Yumi Wan

Lod i bin mekem i klia long stat blong las dispensesen ia se yumi mas tekem gospel i go long ful wol. Wanem Hem i bin talem long sam prishud lida blong Hem long 1831, Hem i stap talem long plante naoia. Nomata wanem yia blong yu, paoa blong yu, Jos koling blong yu o ples we yu stap long hem, yumi olsem wan pipol we Hem i singaotem yumi long wok ia blong helpem Hem blong tekem ol sol i kam kasem taem Hem i kambak bakegen. Hem i talem long ol fas wokman long plantesen blong hem

se Hem i givim wan komanmen long olgeta, se evri man, tugeta we i elda, o i pris, o i tija, mo tu, we i memba, blong go wetem strongfala paoa blong hem, mo wok strong wetem ol han blong hem, blong rere mo mekem i hapen, ol samting we Hem, Lod, i givim oda from.

Mo blong oli mekem prijing blong olgeta i stap olsem voes blong woning, evri man i tok long neiba blong hem, wetem voes we i sofsof mo i no stap flas,

mo blong oli go aot long medel blong ol nogud man. Oli mas sevem olgetawan. Mo olsem ol man we oli stap tekem toktok blong Lod i go, oli mas stap klin.¹

Naoia, yufala, ol memba blong Aronik Prishud i save luk se oda blong Lod i tekem yufala tu. Naoia we yufala i save se Lod i stap mekem rere wan rod oltaem blong obei long ol komanmen blong Hem, yufala i save luk se bae Hem i mekem hemia long wanwan long yufala.

Bae mi talemaot long yufala olsem wanem Hem i bin mekem hemia long wan boe we, naoia, i stap long ofis blong pris long Aronik Prishud. Hem i gat 16 yia. Hem i stap long wan kantri we ol misinari oli kam blong fas taem i no plante yia i pas. Oli gat wok blong tufala taon, be i no long taon ia we boe ia i stap long hem.

Taem hem i bin yangfala, papa mo mama blong hem oli tekem hem i go long Yuta blong hem i stap sef. Famle ia, ol misinari oli tijim mo baptaesem olgeta. Hem i no baptaes long Jos from se hem i no gat eit yia yet.

Papa mo mama blong hem, tufala i ded long wan aksiden. Mekem se bubuwoman blong hem i mekem hem i gobak hom, i krosem bigfala solwota, i gobak long taon we hem i bon long hem.

Hem i stap wokbaot long rod long Maj, jes wan yia i pas taem hem i filim se hem i mas toktok long wan woman we hem i no save. Hem i toktok long hem long Inglis we hem i save tingbaot. Woman ia i nes, we misin presiden i sendem hem i kam long taon ia blong lukaotem haos mo dokta blong ol misinari we bae oli kam long ples ia. Hem mo woman ia i kam fren taem tufala i storian. Taem woman ia i gobak long misin hedkwota, hem i talem long ol misinari abaot boe ia.

Tufala fas elda i kasem ples long Septemba 2012. Smol boe ia i fas baptaes blong tufala insaed long Jos blong Jisas Kraes blong Ol Lata-dei Sent. Long manis Maj blong yia ia, hem i wan memba blong fo manis. Oli odenem hem i kam pris long Aronik Prishud blong mekem se hem i save mekem baptaes blong seken konvet long Jos. Hem i fas prishud paeonia blong tekem ol narafala pikinini blong Papa long Heven wetem hem blong stanemap Jos long wan taon we i gat samples 130 taosen pipol.

Long Ista Sandei, 31 Maj 2013, membasip blong Jos i gro i kasem sikis memba long taon ia. Hemwan nomo i lokol memba we i stap go long miting long Sandei ia. Hem i bin kasem kil long ni blong hem long dei bifo, be hem i gat strong tingting blong go. Hem i bin prea blong hem i save wokbaot i go long jos. Hem i pasem sakramen wetem fo yang elda mo wan kapol misinari.

Stori ia, i no gat samting i bigwan tumas long hem, sapos nomo yu luksave, se insaed long hem i gat paten blong han blong God blong bildimap kingdom blong Hem. Mi bin luk hemia plante taem.

Mi bin luk long Niu Meksiko, olsem wan yang man. Blong plante jeneresen, ol profet oli talem long yumi se yumi mas helpem ol misinari blong faenem mo tijim olgeta we oli gat wan ones hat, mo afta lavem olgeta we oli kam long kingdom.

Mi bin luk wanem nao ol fetful prishud lida mo memba oli save mekem. Long 1955, mi kam wan ofisa long Yunaeted Stet Ea Fos. Bisop blong mi long hom i givim wan blesing long mi jes bifo mi aot long fas stesen blong mi, we i stap long Albukek, Niu Meksiko.

Long blesing blong hem, hem i talem se taem blong mi long ea fos bae i wan misinari seves. Mi kasem jos long fas Sandei long Albukek Fas Branj. Wan man i wokbaot i kam luk mi, i talem se hem i distrik presiden, mo talem long mi se bae hem i singaotem mi blong stap olsem wan distrik misinari.

Mi talem long hem se bae mi stap ia blong wan trening blong sam wik nomo, afta, bae mi mas go long nara ples long wol. Hem i talem, “Mi no save long hemia, be mifala i stap singaotem yu blong givim seves.” Long medel blong ami trening blong mi, wan janis i kamaot; oli jusum mi aot long ol handred ofisa we i kasem trening blong tekem ples, long hedkwota, blong wan ofisa we i bin ded.

Mekem se, long tufala yia we mi stap longwe, mi wok long ofis blong mi. Long ol naet mo evri wiken, mi bin tijim gospel blong Jisas Kraes long ol pipol we ol memba oli tekem olgeta i kam.

Ol kompanion blong mi mo mi, i gat samples 40 aoa long wan manis long misinari seves mo mifala i no nid nating blong noknok long ol doa blong faenem wan blong tij. Ol memba oli fulumap ol plet blong mifala i fulap tumas, mekem se plante taem, mifala i stap tijim 2 famle long wan naet. Mi luk, miwan, paoa mo blesing long singaot blong ol profet blong evri memba i stap olsem wan misinari.

Long las Sandei, bifo mi aot long Albukek, fas stek i bin oganaes long taon ia. Naoia, i gat wan tabu tempol i stap ia, wan haos blong Lod, long wan taon we, long wan taem, mifala i stap mit long wan japel nomo wetem ol Sent we oli stap tekem ol fren i kam long mifala blong tijim mo filim witnes blong Spirit. Olgeta fren ia oli filim se i gat wan hom we i stap welkamem olgeta insaed long tru Jos blong Lod.

Mi bin luk hemia long Niu Inglan, taem mi go long skul. Oli bin singaotem mi olsem kaonsela blong wan gudfala distrik presiden we, fastaem i no gat intres long Jos, i kam wan man blong bigfala paoa long saed blong spirit. Hom tija blong Hem i lavem hem tumas, mekem se i sarem ae long bigfala siga blong hem mo luk wanem nao God i save luk long hem. Distrik presiden mo mi i draev i go long ol hil mo long saed blong solwota blong visitim ol smol branj we i fulumap Masajusets mo Rod aelan blong bildim mo blesem kingdom blong God.

Long ol yia we mi wok wetem bigfala lida ia, mitufala i luk ol pipol oli karem ol fren i kam long Jos tru long eksampol mo invitesen blong olgeta blong lisin long ol misinari. Long mi, ol branj ia oli gro slo mo oli no strong. Be long Sandei we mi aot, faef yia afta, 2 Aposol i kam blong oganaesem distrik blong mifala i kam stek long Longfelo Pak Japel long Kambrij.

Sam yia afta, mi gobak blong kondaktem wan stek konfrens longwe. Stek presiden i tekem mi blong luk wan ston hil long Belmon. Hem i talem long mi se bae i wan gudfala ples blong wan tempol blong God. Wan i stanap long ples ia naoia. Taem mi stap lukluk long hem, mi tingbaot ol memba we oli gat tingting i stap daon, we mi sidaon wetem olgeta long ol smol branj, ol neiba we oli stap invaetem olgeta, mo ol misinari we oli stap tijim olgeta.

I gat wan niu dikon long miting ia tedei long naet. Mi bin stap wetem hem long semfala Ista Sandei ia we pris ia, we mi tokbaot finis, i wokbaot i kam long wan memba miting. Dikon ia i glad tumas taem papa blong hem i talem se bae hem i stap wetem hem long prishud miting ia tedei long naet. Papa ia i bin wan bigfala misinari long misin we papa blong hem i bin presiden. Mi bin luk 1937 Misinari Hanbuk blong bigfala bubuman blong hem. Histri blong hem blong tekem ol pipol i kam long Jos i stat longwe i kam.

Mekem se, mi bin toktok wetem bisop blong dikon blong save wanem eksperiens boe ia i wantem gat blong tekem wok blong prishud blong karem tugeta ol sol blong Lod. Bisop i bin glad tumas taem hem i tokbaot olsem wanem wod misin lida i stap folemap progres blong ol investigeta. Hem i karem infomesen ia long ol misinari oltaem.

Bisop mo wod kaonsel blong hem i toktok raon long evri investigeta we i progres. Oli disaed wanem oli save mekem long wanwan man mo woman mo famle blong olgeta, blong helpem olgeta blong kam fren bifo baptaes, blong tekem olgeta long ol aktiviti, mo blong fidim olgeta we oli kasem baptaes long toktok blong God. Hem i talem se samtaem, ol misinari oli gat tumas apoenmen blong tij, mekem se oli tekem ol Aronik Prishud olsem ol kompanion.

Wod misin plan i tekem ol gol blong ol kworom blong invaetem olgeta we oli save blong oli mitim ol misinari. Mo tu presidensi blong kworom blong ol dikon i gat invitesen blong putum ol gol mo plan blong ol memba blong kworom blong oli help blong tekem olgeta we oli save i kam long kingdom blong God.

Nao. Ating dikon long strong wod mo pris long niu pris—hemia we i konvet—insaed long smol memba grup i no gat samting i semsemmak wetem wanwan long yufala o wetem yu. Mo bae yu luk se i no gat samting semmak wetem eksperiens blong yufala blong bildimap Jos wetem wanem mi luk olsem ol merikel long Niu Meksiko mo long Niu Inglan.

Be i gat wan wei we yumi stap wan long wok blong yumi long prishud. Yumi mekem yumi kam tabu mo mekem wanwan diuti blong yumi long komanmen ia blong tekem gospel i go long evriwan long ol pikinini blong Papa long Heven.

Yumi serem ol eksperiens long wei we Lod i bildimap kingdom blong Hem long wol ia. Insaed long Jos blong Hem, wetem evri gudfala tul mo oganaesesen we yumi kasem, i gat yet wan stamba trutok we ol profet oli tijim long hao yumi mas mekem prishud wok blong yumi long misinari wok.

Long 1959 Epril jeneral konfrens, Presiden Deved O. MaKei i tijim prinsipol ia, semmak olsem ol profet stat long taem ia, wetem Presiden Tomas S. Monson. Presiden MaKei i talem long las toktok blong hem, se long 1923, long misin long Inglan, i bin gat instraksen i go aot long ol memba blong Jos. Presiden i talem long olgeta blong no spendem mane blong putum atikol long niuspepa blong faet agensem ol nogud filing blong ol pipol agensem Jos. Presiden MaKei i talem se desisen i olsem: “Givim responsabiliti long evri memba blong Jos se long yia ia we i stap kam long 1923, evri memba bae i wan misinari. !Evri memba, wan misinari! Yu save karem mama blong yu i kam long Jos, o ating papa blong yu. Ating i wokfren blong yu insaed long woksop. Wan bae i harem gudfala mesej blong trutok ia tru long yufala.”

Mo Presiden MaKei i bin gohed: “Mo hemia nao mesej tedei. Evri memba—wan milian mo haf—!wan misinari!”²

Taem oli anaonsem, long 2002, se misinari wok bae i kam wan responsabiliti blong ol bisop, mi sapraes tumas. Mi bin wan. Long mi, i luk se oli stap karem wan hevi wok finis blong givhan long ol memba mo daerektem ol oganaesesen long wod.

Wan bisop we mi save, i luk se i no wan moa diuti, be wan janis blong mekem wod i kam tugeta long wan bigfala wok, long wan taem we evri memba oli kam wan misinari. Hem i singaotem wan wod misin lida. Hem i mit wetem ol misinari evri Satedei blong lanem abaot wok blong olgeta, blong leftemap tingting blong olgeta, mo blong lanem abaot progres blong investigeta blong olgeta. Wod kaonsel i faenem ol wei blong ol oganaesesen mo ol kworom blong yusum seves eksperiens blong olgeta olsem wan taem blong rere long misinari wok. Mo olsem wan jaj long Isrel, hem i bin helpem ol yang pipol oli filim ol blesing blong Atonmen blong kipim olgeta oli klin evriwan.

I no longtaem i pas, mi askem olsem wanem hem i eksplenem bigfala namba blong ol konvet baptaes long wod blong hem mo namba we i stap kam antap long saed blong ol yang pipol we oli rere mo wantem blong tekem gospel blong Jisas Kraes i go long wol. Hem i talem se long hem, i no wanwan wok we wan i mekem be hem i fasin we evriwan i bin kam wan blong glad tumas blong tekem ol pipol i kam long komuniti blong ol sent, we i mekem se oli hapi olsem.

Long sam, i hemia mo i moa. Olsem ol boe blong Mosaea, oli bin filim wanem sin i mekem long laef blong olgeta, mo ol gudfala hiling blong Atonmen insaed long Jos blong God. From lav mo tangkyu long presen we Sevya i mekem long olgeta, oli bin wantem blong helpem evriwan we oli save, blong ronwe long harem nogud blong sin, filim glad blong fogivnes, mo blong kam tugeta wanples long sef ples insaed long kingdom blong God.

Hem i lav blong God mo lav we oli gat long ol fren mo ol neiba we i mekem oli stap wan blong givim seves long ol pipol. Oli bin wantem tekem gospel long evriwan long pat blong olgeta blong wol. Mo oli bin mekem ol pikinini blong olgeta oli rere blong stap klin inaf blong Lod i singaotem olgeta blong tij, blong testifae mo blong givim seves long ol narafala pat blong plantesen blong Hem.

Nomata i wan bigfala wod we niu dikon ia bae i mekem diuti blong hem blong serem gospel mo bildimap kingdom, o insaed long smol grup we i stap longwe we longwe long ples we niu pris ia i stap long hem, bae oli stap wan long stamba tingting. Dikon ia, wetem insperesen we i kam long lav blong God, bae i go aot long wan fren we i no wan memba yet. Bae hem i tekem fren blong hem long wan seves o aktiviti blong Jos, mo afta, invaetem hem mo famle blong hem, blong ol misinari i tijim hem. Long olgeta we oli kasem baptaes, bae hem i stap olsem wan fren ia we bae oli nidim.

Pris ia, bae i invaetem ol narawan blong joenem hem long smol grup blong Ol Sent, long ples we hem i filim lav blong God mo gudfala pis blong Atonmen.

Sapos hem i gohed blong stap fetful long prishud diuti blong hem, bae hem i luk grup ia i kam wan branj, mo afta, wan stek blong Saeon bae i kam long taon blong hem. Bae i gat wan wod wetem wan bisop we i kea. Bae i save wan boe o apuboe blong hem, we, wan dei, bae i tekem wan wokman i go long wan hil kolosap mo talem: “Hemia bae i wan gudfala ples blong wan tempol.”

Mi prea se long weaples yumi stap long hem mo wanem diuti yumi gat long prishud blong God, bae yumi stap wan long wok ia, blong tekem gospel i go long ful wol mo bae yumi leftemap tingting blong ol pipol we yumi lavem blong oli kam klin long sin mo stap hapi wetem yumi long kingdom blong God. Long nem blong Jisas Kraes, we hemia i Jos blong Hem, amen.