Txog Thaum Rov Sib Pom Dua

Kuv cov kwv tij thiab cov muam, peb tau muaj ib lub rooj sab laj zoo kawg nkaus. Kuv paub tias nej xav tib yam li kuv xav hais tias tej zaj lus no yeej zoo kawg nkaus. Tau tshoov peb lub siab, thiab peb zaj lus tim khawv txog txoj hauj lwm no tau dag tau zog thaum uas peb tau hnov tus Tswv tus Ntsuj Plig. Thov kom peb yuav nco txog tej yam uas peb tau hnov ob hnub tas los no. Kuv yaum kom nej yuav kawm tej zaj lus no ntxiv thaum twg muab luam tawm hau tej phau Ensign thiab Liahona tom ntej no.

Peb xav ua txhua tus neeg uas tau koom lub rooj sab laj no tsaug, kuj xav ua cov uas tau thov Vajtswv rau peb tsaug thiab. Tsis tas li ntawd xwb, tej nkauj tau txhawb nqa thiab tshoov peb lub siab. Peb hlub peb Tsev Kheej Pawg Nkauj thiab xav ua txhua uas hu nkauj rau peb mloog tsaug.

Peb sib koom siab qhia peb txoj kev ris txiaj rau cov hauv pawg thawj tswj hwm thiab cov thawj coj ntawm lub Koom Haum Ntxhais Hluas uas raug tso tawm ntawm lawv txoj hauj lwm nag hmo. Lawv tau ua hauj lwm zoo kawg nkaus thiab yeej tau rau siab ntso ua lawv tes tej tes num.

Peb tau txhawb nqa, thaum tsa tes pom zoo txais yuav, cov kwv tij thiab cov muam uas raug hu los ua tej hauj lwm tshiab hauv lub rooj sab laj no. Peb xav kom lawv yuav paub tias peb zoo siab vim peb yuav nrog lawv sib koom tes ua hauj lwm rau peb tus Xib Hwb.

Cov kwv tij cov muam es, peb yog ib lub Koom Txoos uas nyob thoob plaws ntiaj teb no. Yus nrhiav tau peb ib co mej zeej thoob qab ntuj khwb no. Kuv yaum kom nej yuav ua cov pej xeem zoo hauv tej teb chaws uas nej nyob thiab ua neeg zej zog siab zoo hauv nej lub nroog, ncav tes mus pab cov neeg hauv lwm txoj kev teev ntuj thiab cov hauv peb lub Koom Txoos tib si. Thov kom peb yuav ua siab ntev, thiab ua siab zoo thiab hlub, cov uas tsis koom peb txoj kev ntseeg thiab peb tej kev cai. Tus Cawm Seej tau coj txoj kev hlub thiab kev ua siab zoo rau txhua tus txiv neej thiab poj niam los rau hauv ntiaj teb no. Thov kom peb yuav ua raws li Nws tus yam ntxwv tsis tu tsis tseg.

Kuv thov kom peb yuav nco qab xav txog cov neeg uas nyob ntawm peb ib ncig. Muaj ib txhia, ntawm cov tub thiab ntxhais hluas, uas tab tom siv cov tshuaj phem, ua phem ua qias, saib duab liab qab, thiab lwm yam zoo li ntawd. Muaj cov uas kho siab, kuj hais txog cov poj ntsuam thiab yawg ntsuag, cov uas xav tau phooj ywg thiab lwm cov neeg uas nco txog lawv. Thov kom peb yuav npaj siab ncav tes mus pab lawv thiab hlub lawv.

Peb nyob hauv ib lub caij hauv ntiaj teb no zaj liv xwm uas muaj teeb meem ntau tiam sis kuj muaj cib fim ntau thiab tej yam uas ua rau peb muaj kev zoo siab. Tiam sis, peb yeej muaj tej lub sij hawm thaum peb poob siab, nyuaj siab, thiab raug kev txom nyem hauv peb lub neej. Tab sis mas, yog peb tso siab rau tus Tswv, Nws yuav pab peb nyiaj mus dhau peb tej kev cov nyom, txawm peb raug dab tsi los xij. Tus Kws Sau Nkauj nplij peb lub siab thaum nws hais tias: “Thaum tsaus ntuj muaj kev quaj ntsuag, tiam sis thaum kaj ntug muaj kev zoo siab.”¹

Kuv cov kwv tij thiab cov muam, kuv xav kom nej yuav paub tias kuv muaj kev ris txiaj ntau npaum li cas rau Yexus Khetos txoj moo zoo, uas raug muab txum tim rov qab los dhau ntawm tus Yaj Saub Yauxej Xamiv. Nws yog qhov tseem ceeb tshaj plaws rau peb txoj kev zoo siab. Thov kom peb yuav txo hwj chim thiab thov Vajtswv, muaj kev ntseeg hais tias peb Leej Txiv Saum Ntuj Ceeb Tsheej coj peb kev thiab thiab foom koob hmoov rau peb lub neej.

Kuv hais lus tim khawv thiab lus pov thawj tias Vajtswv muaj sia nyob, tias Nws hnov cov neeg uas ua siab mos siab muag cov lus thov. Nws Leej Tub, peb tus Cawm Seej thiab tus Txhiv Dim, hais lus rau peb txhua tus tias: “Nej sim mloog saib, kuv sawv sab qhov rooj nraud thiab khob; yog leej twg hnov kuv khob thiab qhib qhov rooj rau kuv, kuv yuav los hauv tus ntawd lub tsev.”² Thov kom peb yuav cia siab rau cov lus no thiab ua raws li lo lus cog tseg no.

Nim no thaum peb xaus lub rooj sab laj no, kuv thov kom nej txhua tus yuav tau lub ntuj ceeb tsheej tej koob hmoov. Thov kom nej vaj nej tsev yuav muaj kev thaj yeeb nyab xeeb, kev sib haum, kev ua siab zoo thiab kev sib hlub puv npo. Thov kom tus Tswv tus Ntsuj Plig yuav nyob puv npo nej vaj tsev. Thov kom nej yuav tu thiab saib xyuas nej zaj lus tim khawv txog txoj moo zoo, xwv kom tej zaj lus tim khawv ntawd yuav tiv thaiv nej ntawm Dab Ntxwg Nyoog tej kev tsim txom.

Mus txog thaum peb rov los sib pom dua rau lub hlis tom ntej no, kuv thov kom tus Tswv yuav foom koob hmoov thiab saib xyuas nej, kuv cov kwv tij thiab cov muam. Thov kom Nws txoj kev thaj yeeb yuav nrog nraim nej tam sim no thiab tas mus li. Ua nej tsaug rau nej tej kev thov Vajtswv pab kuv thiab pab tag nrho cov Tuam Thawj Coj. Peb yeej ris nej txiaj heev. Los ntawm peb tus Cawm Seej thiab tus Txhiv Dim, tus uas peb ua hauj lwm pab, uas yog Yexus Khetos, tus Tswv lub npe, amees.