Me Yacova ni da Qai Sota Tale

Kemuni na taciqu kei na ganequ, sa dua na koniferedi lagilagi oqo. Au kila ni o ni na duavata kei au ni ra sa veivakauqeti dina na itukutuku. Sa tarai na yaloda, ka vaqaqacotaki na noda ivakadinadina ni cakacaka vakalou oqo ena noda vakila na Yalo ni Turaga. Me balavu na noda nanuma tu na veika eda sa rogoca ena rua na siga sa oti oqo. Au uqeti kemuni mo ni vulica vakatitobu ni ra sa tabaki yani ka lako mai ena mekesini na Ensign kei na Liaona.

Eda vakavinavinaka vei ira yadua era sa vosa vei keda, ka vakakina vei ira era cabora na masu. Me kena ikuri, sa veilaveti dina ka veivakauqeti na sere kei na ivakatagi. Eda lomana na noda Matasere lomani ni Tabernacle ka vakavinavinaka vei ira kece tale eso era a vakarautaka talega na sere kei na ivakatagi.

Eda duavata ena noda vakaraitaka na noda vakavinavinaka vei ira ena mataveiliutaki kei na matabose raraba ni Goneyalewa ka ra sa mai vagalalataki e nanoa. Sa vakasakiti na nodra veiqaravi ka taucoko na nodra yalodina.

Eda sa veitokoni, ena laveliga, vei ira na turaga kei na marama era sa kacivi vou ki na veitutu ena koniferedi oqo. Eda vinakati ira kece me ra kila ni da sa vakanamata tu ena noda veiqaravi vata ena nona inaki na iVakavuvuli.

Kemuni na taciqu kei na ganequ, na noda, o keda e dua na Lotu e vuravura raraba. Era kunei ena veiyasai vuravura kece na noda lewenilotu. Au vakasalataki kemuni mo ni lewenivanua vinaka ni veimatanitu o ni tiko kina ka veiwekani vinaka ena nomuni veitikotiko, ni tarai ira yani ena veimatavakabauta tale eso vakakina vei ira na noda. Meda dau veivosoti, ia meda dau yalovinaka ka dauloloma vei ira era sega ni duavata kei na noda vakabauta kei na noda ivakatagedegede. A kauta mai ki na vuravura oqo e dua na itukutuku ni loloma kei na vakanuinui vinaka vei ira kece na turaga kei na marama, na iVakabula. Me da muria tikoga na Nona ivakaraitaki.

Au masuta meda dau nanuma na nodra gagadre o ira era tu wavoliti keda. Era tu eso, vakauasivi vei ira na itabagone, era vakayagataka sara tu vakaca na waigaga, na ivalavala dukadukali, na iyaloyalo vakasisila, kei na so tale. Era tu o ira era galili, oka kina o ira na yada kei na dawai, ka ra guta tu na nodra veitokani kei na veikauwaitaki eso tale. Meda dau tu vakarau meda dodoka yani na liga ni veivuke kei na yalo ni loloma vei ira.

Eda bula donumaka ena itukutuku ni vuravura ni levu tu na veimataqali bolebole duidui ia na veimadigi cecere kei na vuna meda reki kina. Era tu talega vakaidina, na veigauna o ya eda dau sotava kina na rarawa, mosi ni yalo, kei na veileqa bibi sara mada ga ena noda bula. Ia kevaka eda na vakanuinui ga vua na Turaga, ena vukei keda o Koya ena gauna ni dredre, se cava ga. E solia na Daunisame na kena ivakadei: “Sa ia na tagi ena bogi, Ia sa yaco ena mataka na marau.”¹

Kemuni na taciqu kei na ganequ, au vinakata mo ni kila na levu ni noqu vakavinavinaka ena vuku ni kosipeli i Jisu Karisito, sa vakalesui mai ena gauna e muri oqo mai vua na Parofita o Josefa Simici. Sa ikoya na idola ki na noda bula marau. Meda yalomalumalumu ka dau masu, ka vakabauta ni na rawa ni tuberi keda ka vakalougatataki keda ena noda bula na Tamada Vakalomalagi.

Au wasea na noqu ivakadinadina bula kei na noqu ivakadinadina cavuti vei kemuni, ni bula tiko na Kalou, ni dau rogoca o Koya na nodra masu na yalomalumalumu. Sa vosa vei keda yadudua na Luvena, na noda iVakabula ka Dauveivueti: “Raica kau sa tu ena mata ni katuba ka tukituki: kevaka sa rogoca na domoqu e dua na tamata, ka dolava na katuba, au na curu vua.”² Meda vakabauta na veimalanivosa oqo ka vakayagataka na kena yalayala.

Ni mai tini na koniferedi oqo, au sa kaciva kina na veivakalougatataki mai lagi vei kemuni vakayadudua. Me vakasinaiti na nomuni veivale ena vakacegu, ena yalovata, na veinanumi, kei na loloma. Me ra vakasinaiti ena Yalo ni Turaga. Mo ni susuga ka vakamareqeta na nomuni ivakadinadina ni kosipeli, me ra na taqomaki kemuni mai na veivakararawataki nei Setani.

Me yacova ni da qai sota tale ni oti e ono na vula, kemuni na taciqu kei na ganequ, au masulaka me vakalougatataki kemuni ka maroroi kemuni tiko na Turaga. Me tiko vata kei kemuni ena gauna oqo kei na veigauna kecega na Nona vakacegu sa yalataki tu. Vinaka vakalevu na nomuni masu ena vukuqu kei na vukudra na Vakaitutu Raraba kece sara. Keimami sa vakavinavinaka vakalevu sara ena vukumuni. Ena yacana na noda iVakabula ka Dauveivueti, o koya eda qarava, na Turaga, o Jisu Karisito, emeni.