“En̄in ej Jerbal im Aiboojoj eo Aō”

Būreejtōn Packer, jej erem̧aanļo̧k n̄an 98 version eo me em̧m̧an. Ej juon katak eo em̧m̧an eaar letok n̄an kōj.

Jet wiik rem̧ootļo̧k, ilo iien m̧ōlo̧, juon jotāān, kōrā eo ippa, Barbara, im n̄a kar kalimjōkļo̧k mejatoto. Milien iju ko raar kanooj in meram im aiboojoj. Innām Iaar kepeļļo̧k Pearl of Great Price eo im bar riiti kōn bwilōn̄ kōn ta eo Irooj ar ba n̄an Moses ke E ar kōm̧anm̧an laļ ko rellōn̄ im E ar kōm̧anm̧an er kōn un eo An make, im jen Nejin M̧aan, Emake Wōt, E ar kōm̧anm̧an er (lale Moses 1:33).

Ilo tōre in ad Hubble telescope eo eaar kapen aorōk eo kōn ta eo Moses eaar loe. Ekkar n̄an Hubble scientist ro, Milky Way galaxy eo, eo me laļ in ad im aļ rej m̧ōttan ko reddik, ej antooneļo̧k āinwōt juon wōt iaan elōn̄ļo̧k jān 200 billion ejja galaxy ko wōt. N̄an n̄a epen keidi, epen n̄an meļeļe kake, kōm̧anm̧an eo an Anij ekanooj ļap im kilep.

Ro jeiū im jatū, kajoor eo me lan̄ ko im laļ raar im rej ejaak ej priesthood eo. Kōj ro me rej membōr in Kabun̄ in jeļā bwe jipan̄ eo an kajoor an priesthood eo ej Anij Kajoor Pōtata im Nejin, Jisōs Kraist. Ejjab wōt priesthood eo ej kajoor me lan̄ ko im laļ raar ejaake, bōtaab ej kajoor an Rilo̧mo̧o̧r eo eaar kōjerbale ilo kwaļo̧k eo An ilo mour in n̄an kōm̧m̧ani kabwilōn̄lōn̄ ko, n̄an kōjeram̧m̧an im kemour rinan̄inmej, n̄an kōro̧o̧ltok rimej n̄an mour, im, āinwōt Nejin Emake Wōt Nejin Jemen, n̄an niknik ilo metak eo ban bōke an Gethsemane im Calvary—kōn menin kakūrm̧ool kien ko an jim̧we kōn jouj im letok juon Pinmuur eo ejjeļo̧k jem̧ļo̧kin im anjo ioon mej ilo kanniōk kōn Jerkakpeje.

Ej kii ko ilo mālim eo an priesthood in im tōprak eo an kajoor eo me Eaar leļo̧k n̄an Piter, Jemes, im Jon im Rijilōk ro An jet n̄an kōjeram̧m̧an ro jet im n̄an liāpe i ilan̄ im liāpe ioon laļ.

Kajoor eo an priesthood eo ej kwojarjar im ej menin letok aorōk jān Anij. Eoktak jān mālim eo an priesthood, eo ej mālim n̄an jerbal ilo etan Anij. Mālim jab in ak ekapit eo ej letok kōn likūt pā ko ioon. Kajoor eo an priesthood eo ej itok wōt n̄e ro ilo priesthood eo rej kōjerbal e ilo erreeo im m̧akūtkūt ekkar n̄an ankilaan Anij. Āinwōt an Būreejtōn Spencer W. Kimball kar kwaļo̧k, “Irooj ar letok n̄an kōj kajjojo, āinwōt rikabwijer ro an priesthood, m̧ōttan mālim eo an, ak jemaron̄ kōjerbal wōt kajoor ko an lan̄ ioon wānōk eo an juon make” (“Boys Need Heros Close By,” Ensign, Māe 1976, 45).

Ilo raan ko reaiboojoj an Jepļaaktok eo im bar ejaak eo an Kabun̄ eo an Jisōs Kraist ilo laļ in rainin, Jon Ripeptaij, Piter, Jemes, im Jon; Moses, Elias; im Elijah raar itok n̄an laļ in im kar kōjepļaaktok kōn Rikanaan Joseph Smith aolep kii ko im mālim eo an priesthood n̄an jerbal eo an Anij ilo raan kein āliktata.

Im jen kii kein, mālim in, im kajoor in me Kabun̄ eo an Jisōs Kraist ej ejaak rainin, ippān Kraist ej tōl kōn juon rikanaan emour, Thomas S. Monson, im jipan̄ jān Rijilōk ro ejejjet kūr er im kapit er.

Ilo karōk eo an Jemedwōj Ilan̄ me ej leļo̧k n̄an em̧m̧aan ro kajoor an priesthood eo, em̧m̧aan ro ro ewōr eddo eo ejej uwaan n̄an tōl priesthood eo, bōtaab rejjab priesthood eo. Em̧m̧aan ro im kōrā ro ewōr oktak ak aorōk in jerbal ko rej juon wōt. Ejja āinwōt an juon kōrā ban wōr nejin ajri ilo an ejjeļo̧k juon em̧m̧aan, kōn menin juon em̧m̧aan ejjab maron̄ lukkuun kōjerbal kajoor eo an priesthood eo n̄an ejaake juon baam̧le indeeo ilo an ejjeļo̧k juon kōrā. Ilo bar naan ko jet, ilo jekjek ko an indeeo, jim̧or kajoor in tum̧ wōņ in orļo̧k eo im kajoor an priesthood eo rej ajije jān ļeo im lio pālele. Im āinwōt ļeo im lio pālele, juon em̧m̧aan im juon kōrā rej aikuj kajieon̄ ļoor Jemedwōj Ilan̄. Wānōk eo an iakwe an Rikūrijin, ettā, im kijenmej rej aikuj jibadbad eo aer ilo aer pukōt kōjeram̧m̧an ko an priesthood eo ilo mour ko aer im n̄an baam̧le eo aer.

Eaorōk n̄an ad meļeļe bwe Jemedwōj Ilan̄ eaar letok juon iaļ n̄an aolep ļaddik im leddik ro Nejin n̄an bōk kōjeram̧m̧an ko an im kajoorļo̧k jen kajoor eo an priesthood. Io̧lapen karōk eo an Anij n̄an ajri in jetōb ro Nejin ej kean̄ eo An make me jerbal im aiboojoj eo An ej n̄an bōktok mour jab wabanban im mour indeeo an armej (Moses 1:39).

Ilo juon revelesōn kar leļo̧k n̄an Rikanaan Joseph Smith ilo jekjen 81 in Doctrine and Covenants, Irooj ar kōmeļeļeik bwe kajoor eo an priesthood ej jerbal n̄an jipan̄ eo em̧ōjņo̧, im kotak pā ko retoto, im kōkajoorļo̧k nee ko rem̧ōjņo̧ (eoon 5).

Im ilo kōm̧m̧ane men kein kom̧ naaj kōm̧m̧an eļapļo̧k em̧m̧an n̄an armej ro ami, im kom̧ naaj kalōk aiboojoj eo An eo ej ami Irooj (lale D&C 81:4).

Ilo ad kōļmenļo̧kjeņ kōn eo em̧ōjņo̧, kotak pā ko retoto, im kōkajoorļo̧k nee ko, ij kememej juon jiron̄ eaiboojoj jiljilimjuon-iiō dettan ar kwaļo̧k n̄an jim̧aan juon wūt in tōm̧ato edik eaar jino jān ine āinwōt juon m̧ōttan būrojāāk eo an kūlaaj ruo.

Liin eaar kōmeļeļeik bwe jān juon ine edik eitok juon wōjke. Im eļan̄n̄e wōjke eo kar kōjparoke, enaaj kalle elōn̄ tōm̧ato ko me enaaj wōr kajjojo ine ko ie.

Liin eaar ba, “Im eļan̄n̄e aolep ine ko raar katōki im kalle elōn̄ tōm̧ato ko, im kwaar katōk aolep ien ko, ilo jet iien ko enaaj kar wōr am̧ milien tōm̧ato ko.”

“Aolep,” liin eaar bwilōn̄ ilo an kar ba, “jān juon ine edik.”

Innām eaar ba, “Ibaj wōt m̧an wūt eo katka. Iaar doore ilo juon ruum̧ eo emarok im meļo̧kļo̧k in wūttidikdiki. Ke Iaar kememej wūt eo, eaar m̧ōjņo̧ im adimejmej reitok in. Iaar jan̄ kōnke Iaar ļōmņak aolep milien tōm̧ato kein rejamin kar eddōk.”

Innām liin eaar ito limoin n̄an jiron̄ļo̧k jim̧aan kōn “kabwilōn̄lōn̄” eo me eaar waļo̧k.

Liin eaar ba, “Jinō ar ba bōlen wūt in ekar jab mej. Bōlen men eo de eo eaikuji wūtidikdik im meram n̄an kōro̧o̧l tok mour eo an.

“Im liin eaar m̧ool. Iaar wūtidikdiki wūt eo im likūti ilo wūntō eo n̄an bōk kajoor in al. Im, kwojeļā ta?” liin ar ba. “Eaar ro̧o̧ltok mour eo an, im kiiō ej kale milien tōm̧ato ko!”

Wōjke tōm̧ato eo nejin edik, ekanooj obrak kōn men ko raorōk ak āindein ar m̧ōjņo̧ im adimejmej kōn jidiļo̧k in jerbal, kar kōkajoorļo̧k im kemouri kōn ejja jipan̄ eo epidodo an wūtidikdik im kajoor in al jen juon leddik eo edik ej iakwe im pā ko rekōjparok.

Ro jeiū im jatū, āinwōt ajri in jetōb ro nejin Jemedwōj Ilan̄ eo em̧m̧an, ewōr ippād aorōk eo ekwojarjar, ejjeļo̧k jon̄an. Bōtaab eļan̄n̄e jej jab mejmejkaruo, jemaron̄ erom āinwōt wōjke tōm̧ato eo eadimejmej. Jemaron̄ peļļo̧k jān katak eo em̧ool im ko̧jpeļ eo an Jisōs Kraist im erom jabwe najdiki im adimejmej, kōm̧akūt kōj make jān meram eo ekwojarjar im dān in mour ko an iakwe eo indeeo an Rilo̧mo̧o̧r eo im kajoor in priesthood eo.

Ro rej kabwijer priesthood eo im likjab n̄an kajieon̄ kautieje kōn jerbal n̄an baam̧le ko ad im ro jet naaj āinwōt ro me rejjabbōk kōjeram̧m̧an ko būki ilo kajoor eo an priesthood eo im m̧ool naaj erom m̧ōjņo̧ ilo jetōb, kōjerataik kōj make kōn ōn ko remenin aorōk ilo jetōb, meram, im kajoor eo an Anij ilo mour ko aer—āinļo̧k wōt wōjke tōm̧ato eo kanooj obrak kōn aorōk bōtaab kowaane im kōm̧ōjņo̧ikļo̧k.

Ejja āinwōt kajoor an priesthood eo me eaar ejake laļ in, galaxy ko, im aolep laļ maron̄ im aikuj in m̧ōttan mour ko ad n̄an jipan̄, kōkajoorļo̧k, im kōjeram̧m̧an baam̧le ko ad, ro m̧ōttad, im ro rūturiid—ilo naan ko jet, n̄an kōm̧m̧ane men ko me Rilo̧m̧o̧o̧r eo enaaj kar kōm̧m̧ani eļan̄n̄e En kar jerbal in kwaļo̧k ibwilijiid rainin.

Unleplep eo an kajoor in priesthood in ej n̄an kōjeram̧m̧an, kokwojarjar, im karreoik kōj bwe jen maron̄ mour ippān doon ippān baam̧le ko ad ilo im̧aan mejen ro Jined im Jemed, liāp kōn liāp ko an priesthood, bōk kūņad ilo jerbal in ekabwilōn̄lōn̄ an Anij im Jisōs Kraist indeeo kōn meram im aibooj eo Aer ejjeļok jem̧ļo̧kin.

N̄an kadedeļo̧k men in, jet allōn̄ rem̧ootļo̧k eaar wōr aō iien em̧m̧an n̄an bōk kūņaō n̄an kōm̧m̧ane juon video-based kaminene eo an ritōl aolepen peļaakin laļ in ņa etan Strengthening the Family and the Church through the Priesthood.

DVD in kein kajuon im ejipan̄ ej ukook n̄an 66 kajin ko. Ej katakin ekōjkan an kajoor eo an priesthood eo maron̄ kōjeram̧m̧an, kōketak, im bar kōkāāl mour ko ad, mour ko an baam̧le ko ad, im an aolep ro uwaan Kabun̄ in.

Ej kwaļo̧k n̄an kōj aolep—em̧m̧aan ro, kōrā ro, ajri ro; m̧are, mej ļeo pāleen, ak ejjeļo̧k rejtan; jekdo̧o̧ņ ta jekjek ko ad—ekōjkan ad maron̄ ribōk m̧ōttan kōjeram̧m̧an ko an priesthood eo. Ewōr 8-n̄an-12-minit ko an m̧ōttan ko me rej kōmeļeļeik kii ko, mālim, im kajoor eo an priesthood eo im ekōjkan an kōkajoorļo̧k kajjojo, baam̧le ko, im Kabun̄ in.

Juon jikin eo kar pijaiki ejeno̧ļo̧k ilo m̧weo edik im̧ōn ļeļļap eo jinen jibū, Mary Fielding Smith. Eaar kōrā eo ippān Hyrum, ļeo jein Rikanaan Joseph. Āinwōt juon jinen eo ejjeļo̧k rejtan, kōn tōmak eo an epen ilo priesthood eo, liin ar kūr ioon im pedped ioon kajoor eo n̄an kōkajiririik ajri ro nejin ilo iakwe im meram eo an ko̧jpeļ in. Rainin taujin ro ineen ritōl ro retōmak im membōr ro an Kabun̄ in rej kam̧oolol e kōn tōmak, peran, im waanjon̄ak eo an.

Kein kaminene in ekāāl an ritōl ej kiiō pād ilo internet ilo LDS.org n̄an aolep n̄an lale im katak. Komaron̄ alooje jān LDS.org, ak komaron̄ download i n̄an kamputōr eo am̧, smartphone, ak table device ko.

Būreejōnji eo Kein Kajuon ar kajjitōk ippān “stake būreejtōnji ro im bisorik ro n̄an kōjeno̧lo̧k juon ak elōn̄ļo̧k kweilo̧k ko an stake im ward ko̧o̧njeļ n̄an alooje aolep DVD eo. Ko̧o̧njeļ ko an stake im ward reaikuj kōnono ekōjkan kōjerbal katak ko me rej waļo̧k” (Leta eo an Būreejtōnji eo Kein Kajuon, Pāp 1, 2013).

Kobban enaaj im̧we im lujur membōr ro ilo doulul ko an priesthood, Doulul eo an Kōrā ro, Jabōt Jikuul, Doulul eo an Jiron̄ ro, Doulul eo an Likao ro (eļaptata ro rej kōppopo n̄an mijen ko). im kweilo̧k ko an Būraimere, ak ilo Jabōt eo kein kōlaļem. Ko̧o̧njeļ membōr ro remaron̄ in rōjan̄ ro jet im ro jinen im jemen n̄an kōjerbal kaminene in ilo baam̧le ko aer. Ro jeiū im jatū, kaminene eo an ritōl ej n̄an aolep membōr ro an Kabun̄ in. Ro jinen im jemen, etale, kwaļo̧k, im kōnono ta eo kwar ekkatak im en̄jak ippān ajri ro nejūm̧, im kōtļo̧k bwe ren alooje im kōm̧m̧an āinwōt am kōm̧m̧an bwe baam̧le ko ami ren maron̄ kajoorļo̧k kōn priesthood eo.

Jisōs eaar ba:

“Eļan̄n̄e jabdewōt armej ej maro, en itok n̄an Ippa, im idaak” (Jon 7:37).

“A jabdewōt eo ej idaak dān eo I naaj leļo̧k n̄an e, a dān eo eo I naaj leļo̧k n̄an e enaaj aebōj eo ilo e im naaj to̧o̧rļo̧k n̄an mour indeeo” (Jon 4:14).

“N̄a meram in laļ; … eo ej ļoor Eō … a enaaj an meram in mour” (Jon 8:12).

Eļan̄n̄e jabdewōt iaami ej en̄jake tōmak eo ami ak naan in kam̧ool eo ami kōn karōk eo an Jemedwōj Ilan̄ ej dikļo̧k jān ami jeļā ej aikuj, innām en ļapļo̧k am̧i oktakļo̧k n̄an Rilo̧mo̧o̧r eo. Kōm̧m̧an bwe meram eo An im dān in mour eo An en kōm̧m̧an n̄an kom̧ im baam̧le eo ami ta eo dān eo edik im meram eo eaar kōro̧o̧ltok n̄an wōjke tōm̧ato eo eaar m̧ōjņo̧ļo̧k.

Kiiō, Iaar jino kōn bwilōn̄ im ļo̧kjeņ an eo ilo kōm̧anm̧an ko an Anij kōn kajoor eo an priesthood. Ij āinwōt kom̧ ar barāinwōt kōm̧m̧ane, bwilōn̄ eļan̄n̄e kajoor eo an Anij ej katakin im kōjeram̧m̧an kōj eļapļo̧k ilo keidi. Ej lukkuun in ļap, utiej, im aiboojoj.

Joseph Smith ar ba, “Priesthood eo ej juon pedped indeeo, im ar pād ippān Anij jān indeeo im indeeo, im naaj n̄an indeeo im indeeo, ejjeļo̧k jinoin raan ko ak jem̧ļo̧kin” (Teachings of Presidents of the Church: Joseph Smith [2007], 104).

Anij ar letok kajoor in An n̄an ro rej bōke im kōjparok priesthood eo An, eo ej tōl ļo̧k n̄an kōjeram̧m̧an ko kar kallim̧ur an mour jab wabanban im mour indeeo.

Ij kam̧ool bwe jerbal eo an Jisōs Kraist eaar ejaak kōn priesthood eo. Ej kajoor eo me Jemedwōj Ilan̄ im Nejin Jitōn bōro kar kōm̧anm̧an laļ in im jino karōk in m̧ōņōņō eo eļap n̄an em̧m̧an eo ad. Kōm̧m̧an bwe jen jeļā im pukot n̄an kōkajoor mour ko ad make, mour ko ilo baam̧le ko ad, im Kabun̄ eo an Jisōs Kraist im Armej ro Rekwojarjar ilo Raan-ko Āliktata kōn kajoor eo an priesthood eo an Anij ej jar eo aō ilo etan Jisōs Kraist, amen.