ຈົນກວ່າເຮົາຈະພົບກັນອີກ
ໂດຍ ປະທານທອມມັສ ແອັສ ມອນສັນ
ຂ້າພະເຈົ້າອະທິຖານຂໍໃຫ້ພຣະຜູ້ເປັນເຈົ້າຈົ່ງອວຍພອນທ່ານ ແລະ ຮັກສາທ່ານ, ອ້າຍເອື້ອຍນ້ອງຂອງຂ້າພະເຈົ້າ. ຂໍໃຫ້ຄຳສັນຍາທີ່ໃຫ້ຄວາມສະຫງົບຈົ່ງມາສູ່ທ່ານໃນເວລານີ້ ແລະ ຕະຫລອດໄປດ້ວຍເທີ້ນ.
ອ້າຍເອື້ອຍນ້ອງຂອງຂ້າພະເຈົ້າ, ຊ່າງເປັນກອງປະຊຸມທີ່ປະທັບໃຈຫລາຍແທ້ໆ. ຂ້າພະເຈົ້າຮູ້ວ່າ ທ່ານກໍເຫັນດ້ວຍກັບຂ້າພະເຈົ້າ ກັບຂ່າວສານທີ່ດົນໃຈເຫລົ່ານັ້ນ. ຫົວໃຈຂອງເຮົາໄດ້ຖືກສຳພັດ, ປະຈັກພະຍານຂອງເຮົາເຖິງວຽກງານອັນສູງສົ່ງໄດ້ເຂັ້ມແຂງຂຶ້ນ ເມື່ອເຮົາຮູ້ສຶກເຖິງພຣະວິນຍານຂອງພຣະຜູ້ເປັນເຈົ້າ. ຂໍໃຫ້ເຮົາຈົ່ງຈື່ຈຳສິ່ງທີ່ເຮົາໄດ້ຍິນ ໃນສອງມື້ນີ້. ຂ້າພະເຈົ້າຂໍຊຸກຍູ້ທ່ານໃຫ້ສຶກສາຂ່າວສານຕໍ່ໄປ ເມື່ອມັນຖືກພິມຢູ່ໃນວາລະສານ Ensign ແລະ Liahona.
ພວກເຮົາມີຄວາມກະຕັນຍູຫລາຍຕໍ່ທຸກຄົນທີ່ໄດ້ກ່າວປາໄສ, ຕະຫລອດທັງຜູ້ໄດ້ກ່າວອະທິຖານ. ພ້ອມທັງສຽງເພງທີ່ມ່ວນອອນຊອນ ແລະ ໃຫ້ການດົນໃຈ. ພວກເຮົາຮັກກຸ່ມນັກຮ້ອງແທໂບແນໂກ ແລະ ຂໍຂອບໃຈນັກຮ້ອງກຸ່ມອື່ນໆ ທີ່ມາປະກອບສ່ວນ.
ພວກເຮົາທຸກຄົນຂໍສະແດງຄວາມກະຕັນຍູຕໍ່ຝ່າຍປະທານເຫລົ່ານັ້ນ ແລະ ກຳມະການຂອງອົງການຍິງໜຸ່ມສາມັນ ທີ່ໄດ້ຖືກປົດຈາກຕຳແໜ່ງມື້ວານນີ້. ການຮັບໃຊ້ຂອງພວກນາງແມ່ນດີເດັ່ນ ພ້ອມດ້ວຍການອຸທິດຕົນ.
ໂດຍການຍົກມືຂຶ້ນ, ພວກເຮົາໄດ້ສະໜັບສະໜູນບັນດາອ້າຍເອື້ອຍນ້ອງຫລາຍຄົນຕໍ່ຕຳແໜ່ງໃໝ່ຂອງພວກເພິ່ນໃນລະຫວ່າງກອງປະຊຸມນີ້. ພວກເຮົາຢາກໃຫ້ພວກເພິ່ນຮູ້ວ່າ ພວກເຮົາດີໃຈທີ່ຈະໄດ້ຮັບໃຊ້ຮ່ວມກັບພວກເພິ່ນ ໃນອຸດົມການຂອງພຣະອາຈານ.
ພວກເຮົາເປັນສາດສະໜາຈັກທີ່ຂະຫຍາຍໄປທົ່ວໂລກ, ອ້າຍເອື້ອຍນ້ອງທັງຫລາຍ, ສະມາຊິກຂອງພວກເຮົາມີຢູ່ໃນທຸກບ່ອນຕະຫລອດທົ່ວໂລກ. ຂ້າພະເຈົ້າຂໍແນະນຳທ່ານໃຫ້ເປັນປະຊາຊົນທີ່ດີ ໃນບ່ອນທີ່ທ່ານອາໄສຢູ່ ແລະ ເປັນເພື່ອນບ້ານທີ່ດີໃນຊຸມຊົນຂອງທ່ານ, ຈົ່ງເອື້ອມອອກໄປຫາຄົນຕ່າງສາດສະໜາ ແລະ ຄົນທີ່ເປັນສະມາຊິກຂອງສາດສະໜາຈັກຄືກັນ. ຂໍໃຫ້ເຮົາຈົ່ງອົດທົນ, ມີເມດຕາ ແລະ ຄວາມຮັກ ຕໍ່ຄົນທີ່ບໍ່ສົນໃຈກັບຄວາມເຊື່ອ ແລະ ມາດຕະຖານຂອງເຮົາ. ພຣະຜູ້ຊ່ອຍໃຫ້ລອດໄດ້ນຳຂ່າວປະເສີດແຫ່ງຄວາມຮັກມາສູ່ໂລກສຳລັບຊາຍ ແລະ ຍິງທຸກຄົນ. ຂໍໃຫ້ເຮົາຈົ່ງເຮັດຕາມຕົວຢ່າງຂອງພຣະອົງຕະຫລອດໄປ.
ຂ້າພະເຈົ້າອະທິຖານວ່າ ເຮົາຈະຮູ້ຈັກເຖິງຄວາມຕ້ອງການຂອງຄົນທີ່ຢູ່ອ້ອມຮອບເຮົາ. ມີບາງຄົນໂດຍສະເພາະຢູ່ໃນບັນດາຊາວໜຸ່ມ, ຜູ້ມີສ່ວນຮ່ວມໃນເລື່ອງຢາເສບຕິດ, ຜິດສິນທຳ, ຮູບພາບລາມົກ, ແລະ ອື່ນໆ. ມີບາງຄົນທີ່ເປົ່າປ່ຽວດຽວດາຍ, ຮ່ວມທັງແມ່ໝ້າຍ ແລະ ພໍ່ໝ້າຍ, ຜູ້ຢາກໃຫ້ມີຄົນເວົ້າລົມນຳ ແລະ ເປັນຫ່ວງເປັນໄຍນຳເຂົາເຈົ້າ. ຂໍໃຫ້ເຮົາຈົ່ງພ້ອມທີ່ຈະເອື້ອມອອກໄປຫາເຂົາເຈົ້າ ດ້ວຍມືທີ່ຊ່ອຍເຫລືອ ແລະ ຫົວໃຈທີ່ຮັກແພງ.
ເຮົາມີຊີວິດຢູ່ໃນວັນເວລາແຫ່ງປະຫວັດສາດຂອງໂລກ ທີ່ມີການທ້າທາຍຫລາຍ, ແຕ່ມີໂອກາດ ແລະ ເຫດຜົນອັນຍິ່ງໃຫຍ່ຫລາຍທີ່ຈະຊື່ນຊົມ. ແນ່ນອນ, ຈະມີບາງເວລາທີ່ເຮົາຈະປະເຊີນກັບຄວາມຜິດຫວັງ, ເຈັບປວດໃຈ, ແລະ ແມ່ນແຕ່ຄວາມໂສກເສົ້າໃນຊີວິດຂອງເຮົາ. ເຖິງຢ່າງໃດກໍຕາມ, ຖ້າຫາກເຮົາໄວ້ວາງໃຈໃນພຣະຜູ້ເປັນເຈົ້າ, ແລ້ວພຣະອົງຈະຊ່ອຍເຫລືອເຮົາຜ່ານຜ່າຄວາມຫຍຸ້ງຍາກນັ້ນ ບໍ່ວ່າມັນຈະເປັນອັນໃດກໍຕາມ. ຜູ້ແຕ່ງເພງສັນລະເສີນໄດ້ໃຫ້ຄຳໝັ້ນໃຈນີ້ວ່າ: “ນ້ຳຕາອາດໄຫລຫລັ່ງໃນເວລາກາງຄືນ, ແຕ່ຄວາມຊົມຊື່ນຍິນດີ ກໍມີມາໃນຕອນເຊົ້າ.”1
ອ້າຍເອື້ອຍນ້ອງທັງຫລາຍ, ຂ້າພະເຈົ້າຢາກໃຫ້ທ່ານຮູ້ວ່າ ຂ້າພະເຈົ້າມີຄວາມກະຕັນຍູຫລາຍສຳລັບພຣະກິດຕິຄຸນຂອງພຣະເຢຊູຄຣິດ, ທີ່ໄດ້ຟື້ນຟູຄືນມາໃໝ່ໃນຍຸກສຸດທ້າຍນີ້ ຜ່ານທາງສາດສະດາໂຈເຊັບ ສະມິດ. ມັນເປັນສິ່ງສຳຄັນຕໍ່ຄວາມສຸກຂອງເຮົາ. ຂໍໃຫ້ເຮົາຈົ່ງຖ່ອມຕົນ ແລະ ອະທິຖານ, ໂດຍມີສັດທາວ່າ ພຣະບິດາເທິງສະຫວັນຂອງເຮົາ ສາມາດນຳພາ ແລະ ອວຍພອນຊີວິດຂອງເຮົາ.
ຂ້າພະເຈົ້າຂໍເປັນພະຍານ ແລະ ຂໍສະແດງປະຈັກພະຍານຕໍ່ທ່ານວ່າ ພຣະເຈົ້າຊົງພຣະຊົນຢູ່, ວ່າພຣະອົງໄດ້ຍິນຄຳອະທິຖານອັນຖ່ອມໃຈຂອງເຮົາ. ພຣະບຸດຂອງພຣະອົງ, ພຣະຜູ້ຊ່ອຍໃຫ້ລອດ ແລະ ພຣະຜູ້ໄຖ່ຂອງເຮົາ, ໄດ້ກ່າວຕໍ່ເຮົາແຕ່ລະຄົນວ່າ: “ເບິ່ງແມ, ເຮົາຢືນເຄາະຢູ່ທີ່ປະຕູ, ຖ້າຜູ້ໃດໄດ້ຍິນສຽງຂອງເຮົາ ແລະ ໄຂປະຕູ ເຮົາຈະເຂົ້າໄປຫາຜູ້ນັ້ນ.”2 ຂໍໃຫ້ເຮົາຈົ່ງເຊື່ອຖ້ອຍຄຳເຫລົ່ານີ້ ແລະ ສວຍໂອກາດຮັບເອົາຄຳສັນຍາດັ່ງກ່າວ.
ໃນທ້າຍກອງປະຊຸມນີ້, ຂ້າພະເຈົ້າຂໍໃຫ້ພອນຈາກສະຫວັນຈົ່ງມາສູ່ທ່ານແຕ່ລະຄົນ. ຂໍໃຫ້ບ້ານເຮືອນຂອງທ່ານເຕັມໄປດ້ວຍຄວາມສະຫງົບ, ຄວາມຖືກຕ້ອງປອງດອງ, ຄວາມສຸພາບ, ແລະ ຄວາມຮັກ. ຂໍໃຫ້ມັນເຕັມໄປດ້ວຍພຣະວິນຍານຂອງພຣະຜູ້ເປັນເຈົ້າ. ຂໍໃຫ້ທ່ານຈົ່ງບຳລຸງລ້ຽງປະຈັກພະຍານຂອງທ່ານເລື່ອງພຣະກິດຕິຄຸນ, ເພື່ອວ່າມັນຈະປົກປ້ອງທ່ານ ຕ້ານທານກັບອຳນາດຂອງຊາຕານ.
ຈົນກວ່າເຮົາຈະພົບກັນອີກໃນຫົກເດືອນຂ້າງໜ້າ, ຂ້າພະເຈົ້າອະທິຖານຂໍໃຫ້ພຣະຜູ້ເປັນເຈົ້າຈົ່ງອວຍພອນທ່ານ ແລະ ຮັກສາທ່ານ, ອ້າຍເອື້ອຍນ້ອງຂອງຂ້າພະເຈົ້າ. ຂໍໃຫ້ຄຳສັນຍາທີ່ໃຫ້ຄວາມສະຫງົບຈົ່ງມາສູ່ທ່ານໃນເວລານີ້ ແລະ ຕະຫລອດໄປດ້ວຍເທີ້ນ. ຂອບໃຈຫລາຍໆສຳລັບຄຳອະທິຖານຂອງທ່ານເພື່ອຂ້າພະເຈົ້າ ແລະ ເພື່ອເຈົ້າໜ້າທີ່ຊັ້ນຜູ້ໃຫຍ່ທຸກຄົນ. ພວກເຮົາມີຄວາມກະຕັນຍູຫລາຍສຳລັບທ່ານ. ໃນພຣະນາມຂອງພຣະຜູ້ຊ່ອຍໃຫ້ລອດ ແລະ ພຣະຜູ້ໄຖ່ຂອງເຮົາ, ຜູ້ເຮົາຮັບໃຊ້, ແມ່ນແຕ່ພຣະເຢຊູຄຣິດ, ພຣະຜູ້ເປັນເຈົ້າ, ອາແມນ.