2010–2019
O i Matou o Afafine o lo Tatou Tama Faalelagi
Aperila 2013


O i Matou o Afafine o lo Tatou Tama Faalelagi

I le avea ai ma afafine o le Atua, o i tatou taitoatasi e faapitoa ma eseese i o tatou tulaga ma aafiaga. Ae peitai o a tatou vaega e tāua—aua e tāua i tatou.

O vaiaso uma lava, e tauloto ai e tamaitai talavou uma i le lalolagi atoa le autu a Tamaitai Talavou. Po o le a lava le gagana, o taimi uma lava ou te lagona ai nei upu, “O i matou o afafine o lo matou Tama Faalelagi, e alofa ia i matou, ma matou te alolofa foi ia te Ia,”1 e faamautu mai e le Agaga i lo’u loto ua moni ia. E le gata o se faamautuina o lo tatou faasinomaga—po o ai i tatou—ae o se faailoaga foi o lē e ona [afafine] ua i ai i tatou. O i tatou o afafine o se tamalii faaeaina!

I atunuu uma ma konetineta uma, ua ou feiloai i tamaitai talavou e talitonu ia i latou lava, ma atamamai e tautatala, e tumu i le malamalama, ua faaeaina ona o le malosi o le galulue faapea ma tofotofoga, ua i ai ni faatuatua mama ma faatauvaa. Latou te ola mama. Latou te tausi feagaiga ma e “tutu o ni molimau a le Atua i taimi uma ma i mea uma, ma i nofoaga uma.”2 Latou te iloa po o ai i latou ma ua i ai so latou matafaioi taua e faatino i le fausiaina o le malo o le Atua.

A o o’u i ai i le kolisi, sa avea au ma se tasi o le Ausiva Masani Faavaomalo a le BYU. I se tasi taumafanafana, sa maua ai e le matou vaega se avanoa tulaga ese e maimoa faataamilo ai i misiona i Europa. Sa avea o se taumafanafana faigata lea ia te a’u ona o ni nai masina na muamua atu, na maliu faafuasei ai lo’u tamā. A o matou i ai i Sikotilani, na ou lagona le tuua na o au ma oo ina o’u lotovaivai. Na matou sisiva i se falelotu i lena po, ma ina ua uma le matou faafiafiaga sa matou o atu loa i le maota o le misiona lea sa i autafa atu. A o faaauau atu la’u savali, sa ou vaaia se maa sa taatia ai i le togalaau na teuina lelei i talaane o le pa. O luga o le maa sa ou faitau ai i upu, “Po o le a lava lau matata, fai ia lelei lau vaega.” O le taimi lena na matuai gotouga i le taele o lo’u fatu na upu, ma sa ou lagonaina ia mana o le lagi o aapa mai ma aumai ia te a’u se savali. Na ou iloaina ai sa silafia a’u e se Tama Faalelagi agaalofa. Na ou lagonaina sa lei tuua na o au. Na ou tutu i lena togalaau ma ou tagi ai. “Po o le a lava lau matata, fai ia lelei lau vaega.” O lena faamatalaga faatauvaa na toefaafouina ai la’u vaaiga mamao e faapea, na silafia a’u e le Tama Faalelagi ma na i ai sana fuafuaga mo lo’u olaga, ma o le agaga na ou lagonaina na fesoasoani ou te malamalama ai e tāua la’u vaega.

Mulimuli ane, na ou iloa ai o lenei faaupuga na musuia ai foi le perofeta o Tavita O. MaKei a o auauna ai o se faifeautalai talavou i Sikotilani. Na ia vaaia i luga o se maa i se fale i se taimi o le lotovaivai a o i ai i lana misiona, ma sa siitiaina o ia e na upu. O tausaga mulimuli ane a o tuuina i lalo le fale, na ia faia ni fetuunaiga ina ia aumai le maa ma faataatia i totonu o le togalaau i le maota o le misiona.3

I le avea ai ma afafine o le Atua, o i tatou taitoatasi e faapitoa ma eseese i o tatou tulaga ma aafiaga. Ae peitai o a tatou vaega e tāua—aua e tāua i tatou. O a tatou saofaga i aso uma i le faafaileleina, aoaoina, ma le tausiga o isi e foliga foi o se mea masani, tau le iloa, faigata, ma ta’u faatauvaaina i nisi o taimi, ae ui i lea, pe a tatou manatualena laina muamua o le autu a Tamaitai Talavou—“O i matou o afafine o lo matou Tama Faalelagi, e alofa ia i matou”—o le a faia ai le eseesega atoa i a tatou mafutaga ma a tatou tali.

E le’i mamao atu, na maliu ai lo’u tina maoae, i le 92 o tausaga o lona soifua. Sa ia tuua lenei olaga i le tino e pei ona sa ia soifua ai—filemu. O lona olaga sa le o le mea lea sa ia fuafuaina. O lana tane, o lo’u tama, na maliu ina ua 45, na tuua ai o ia ma se fanau e toatolu—o a’u ma o’u tuagane e toalua. E 47 tausaga na nofo ai o ia o se tagata ua maliu lana tane. Sa ia tausia lo matou aiga e ala i le faiaoga i le aoga i le aso ae faiaoga i lesona ta-piano i le po. Sa ia tausia lona tama ua toeaina, lo’u tamamatua, o le sa nofo i le fale tuaoi. Sa ia faamautinoa o matou aoaoga uma i le kolisi. O le mea moni, sa ia finafinau i ai ina ia mafai ona avea i matou na ni “tagata e saofagā.” Ma sa le’i faitio lava o ia. Sa ia tausia ana feagaiga, ma ona sa ia faia, o lea sa ia talosagaina ai mana o le lagi e faamanuia lo matou aiga ma ia auina mai ni vavega. Sa faalagolago o ia i le mana o le tatalo, perisitua, ma folafolaga o feagaiga. Sa faamaoni o ia i lana auaunaga i le Alii. O lona tuuto mausali sa taofiofia ai i matou, o lana fanau. Sa masani ona ia ta’uina mai ia i matou le mau: “O A’u, o le Alii, e noatia a’u pe a outou faia mea ou te fai atu ai; ae a outou le faia mea ou te fai atu ai, e leai se folafolaga mo outou.”4 O lana mautauave lena, ma sa ia iloaina e moni. Sa malamalama o ia i le uiga o le avea ma se tagata tausi feagaiga. Sa le’i taualoa o ia e le lalolagi. Sa le’i manao o ia i lena mea. Sa malamalama o ia i lona tagata ma po o ai e anaina o ia—o se afafine o le Atua. Ioe, e mafai ona ta’ua e faapea i lo matou tina, sa ia faia lelei lana vaega.

I tamaitai ma tina, na saunoa atu ai Peresitene Gordon B. Hinckley i se taimi:

“E le tatau ona faasēloa i la tatou vaai le malosi o se tamaitai. O tina e sili ona patino o latou aafiaga i olaga o a latou fanau. … O tina e faafaileleina i latou ma tausi i latou i ala o le Alii. O a latou faatosinaga e le mafaatusalia. …

“…O i latou o foafoa o le ola. O i latou e atiaeina le fanau. O i latou o faiaoga o tamaitai talavou. O i latou o a tatou soa taua. O i latou o a tatou soātau i le fausiaina o le malo o le Atua. E maoae la latou matafaioi, e ofoofogia la latou saofaga.”5

E faapefea la ona totoina e se tina ma se tama i so laua afafine faapelepele le upumoni faamamaluina ma le faavavau e faapea, o ia o se afafine o le Atua? E faapefea ona tatou fesoasoani ia te latou ia ia laa ese mai le lalolagi ma laa atu i totonu o le malo o le Atua?

I se lalolagi ua fai ifo ai tulaga faatonuina lelei, e manaomia e tamaitai talavou ni tamaitai ma ni alii e “tutu atu o ni molimau a le Atua i taimi uma ma i mea uma, ma i nofoaga uma.” E le’i ai se taimi muamua ua sili atu ai le taua o lenei mea nai lo o le taimi nei. E manaomia e tamaitai talavou ni tina ma ni taitai e faataitaia amioga mama faaletamaitai. Tina, o la oulua mafutaga ma lau tama e matuai taua tele, ma e faapena foi i au faataitaiga. O le ala e te alofa ai ma faamamaluina ai lona tamā, lona perisitua, ma lana matafaioi paia, o le a atagia ma atonu e faalauteleina i uiga faaalia ma amioga a lau tama.

O le a lena vaega lea e tatau ia i tatou uma ona “faia lelei”? O loo manino lava i le folafolaga i aiga:

“I le fuafuaga paia, e tatau ona pulefaamalumalu tamā i o latou aiga i le alofa ma le amiotonu ma o i latou e tuuina atu mea e manaomia o le olaga ma le puipuiga mo o latou aiga. O le uluai matafaioi a tina o le faafaileleina lea o a latou fanau. O nei matafaioi paia, e ao i tamā ma tina ona fesoasoani le tasi i le isi o se paaga tutusa. …

“Matou te lapatai atu o tagata taitoatasi o e ua solia feagaiga o le ola mama, o e faasaunoa i taitoalua po o fanau, o e ua faatalale i le faataunuuina o tiutetauave faaleaiga, o le a i ai se aso tou te tutu atu ai e tali atu i luma o le Atua.”6

I le lalolagi le mama o le vaitaimi o Mamona, sa ia faaalia ai le faanoanoa ona sa aveesea mai i tamaitai le mea ua silisili ona pele ma taua i luga o mea uma lava, o le le gaoia lea ma le mama.7

Ou te toe faafouina le valaau mo se toe foi i le mamā. O le mamā o le malosiaga ma le mana o afafine o le Atua. O a ni foliga o le a i ai le lalolagi pe afai e toe faafoi mai mamanu o le mamā—o mafaufauga ma uiga faaalia e tusa ai ma le tulaga maualuga o le amiomama—tulaga faatonuina, e aofia ai le ola mama8—i lo tatou lalolagi e avea o se tulaga faatonuina e aupito sili ona faatauaina? Afai e faaitiitia le ola le mama, ponokalafi, ma sauaga mataga, mata o le a itiiti ni faaipoipoga malepelepe, olaga nutipalaina, ma loto nutimomoia? Mata e faamamalu ma lagolago e ala o faasalalauga nai lo le osofaia ma faatamaia o afafine faapelepele o le Atua? Afai e malamalama tagata soifua uma i le taua o le faamatalaga “O i tatou o afafine o lo tatou Tama Faalelagi,” o le a se manatulia ma se faiga o le a taulima ai tamaitai?

O ni nai tausaga ua mavae, a o fausiaina lenei Maota Autu mo Konafesi ma ua lata ona faamaeaina, sa ou ulu mai ai i totonu o lenei maota paia i le fogafale faatautau i se pulou malō ma ni matatioata mo le puipuiga, ua sauni e salu le kapeta lea sa fesoasoani ai lo’u toalua e faapipii. O le tulaga lea ua tu ai nei le pulelaa sa i ai se tamai palau sa faaaoga e aveese ai le pefu, ma sa mafiafia le pefu i totonu o lenei fale. Ina ua to’a, sa to’a i luga o le kapeta fou. O lau vaega o le faamamaina lea i le tamai masini mitipefu. Ma o lea sa ou faamamaina ai ma faamamaina ma faamamaina. Ina ua mavae aso e tolu, na le toe ola si au tamai masini mitipefu!

O le aoauli a o lumanai le uluai konafesi aoao i totonu o lenei maota matagofie, sa telefoni mai ai lo’u toalua ia te a’u. Sa saunia e faapipii le vaega mulimuli o le kapeta—i lalo o lenei pulelaa lauiloa.

Na fesili mai o ia, “O le a se mau e tatau ona tusia i le pito i tua o le kapeta lenei?”

Na fesili mai o ia, “Mosaea 18:9: ‘Tu o [se molimau] a le Atua i taimi uma ma i mea uma, ma i nofoaga uma.’”

I se lalolagi ua matuai luitauina lava, o le mea lena o loo o’u vaai o fai e tamaitai talavou ma tamaitai uma o lenei Ekalesia. O i latou o se faatosinaga mo le lelei. O i latou e mama ma fai ma faataitaiga, atamamai ma galulue malosi.. O loo latou faia se eseesega aua e ese i latou. O loo lelei le faatinoga o lo latou vaega.

I tausaga ua mavae, a o ou saluina lenei kapeta—sa taumafai e fai lelei la’u vaega faatauvaa—ou te le’i iloa o le a i ai se aso o le a tu ai o’u vae i luga o le kapeta o loo i lalo o lenei pulelaa.

I le asō i le avea ai o se afafine o le Atua, ou te tulai e avea o se molimau o loo soifua o Ia. O Iesu o le Keriso. O Ia o lo tatou Faaola. E ala atu i Lana taulaga togiola e le iu, o le a mafai ai ona ou toe foi atu i se aso e mafuta ma Ia—faamaonia, mama, ma faamauina i se aiga e faavavau. O le a faavavau pea ona ou viia o Ia mo le faamanuiaga o le avea ma se tamaitai, se avā, ma se tina. Ou te molimau atu o loo taitaia i tatou e se perofeta a le Atua, o Peresitene Thomas S. Monson, ma ou te faafetai mo tamalii amiotonu, o le mana o o latou perisitua ua manuia ai lo’u olaga. Ma o le a ou faafetai pea lava mo le malosi o loo ou maua e ala mai i le mana gafatia o le Togiola le iu a le Faaola a o faaauau ona ou taumafai e “fai lelei [la’u] vaega.” I le suafa o Iesu Keriso, amene.

Faamatalaga

  1. Alualu i Luma a Tamaitai Talavou (tamaitusi, 2009), 3.

  2. Mosaea 18:9.

  3. Tagai Matthew O. Richardson, “‘What E‘er Thou Art, Act Well Thy Part’: John Allan’s Albany Crescent Stone,” Journal of Mormon History, vol. 33 (Fall 2007), 31–61; Francis M. Gibbons, David O. McKay: Apostle to the World, Prophet of God (1986), 45.

  4. Mataupu Faavae ma Feagaiga 82:10.

  5. Gordon B. Hinckley, “Tu Malosi ma le Mausali,” Fonotaga Faaleaoaoga a Taitai i le Lalolagi Atoa, 10 Ian., 2004, 21.

  6. “O Le Aiga: O Se Folafolaga i le Lalolagi,” Liahona, Nov. 2010, 129.

  7. Tagai Moronae 9:9.

  8. Tagai Alualu i Luma a Tamaitai Talavou, 70.