Kitail iei Sapwellimen Sahm Nanleng Serepein Kan

Nan wihk koaros peinakapw akan nan sampah pwon kin kapwkapwurehieng oh ndahla oaralap en Peinakapw Akan. Ni lokaiahn sahpw sohte lipilipil, ansou koaros me I kin rong lepin mahsen pwukat, “Kitail iei Sapwellimen Samatail Nanleng serepein kan, E poakohng kiht, oh se poakohng Ih,”¹ Ngehno kin kamehlel ong pali ngenie me re mehlel. E wia kamehlelpen kitail—ihs kitail—ahpw pil kamehlelpen nein ihs kitail. Kitail iei sapwellimen kahlap lapalap serepein!

Nan wehi koaros oh nan sahpw koaros I tuhwongehr peinakapw kehlail, loalokong, direki marain, me koahieklahr pwehki pwersek oh kasongosong, me ahniki pwoson me unsek oh mengei. Irail mwour mwahu. Irail wia soun kolokol inou sarawi me kin uh ni “duwen sounkadehde kan en Koht ni ahnsou koaros oh ni mehkoaros, oh ni wasa koaros.”² Irail ese ihs irail oh me irail ahniki doadoahk kesempwal en kapwaiada nan kokoudahn wehin Koht.

Ni ansou me I sukuhl BYU, I wia emen tohn pwihn en kahlek en BYU International Folk Dancers. Ehu summer aht pwihn ahniki ansou mwahu en seiloakih misin kan nan Europe. E wia summer apwal ong ie pwehki sounpwongte depe mwowe ahi pahpao mehla karuwaru. Ansou me se mih Scotland, I pehm me I kelehpw oh I pahtoula. Se kahlek ni ehu ihmw sarawi nihpwongo oh mwurihte kohla ni imwen misino me mihte pil wasao. Ni ansou me I aluhla ni misino, I kilang takai ehu me mih nan mwetuwel kaselel limwahn kehlo. Lepin mahsen me ntingidi pohn takaio iei, “Sohte lipilipil me ke wia, wia mwahu ahmw pali.” Ni ansouohte lepin mahseno sair loal nan mohngiongi, oh I pehm me manaman kan en nanleng kapahdohng ie iren kaweid. I ese me Sahm Nanleng me limpoak mwahngih ihs ngehi. I pehm me I sohte kelehpw. I kesihnen nan mwetuwelo ni eh miehda pilen mesei. “Sohte lipilipil me ke wia, wia mwahu ahmw pali.” Lepin mahsen mengeio kahrehiong ahi wekidala ahi madamadau me Sahm Nanleng mwahngihie oh sapwellimaniki pilahn ong ei mour, oh ngehno seweseie wehwehki me ahi palio mie katepe.

Mwuhr I ahpw diarada me lepin mahsen wet pil sair soukohp David O. McKay ansou me e papah duwen misineri pwulopwul nan Scotland. E kilang takaio ni ihmw ehu ni ansou ehu me e ahniki katoutou nan ah misin, oh lepin mahsen ko kamarahda ih. Sounpar tohto mwuri ansou me ihmwo pahn pokdihsang, e koasoanehdi pwehn alehdi takaio oh kadaralahng nan mwetuwelo ni misino.³

Ni duwen sapwellimen Koht serepein kitail koaros wikpeseng oh ahniki irair tohrohr. Ahpw atail pali kan kesempwal—pwehki emenemen kitail kesempwal. Atail mwekid kan en ehuehu rahn en sawas, padahk, oh poakohng mehteikan kak mwomwen kapwang, sohte katepe, apwal, oh kihkitaildi ekei pak, ahpw ni atail pahn taman lepin mahsen sang oaralap en Peinakapw Akan— “Kitail iei Sapwellimen Samatail Nanleng serepein kan, E poakohng kiht” —e pahn mie lipwe laud ong atail ehupene ong aramas teikan oh atail mwekid kan.

Kerendohte ahi nohno kaselel me sounpar 92 mehla. E mweselsang mour wet duwehte ni eh momour—ni meleilei. Ah mour sohte wia me e kasik. Ah pwoudo, ahi pahpao, mehla ansou me e sounpar 45, kihdihieng ih seri silimen—ngehi oh riei pwutak riemen. E momouriki sounpar 47 ni duwen liohdi. E apwalih aht peneinei ni ah wia sounpadahk ni rahn oh padahk piano ni soutik. E apwalih ah pahpao, ahi pahpa kahlapo, ni eh mahlao me kin mihte limwaht. E nsenohki me kiht koaros alehdi kasukuhl en college. Dene pwe sen wia aramas me “kak kihda sawas.” Oh e sohte kaulim. E kolokol ah inou sarawi kan, oh pwehki eh wia met, e kahrehieng manaman en lahng eh mweredi kapaiada nimwato oh kadarodo manaman kapwuriamwei. E kehliki manaman en kapakap, priesthood, oh inou sarawi kan. E loaloapwoat nan ah papah Kauno. Ah pwoson loaloapwoat kakehlailih kiht, nah serihkan. E kin kalapw katamanohng kiht iren pwuhk sarawi me mahsanih me Kauno kin anahne kapwaiada me E mahsanih; ahpw ni atail sohte kin kapwaiada Sapwellime mahsen, kitail sohte ahniki inoupe.⁴ Met iei ah oaralap, oh e ese me e mehlel. E wehwehki duwen wia soun kolokol inou. E sohte ndand nan sampah. E sohte anahne en ndand. E wehweki ihs ih oh nein ihs ih—sapwellimen Koht serepein. Mehlel me aramas kak ndahki aht nohnohu me e wia mwahu ah pali.

President Gordon B. Hinckley mahsanih mepwukat me pid lih oh nohno:

“Kitail sohte kak en manokehla kehlail en lih. … Iei nohno kan me kin keieu mie lipwarail ong mour en neirail serihkan. … Iei nohno kan me kin apwalih irail oh padahkihieng irail duwen Kauno. Lipwarail sohte weliepe. …

“… Irail soun kapikada mour. Irail soun apwalih serihkan. Irail soun padahkih peinakapw akan. Irail iei atail werek kesempwal. Irail iei iangatail tohn doadoahk nan kauwadahn wehin Koht. Ia uwen lap en arail pwukoa, uwen kaselel en arail pali.”⁵

Ia duwen nohno men de pahpa men eh pahn padahkiong serepein men mehlel poatoapoat oh kalapalap me kitail iei sapwellimen Koht serepein? Ia duwen atail kak sewese irail en sokasang nan sampah oh oh sokalahng nan wehin Koht?

Nan sampah me mour mwahu wie tikitikla, peinakapw akan anahne lih oh ohl en uh ni “duwen sounkadehde kan en Koht ni ahnsou koaros oh ni mehkoaros, oh ni wasa koaros.” Sohte ehu ansou tohrohr me kesempwal duwe ansou wet. Peinkapw akan anahne nohno kan oh mehn kahlemeng me wia karasaras en lih mour mwahu. Nohno kan, amwail ehupene ong noumwail serepein kan kesempwal douluhl, oh amwail karasaras pil duwehte. Duwen omw kin poakohng oh wauneki ah pahpa, ah priesthood, oh ah pwukoa sarawi pahn pil sansal oh mwein pahn kalaudla nan mwekid en noumw serepeino oh ah wiewia.

Dahkot pali me kitail koaros anahne “wia mwahuih”? Kalohko en peneinei dehde:

“Sang ni koasoandi sarawi, pahpa kan pahn kin kaunda arail peneinei kan ni limpoak oh mour pwung oh pwukoahki soahng kan me anahn ong mour oh en sinsile arail peneinei kan. Nohno kan pwukoahki keieu en apwalih keirdahn neirail serihkan. Nan pwukoa sarawi pwukat, pahpa kan oh nohno kan ahniki pwukoa en sewese emenemen ni duwen werek pahrek.…

Se keperki me emenemen aramas me kawehla inou kan en mour mwakelekel, me kin wiakawe ah pwoud de nah seri, de me sohte kapwaiada ah pwukoa kan ong ah peneinei pahn ehu rahn kadeingki mwohn Koht.”⁶

Nan mwehi suwed me Mormon momouriki, e nsensuwedkihla me lih oko katiasang soahng me keieu kaselel oh keneinei sang mehkoaros—arail mour mwahu oh mwakelekel.⁷

I kapwurehieng likwer en pwuralahng mour mwahu. Mour mwahu iei kehl oh manaman en sapwellimen Koht serepein. Dah me sampah pahn wiahla ma mour mwahu—mwohmw en madamadau oh mwekid me poahsoankihda koasoandi ile⁸—pahn wiahla mehkot me keieu kesempwal nan atail mwehi? Ma mour suwed, kilel en nenek, oh wiakaue aramas pahn tikitikla, e pahn malaulaula pwopwoud ohla, de mour ohla, oh mohngiong ohla kan? Soun kihda rohng kan kak kihda rohng de soahng kan me kin kakehlail oh kalapalapiala sapwellimen Koht serepein keneinei kan ah kaidehn kihdi oh wiahkihla me lih mwahl? Ia duwen ma aramas koaros wehwehki mehlel kesempwalpen lepin mahseno, “Kitail iei Sapwellimen Samatail Nanleng serepein kan,” ia pahn mwomwen epwelpen lih?

Sounpar kei samwalahro, ansou me kokoudahn Conference Center wet pahn kereniengehr imwisekla, I pidolong nan ihmw sarawi wet ni wasa me palangko mihie ni ei lisoarop kekeluwak oh kilahs pwehn perehla meseie, onop en vacuum de kamwakele carpet-o de me irepe nan tahto me ahi pwoudo sawsawas perekihdi. Nan mwoahl wet, misihn wie kamwkamwakid pwehl me elehieng en pwelipar uhdahn mosul nan ihmw wet. Ansou me e soandi, e soandihieng pohn taht oh carpet kapwo. Ahi doadoahk iei en vacuum. Eri ngehi vacuum oh vacuum oh vacuum. Mwurin rahn siluh, nei kisin vacuum-o mwasikala oh solahr kak doadoahk!

Mwurin souwas mwohn tepin tiepene lap eh pahn wiawi nan ihmw kaselel wet, ahi pwoud delepwohnihie. E pahn irepehdi keimwseklahn carpet nan mwoahl wet—pahn wasahn kapahrek wet.

Dene, “Mehnia iren pwuhk sarawi I en ntingidhi nan tihnsewen carpet wet?”

Oh I nda, “Mosiah 18:9: Uh ni ‘duwen sounkadehde kan en Koht ni ahnsou koaros oh ni mehkoaros, oh ni wasa koaros.’”

Nan sampah ieu me inenen kasongosong, iei me peinakapw akan oh lih koaros en Mwomwohdiso wet kin wiewia. Irail wia lipw mwahu. Irail mour mwahu oh wia mehn kahlemeng, loalokong oh pwerisek. Mie lipwarail me mwahu oh weksang koaros pwe irail kin weksang koaros. Irail wiewia mwahu arail pali.

Pahrekei samwalahro ansou me I wie vacuum-ih de kamwkamwakele carpet wet—nannanti en wia ahi kisin pali—I sohte lemehda me ehu rahn I pahn kesihnen wasaht ni paten nehi ka ahr pahn mih pohn carpet en nan mwoahl wet.

Rahnwet ni duwen sapwellimen Koht serepein, I uh ni duwen sounkadehde me E ketin ieias. Sises iei Krais-o. Ih me atail Soundoar. Iei pwehki Sapwellime meiroang en tomw poatoapoat me I pahn ehu rahn pwurala mour Reh—kasongosongehr, unsek, oh katengteng nan peneinei poatoapoat. I pahn kapingki erein pwehki ei wia lih emen, lih pwopwoud, oh nohno men. I kapingki me kitail mih pahn kaweid en emen soukohp en Koht, President Thomas S. Monson, oh I kapingki ohl mour pwung, me arail manaman en priesthood kin kapaiahda ahi mour. Oh I pahn pil kapingki erein kehlail me I kin alehdi sang manman en kakoahiek en Tomw en Sounkomouro ni ahi kin doula nantihiong en “wia mwahu [ahi] pali.” Ni mwaren Sises Krais, ahmen.