntawd hauv ib hoob tsaus tsaus thiab tsis nco qab ywg dej rau. Thaum kuv nco tau kuv tsob ntawd, nws twb ntsws tas twb zoo li tuag lawm. Kuv quaj vim kuv xav txog tag nrho cov txiv lws suav ntawd uas yuav tsis muaj cib fim loj hlob tuaj li.”

Ces tus ntxhais xeeb ntxwv ntawd txawm zoo siab qhia nws yawg txog “qhov txuj ci tseem ceeb” uas muaj los.

Nws piav hais tias, “Kuv niam hais tias tej zaum kuv tsob ntawd tsis tau tuag. Tej zaum tsob ntawd tsuas xav tau dej thiab me ntsis tshav ntuj kom thiaj rov ciaj.

“Thiab kuv niam hais yog lawm. Kuv ywg tsob ntawd thiab muab nws txawb saum txee qhov rai kom tau tshav ntuj. Thiab saib seb, txawm muaj li cas?” nws nug. “Tsob ntawd rov qab ciaj los, thiab nim no nws yuav txi txiv lws suav ntau!”

Tus ntxhais ntawd tsob txiv lws suav, uas muaj peev xwm txi tau txiv tiam sis ho tsis muaj leej twg saib xyuas zoo, nim no rov qab loj hlob tuaj vim yog nws ywg dej rau thiab muab nws tso nte tshav.

Cov kwv tij thiab cov muam, vim peb yog peb Leej Txiv Saum Ntuj Ceeb Tsheej cov me nyuam ntawm sab ntsuj plig, peb muaj peev xwm ncav tau peb cov hom phiaj los saum ntuj los. Tiam sis yog peb tsis ceev faj me ntsis, peb yuav zoo ib yam li tsob txiv lws suav uas hais txog ntawd. Peb nyob nrug deb ntawm cov lus qhuab qhia tseeb thiab Yexus Khetos txoj moo zoo thiab rais los mus ua neeg tsis muaj zog ntawm sab ntsuj plig, vim peb tau tshem peb tus kheej tawm ntawm qhov kaj uas los saum ntuj los thiab tus Cawm Seej txoj kev hlub thiab lub hwj chim pov thawj hwj.

Lawv cov uas tuav lub pov thawj hwj thiab tsis rau siab saib nws rau nqi thaum lawv ua hauj lwm pab peb tej tsev neeg thiab lwm tus neeg yuav zoo nkaus li lawv cov uas tsis txais cov koob hmoov uas muaj vim yog lub pov thawj hwj lub hwj chim thiab yeej yuav ntsws tuaj ntawm sab ntsuj plig, vim lawv cais lawv tus kheej tawm ntawm qhov zoo, qhov kaj, thiab lub hwj chim uas los ntawm Vajtswv los—ib yam li tsob txiv lws suav uas muaj peev xwm ntau tiam sis ntsws tas.

Tib lub pov thawj hwj uas tsim ntuj tsim teb yuav tsum yog ib feem ntawm peb lub neej kom thiaj pab, ntxiv dag zog rau, thiab foom koob hmoov rau peb tej tsev neeg, peb cov phooj ywg, thiab peb cov neeg zej zog—hais ua lwm yam lus, kom ua tej yam tus Cawm Seej yuav ua yog tias Nws nyob no niaj hnub nim no.

Thiab lub ntsiab ntawm lub pov thawj hwj lub hwj chim kom foom koob hmoov rau peb, ua rau peb kom dawb ceev thiab dawb huv, kom peb thiaj nrog peb tej tsev neeg nyob ua ke rau ntawm peb Leej Niam Leej Txiv Saum Ntuj lub xub ntiag, sib khi ua ke dhau los ntawm lub pov thawj hwj, thiab koom ua Vajtswv thiab Yexus Khetos Nkawd tej hauj lwm mus ib txhis li.

Ua li no, ob peb hlis dhau los kuv muaj lub cib fim nrog lwm tus neeg koom ua ib zaj vis dis aus uas yuav cob qhia cov thawj coj nyob thoob plaws ntiaj teb hu ua Ntxiv Dag Zog rau Tsev Neeg thiab lub Koom Txoos dhau ntawm lub Pov Thawj Hwj.

Daim DVD no yog muab txhais ua 66 yam lus. Nws qhia saib lub hwj chim ntawm lub pov thawj hwj yuav ua li cas foom koob hmoov rau peb tej tsev neeg thiab lub Koom Txoos cov mej zeej.

Nws qhia peb sawv daws—txiv neej, poj niam, me nyuam; txij nkawm, poj ntsuag yawg ntsuag, los yog cov tseem tsis tau yuav poj niam yuav txiv—saib peb yuav ua li cas txais tau tej koob hmoov ntawm lub pov thawj hwj. Muaj tej zaj 8-mus rau-12-feeb uas piav txog cov yawm sij, txoj cai, thiab lub hwj chim ntawm lub pov thawj hwj thiab saib nws ua li cas ntxiv dag zog rau tib neeg, tsev neeg, thiab lub Koom Txoos.

Muaj ib zaj uas lawv thaij hauv kuv niam tus niam tais laus, Mary Fielding Smith, lub me nyuam tsev. Nws yog Hyrum tus poj ntsuam, es Hyrum yog tus Yaj Saub Yauxej tus tij laug. Ua ib tug niam tsev, thiab dhau ntawm nws txoj kev ntseeg ruaj nrees rau ntawm lub pov thawj hwj, nws thov Vajtswv kom tau thiab vam khom lub hwj chim ntawd kom cob qhia thiab foom koob hmoov rau nws cov me nyuam hauv qhov kaj ntawm txoj moo zoo. Niaj hnub nim no nws cov xeeb leej xeeb ntxwv uas yog thawj coj thiab mej zeej hauv lub Koom Txoos ua nws tsaug vim yog nws txoj kev ntseeg, siab loj, thiab yam ntxwv.

Qhov kev cob qhia tshiab no yeej muaj nyob rau ntawm qhov Internet rau ntawm LDS.org rau txhua tus neeg saib thiab mloog (wwlt.lds.org). Nej saib tau ncaj qha rau ntawm LDS.org, los yog nej download tau rau nej lub koos pis tawj, lub xov tooj smartphone, los sis lub tshuab tablet.

Thawj Pawg Thawj Tswj Hwm tau hais kom “tej ceg txheem ntseeg pawg thawj tswj hwm thiab tej pawg npisov siv ob peb kev sib ntsib rau ceg txheem ntseeg los sis pawg ntseeg pawg sab laj kom saib tau daim DVD no. Ceg txheem ntseeg thiab pawg ntseeg tej pawg sab laj yuav tsum sib tham seb yuav siv tej yam uas qhia rau lawv nyob haud.” (Thawj Pawg Thawj Tswj Hwm tsab ntawv, Ob Hlis Ntuj 1, 2013).

Tej yam nyob hauv daim DVD no yuav txhawb nqa thiab txhib cov uas koom tej pawg pov thawj hwj, lub Koom Haum Niam Tsev, Hnub Caiv Kev Kawm Vaj Lug Kub, Koom Haum Tub Hluas, Kaum Haum Ntxhais Hluas (twb yog lawv cov uas npaj mus ua tub txib), thiab sawv daws. Ces cov uas koom pawg sab laj yuav yaum tau tib neeg thiab niam txiv muab daim DVD no rau lawv tsev neeg saib. Cov kwv tij thiab cov muam, txoj kev cob qhia cov thawj coj no yog rau txhua tus mej zeej hauv lub Koom Txoos. Ib tsoom niam txiv, tshab xyuas, faib, thiab sib tham txog tej yam uas nej kawm nrog rau nej cov me nyuam, thiab cia lawv saib tej zaj no thiab, kom nej tej tsev neeg thiaj muaj zog zuj zus tuaj dhau los ntawm lub pov thawj hwj.

Yexus hais tias:

“Tus uas nqhis dej cia li los cuag kuv, kuv yuav muab dej rau nws haus” (Yauhas 7:37).

“Tiam sis tus uas haus cov dej uas kuv muab rau nws yuav tsis nqhis ib zaug li lawm. Cov dej uas kuv muab rau nws yuav txhawv hauv nws lub siab thiab cawm nws txoj sia mus ib txhis” (Yauhas 4:14)

“Kuv yog qhov kaj rau neeg ntiaj teb. Tus uas raws kuv qab yuav … tau lub neej tshav ntuj nrig” (Yauhas 8:12).

Yog tias nej tus twg xav hais tias nej txoj kev ntseeg los yog txoj kev ua tau tim khawv txog Vajtswv txoj hau kev tsis tshua muaj zog, ces cia li tig mus cuag tus Cawm Seej. Cia Nws qhov kaj thiab Nws cov dej uas muaj txoj sia pab nej thiab nej tsev neeg ib yam li ob qho ntawd tau pab tsob txiv lws suav uas hais txog ntawd.

Nim no, kuv tau pib hais txog qhov uas tej yam uas Vajtswv tsim dhau los ntawm lub hwj chim lub pov thawj hwj yeej ua rau yus xav tsis thoob. Hos tam sim no, kuv xav tsis thoob txog qhov uas Vajtswv muaj peev xwm qhia thiab foom koob hmoov rau peb. Yeej yog ib qho zoo kawg nkaus li.

Yauxej Xamiv hais tias, “Lub Pov Thawj Hwj yog ib txoj ntsiab cai kav mus ib txhis, thiab tau nrog Vajtswv nyob ib txhiab ib txhis li” (Teachings of Presidents of the Church: Joseph Smith [2007], 104).

Vajtswv tau muab Nws lub hwj chim pub rau lawv cov uas txais thiab saib rau nqi Nws lub pov thawj hwj, uas coj peb mus txais tau tej koob hmoov ntawm kev tsis txawj tuag thiab lub neej nyob mus ib txhis.

Kuv ua tim khawv hais tias Yexus Khetos tej hauj lwm yog ua tiav dhau ntawm lub pov thawj hwj. Yog lub hwj chim uas peb Leej Txiv Saum Ntuj Ceeb Tsheej thiab Nws Tib Leej Tub siv kom tsim tau lub ntuj lub teb thiab pib txoj kev zoo siab uas nws npaj tseg rau peb. Thov kom peb cia li ua neeg txawj ntse thiab ntxiv dag zog rau peb lub neej, thiab peb tej tsev neeg, thiab lub Koom Txoos dhau los ntawm lub hwj chim ntawm lub pov thawj hwj yog kuv cov lus thov Vajtswv los ntawm Yexus Khetos lub npe zoo, amees.