Peb Yog Peb Leej Txiv Saum Ntuj Ceeb Tsheej cov Ntxhais

Txhua lub lim tiam cov ntxhais hluas nyob thoob plaws lub ntiaj teb no hais Koom Haum Ntxhais Hluas cov ntsiab lus. Txawm yog hais yam lus twg los, txhua lub sij hawm kuv hnov cov lus no: “Peb yog Leej Txiv Saum Ntuj Ceeb Tsheej cov ntxhais; Nws hlub peb, thiab peb hlub Nws,”¹ tus Ntsuj Plig tshoov kuv lub siab tias tej lus no muaj tseeb. Tej lus no tsis qhia tias peb yog leej twg xwb---tiam sis tej lus no kuj qhia tias peb leej txiv yog leej twg. Peb yog cov ntxhais ntawm ib tug neeg tsa nto!

Nyob hauv txhua lub teb chaws, kuv tau ntsib cov ntxhais hluas uas paub lawv tus kheej, lawv muaj txoj kev kaj puv npo, sib zog ua hauj lwm, thiab muaj kev ntseeg tiag tiag. Lawv tsim txiaj. Lawv ua raws lawv tej kev khi lus thiab “sawv ua Vajtswv tej tim khawv rau txhua lub caij nyoog thiab rau tag nrho txhua txhia yam, thiab nyob tag nrho txhua qhov chaw uas nej yuav nyob.”² Lawv paub lawv yog leej twg thiab lawv muaj ib txoj hauj lwm tseem ceeb hauv Vajtswv lub nceeg vaj.

Thaum kuv kawm ntawv qib siab, kuv yog ib tug mej zeej hauv pawg seev cev hauv BYU International Folk Dancers. Muaj ib lub caij sov peb pawg muaj cib fim mus seev cev hauv tej qhov chaw tshaj tawm txoj moo zoo nyob hauv Europe. Nyuaj rau kuv ua li no vim ob peb hlis ua ntej lub sij hawm ntawd kuv txiv tau tas sim neej. Thaum peb nyob hauv Scotland, kuv kho siab thiab poob siab heev. Hmo ntawd peb tau seev cev hauv ib lub tsev teev ntuj ces tom qab ntawd peb tau mus rau lub tsev ntawm qhov chaw tshaj tawm txoj moo zoo. Thaum kuv taug kev, kuv pom ib lub pob zeb nyob hauv ib lub vaj ntawm lub qhov rooj. Saum lub pob zeb ntawd muaj ib co lus sau hais tias, “Txawm koj nyob qhov twg, ua hauj lwm zoo xwb.” Thaum lub sij hawm ntawd cov lus ntawd nkag hauv kuv lub siab, thiab kuv xav tias Vajtswv tau hais lus rau kuv. Kuv paub tias Leej Txiv Saum Ntuj Ceeb Tsheej hlub kuv. Kuv xav tias kuv tsis nyob kuv ib leeg xwb. Kuv los kua muag sawv hauv lub vaj ntawd. “Txawm koj nyob qhov twg, ua hauj lwm zoo xwb.” Zaj lus ntawd ua rau kuv nco qab tias kuv Leej Txiv Saum Ntuj Ceeb Tsheej paub kuv thiab muaj ib txoj hau kev, thiab tus ntsuj plig pab kuv to taub hais tias kuv txoj hauj lwm muaj nqi heev.

Tom qab ntawd, kuv tau kawm hais tias zaj lus no tau pab tus yaj saub Daviv O. McKay thaum nws ua tub txib nyob hauv Scotland. Nws twb nyeem cov lus ntawd saum ib lub pob zeb ntawm ib lub tsev loj thaum nws ua tub txib thiab nws poob siab; cov lus ntawd tau txhawb nqa nws. Ntau xyoo tom qab ntawd, thaum lub tsev ntawd raug muab rhuav, nws hais kom neeg nqa lub pob zeb ntawd mus rau lub vaj ntawm lub tsev tshaj tawm txoj moo zoo ntawd.³

Peb cov uas yog Vajtswv cov ntxhais, peb nyias muaj nyias tej txuj ci thiab tej xwm txheej. Tiam sis, peb txoj hauj lwm muaj nqi---vim peb muaj nqi. Tej lub sij hawm thaum peb tu, qhia thiab saib xyuas lwm tus txhua hnub, peb xav tias tej ntawd nyuaj thiab tsis muaj nqi, tiam sis thaum peb nco txog Koom Haum Ntxhais Hluas cov ntsiab lus---“Peb yog peb Leej Txiv Saum Ntuj Ceeb Tsheej cov ntxhais; Nws hlub peb”---ces ua rau peb paub tias tej ntawd yeej pab peb txoj kev sib raug zoo nrog lwm tus.

Tsis ntev tas los kuv niam uas muaj 92 xyoos tau tso lub ntiaj teb no tseg. Nws tsis tau muaj npe nrov li. Nws lub neej tsis mus raws li nws npaj. Nws tus txiv, uas yog kuv txiv, tau tas sim neej thaum nws muaj 45 xyoos, thiab tso peb tug me nyuam rau nws---yog kuv thiab kuv ob tug nus. Tau 47 xyoo nws yog ib tug poj ntsuam. Nws qhia ntawv thaum nruab hnub thiab qhia kev ntaus piano thaum hmo ntuj kom txhawb nqa pab peb tsev neeg. Nws tu nws txiv, uas yog kuv yawm txiv, uas nyob ntawm peb ib sab. Nws ua hauj lwm kom peb txhua tus muaj cib fim mus kawm ntawv qib siab tau. Nws hais tias peb yuav tsum ua li ntawd kom peb “pab tau lwm tus.” Thiab nws yeej tsis yws hlo li. Nws ua raws li nws tej kev khi lus, vim nws ua li ntawd nws thiaj li thov Vajtswv lub hwj chim los foom koob hmoov rau peb tsev neeg thiab ua tej txuj ci tseem ceeb. Nws tso siab rau kev thov Vajtswv, lub pov thawj hwj thiab tej kev khi lus. Nws rau siab ua nws txoj hauj lwm rau tus Tswv. Nws txoj kev rau siab ruaj nrees tau pab nws cov me nyuam nyob ruaj nrees. Nws pheej hais tej nqe vaj lug kub no rau peb: “Kuv, tus Tswv, yuav tsum ua li kuv tau cog lus thaum nej ua li kuv hais; tiam sis thaum nej tsis ua li kuv hais, nej yuav tsis tau kev cog lus.”⁴ Nov yog nws cov ntsiab lus, thiab nws paub cov lus ntawd muaj tseeb. Nws paub ua raws li nws tej kev khi lus. Kuv niam tsis tau muaj lub npe nrov heev. Nws tsis xav muaj li ntawd. Nws to taub hais tias nws yog leej twg thiab nws yog Vajtswv ib tug ntxhais. Kuv niam pheej ua hauj lwm zoo xwb.

Muaj ib zaug Thawj Tswj Hwm Gordon B. Hinckley hais txog cov poj niam hais tias:

“Peb yeej yuav tsum nco ntsoov tias cov poj niam muaj zog. ... Cov niam tsev pab lawv cov me nyuam lub neej. ... Cov niam tsev tu lawv loj hlob raws li tus Tswv txoj kev. Lawv lub hwj huam tseem ceeb heev. …

“... Lawv yog cov uas ua rau neeg muaj txoj sia. Lawv tu co me nyuam. Lawv qhia cov ntxhais hluas. Lawv yog peb cov khub uas yeej tseem ceeb heev. Lawv yog cov uas koom nrog peb txhim tsa Vajtswv lub nceeg vaj. Lawv txoj hauj lwm tseem ceeb thiab zoo kawg nkaus.”⁵

Ib leej niam los yog leej txiv yuav ua li cas qhia nws tus ntxhais txog qhov tseeb hais tias nws yog Vajtswv ib tug ntxhais? Peb yuav ua li cas pab nws tawm ntawm lub ntiaj teb mus thiab nkag mus hauv Vajtswv lub nceeg vaj?

Nyob hauv ib lub ntiaj teb uas tsis coj ncaj ncees, cov ntxhais hluas yuav tsum muaj tib neeg uas “sawv ua Vajtswv tej tim khawv txhua lub sij hawm, thiab txog txhua yam, thiab nyob hauv txhua qhov chaw.” Qhov no yeej tseem ceeb kawg nkaus tam sim no. Cov ntxhais hluas xav tau lawv niam thiab cov uas coj yam ntxwv ua poj niam tsim txiaj. Cov niam tsev, nej txoj kev sib raug zoo nrog nej cov ntxhais thiab nej txoj kev coj yam ntxwv yeej tseem ceeb kawg nkaus. Nej tus ntxhais tej cwj pwm thiab tus yam ntxwv yuav ua raws li nej ua thaum nej saib taus nws txiv, nws txiv lub pov thawj hwj thiab txoj hauj lwm.

Txoj hauj lwm uas peb yuav tsum “ua zoo” yog dab tsi? Zaj lus tshaj tawm txog tsev neeg qhia meej hais tias:

“Los ntawm lub tswv yim los saum ntuj los, cov txiv tsev yuav tsum kav lawv tej tsev neeg los ntawm kev hlub thiab kev ncaj ncees thiab lav ris npaj ua kom muaj tej yam uas lawv tsev neeg yuav tsum muaj kom thiaj ua neej tau thiab txais tau kev pov hwm rau lawv tsev neeg. Cov niam tsev txoj kev lav ris thib ib yog tu lawv cov me nyuam. Nyob rau tej kev lav ris tseem ceeb dawb ceev no, tej niam tsev txiv tsev yuav tsum sib pab xws li nkawd nyob sib txig. …

“Peb ceeb toom hais tias cov neeg uas txhaum tej kev khi lus ntawm kev coj dawb huv, cov uas tsim txom lawv tus khub los yog lawv cov me nyuam, los yog cov uas tsis lav ris koob lawv tsev neeg yuav muaj ib hnub twg uas lawv yuav lav ris txog tej no rau ntawm Vajtswv lub xub ntiag.”⁶

Nyob hauv Maumoos lub caij nyoog, nws nyuaj saib hais tias cov neeg phem muab cov poj niam tej uas muaj nuj nqis tshaj plaws txhua yam huv tib si, uas yog txoj kev coj dawb huv thiab tsim txiaj.⁷

Kuv hais dua hais kom nej rov qab los ua neeg tsim txiaj. Kev tsim txiaj yog lub hwj chim ntawm Vajtswv cov ntxhais. Lub ntiaj teb yuav zoo li cas yog tias peb saib kev tsim txiaj---uas yog kev xav thiab ua raws li kev cai coj ncaj ncees⁸ rau nqi tshaj txhua yam? Yog tias tsis muaj kev coj tsis ncaj ncees, kev saib duab liab qab, thiab kev tsim txom, puas yuav muaj kev sib nrauj, kev txom nyem, thiab kev muaj siab puas tas? Chaw tshaj tawm xov xwm puas yuav txhawb nqa thiab saib Vajtswv cov ntxhais rau nqi? Yog tias tag nrho noob neej to taub cov lus no tseem ceeb npaum li cas hais tias, “Peb yog peb Leej Txiv Saum Ntuj Ceeb Tsheej cov ntxhais,” ces tib neeg yuav ua li cas rau cov poj niam?

Ntau xyoo tas los, thaum yuav luag ua lub Tuam Tsev Rau Rooj Sab Laj tiav, kuv nkag mus hauv lub tsev no, ntoo kaus mom tawv thiab tsom iav, npaj nqus daim pua tsev uas kuv tus txiv pab pua. Nyob ntawm lub sam thiaj no yog ib lub tsheb nrau av me me, thiab muaj cov hmoov av ntau heev. Cov hmoov av tau nkag mus rau hauv daim pua tsev. Kuv txoj hauj lwm yog kev nqus tsev. Kuv nqus thiab nqus thiab nqus. Tom qab peb hnub kuv lub tshuab nqus tsev twb tau piam vim nws kub dhau lawm!

Yav tav su ua ntej thawj zaug yuav muaj lub tuam rooj sab laj hauv lub tsev zoo nkauj no, kuv tus txiv tau hu kuv. Nws tab tom yuav pua daim kawg rau ntawm qhov chaw no.

Nws nug hais tias, “Kuv yuav tsum sau nqe vaj lug kub twg hauv qab daim puas tsev no?”

Thiab kuv hais tias, “Mauxiyas 18:9: ‘Sawv ua tim khawv txog Vajtswv txhua lub sij hawm thiab nyob hauv txhua yam, thiab nyob txhua qhov chaw.”’

Hauv lub ntiaj teb nyuaj heev, cov ntxhais hluas thiab cov poj niam ntawm lub Koom Txoos ua li no. Lawv coj yam ntxwv zoo. Lawv tsim txiaj, txawj ntse thiab nquag heev. Lawv pab lwm tus vim lawv yeej txawv lwm tus. Lawv sim ua lawv txoj hauj lwm kom zoo.

Ntau xyoo tas los, thaum kuv nqus tsev nyob ntawm no---kuv sim ua kuv txoj hauj lwm zoo---kuv tsis tau paub hais tias muaj ib hnub kuv yuav sawv saum daim pua tsev nyob ntawm lub sam thiaj no.

Vim kuv yog Vajtswv ib tug ntxhais, kuv ua tim khawv hais tias Vajtswv muaj txoj sia nyob. Yexus yog tus Khetos. Nws yog peb tus Txhiv Dim. Los ntawm Nws txoj kev theej txhoj, muaj ib hnub kuv yuav rov qab mus nrog Nws nyob---thaum kuv yog neeg dawb huv uas muaj ib tsev neeg nyob mus ib txhis. Kuv yuav qhuas Nws vim kuv yog ib tug poj niam, leej niam, thiab niam tsev. Kuv ua tim khawv hais tias, Vajtswv ib tug yaj saub, Thawj Tswj Hwm Thomas S. Monson, coj peb kev thiab kuv zoo siab vim muaj cov txiv neej ncaj ncees uas tuav lub pov thawj hwj hauv kuv lub neej. Thiab kuv yeej yuav zoo siab ua Vajtswv tsaug rau lub dag zog uas kuv txais los ntawm tus Cawm Seej txoj Kev Theej Txhoj lub hwj chim thaum kuv sib zog “ua hauj lwm zoo xwb.” Los ntawm Yexus Khetos lub npe, amees.