Kuht Pa Acn Nuhtin Pahpah Tuhmasr Inkuhsrao

Sel Elaine S. Dalton

Tuhfahna Fihlfihllac Prestuhn Luhlahp ke U luhn Muhtwacn Fuhsr


Oa acn nuhtin God, kais sie sesr siena ke ohiyacsr ac ma kuht puhlakihn. Ac tuhsruhk oasr srihpacn ip lasr uh—ke srihpen oasr srihpacsr.

Wik nuh kwewa muhtwacn fuhsr fin facluh nohfohn kalweni sifac luhn Muhtwacn Fuhsr uh. Finne ke kahs fuhkah, kais sie pacl nga lohng kahs inge, “Kuht acn nuhtin Pahpah tuhmasr Inkuhsrao, suc luhngse kuht, ac kuht luhngse El,”1 Nguhn uh ahkkweye nuh ke nguhnihk lah ma inge pwacye. Tiac sie kahs in ahkpwacyei ohiyacsr muhkwena—lah suc kuht uh—tuhsruhk oacyacpac akihlenyuck se lah suc kuht uh. Kuht acn nuhtin El suc fuhlwactlacna!

Ke facl ac muhtuhn facl nuh kwewa, nga ohsun nuh sin muhtwacn fuhsr puhlaik, suhmaht, sesseslah ke kahlwem, kapkapwack ke orekma upac ac ma upac, sruokyacna luhlahlfongi nwacsnwacs ac wo. Elos nwacsnwacs wo. Elos liyacacng olweacng suc tuyak oacna mwet loh luhn God ke pacl nuh kwewa ac ke ma nuh kwewa, ac ke acn nuh kwewa.2 Elos etuh lah suc elos uh ac lah elos eis sie kunohkohn yohk srihpac in oruh ke muhsahi tohkohsrahi luhn God.

Ke nga wi lutlut fuhlwact, nga sie mwet ma wi BYU International Folk Dancers. Sie suhmuhr ah, u se lasr inge eis pacl wo la in som nuh ke misin fin acn Europe. Summer na upac se nuh sihk ke srihpen mahlwem ekahsr na met ah pahpah se tuhmuhk ah misac ke lut. Ke kuht sun acn Scotland, nga puhla muhkahimtacl ac suhpwacrlac. Kuht tacn ke sie lohm alu ke fong sac ac na tukun tacn lasr ah kuht som nuh ke lohm in misin se an siskac ah. Ke nga fahsryang nuh ke lohm sac, nga liyacack sie yot ma fihliyucki ke sie imac ma karihngihnyuckyang ke sisken kalkal ah. Nga riti kahs inge fac, “Suc kom an, oruh in wo ip lom an.” Ke pacl sac na kahs ingacn kahlyac insiyuck, ac nga puhlakihn kuh luhn inkuhsrao kolyuckme ac use nuh sihk sie pweng. Nga etuh lah Papah Lucng El etweyuc. Nga puhlakihn lah nga tiacna muhkwena. Nga tu lun imac sac tuhng. “Suc kom an, oruh in wo ip lom an.” Pohloh kahs fihsrwacsr se ingacn ahksasucyelah nuhnak luhk uh lah Pahpah Lucng El etweyuc ac oasr sie plwacn nuh ke moul luhk uh, ac nguhn ma nga puhlakihn ah kahsrweyuc in kahlwem kac lah ip luhk uh oasr srihpac.

Tohkoh, nga etwacack lah fahk se inge tuh sie pacl ah moklwelwack mwet pahluh David O. McKay ke el tuh kuhlwacnsap oa sie misinerri fuhsr fin acn Scotland. El tuh liyacack ke sie yot ke sie lohm ke sie pacl suhpwacr ke misin lal, ac kahs inge sruhkuhlwack. Yac ekahsr tohkoh ke lohm sac kuhnanuclac ah, el oruh inkacnek in eis yot sac ac fihliyac ke imac ke lohm in misin sac.3

Oa acn nuhtin God, kais sie sesr siena ke ohiyacsr ac ma kuht puhlakihn. Ac tuhsruhk oasr srihpacn ip lasr uh—ke srihpen oasr srihpacsr. Ma kuht sang ke kahsruh in kahsruh tuhfahlah, luti, ac karihngihn mwet sahyac uh sahp oacna in mwe alsruhngwesr, srihklac, upac, ac mwe ahkmwekihn ke kuhtuh pacl uh, ac tuhsruhk ke kuht esam pohloh kahs se emet ke u luhn Muhtwacn Fuhsr—“Kuht acn nuhtin Pahpah tuhmwacsr Inkuhsrao, suc luhngse kuht”—ac fah oruh yohk eklac ke kuhpahsr ac top lasr uh.

Ke pacl na fototo somlah ah, ninac matwac yac 92 se misac. El som liki moul suhkawihl se inge oacna ke el tuh moul ah—mislac. Moul lal ah tiac oacna ma el plwacni. Mukul tuhmwacl ah, suc pa pahpah tuhmuhk, el misac ke el matwac yac 45, fihliyac tuhlihk tolu yohrohl—nga ac tamuhlwel luo wiyuck. El moul sun lusen yac 47 oa sie katinmas. El karuhnguhnwacng sucu lasr uh ke el luti ke lutlut ah ke lwen ac luti ohkohn ke fong. El karuhnguhnwacng pahpah mahtuhuh se tuhmwacl, pahpah mahtuh tuhmuhk, suc muhta siskacsr. El ahklohye tuh kais sie sesr in eis lutlut fuhlwact. El tu na kuh kac kuht in muh kuh in “wi sang.” Ac el tiacna tohrkahskahs. El sruokyac na olweacng lal, ac ke srihpen el orwaclah, el suli kuh luhn inkuhsrao in ahkinsewowoye lohm sesr ac in suhpuh ma usrnguck. El fungyang nuh ke kuh luhn pruhe, pristut, ac olwelah luhn olweacng uh. El oaru ke kuhlwacnsap lal nuh sin Leum. Insacnweacng kuh lal ahkkweye kuht, suc tuhlihk nahtuhl. El kwacna kalweni ma suhmuhslah lah Leum El enenuh in oruh ke kuht oruh ma El fahk; tuhsruhk ke kuht tiac oruh ma El fahk uh, wacngihn olwelah lasr.”4 Pa ingacn pohloh kahs lal uh, ac el etuh lah ma inge pwacye. El kahlwem kac lah meac kalmeyac in sruokyac na wuhlweacng. El tiacna akihlenyuck sin facluh. El tiacna ke. El etuh lah suc el uh ac nuhtin suc el uh—sie tuhlihk muhtwacn nuhtin God. Pwacyena lah, kuh in fwack ke ninac kiyacsr ah lah el orwaclah wo ip lal.

Ke muhtwacn ac ninac uh, Prestuhn Gordon B. Hinckley el tuh fahk sie pacl ah:

“Kuht enenuh in tiac muhlkuhnlah kuh luhn muhtwacn uh. … Ninac uh pa kwacna mokle moul luhn tuhlihk nahtuhlos. … Ninac uh pa karuhnguhnuhlos ac tuhfahloslac ke ohiyac luhn Leum. Mokleyuck lalos yohk srihpac. …

“… Elos pa mwet orwaclah moul uh. Elos pa karuhnguhnwacng tuhlihk uh. Elos pa mwet luti luhn muhtwacn fuhsr uh. Elos pa kawuck yohk srihpac lasr. Elos pa mwet tuhlan orekma lasr in muhsaheack tohkohsrahi luhn God. Fuhkah wolacnaiyacn ma kunaclos, fuhkah wolacnaiyacn mwe sang lalos.”5

Na sie ninac kuh sie pahpah kuh in akiyac fuhkah nuh sin acn nahtuhlos ma pwacye wo ac ma pahtpaht lah el acn nuhtin God? Kuht ac kahsrwelos fuhkah in srollah liki facluh ac sroacng nuh ke tohkohsrahi luhn God?

Ke facl ma kais kuhtuh na koluklac, muhtwacn fuhsr uh enenuh muhtwacn ac mukul uh in tuyak in mwet loh luhn God ke pacl nuh kwewa ac ke ma nuh kwewa, ac ke acn nuh kwewa. Wacngihn pacl ma yohk srihpac oacna inge. Muhtwacn fuhsr uh enenuh ninac ac mwet in lotwelos suc ahkkahlwemye ohiyac wo luhn muhtwacn uh. Ninac an, ohiyacn inmahsrlowos ac acn nuhtuwos an arulacna yohk srihpac, ac oacyacpac ohiyacn srihkasrak lom an. Kowos luhngse ac kaksakihn fuhkah pahpah tuhmwacl an, pristut lal, ac kunohkohn muhtahl lal ac fah ahkkahlwemyeyuck ac sahp ahkyohkyeyuck ke atacn ac elahn acn nuhtum an.

Meac ip se ma kuht nuh kwewa enenuh in “oruh in wo” uh? Mwe fahkwack luhn sucu uh kahlwem:

Ke plwacn muhtahl, pahpah uh in karihngihn sucu lalos ke luhngse ac suwohswohs ac ma kunaclos in sang ma enenuh luhn moul uh ac in karuhnguhnwacng sucu lalos. Ma kunacn ninac uh pa in liyacacng tuhlihk nahtuhlos. Ke kunohkohn muhtahl inge, pahpah ac ninac uh enenuh in akacsruhi oa mwet oacna sie inmahsrlo. …

Kuht ahksensenye lah mwet ma kuhnaoslah olweacng luhn nwacsnwacs, suc ahkkohsye elos suc elos pahyuck se kuh tuhlihk nahtuhlos, suc tiacna oruh kunohkohn in sucu uh ac fah sie pacl tu in topuk ma inge ye muhtuhn God.6

Ke acn ma koluk ke pacl lal Mormon ah, el ahsor lah muhtwacn ah tuh ahkkolukyeyucklac ke ma sacohk emet ah uh—ohiyac wo ac nwacsnwacs.7

Sifilpac nga ahksasucye pahng se in fohlohk nuh ke ohiyac wo. Ohiyac wo pa ma fokoko ac kuh luhn acn nuhtin God. Ac fuhkah facluh fin ohiyac wo—pactuhn ke nuhnak ac elah wiwina ohiyac suwohs fuhlwact, weacng tiac kosro8—tuh sifilpac fohlohkihnyuckme nuh fin acn sesr oacna sie ma yohk srihpac na pwacye? Fin ma koluk, petsac koluk, ac ahkkohs uh srihkeni, yac ac suhpuhseni macruht kuhnaosyucklac, moul kuhnaosyucklac, ac inse muhsahl? Kuh ma sulkackihnyuck ke retio ac tv uh ahkfuhlwactye ac ahkkweye liki na in suhmuhngnguh ac ahksrihkye acn sacohk nuhtin God? Fin mwet nuh kwewa kahlwem ke yohk srihpaciyacn pohloh kahs se inge “Kuht pa acn nuhtin Pahpah tuhmwacsr Inkuhsrao,” muhtwacn uh ac motkweyuck ac liyeyuckyang?

Yac ekahsr somlah ah, oacna ke Conference Center se inge apkuhran in sahflah muhsah kac, nga utyak nuh ke lohm muhtahl se inge ke sacwuhlsrihsr ke twek se sun susu kwekwe se ac kuhlahs in sefti, ahkolah in fahkyumi karpet ma mukul se tuhmuhk ah kahsruh ahknoeyac ah. Ke acn in tu sramsram sac packo soko ma orekmakihnyuck in mokle fohk uh, ac kutkut srihsrihk ke lohm se inge mahtoltol. Ke puhtati uh, puhtatlac nuh fin carpet sasuc sac. Ip luhk pa in fahkyumi. Ac oruh nga fahkyum ac fahkyum ac fahkyum. Tukun lusen lwen tolu, fahkyum srihsrihk se intihk ah muhsahllah!

Ekuh se met liki toeni luhlahp se emet lun lohm kahto se inge, mukul tuhmuhk uh tuh pahngonyuc. El ac tuhfahna oruh in ahknoeyac ip sahflah ke karpet sac—ye acn in tu sramsram mahtuh se inge.

El siyuck, “Ma suhmuhslah fuhkah ngwac suhmuhslah fin tukun karpet se inge uh?

Ac ga fahk, Mosiah 18:9: fahk muh tuyak oacna [sie mwet loh] luhn God ke pacl nuh kwewa ac ke ma nuh kwewa, ac ke acn nuh kwewa.

Ke sie facluh na upac, pa ingacn ma muhtwacn fuhsr ac muhtwacn nuh kwewa ke Alu se inge oruh uh. Elos mwet mokleyuck ke ma wo. Elos wo ac suwohswohs, lahlmwetmwet ac oaru. Elos oruh oasr eklac ke srihpen elos pa siena uh. Elos oruh wo ip lalos uh.

Yac ekahsr somlah ah, ke nga tuh fahkyumi karpet se inge—srihke in oruh in wo ip srihsrihk kunuck—nga tiacna akihlen lah sie pacl ngwac muh tulac ke niyuck fin karpet se ke acn in tu sramsram se inge.

Mihsenge oacna sie acn nuhtin God, nga tuyak oacna sie mwet lohoh lah El moul. Jisus pa Kraist. El pa Mwet in Molwelah lasr. Ke kihsacn iwaclah ma pahtpaht Lal ma nga fah sie pacl fohlohklac muhta Yohrohl—ahkpwacyelah, nwacsnwacs, ac siliyucki nuh ke sie sucu ma pahtpaht. Nga fah kaksyakuhnuhl pacl nuh kwewa ke pacl wowo luhk in oruh sie muhtwacn, sie muhtwacn pahyuck, ac sie ninac. Nga fahkwack lah kuht kolyuck sin sie mwet pahluh luhn God, Prestuhn Thomas S. Monson, ac nga tarilacna nuh sin mukul suwohswohs, suc kuh luhn pristut lalos ahkinsewowoye moul luhk uh. Ac nga fah kulohkihn ma pahtpaht ke kuh ma nga eis ke kuh ke Iwaclah luhn Mwet Lahngo ke nga fahfahlacna in “oruh in wo ip [kunuck].” Ke inen Jisus Kraist, amen.

Mostrar las referencias

  1.  

    1. Young Women Personal Progress (booklet, 2009), 3. Young Women Personal Progress (booklet, 2009), 3.

  2.  

    2. Liye Mosiah 18:9.

  3.  

    3. Liye Matthew O. Richardson, “‘What E‘er Thou Art, Act Well Thy Part’: John Allan’s Albany Crescent Stone,” Journal of Mormon History, vol. 33 (Fall 2007), 31–61; Francis M. Gibbons, David O. McKay: Apostle to the World, Prophet of God (1986), 45.

  4.  

    4. Liye Doctrine and Covenants 82:10.

  5.  

    5. Gordon B. Hinckley, “Standing Strong and Immovable,” Worldwide Leadership Training Meeting, Jacnweri 10, 2004, 21.

  6.  

    6. “Sucu: Sie Mwe Fahkwack Nuh Fin Facluh,”Ensign kuh Liahona, Nohfohmpuh 2010, 129.

  7.  

    7. Liye Moroni 9:9.

  8.  

    8. Liye Young Women Personal Progress,70.