2010–2019
Sel Deluut el Mo Kebetech
April 2013


Sel Deluut el mo Kebetech

Nglunguchek me a Rubak bo lomekngeltengat e lomes er kemiu, e rodam me a rodos er ngak. A yaksok er Ngii er a budech bo lobengkemiu er chelechang e lolemolem.

Rodam me a rodos, ng klebokel el ongdibel tial bla de ngarngii. Ak medengei el kmo ko mo bengkek e kongei el kmo aikel klumech a kmal mle melisiich. A rengud a mla obotech, ea klaumera er kid er tial chedaol ureor a mla mo mesisiich el bla dolchesuar a Reng er a Rubak. Bo dolbedebek a bla derenges er a ikal mereko el eru el klebesei. A kulengit me mluut el mesuub aikal klumech sel bol llechukl er a babier er a Ensign me a Liahona.

Kede oureng a saul er a dersta er tirkel milngedecheduch el mei er kid, me tirkel dilu nglunguuch. Osisiu, a chelitakl a kmal mle ungil e melisiich er kid. Ng betik a rengud er a klebokel el Tabernacle Choir e oureng a sulir tirkel bebil el dirrek el ulengeseu er a chelitakl.

Kede dmak el rokui el oureng a sulir tirkel ngara omerreder me a re ngara board er a cherrengelel a Young Women el mlengai er a okedong er tir chelii. A omesiungir me a blakelreng er tir er a urerir a kmal mle ungil.

Kede mla kongei, longkiu odars er a chim, er tial ongdibel a rodam me a rodos el mla mokedong el mora beches el deruchall. Ng soad a bo lodengei el kmo aki semeriar el mo oureor lobengterir er a chelsel tial urerel a Mastang.

Kid a Ikelesia el berberiid er a beluuelchad, e rodam me a rodos. A rechedal a ikelesia a berberiid er a beluulechad. A kulengit me bo mungil chad er a beluu er a ikel mkiei er ngii e bo mungil tonari er a basio el mngarngii, el olngeseu er tirkel kuk chad er a bebil er a klechelid me a dirrek el chedal a klechelid er kid. Bo el mededaes a rengud, e de bekokeuii e doubeltikelreng, el mo er tirkel kuk diak el chedal a klechelid er kid me a llechud. A Osobel a uleba klumech er a beltikelreng me a ungil omeruul el mei er tial beluulechad el mora rokui el sechal me a redil. Dolemolem loltirakl Okesiul.

Nglunguchek me bo dekerekikl a ngelsengesir tirkel ngara bitar kid. Ngarngii a rebebil, oumesingd a rengeasek, el tir a chelsechusem er a mekngit el kar, tekoi er a deleboes, osengel a mekngit lomeruul, me a lmuut el bebil. Ngarngii tirkel sabisi el di tir el tang, luldimukl a re mla melakl el sechal me a redil, lousbech ongelim er a rebebil er a rechad. Bo de kldmokl lodars a chimad me a beltikelreng er a rengud el mo er tir.

Kede kiei er a taem er a reksi el klou a uldikel me a ongarm e dirrek el klou a techall el kirel a deureng. Ng uaisei, el ngarngii, aikel taem el moalech a rengud, ngara ringel, me a dirrek el kerior er a klengar kid. Eng di, alsekum e kede otilii a klaumera er kid er a Rubak, e Ngii a mo ngosukid er a ngii dil, ringel el mei. A Psalmist a meskid a mesisiich el tekoi: “A langel a ltang ngarngii el tal kesus, eng di a deureng a duum er a tutau.”1

Rodam me a rodos er ngak, ng soak a bo modengei el kmo ng dmeu a renguk er a ebangkelio er a Jesus Kristo, el mla moluut er chelechal uriul klebesei lokiu a Profet Joseph Smith. Ng kiis el kirel a deureng er kid. Bol ngariou a rengud e de ngara nglunguuch, loba klaumerang er a Demad er a Babeluades el kmo ng mo omekrael e omekngeltengat a klengar kid.

A kuchais er a sioning me a klaumera er ngak er kemiu el kmo a Dios a ngar, e Ngii a remenges a ngluguchir a re ngariou a rengrir. A Ngelekel Sechal, el Osobeled e Olsobel er kid, a mengedecheduch er a dersta er kid: “Uaisei, ak dechor er a tuangel e melengod: A le ngarngii a rongesak, e mekengii a chesimer, eak me soiseb.”2 Bo doumerang aikal tekoi me bo denguu tial yaksok.

Chelechal bocha le merek tial ongdibel, ea kulengit a klengeltengat er a babelaudes leko er a dersta er kemiu. A rekeblimiu bol mui er a budech, kltalreng, ungil omereuul, me a beltikelreng. Bol mui er a Reng er a Rubak. Bo momekeroul e molisiich er a klaumera er kemiu er a ebangkelio, me luchul a ulekerreu le kor kemiu er a taem er a odechelakl er a Diablong.

Me sel deluut el mo kebetech er a chelsel elolem el buil, eak meluluuch me a Rubak bo lomekngeltengat e lomes er kemiu, e rodam me a rodos er ngak. A yaksok er Ngii er a budech bo lobengkemiu er chelechang e lolemolem. Ko mesulang er a nglunguchiu el kirek me a dirrek el kirir a re General Authorities. Aki kmal mereng a suliu. El ngara ngklel a Osobel e Olsobel er kid, el dosiou er ngii, el ngii a Jesus Kristo, el Rubak, amen.