Ne Ke Kuht Sifil Ohsun

Tamuhlwel ac tahmtahel wiyuck, fuhkah wolacnaiyacn toeni se lasr inge. Nga etuh lah kowos insese nuh sihk lah pweng uh mokleyuck na pwacye. Insiyacsr puhsralyucklac, ac fahkwack luhlahlfongi lasr ke orekma wolacna se inge fokokoi ke kuht puhlakihn Nguhn luhn Leum. Nga finsrak tuh kuht in esam ma kuht lohng ke lwen luo tari ah me. Nga kwacfe kowos in sifil lutlutkihn pweng uh ke ac printiyucki ke ma ac tuhkuh ke mackuhsin luhn Ensign ac Liahona uh.

Nga ahkkahlwemye tarilacna lasr nuh sin kais sie suc sramsram nuh sesr, oacpacna elos suc oruh pruhe uh. In weacng, on uh arulacna ahkkweye ac mokleyuck. Kuht luhngse Tabernacle Choir wolacna lasr uh ac kuloh nuh sin mwet nuh kwewa sahyac suc oruh pac on uh.

Kuht tuhkweni fahsrweni in ahkkahlwemye tarilacna lasr nuh sin mwet ke prestuhnsi ac u luhlahp luhn Muhtwacn Fuhsr suc fihlfihllac eke ah. Kuhlwacnsap lalos uh wo na pwacye ac kihsackuhnlah lalos uh sahflah.

Kuht ahkkweye, ke sralwack paho, tamuhlwel ac tahmtahel suc pahngonyuck nuh ke acn sasuc uh ke puhlan pacl in toeni se inge. Kuht luhngse elos nohfohn in etuh lah kuht tuhpan in weluhlos kuhlwacnsap ke ohiyac luhn Mwet Kol sac.

Kuht sie Alu fin facluh nohfohn, tamuhlwel ac tahmtahel. Kuht kuh in sukokyak fin facluh nohfohn. Nga kwacfe kowos in oruh mwet wowo ke muhtuhnfacl kowos muhta we an ac mwet tuhlan wowo ke muta lowos an, kahsruh mwet ke alu sahyac an oacna mwet lasr sifacna. Lwelah kuht in mongfihsrwacsr ke, oacyacpac in kuhlwacng ac luhngse nuh selos, suc tiacna akacsruhi ke luhlahlfongi ac ohiyac lasr uh. Mwet Lahngo El use nuh facluh se inge sie pweng ke luhngse ac ma wowo nuh sin mukul ac muhtwacn nuh kwewa. Lwelah kuht in ukwe srihkasrak Lal lwen nuh kwewa.

Nga pruhe tuh kuht in akihlen ke enenuh luhn mwet rauni kuhtlac uh. Oasr kuhtuh, yohkna inmahsrlon mwet fuhsr, suc orekmakihn ono fukoko, kosro, petsac koluk, ac kuhtuh pac. Oasr pac mwet suc muhkahimtacl, weacng katinmas ac tuhmuhn mas uh, suc kena ke mwet ac ma kacn mwet sahyac uh. Lwelah kuht in ahkolah in sang nuh selos sie paho in kahsruh ac sie inse luhngse.

Kuht muhta ke sie pacl ke ma mahtuh luhn facluh ke ma upac puhkantwen tuhsruhk oacyacpac pacl wowo ac srihpac yohk in engankihn. Oasr pac, pwacyena, kuhtuh pacl ke kuht puhlakihn koluk, ahsor, ac finne ma upac ke moul lasr uh. Ke ma inge, kuht fin fihliyac luhlahlfongi lasr in Leum, El fah kahsrwe kuht ke pacl upac, oacna sie kain in ma. Ke Psalm ituckuh ma pwacye inge: “Sahp ac oasr tuhng ke fong, tuhsruhk engan fah sikyak ke lotutacng.”¹

Tamuhlwel ac tahmtahel wiyuck, nga ke kowos in etuh luhpan tarilacna luhk ke wosasuc luhn Jisus Kraist, fohlohkihnyuckyak ke lwen sahflah inge sel Mwet Pahluh Joseph Smith uh. Pa ki nuh ke engan lasr uh. Lwelah kuht in mongfihsrwacsr ac sesseslah ke pruhe, in oasr luhlahlfongi lah Pahpah tuhmasr Inkuhsrao El kuh in kol ac ahkinsewowoye kuht ke moul lasr uh.

Nga fahkwack mwe lohoh luhk sifacna ac fahkwack luhlahlfongi nuh suwos lah God El moul, lah El lohng pruhe ke inse puhsisacl. Wen Nahtuhl, Mwet Lahngo ac Molwelah lasr, El sramsram nuh sesr kais sie: “Lohng, nga tu ke motonoac uh, ac towolack, kuhtwena mwet fin lohng puhsrwek, ac ikacslah motonoac uh, nga fah utyak ac mongo yohrohl.”² Lwelah kuht in luhlahlfongi kahs inge ac eis pacl wowo ke olwelah inge.

Ke toeni se inge ingena sahflah uh, nga orwaclah mwe insewowo inkuhsrao uh nuh fin kais sie suwos. Lwelah lohm suwos in sesseslah ke mihslac, engan, kuhlwacng, ac luhngse. Lwelah elos in sesseslah ke Nguhn luhn Leum. Lwelah kowos in tuhfahlah ac ahkkweye fahkwack luhlahlfongi lowos ke wosasuc uh, tuh elos fah oruh sie mwe karihngihnyuck nuh suwos lain srihngihlyuck lal Setuhn uh.

Ne ke kuht sifil ohsun ke mahlwem ohnkohsr, nga pruhe tuh Leum El fah ahkinsewowoye ac liye kowosyang, tamuhlwel ac tahmtahel wiyuck. Lwelah mihslac uliyuckme Lal in wi kowos ingena ac lwen nuh kwewa. Kuloh ke pruhe lowos keik ac kacn General Authorities nuh kwewa uh. Kuht tarilacna na pwacye suwos. Ke inen Mwet Lahngo ac Mwet Molwelah lasr, suc kuht kuhlwacnsapuh, finne Jisus Kraist, Leum an, amen.