2010–2019
Jej Juon Wōt
Eprōļ 2013


Jej Juon Wōt

Ij jar bwe jekdo̧o̧n ia eo jej pād ie im jekdo̧o̧n eddo ko ad ilo priesthood eo an Anij, jenaaj ippān doon ilo jerbal in n̄an bōkļo̧k ko̧jpeļ in n̄an aolepen laļ.

Irooj eaar kalikar ilo jino in iien bōk eddo in āliktata bwe kar kakien kōj n̄an kwaļo̧k ko̧jpeļ eo an n̄an aolepen laļ. Ta eo Ej ba n̄an elōn̄ rikabwijer ro an priesthood eo rainin ejja men eo wōt Eaar ba n̄an jet iaan rikabwijer priesthood ro ilo 1831. Jekdo̧o̧n ewi jon̄an rūtto eo ad, ta kapeeļ ko ewōr ippād, ta kūr eo ad ilo Kabun̄ in, ak ia eo jej jokwe ie. Jaar aolep kūr n̄an jerbal ippān doon n̄an jipan̄ E ilo An meļaaj an ad m̧ae Enaaj bar itok. Eaar ba n̄an rijerbal ro m̧oktata ilo jikin kallib eo:

Eaar kakien rijerbal ro m̧oktata ilo jikin kallib eo—kajjojo elder, pris, rūkaki, im barāinwōt membōr—n̄an jino kōn an kajoor im jerbal kōn pā ko pein n̄an kōpooje im kadedeļo̧k men ko Eaar kakien.

Eaar kakien bwe aer kwaļo̧k eaikuj ilo juon ainikien kakkōļ emera im ettā, kajjojo em̧m̧aan n̄an ritūrin.

Eaar barāinwōt kakien er n̄an ilo̧k jān ilubwiljin ro rinana; im n̄an lo̧mo̧o̧ren er make; im bwe ro rej rikabwijer jāpe an Irooj ren erreeo.1

Kiiō, kom̧ ro uwaan Priesthood eo an Aaron maron̄ loe bwe kean̄ eo an Irooj ej kobaik kom̧ ilo kakien in Kōn ami jeļā bwe Ej kōpooj juon iaļ n̄an aer kōjparok kien ko An, komaron̄ kōtmene bwe Enaaj kōm̧m̧ane n̄an kajjojo iami.

Kōtļo̧k bwe in jiron̄ kom̧ ekōjkan An kar kōm̧m̧ane n̄an ļaddik eo me eaar kabwijer opiij eo an pris ilo Priesthood eo an Aaron. Eaar 16 an iiō. Eaar jokwe ilo juon jikin ijo mijenede ro m̧oktata raar tōk eāāk ļo̧k juon iiō em̧ootļo̧k. Kar jitōn̄ er n̄an ruo bukwōņ ko, ak ejjab bukwōņ eo me ļaddik eo eaar jokwe ie.

Ke eaar lukkuun in dik wōt, ro jinen im jemen raar bōk tok e n̄an Utah kōn kōjparok. Kar katakin baam̧le eo im raar peptaij jen mijenede ro. Eaar jab peptaij n̄an Kabun̄ in kōnke eaar jab ralitōk an iiō ilo tōre eo.

Ro jinen im jemen raar mej ilo juon itaak in wa. Kōn menin leļļap eo jibwiņ eaar kōm̧m̧an bwe en ro̧o̧ltok n̄an kapijuknen eo an, kijoon lom̧alo, ro̧o̧l n̄an jikin eo ar lo̧tak ie.

Eaar etetal ilo iaļ eo ilo M̧aaj juon iiō em̧ootļo̧k ke eaar en̄jake bwe eaikuj in kōnono ippān juon kōrā eo ejaje kajjien. Eaar kōnono ippān ilo kajin Pālle eaar kememej. Liin eaar juon nōōj kar jilkinļo̧k jen mijen būreejtōn eo n̄an jikin eo n̄an kappok em̧ im jikin taktō n̄an mijenede ro me renaaj jerbal ijo ejjab to. E im kōrā eo raar jino m̧ōttā ilo aer ekōnono. Ke liin ar jepļaak n̄an mijen headquarter eo, eaar jiron̄ mijenede ro kōn e.

Elder ro ruo m̧oktata raar tōk eāāk ļo̧k ilo Jeptōm̧ba 2012. Ļaddik eo eatijinemjen ar ripeptaij eo m̧oktata tok n̄an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Ilo M̧aaj in iiō in eaar emen allōn̄ in an membōr. Eaar ekkapit n̄an pris ilo Priesthood eo an Aaronic im bwe en maron̄ peptaiji rioktak eo kein karuo n̄an Kabun̄ in. Eaar pioneer in priesthood eo m̧oktata n̄an kobaik ajri ro jet nejin Jemedwōj Ilan̄ n̄an kajutak Kabun̄ eo ilo juon jikin emaron̄ 130,000 armej.

Ilo Jabōt in Ijtō eo, M̧aaj 31, 2013, oraņ membōr ilo Kabun̄ in ijo eaar eddōkļo̧k n̄an jiljino membōr ro ilo jikin en. Eaar e wōt membōr ijo eaar pād ilo kweilo̧k eo Jabōt eo. Bukien eaar jorrāān raan eo m̧okta, bōtaab eaar jōk ilo e n̄an pād ijo. Eaar jar bwe en maron̄ etetal n̄an m̧ōn jar eo. Eaar bōk kwojkwoj eo ippān mijenede ro reddik im juon mijenede ripālele.

Bwebwenato in emaron̄ in jab kabwilōn̄lōn̄ ijello̧kin n̄e kwoj kile jon̄ak eo ilo pein Anij n̄an kalōk aelōn̄ in kiin̄ eo An. Em̧ōj aō loe elōn̄ alen.

Iaar loe ilo New Mexico āinwōt juon likao. Ium̧win epepen ko rikanaan ro raar jiron̄ kōj bwe jen jipan̄ mijenede ro pukot im katakin bōro ko rem̧ool im iakwe armej ro rej itok n̄an aelōn̄ in kiin̄ in.

Em̧ōj aō loe kōn n̄a make kōn ritōl ro an priesthood retiljek im membōr ro remaron̄ jerbal. Ilo 1955 Iaar erom̧ juon opija ilo United States Air Force. Bisop eo ilo kapijuknen eo aō ar letok juon kōjeram̧m̧an m̧okta jen aō etal n̄an ijjitōn̄ eo aō m̧oktata, eo ar pād ilo Albuquerque, New Mexico.

Ilo kōjeram̧m̧an eo ar ba bwe tōre eo aō ilo air force enaaj juon jerbal in mijenede. Iaar tōk eāāk ļo̧k ilo m̧ōn jar eo ilo Jabōt eo aō m̧oktata ilo Albuquerque First Branch. Juon em̧m̧aan eaar itok n̄an ippa, kar kwaļo̧k kadkadin make āinwōt district būreejtōn eo, im kar jiron̄ eō bwe ej tin kūr eō n̄an jerbal āinwōt juon district missionary.

Iaar jiron̄ ļo̧k e bwe Inaaj pād ijo n̄an kaminene kōn jejjo wōt wiik innām Inaaj bar ijjjitōn̄ n̄an bar jet jikin ilo laļ in. Eaar ba, “Ijaje kōn menin, ak kōm̧ ar aikuj in kūr eok n̄an jerbal.” Ilo io̧lepen kaminene in tariņae eo aō, kōn ta eo ar waļo̧k n̄an oktak, Iaar kālet jān bukwi in opija ro raar kaminene n̄an bōk jikin juon opija eo ar mej.

Kōn men in, ilo iiō ko ruo Iaar pād ijo, Iaar jerbal ilo kūr eo aō. Ilo kajjojo jota im kajjojo wiik, Iaar kwaļo̧k ko̧jpeļ eo an Jisōs Kraist n̄an armej ro membōr ro raar bōktok n̄an kōm̧

Ro m̧ōtta im n̄a kar jolo̧k elōn̄ ļo̧k jān 40 awa ko ilo juon allōn̄ ilo jerbal in mijenede eo am̧ ijelo̧kin kōlaļļaļ ilo kōjem ko n̄an pukot juon n̄an katakin. Membōr ro raar lukkuun kaboub kōm̧ bwe en emakijkij am̧ katakin ruo baam̧le ilo juon jota. Iaar lo kajoor eo kōn eō make im kōjerbal e ilo ālij kūr eo an rikanaan ro n̄an kajjojo membōr n̄an erom juon mijenede.

Ilo Jabōt eo āliktata m̧okta jen aō likūt Albuquerque, stake eo m̧oktata ar ejaak ilo jikin eo. Ewōr kiiō juon tampeļ ekwojarjar ijen, juon im̧ōn Irooj, ilo juon jikin ijo me kōm̧ij ioon doon ilo juon im̧ōn jar ippān Armej ro Rekwojarjar ro raar bōktok ro m̧ōttaer n̄an kōm̧ n̄an katakin im n̄an en̄jake kam̧ool eo an Jetōb. Raar en̄jake ruwainene im ilo im̧ōn Irooj em̧ool.

Iaar lo menin bar ilo New England ke iaar etal n̄an jikuuļ. Kar kūr eō āinwōt rikakpilōklōk n̄an juon district būreejtōn eo em̧m̧an me kar bōktok jān an kar jab itoklimo ilo Kabun̄ in n̄an juon em̧m̧aan eļap kajoor ilo jetōb. Rūkaki in m̧ōko an raar iakwe e n̄an kowaan jikka eo kijen im lo ta eo Anij emaron̄ kar lo ilo e. District būreejtōn eo im n̄an kar ettōrļo̧k ilo bat ko im itōrerein parijet ko n̄an loļo̧k branch ko reddik me raar pād ilo Massachusetts im Rhode Island n̄an kalōk im kōjeram̧m̧an aelōn̄ in kiin̄ an Anij.

Ilo iiō ko Iaar jerbal ippān ritōl in em̧m̧an, kōm̧ ar lo an armej ro bōktok ro m̧ōttāer n̄an Kabun̄ in kōn waanjon̄ak im karuwainene ko aer n̄an ron̄jake mijenede ro. N̄a n̄a eddōkļo̧k eo an im̧ōn jar ko ar dik im nana. Ak ilo Jabōt eo ij em̧akūt, laļem iiō tok ālik, ruo Rijilōk raar itok n̄an ejaak e district eo am n̄an juon stake ilo Longfellow Park chaple ilo Cambridge.

Iiō ko tok ālik Iaar jepļaak ļo̧k n̄an kōm̧m̧ane juon kweilo̧k eļap an stake ijen. Stake būreejtōn eo ar bōk eō n̄an lale juon dōkā in to̧l ilo Belmont. Eaar jiron̄ eō bwe eaar juon jikin eo ejjejet n̄an juon tampeļ an Anij. Juon tampeļ ej pād ijen kiiō. Ke Ij reilo̧k, Ij kememej membōr ro rettā Iaar jijet ippāer ilo im̧ōn jar ko reddik, ro riturier kar kūr tok er, im mijenede ro raar katakin er.

Ewōr juon tikōn ekāāl ilo kweilo̧k in ijin jotenin. Iaar pād ippān ilo ejja Jabōt in Ijtō eo me pris eo, eo Iaar kōnono kake m̧okta, ar etetal n̄an juon iaan kweilo̧k eo an juon wōt membōr. Tikōn eo eaar ettōn̄ke jemen eaar enaaj kar pād ilo kweilo̧k in an priesthood ippān joten in. Jemen eaar juon mijenede em̧m̧an ilo ejja mijen eo wōt me jim̧m̧an eaar būreejtōn ie. Iaar lo 1973 Missionary Handbook eo an jim̧m̧an. Baam̧le eo an eaar ebbōktok armej n̄an Kabun̄ in ium̧win elōn̄ epepen ko.

Iaar kōnono ippān bisop eo an tikōn eo n̄an katak ta en̄jake ko emaron̄ in kōtmene ilo kweilo̧k eo n̄an kakūrm̧ool jerbal eo ilo priesthood n̄an kobaik jetōb ko an Irooj. Iaar jeļā ward eo ar obrak kōn jetōb im membōr ro retiljek. Bisop eo ar m̧ōņōņō ilo an kōmeļeļe wāween an ritōl mijenede eo an ward etali eddōkļo̧k eo an rikatak ro. Ej bōk meļeļe jab eo ilo an ioon mijenede ro.

Bisop im ward ko̧o̧njeļ eo rej kōnono kōn eddōkļo̧k eo an kajjojo rikatak. Rej kālet ta eo remaron̄ kōm̧m̧ae n̄an kajjojo armej im baam̧le ko aer n̄an jipan̄ er erom ro m̧ōttāer m̧okta jān er peptaij, n̄an kobaik er ilo m̧akūtkūt ko, im n̄an najdik ro me rej peptaij. Eaar ba mijenede ro ilo jet iien wōr aer iien n̄an katakin me rej bōk rikabwijer ro an Priesthood eo an Aaron āinwōt ro m̧ōttāer.

Kōttōpar eo an ward eo ekoba kōttōpar eo an doulul ko ej n̄an kūr ro me rejeļā kajier n̄an ioon mijenede ro. Em̧ool būreejtōnji eo an tikōn ro ej kūr tok n̄an kōm̧m̧an kōttōpar ko im karōk eo n̄an ro uwaan doulul eo aer n̄an jipan̄ bōktok ro rejeļā kajier n̄an aelōn̄ in kiin̄ an Anij.

Kiiō, tikōn eo ilo ward eo ekajoor im pris eo ilo juon kumi ekāāl im dik emaron̄ in āinwōt jidik wōt ilo jeļā ippān ro jet ak ippam̧. Im komaron̄ jab lo eļap jokkuun wōt juon ippān en̄jake eo am̧ ilo kalōk Kabun̄ in kōn ta eo iaar lo āinwōt kabwilōn̄lōn̄ koi lo New Mexico im ilo New England. Em̧ool komaron̄ lo ta eo bisop eo eaar kōm̧m̧ane ilo ward eo ekāāl an tikōn eo āinwōt juon waanjon̄ak ekabwierer n̄an pris ilo an ejjeļo̧k juon branch būreejtōn im kōn wōt juon ememļo̧kjeņ eo an tōmak eo an ro jinen im jemen n̄an jolet an make mijenede.

Bōtaab ewōr juon wāween eo me jej eddoin ilo jerbal eo ad ilo priesthood. Jej kokwojarjar kōj make im kakūrm̧ool eddo ko ad kajjojo ekkar n̄an kien eo n̄an bōk ko̧jpeļ eo n̄an aoelp ajri ro nejin Jemedwōj Ilan̄.

Ewōr ad en̄jake ko ilo wāween eo me Irooj ej kalōk aelōn̄ in kiin̄ eo An ioon laļ in. Kabun̄ eo An, kōn aolep kein jerbal ko reaiboojoj im ejaak eo kar letok, ej pād wōt pedped eo em̧ool kar kwaļo̧k jen rikanaan ro kōn wāween ar kakūrm̧ool jerbal eo ad ilo priesthood n̄an kōm̧m̧ane jerbal in mijenede.

Ilo 1959 Eprōļ Kweilo̧k eo Eļap, Būreejtōn David O. Mckay ar kwaļo̧k pedped in, jen tōre ko an rikanaan ro n̄an tōre eo an, ekoba Būreejtōn Thomas S. Monson. Būreejtōn Mckay ar kwaļo̧k juon bwebwenato ilo naan in kōjem̧ļo̧k ko an bwe ilo 1923 ilo British Mission, eaar wōr juon kōmeļeļe eļap kar jilkinļo̧k n̄an membōr ro an Kabun̄ in (ro raar jokwe ilo British Mission). Kar jiron̄ er bwe ren jab jolo̧k jāān kōn oktak eo me armej ro ilo eria eo raar kōm̧m̧ane n̄an Kabun̄ in. Būreejtōn Mckay ar ba ļōmņak eo: Leļo̧k aolep jerbal n̄an kajjojo membōr ilo Kabun̄ in bwe ilo iiō ne ej itok 1923 kajjojo membōr naaj juon mijenede. Kajjojo membōr ej juon mijenede! Komaron̄ bōktok jinōm̧ n̄an Kabun̄ in, ak emaron̄ in jem̧ōm̧; bōlen emaron̄ in rijerbal ro m̧ōttam̧ ilo jikin jerbal eo am. Jet remaron̄ ron̄ enaan eo em̧m̧an kōn m̧ool eo kōn kom̧.”

Im Būreejtōn Mckay ar wōnm̧aanļo̧k wōt: “Im bwe en̄in ej enaan eo an rainin. Kajjojo membōr—juon milien im jimettan—juon mijenede!2

Ke ar waļo̧k ilo 2002 me jerbal in mijenede emaron̄ in erom jerbal eo an bisop ro, Iaar bwilōn̄. Eaar alikar n̄an eō bwe jon̄an jerbal eo an bisop ro n̄an kwaļo̧k n̄an membōr ro im n̄an tōl doulul ko ilo ward eo n̄an aer kadedeļo̧k.

Juon bisop iaar jeļā kajien ar jab kobaik eddo eo bōtaab iien eo em̧m̧an n̄an bōktok ward eo ippān doon ilo juon jekjek eo em̧m̧an ijo kajjojo membōr ro ren erom juon mijenede. Eaar kūr juon ritōl mijen an ward eo. Eaar ioon mijenede kōn e make kajjojo Jadede n̄an ekkatak kōn jerbal eo aer im n̄an rōjan̄ er. Ward ko̧o̧njeļ eo ar lo wāween ko n̄an doulul ko im doulul ko n̄an kōjerbal iminene ko aer n̄an jipan̄ kepooj membōr ro n̄an erom mijenede ro. Im āinwōt juon riekajet in Israel, ej jipan̄ armej ro rōm̧m̧an ded n̄an en̄jake kōjeram̧m̧an ko an Pinmuur eo n̄an dāpij aer erreeo.

Jem̧aanļo̧k iaar kajjitōk ippān ekōjkan an kar kōmeļeļeik m̧ōkaj in eddōkļo̧k in oran ripeptaij ro ilo ward eo an im ļapļo̧k ilo oran rūm̧m̧an ded ro repojak n̄an bōk ko̧jpeļ eo an Jisōs Kraist n̄an laļ in. Eaar ba ļapļo̧k eo eaar jab itok jidik kōnke raar kōm̧m̧ane jet jerbal ko. Eaar wāweeen eo raar erom juon ilo itoklimo eo aer n̄an bōktok armej n̄an jukjuk in pād eo an Rikwojarjar ro me raar bōktok er n̄an kain m̧ōņōņō in.

N̄an jet armej ļapļo̧k eaar itok jān juon men in kakobaba n̄an itoklimo eo. Āinwōt ļōmaro nejin Mosaia, raar en̄jake bwe tōprak ko an jerawiwi ilo mour ko aer make im kabwilōn̄lōn̄ in kemour eo an Pinmmur eo ilo Kabun̄ eo an Anij. Kōnke kōn iakwe im kam̧oolol n̄an menin letok eo an Rilo̧mo̧o̧r eo n̄an er, raar kōņaan jipan̄ jabdewōt remaron̄ in kar n̄an ko jān būrom̧ōj eo an jerawiwi, en̄jake lan̄lōn̄ eo an jeorļo̧k bōd, im n̄an koba ippāer n̄an ineem̧m̧an eo ilo aelōn̄ in kiin̄ an Anij.

Eaar kōn iakwe eo an Anij im kōn iakwe n̄an ro m̧ōttāer im ro riturier bwe kakobaik er n̄an jerbal n̄an armej ro. Raar ikidelel n̄an bōk ko̧jpeļ eo n̄an kajjojo ilo m̧ōttan eo an laļ in. Im raar kōpooj ajri ro nejier n̄an erreeo n̄an kūr jen Irooj n̄an katakin, n̄an kam̧ool, im n̄an jerbal ilo m̧ōttan ko jet ilo jikin kallib in An.

Jekdo̧o̧n ilo ward ko reļļap ijo tikōn eo ekāāl enaaj kōm̧m̧ane eddo eo an n̄an kwaļo̧k ko̧jpeļ eo im kalōk aelōn̄ in kiin̄ eo a kilo kurup eo edik ettoļo̧k ijo pris eo ekāāl ej jerbal, renaaj juon wō ilo kōttōpar. Tikōn eo eo enaaj im̧we jen iakwe an Anij n̄an tōpar juon m̧ōttan eo ejjan̄in membōr (ilo Kabun̄ in). Enaaj kobaik eo m̧ōttan ilo jerbal ko jet ak m̧akūtkūt ilo Kabun̄ in innām karuwaineneik e im baam̧le eo an n̄an ekkatak ippān mijenede ro. Armej ro rej peptaij rej aikuji juon m̧ōttāer, im enaaj m̧ōttā ippāer.

Pris eo enaaj karuwaineneik ro jet n̄an kobatok ippān kumi eo edik in Armej ro Rekwojarjar ijo renaaj en̄jake iakwe eo an Anij im kōjeram̧m̧an eo an Pinmuur.

Eļan̄n̄e ej wōnm̧aanļo̧k wōt ilo tiljek ilo eddo eo an ilo priesthood eo, enaaj lo kumi eo erom juon branch, innām juon stake an Zaion enaaj itok n̄an jikin kweilo̧k eo an. Enaaj wōr juon ward ippān juon bisop ej kea. Emaron̄ erom juon ļaddik ak jibūn me naaj juon raan bōk juon rikarejeran Anij n̄an juon bat epaake im ba, “Enaaj juon jikin em̧m̧an n̄an juon tampeļ.”

Ij jar bwe jekdo̧o̧n ia eo jej pād ie im jekdo̧o̧n eddo ko ad ilo priesthood eo an Anij, jenaaj ippān doon ilo jerbal in n̄an bōkļo̧k ko̧jpeļ in n̄an aolepen laļ im bwe jenaaj rōjan̄ armej ro jej iakwe n̄an erreeo jān jerawiwi im n̄an m̧ōņōņō ippād ilo aelōn̄ in kiin̄ eo an Anij. Ilo etan Jisōs Kraist, eo ej an Kabun̄ in, amen.