“Pa Inge Orekma ac Wolacna Luhk”

Prestuhn Packer, kuht finsrak in lohng pacl 98 ke puhpuhlyuck wolacna se inge. Ma na lahlmwetmwet el use nuh sesr.

Kuhtuh wik tari ah, ke sie fong ohyohu ac lohsr, muhtwacn kiyuck, Barbara, ac nga ngwetwack ke fwefwelac nuh inkuhsrao. Itu miliacn uh kahlwem ac kahto na pwacye. Na nga ikacslah Pearl of Great Price ac sulpac riti ac motko ke ma Leum God El fahk nuh sel Moses lah El orwaclah facluh pucspucs ac El orwaclah ke srihpac Lal sifacna; ac ke Wen Kuloh Nahtuhl, El orwacloslac (liye Moses 1:33).

Ke lwen lasr Hubble deep-space telescope kuh in ahkkweye yohk srihpaciyacn ma Moses el liye ah. Ma Hubble scientist fahk ke Milky Way galaxy, lah facluh ac faht lasr uh pa sie ip na srihsrihk, in liye lah oasr puhs liki 200 piliacn galaxies oacna sie. Nuh sihk upac in kahlwem kac, tiac kuh in nuhnkuh kac, lah ma oreklac sin God uh yohklac ac sralacp.

Tamuhlwel ac tahmtahel, kuh ma inkuhsrao ac facluh oasr ac oreklac kac uh pa pristut uh. Kuht suc mempucr ke Alu uh etuh lah kahsruh nuh ke kuh luhn pristut pa God Kuhlwacna ac Wen Nahtuhl, Jisus Kraist. Tiac kuh luhn pristut muhkwena pa inkuhsrao ac facluh oreklac kac uh, tuhsruhktuh oacyacpac kuh luhn Mwet Lahngo orekmakihnyuck ke orekma Lal fin facluh in oruh ma usrnguck, in ahkinsewowoye ac onwelah mwet mas, in ahkmoulyeack mwet misac, ac, ke Wen Kuloh Sefanna nuhtin Pahpah tuhmasr, in muhtweng kweok yohklac luhn Gethsemane ac Calvary—na El ahkfalye masap luhn mwe nuhnuhnkuh ke luhng kuhlwacng kuh sie Iwaclah ma pahtpaht ac kuhtanglah misac luhn mahno nuh ke Sifilpac Moulyak.

Pa ki ke wal luhn pristut ac kuh tuhkuh kac ma El sang nuh sel Peter, James, ac Jon ac Mwet Sap sahyac Lal in ahkinsewowoye mwet sahyac an in kapsreni inkuhsrao ma kapsreni fin facluh uh.

Kuh luhn pristut pa sie mwe sang muhtahl ac enenweyuck luhn God. Siena liki wal luhn pristut, suc pa mukwikwi ke inen God. Wal kuh akwuck se ingacn ituckyang ke fihliyac paho fin sifac. Kuh luhn pristut tuhkuh muhkwena ke mwet nwacsnwacs ac mukwikwi ke ma luhngse luhn God. Oacna Prestuhn Spencer W. Kimball el fahkwack ah, “Leum El use nuh sesr nohfohn, mwet suc sruok pristut, ip ke wal lal, tuhsruhktuh kuht kuh in orekmakihn muhkwena kuh luhn inkuhsrao wiwina suwohswohs lasr” (“Boys Need Heroes Close By,” Ensign, Mei 1976, 45)

Ke lwen wolacna ke Fohlohkihnyuckyak ac sulpac oreklac luhn Alu luhn Jisus Kraist ke facluh mihsenge, Jon Pacptais; Peter, James, ac Jon; Moses; Elias; ac Elijah tuhkuh nuh facluh ac fohlohkohnwack nuh sel Mwet Pahluh Joseph Smith ki ac wal luhn pristut ke orekma luhn God ke lwen sahflah inge.

Ke ki inge, wal inge, ac kuh inge ma Alu luhn Jisus Kraist orekweni mihsenge, ac Kraist pa sifac ma mwet pahluh moul Lal, Thomas S. Monson, ac Mwet Sap pahngonyuck suwohs in kahsrwel.

Ke plwacn Pahpah tuhmasr Inkuhsrao ma sang pristut nuh sin mukul, mukul uh oasr kunohkohn yohk in karihngihn pristut an, tuhsruhktuh elos tiac pa pristut uh. Oasr kunohkohn siena luhn mukul ac muhtwacn. Oacna muhtwacn se tiac kuh in pihtuctuckihn sie tuhlihk sahyacn sie mukul, na mukul se tiac kuh in orekmakihn kuh luhn pristut nohfohn in akiyac sie sucu ma pahtpaht sahyacn sie muhtwacn. Ke kahs sahyac uh, ke ohiyac luhn ma pahtpaht, kuh in pihtuctuc ac kuh luhn pristut kwewana akacsruhiyuck sin mukul ac muhtwacn kiyac. Ac in oacna mukul ac muhtwacn kiyac, mukul se ac muhtwacn se enenuh in srihke ukwe Pahpah tuhmasr Inkuhsrao. Ma yohk luhn mwet Kristin oacna luhngse, inse puhsisacl, ac mongfihsrwacsr enenuh in yohk srihpac nuh selos ke elos suk mwe insewowo luhn pristut ke moul lalos ac sucu lalos.

Yohk srihpac nuh sesr in kahlwem lah Pahpah Luhng El orwaclah inkacnek soko in tuhlihk nuh kwewa Nahtuhl in eis mwe insewowo kac ac in ahkfokokoyeyuck ke kuh luhn pristut. Infulwacn plwacn luhn God nuh sin tuhlihk nguhn Nahtuhl pa fahkwack ma orekma ac wolacna Lal pa in oruh moul luhn mwet in eis moul ma pahtpaht yurin God (liye Moses 1:39).

Ke fwackyuck an ma sang nuh sel Mwet Pahluh Joseph Smith ke section 81 ke Doctrine and Covenants, Leum el ahkuhtweyac lah kuh luhn pristut orekmakihnyuck in kahsruh mwet muhnahs, ahkkweye paho ma ahtlah, ac ahkfokokoye niyac muhnahs an (fuhs 5).

Ac in oruh ma inge kowos ac fah oruh ma wo emet nuh sin mwet tuhlan lowos, ac fah ahkfuhlwactye wolacna luhn El suc pa Leum lowos (liye D&C 81:4).

Ke kuht nuhnkuh ke petsac in kahsruh mwet muhnahs, ahkkweye paho ma ahtlah, ac ahkfokokoye niyac muhnahs an, nga esam ke sie tuhlihk matwac yac itkohsr ahkkahlwemye nuh sin pahpah mahtuh tuhmwacl sie tomato ma muhtwacwacack ke fihtac se oacna sie project luhn kuhlahs luo ke lutlut ah.

El ahkuhtweyac lah ke fihtac sefanna kuh in tuhkuh soko fukunsahk. Ac fin karihngihnyuck fukunsahk soko ah, tomato pucspucs kuh in tuhkuh oasr fihtac puhkantwen kac.

El fahk, “Na fin fihtac ingacn nohfohn ukwiyucki ac orwaclah tomato pucspucs pac, ac kowos ukiyac fihtac ingacn nohfohn pac, ke kuhtuh yac kowos ac eis miliacn sin tomato uh.”

“Nohfohn,” el fahk ke engan, “tuhkuh ke sie fihtac srihsrihk.”

Tuhsruhktuh el fahk, “nga apkuhran in uniyac fukunsahk soko suhnuhk ah. Nga fihliyac ke infuckihl lohsr se ac muhlkuhnlah in sang kihte kof. Ke nga esamwack fukunsahk soko ah, nga liye lah luhman muhnahs ac sahp misac. Nga tuhng ke nga nuhnkuh ke tomato miliacn ma ac tiac kapwack.”

El rahrah na in fahk nuh sin pahpah mahtuh tuhmwacl ke “usrnguck” ma sikyak ah.

El ahkuhtweyac, “Ninac el fahk lah sahp fukunsahk soko ah tiac misac. Sahp ma el enenuh pa kuhtuh kof ac kahlwem in molwelah fukunsahk soko ah.

“Ac pwacye sel. Nga sang kuhtuh kof, ac nga sang kahlwem nuh kac. Ac meac sikyak?” el siyuck. “El sulpac moulyak, ac ingena el kuh in oraclah tomato miliacn an!”

Fukunsahk tomato srihk suhnwacl, sesseslah ke kuh tuhsruhktuh ahkmuhnahsyeyuck ke srihpen tiac karihngihnyuck, na ahkfokokoye ac molwelah ke fihsrwacsr in sang kuhtuh kof ac kahlwem sin muhtwacn fuhsr an suc luhngse ac kena karihngihn.

Tamuhlwel ac tahmtahel, oacna tuhlihk nguhn nuhtin Pahpah luhngse tuhmasr Inkuhsrao, oasr kuh wacngihn sahflahiyacn inkuhsrao lasr. Tuhsruhktuh kuht fin tiac porongo, kuht kuh in eklac oacna soko fukunsahk muhnahs. Kuht kuh in som liki wosasuc pwacye luhn Kraist ac oruh in masrinsracl ac muhnahs ke nguhn, mweyen kuht som liki kahlwem wolacna ac kof in moul ke luhngse ma pahtpaht ac kuh luhn pristut luhn Mwet Lahngo.

Mwet suc sruok pristut ac tiac srihke in ahkfalye pristut an ke kuhlwacnsapuh sucu lasr ac mwet sahyac oacna mwet suc tiac eis mwe insewowo ke kuh luhn pristut ac fah muhnahslah ke nguhn, mweyen elos tiacna eis mwe enenweyuck ke nguhn ke mongo, kahlwem, ac kuh luhn God ke moul lalos—oacna tomato fukunsahk ma sesseslah ke kuh tuhsruhktuh tiac karihngihnyuck ac muhnahslah.

Kuh se oacna ma oraclah facluh, galaxy, ac universe an kuh ac enenuh in wi ip ke moul lasr uh in kahsruh, ahkfokokoye, ac ahkinsewowoye sucu lasr, kawuck lasr, ac mwet tuhlan lasr uh—ke kahs sahyac, in oruh ma luhngse luhn Mwet Lahngo suc El fin oasr ac fah ahkkweye kuht mihsenge.

Ac srihpac yohk ke kuh luhn pristut pa in ahkinsewowoye, ahkkweye, ac ahknwacsnwacsye kuht na kuht kuh in muhta yurin sucu lasr yurin pahpah tuhmasr ac ninac kiyacsr inkuhsrao, oracni ke sil luhn pristut, wi orekma wolacna luhn God ac Jisus Kraist ac ahkyohkye kahlwem ac wolacna Lalos.

Ke srihpac se inge, kuhtuh mahlwem tari ah nga eis pacl wo in wi ke oraclah luhn petsac-ma ke mwe luti nuh sin mwet kol facluh nohfohn pahngpahng Ahkfokokoye Sucu an ac Alu nuh ke Pristut.

DVD sasuc ac wo in lutlutkihn se inge luhngasyucklac nuh ke kahs 66. El luti ke ohiyac ma kuh luhn pristut kuh in ahkinsewowoye, molwelah, ac sulpac molwelah moul lasr, moul luhn sucu lasr, ac moul luhn mempucr nuh kwewa ke Alu uh.

Ahkkahlwemye nuh sesr nohfohn—mukul, muhtwacn; pahyuck, katinmas, kuh lolacp; kuh kuhtwena ohiyac—ohiyac ma kuht kuh in wi ipeis mwe insewowo luhn pristut. Oasr suhnuhn ip ke petsac ma lusen minit oalkosr nuh ke singucul luo ma ahkuhtweyac ki, wal, ac kuh luhn pristut ac ohiyacn ma ahkfokokoye kais sie mwet, sucu, ac Alu uh.

Sie ip sacohk pa petsaciyucklac ke lohm srihsrihk in payonir luhn ninac mahtuh kiyacn ninac mahtuh kiyuck ah Mary Fielding Smith. El pa katinmas kiyacl Hyrum, mukul mahtuh wiyacl Mwet Pahluh Joseph. Oacna sie ninac lolacp, ac ke luhlahlfongi kuh ke pristut, el pahngonyuck ac luhlahlfongi kuh se inge in tuhfahlah ac ahkinsewowoye tuhlihk nahtuhl ke luhngse ac kahlwem luhn wosasuc an. Mihsenge tuhlihk tausin nohfohn nahtuhl luhn mwet kol luhlahlfongi ac mempucr ke Alu uh fahk kuloh nuh sel ke luhlahlfongi, puhlaik, ac srihkasrak lal.

Mwe ahkpah sasuc nuh sin mwet luti inge oasr ingena ke internet luhn LDS.org ac mwet nuh kwewa kuh in liye. Kowos kuh in liye ke internet ke LDS.org, kuh kowos kuh in download nuh ke computer, smartphone, kuh tablet device nuhtuwos an.

Prestuhnsi Se Met siyuck tuh “prestuhnsi luhn stek ac pisaprik in sang sie kuh luo miting ke stek kuh ward in liye DVD sacn [nohfohn]. Miting luhn stek ac ward enenuh in sramsram ke ohiyac in oruh ac luti ma oasr kac an” (First Presidency letter, Fepweri 1, 2013).

Ma oasr kac fah mokle ac ahkkweye mempucr ke u luhn pristut, Rilif Sosaiti, Sacnri Skul, Muhtwacn Fuhsr, Mukul Fuhsr (yohk nuh sin mwet suc ahkolah in wi misin), ac ke toeni luhn U luhn Tuhlihk Srihsrihk, kuh ke toeni ke Sacnri ahklimekohsr. Mempucr ke council ac fah ahkkweye kais sie ac pahpah ac ninac in orekmakihn petsac se inge yurin sucu lalos an. Tamuhlwel ac tahmtahel, mwe luti luhn mwet kol se inge ma nuh sin mempucr nuh kwewa luhn Alu uh. Pahpah ac ninac an, liye, akacsruhi, ac sramsram ke ma kowos lotwelah ac puhla kac yurin tuhlihk nuhtuwos, ac lwelah elos in liye ac oruh oacna sie yuruwos ma sucu lowos an kuh in ahkfokokoyeyucklac ke pristut uh.

Jisus el fahk:

“Kuhtwena mwet suc maluh, lwelah elan tuhkuh nuh yuruk ac nihm” (Jon 7:37).

“Ac kuhtwena mwet suc nihm ke kof se ma nga fah sang nuh sel, ac fah tiacna sifilpac maluh; tuh kof se ma nga fah sang nuh sel ac fah eklac sie unohn in kof in el, suc ac fah sang nuh sel kof in moul, oacyacpac moul ma pahtpaht.” (Jon 4:14).

“Nga kahlwem luhn facluh: Kuhtwena mwet suc fahsr tukuk fah oasr kahlwem luhn moul yohrohl” (Jon 8:12).

Fin kuhtwena suwos puhla lah luhlahlfongi lowos ke plwacn luhn Pahpah Lucng muhnahs liki kowos nuhnkuh enenweyuck, na ahkfototoye nuh sin Mwet Lahngo. Lwelah kahlwem Lal ac kof in moul Lal in oruh nuh suwos ac sucu lowos ma oacna kof ac kahlwem oruh nuh ke fukunsahk tomato muhnahs soko ah in moulyak.

Ingena, nga muhtwacwacack ke ma wolacna ke ma oreklac sin God nuh ke kuh luhn pristut. Nga tu inge ac motko, oacna puhs suwos oruh, fin kuh luhn God in luti ac ahkinsewowoye kuht uh kuh in kahlwem sie lwen uh. El kuhlwacna, yohk, ac fokoko.

Joseph Smith el fahk, “Pristut pa sie ip yohk ma pahtpaht, ac oasr yurin God ke ma pahtpaht, ac fah nuh ke ma pahtpaht, ke wacngihn sahflah ke lwen kuh yac” (Teachings of Presidents of the Church: Joseph Smith [2007], 104).

God El sukohsohk in sang kuh Lal nuh sin mwet suc insese ac ahkfuhlwactye pristut Lal, ma kol nuh ke insewowo olweyucklac ke moul ma pahtpaht yurin Pahpah Lucng.

Nga fahkwack lah orekma luhn Jisus Kraist oreklac ke pristut uh. Pa kuh ma Pahpah tuhmasr Inkuhsrao ac Wen Kuloh Nahtuhl orwaclah facluh se inge ac muhtwacwacack plwacn wolacna in engan kacsr. Lwelah kuht in lahlmwetmwet in suk in ahkfokokoye moul lasr uh, moul luhn sucu lasr uh, ac Alu luhn Jisus Kraist luhn Mwet Luhlahlfongi ke Lwen-sahflah nuh ke kuh luhn pristut luhn God pa pruhe inse puhsisacl luhk ke inen Jisus Kraist, amen.