2010–2019
Kid a Redil Ngelekel a Demad er a Babeluades
April 2013


Kid a Redil Ngelekel a Demad er a Babeluades

Me kid el redil ngelekel a Dios e kede tokubets e kakerous a teletael de ngara chelsel. Eng di a dersta er kid a klou a ultutelel—le ngii el klou a belkud.

Sel bek el sandei, ea rengeasek el redil liueklii a beluulechad a melekoi er a dai er a Young Woman. Ng diak el iior er a omelekoi, le bek el taem el krenges aikal tekoi, “Kemam a ngelekel a Demam er a Babeluades, el betik a rengul er kemam, e kemam a betik a rengmam er Ngii,”1 ea Chedaol Reng a meketeklii er a renguk el kmo ng klemerang. Ng diak di lesisichii sel meral teleteled el kmo kede techang—ng dirrek el—smisichii sel kmo kede mlar ker mei. Kid a ngelekel a mla mekebkall e ngar el chad!

Bek el basio er a bek el beluu, e ak kebetech ngak me a meklou a rengrir, meduch el mesaod el ngeasek, mui er a llomes, el mla beob lokiu a meringel lurreor me a omelasem, lolab a klikiid e beot el klaumerang. Te klikiid. Te oltirakl a telbiil el “dechor el sioning er a Dios er a bek el taem er a bek el tekoi, er a bek el basio.”2 Te medengei el kmo te techang e ngarngii a ultutelir el kirel okedecherul a rengedel a Dios.

Sera kngara daingak, e ak mle ngara chelechad er a BYU International Folk Dancers. A tara summer, e tial chelechad a mlo techellel el mo mes er a mision er a Europe. Tia mle meringel el summer er ngak ele sesei el buil ruriul ea demak a mlad. Me sera ki mngara Scotland, e a kmal mlo mesaul a renguk. A ki milloik er sel kesus er a ikelesia, ea uriul er a klokolam, ea ki mlo er a kuk bita el chesimer el mo er tial blai er a mission. Tia er a kurael eak milsa bad el ulsirs er a tkul a kakine er a sers. Aikakid a mle llechukl er ngii, “Ngii di el ker el mngarngii e bo muldellomel.” Seikid el taem e ak mle medengei er a chelsel a renguk, el kmo a babeluades a uldersii tia el klumech el mei er ngak. Ak mle medengei el kmo a Chedam er a Babeluades a medengelkak. A kulmelchesiu el dimlak el sal kmal di ngak el uai ke el kulumdasu. Ak dilechor er a sers el mle mui chiuosech er a medak. “Ngii di el ker el mngarngii, e bo muldellomel.” Tia el beot el tekoi a milsak a beches el ues el kmo a Chedam er a Babeluades a medengelkak e ngarngii a uldeseul el kirel a klengar er ngak, ea reng el kulechesuar a ngilsukak el mo medengelii el klou a belkul sel kuk blingelek.

A uriul e ak mlo medengei el kmo tial tekoi a dirrek el mle odbechii a profet David O. McKay er a le misionari er a Scotland. Ng milsang el lechukl ngara bad er a okedecheraol er a le sal mesaul a rengul er a lengara mision, me a ikal tekoi a kmal silbechii er a rengul. Betok el rak ruriul e tial omekedecheraol a luruud er ngii, ng uluureor el kirel a ngeiul tial bad e ngiluu el lolia er a sers er a blai er a mision.3

Me kid el redil ngelekel a Dios, e kede tokubets e kakerous a teletael el de ngara chelsel. Eng di dersta er kid a klou a ultuteled—le kid el meklou a belkud. Aikel doltobed el ngarkid el kirel a ulekeroul, olisechakl, me a omekerreu er a rebebil a ua le diak el klou a belkul, mekekerei el tekoi, meringel, e demerur a lebebil ra taem, eng di sel de letkii sel kot el tekoi el ngara sel dai er a Young Women el—“Kemam a redil ngelekel a Demam er a Babeluades, el betik a rengul er kemam”—eng sebechel ngodechii a omelkinged me a deleuill er kid.

A kmal ungil el 92 a rekil el delak a mlad. Ng tilobech er tial klechad el kiliei el—chelellakl. A klengar er ngii a diak el sel ble lomdasu er ngii. A bechil, el demak, a mlad er a le 45 a rekil, meng chilitii ngii me a re tedei el ngalek—ngak me a teru el ochedak. Ng kiliei el 47 el rak el mesobil. Ng ullengeseu er a telungalek er kemam el olisechakl er a skuul a le mellomes e olisechakl a piano sel le klebesei. E uluungerachel er a uodela el demal, el demak el rubak, el kiliei er a bita el blai. Ng ulterkeklii el derta er kemam a tuobed er a daingak. Ng ulterkeklii me bol sebecham el mo “olengeseu.” E dimlak el longeremrum. Ng ultirakl a telbielel, e tiang a uchul, meng ultengel a klsisiich er a babeluades el mo omekngeltengat er a blimam e uldurokl ongasireng sel bebil er a team. Ng uleltuil er a klisiichel a nglunguuch, priesthood, me a yaksok er a telbiil. Ng mle blak a rengul er a omesiungel a Rubak. A mesisiich el klaumerang a mle sisichemam, el ngelekel. Ng blechoel el melekoi er a moktek er ngii el merkamam el kmo a Rubak a llechotel sel doruul a soal; engdi sel lak dorrenges, eng diak el bol mutaut a yaksok er ngii.”4 Tia mle kerbai lobang, e mle medengelii el mo ng klemerang. Ng mle medengelii a belkul a oltirakl a telbiil. Ng dimlak a tang mel nguu a chetengakl er a beluulechad. Ng dimlak el soal tiang. Ng di bai mle medengei el kmo ngii ng techang e sebechel me techang—el redil ngelekel a Dios. Ng sebeched el melekoi el kirel a delemam el kmo ng mle uldellomel e riruul a ngerchelel.

Ng mora redil me a rechedil ea, President Gordon B. Hinckley er a ta el taem a dilu el kmo:

“Ng diak el kired el oridii a osenged er a klisichel a redil. … Ng chedil a ngii a mesisiich a klisichel er a klengar er a rengelekir. … Ng chedil ngii a omekeroul er tir e obetiterir el moltirakl er a Rubak. A klisichir a kmal klou. …

“ … Tirkang a omeob a klengar. Tir a omekerreu er a rengalek. Tir a sensei er a rengeasek el redil. Tir a diak el mutechei el ombid. Tir a dedak el chad er a urerel a omekedecherul a rengedel a Dios. Ng kmal klou a urerir, e ungil a ngerchelir loruul.”5

Ng mekera chedil malechub a chedam a losisecheklii a ngelekel redil a ngarbab e mera el klemerang el kmo kid a ngelekel a Dios? Kede mekera e ngosuterir el tuobed er a beluulechad e soiseb er a rengedel a Dios?

Ngar tial beluulechad el ngomeda kldung er ngii ea rengeasek el redil ousbech er a remeklou er redil me a resechal el mo “dechoer el sioning er a Dios er a bek el taem er a rokui el tekoi, me a rokui el basio.” Ng dirkak a tang me tial le sal klou a ultutelel er chelechang. A ngeasek ousbech er a chedil e ousbech er a olsisechakl el ulecholt er tir a kldung er a kleredil. Rchedil, a deleuill er kau me a rengelekem el redil a kmal klou abelkul, luldimukl er a okesiu er kau. A teletelem omongull er a demal, priesthood lobang, me a chedaol ngerchelel a mo ulecholt a altang e kede mesa el kmal klou er a blekerdelel a ngelekem me a omerellel.

Ngera sel blingeled el kid a kired el “doruul er ngii el kot lungil”? Chais el mora Beluulechad a bleketakl:

“Mengokiu a chedaol kedmeklel, ea rechedam a bdelul a telungalek loba beltikelreng me a llemalt e ngerchelir el smiik e kudmokl aikel lousbech er a klechad me a ungil ulekerreu el mora telungalek. A kot el ngerchelir a rechedil a omekerreu e omekeroul er a rengelekir. Chelsel aikaikid el chedaol ngerachel, ea rechedam me a rechedil a kirir el kaukledem e kaingeseu el tabesul a ngerchelir. …

“Aki omeklatk el tirkel chad el tir sel telbiil er a llach el kirel a delboes, el tir a melemall e omekringel e mengurusii er a rebecherir me a rengelekir, malechub e te diak el ruul aike el ngerchelir er a telungalek a mo dechoer e mo mukerkeriil er a medal a Dios er a ta er a klebesei.” 6

Sera le klou a delengerenger er a beluu er a ltemel a Mormon, eng ngulumekikngit el reng le redil a milngai er tir sel ngii a kot el ngarbab er a rokui—kldung me a klikiid.7

Ak lmuut lomeklatk el kirel okedongel a kldung. A kldung a klisichel a rengelekel a Dios el redil. Ng kol mo uangera beluulechad alsekum a kldung—blekeradel er a uldasu me a omeruul lobengkel a ngarbab el teletelel a ungil klechad8—a lmuut el morngii er a beluu el ngii a mo kot el ngarbab el teletael? Alsekum me a delngerenger, deleboes, omelemall a merael mo kekerei, eng sebechel mo mekesai a teruud el chelebechiil, teruud el klengar, me a telemall el reng? A media ng moldubech e mengeluolu e diak el bai lomtok e lomekrur er a remekreos el ngelekel a Dios el redil? Alsekum me a rechad a ungil medengelii a ultutelel tial el tekoi el kmo “Aki redil ngelekel a Demam er a Babeluades,” ng kol uangera osenged me a omerelled el mora redil?

Sesel rak ra memong, er a le bochu merek a Conference Center, e ak mlo tmuu er tia el chedaol basio er a balcony e loulekou a medecherecher el ulkou e ouklas, el mochu melecha carpet el bechik a ulengeseu el mo melechang. Tial ngarngii a podium a mlarngii a torak el loltak a chutem, ng belkul a kmo a hokori er tial basio a kmal mle klou, e sel beriou, eng meked er tial carpet. Me ak mle vacuum. A uriul er a edei el klebesei, e tia el kekerei el vacuum el kngiluu er a blik a di mildul!

A ieta suelebe ruchei er a kot el klou longdibel er tial klebokel, beches el okedecheraol, ea bechik a ulemekedong er ngak. Ng di kmedung eng mo melecha er sel mong meng ulebongel el carpet—er eungel tial merael chisel pulpit.

Ng uleker, “Ngere el bades er a chedaol llechukl a kluches er tial carpet?”

Me ak dilu, “Mosiah 18:9: ‘Bom dechor [el] sioning er a Dios er a ngii di el taem me a ngii di el ngerang, me a ngii di el basio.’”

Chelecha el sal kmal imis el klou omelasem, e tiaikid a loruul er ngii a rengeasek el redil me a rokui el redil er tial Ikelesia. Te bai mlo olchotel a ungil. Te kedung ma mle ungil, e mle mellomes ma mle bak a rengrir ra ureor. Te meruul a kakerous le tir el ngodech. Te ungil meruul a ngerchelir.

Betok el rak er a memong, er ser ak vacuum er tial carpet—el melasem a mo ungil meruul er tial kekerei el kuk blingelek—ng dimlak kudengei el kmo a tara klebesi e ak mo dechor er tiang el ochik a bereked er tial carpet er a eungel tial pulpit.

Chelechal sils el kredil ngelekel a Dios, eak dechor lolecholt el sioning el kmo Ngii a ngar. A Jesus a Kristo. Ngii a Osobeled. Me ngokiu sel mo cherchar, el ringel er a tngakireng me bol sebechek el ta er a klebesi e kluut el mo kiei e Lobengekel—el mo ulterkokl, klikiid, e merenged er a mo cherchar el telungalek. Ak blechoel mereng a Sulel er a techall el redil, bechiil, e chedil. A kuuchais el kmo kid a mukrael er a profet er a Dios, el President Thomas S. Monson, me ngak a oureng a saul el kirir a remelemalt el meklou el sechal, el klisiich er a priesthood el lobang a mla omekngeltengat er a klengar er ngak. Me ngak a di blechoel el ngar omereng el saul er a klisiich el kngai lokiu a klisichel a Tngakireng er a Osobel lolengeseu sel kulemolem e melasem el mo “ungil meruul a [ngerchelek].” Ngara ngklel a Jesus Kristo, amen.

Uleklatk

  1. Young Women Personal Progress(babier, 2009), 3.

  2. Mosiah 18:9.

  3. Mesa Matthew O. Richardson, “‘What E‘er Thou Art, Act Well Thy Part’: John Allan’s Albany Crescent Stone,” Journal of Mormon History, vol. 33 (Fall 2007), 31–61; Francis M. Gibbons, David O. McKay: Apostle to the World, Prophet of God (1986), 45.

  4. Mesa Doctrine and Covenants 82:10.

  5. Gordon B. Hinckley, “Standing Strong and Immovable,” Worldwide Leadership Training Meeting, Jan. 10, 2004, 21.

  6. “A Telungalek: Chais el mora Beluulechad,” Ensign malechub a Liahona, Nov. 2010, 129.

  7. Mesa Moroni 9:9.

  8. Mesa Young Women Personal Progress, 70.