Peb Ntseeg Kev Coj Dawb Huv

Peb yuav to taub kev coj dawb huv tseem ceeb npaum li cas thaum peb xav txog Leej Txiv Saum Ntuj Ceeb Tsheej txoj kev zoo siab rau Nws cov me nyuam. “Txhua txhia tus tib neeg---txiv neej thiab poj niam---raug tsim muaj yam ntxwv zoo li Vajtswv. Txhua txhia tus yog nkawm niam txiv saum ntuj ceeb tsheej ib tug tub ntsuj plig los yog ib tug ntxhais ntsuj plig uas nkawd hlub thiab ... txhua txhia tus muaj ib tug cwj pwm thiab txoj hmoov los saum ntuj los” (“Tsev Neeg: Ib Zaj Lus Tshaj Tawm Rau lub Ntiaj Teb,” Ensign los sis Liahona, Kaum Ib Hlis Ntuj 2010, 129). Txhua leej txhua tus yog Vajtswv cov me nyuam ntsuj plig thiab nrog Nws nyob ua ntej lawv los rau hauv lub ntiaj teb. Leej Txiv txoj hau kev kom Nws cov tub thiab ntxhais ntsuj plig txais tej cev nqaij daim tawv, muaj lub neej hauv lub ntiaj teb, thiab vam meej mus txog thaum lawv tau txais kev tsa nto.

Peb lub cev nqaij daim tawv ua rau peb kawm tau tej yam uas peb kawm tsis tau nyob hauv peb lub neej ua ntej peb yug los. Yog li ntawd, peb haj yam sib raug zoo nrog lwm tus, txawj paub thiab ua raws li qhov tseeb, thiab txawj ua raws li tej ntsiab cai thiab cov kab ke ntawm Yexus Khetos txoj moo zoo vim peb muaj cev nqaij daim tawv. Nyob hauv lub neej no, peb kawm txog kev hlub tshua, kev ua siab zoo, kev zoo siab, kev tu siab, poob siab, kev mob kev nkeeg, thiab muaj tej teeb meem ntawm sab cev nqaij daim tawv uas npaj peb tus kheej rau txoj sia nyob mus ib txhis. Muaj tej yam uas peb yuav tsum kawm, zoo li cov vaj lug kub hais tias, “raws li sab cev nqaij daim tawv” (1 Nifais 19:6; Amas 7:12–13).

Tom qab uas tau tsim lub ntiaj teb, Vajtswv tso Adas nyob hauv lub Vaj Edees. Tiam sis Vajtswv hais tias “tsis zoo rau txiv neej nyob nws ib leeg” (Mauxes 3:18; kuj saib Chiv Keeb 2:18), thiab Evas los ua Adas tus poj niam. Yuav tsum muaj txiv neej thiab poj niam tej txuj ci ntawm sab ntsuj plig, sab nqaij daim tawv, kev txawj ntse thiab lub siab lub ntsws kom thiaj muaj txoj kev zoo siab. “Rau tus Tswv yog tsis muaj txiv neej kuj tsis txawj muaj poj niam, yog tsis muaj poj niam kuj tsis txawj muaj txiv neej” (1 Kauleethaus 11:11). Tus txiv neej thiab tus poj niam ib leeg yuav tsum txhawb nqa, foom koob hmoov, thiab pab ib leeg.

Vajtswv yog tus uas tau tsa txoj hau kev uas yus tsim tau txoj sia hauv ntiaj teb no. “Thawj los lus txib ... Vajtswv txib kom Adas thiab E-vas ua hais ntsig txog nkawd txoj kev ua niam ua txiv” (Ensign los sis Liahona, Kaum Ib Hlis Ntuj 2010, 129). Lo lus txib uas hais kom huaj vam mus puv tas lub ntiaj teb tseem muaj ceem lawm. Yog li ntawd, kev sib yuav ntawm ib tug txiv neej thiab ib tug poj niam yog txoj kev uas Vajtswv tso cai kom cov ntsuj plig los rau hauv lub ntiaj teb no. Qhov uas tsis sib deev ua ntej sib yuav thiab kev coj ncaj ncees tom qab sib yuav mam li tiv thaiv qhov dawb huv ntawm txoj kev no.

Lub hwj chim muaj tub muaj ki muaj nqi ntawm sab ntsuj plig. Qhov uas neeg siv lub hwj chim no ua tsis zoo ua kom tej lub hom phiaj ntawm peb Leej Txiv txoj hau kev thiab peb lub neej hauv lub ntiaj teb puas tsuaj tas. Peb Leej Txiv Saum Ntuj Ceeb Tsheej thiab Nws Leej Tub tsim tau neeg thiab tau muab ib feem ntawm Nkawd lub hwj chim rau peb. Tej kev cai txog kev siv lub hwj chim muaj tub muaj ki yeej tseem ceeb rau Vajtswv txoj hau kev. Peb txoj kev zoo siab hauv lub neej no thiab txoj hmoov nyob mus ib txhis yuav nyob ntawm seb peb xav thiab siv lub hwj chim zoo kawg nkaus no li cas.

Txwj Laug Dallin H. Oaks piav hais tias:

“Lub hwj chim tsim txoj sia yog [ib] lub hwj chim tseem ceeb tshaj plaws uas Vajtswv tau muab rau nws cov me nyuam. Vajtswv thawj lo lus txib hais kom peb siv lub hwj chim no, tiam sis nws kuj tsa ib txoj kev cai kom txhob siv tsis yog. Peb qhia tias txoj kev cai coj dawb huv tseem ceeb heev vim peb to taub txog lub hom phiaj ntawm peb lub hwj chim muaj tub muaj ki kom ua raws li Vajtswv txoj hau kev. …

“Yog tsis tau sib yuav, txhua yam kev siv lub hwj chim muaj tub muaj ki yog kev txhaum thiab kev muab ib yam uas los saum ntuj los hloov ua ib yam tsis zoo.” (“The Great Plan of Happiness,” Ensign,, Kaum Ib Hlis Ntuj 1993, 74).

Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg muaj ib txoj kev cai hais txog kev coj dawb huv uas tsis hloov hlo li: tsim nyog pw ua ke tsuas yog ib tug txiv neej thiab ib tug poj niam sib yuav raws li Vajtswv txoj hau kev xwb. Qhov no tsis yog ib qho tshiab uas yus nrhiav, ib qho yus ua kom txaus siab, los yog ib qho kev lom zem uas yus ntshaw. Qhov no tsis yog ib qho uas yus lam ua xwb. Tiam sis, nyob hauv lub neej no qhov no yog ib qho uas qhia tias peb los saum ntuj los thiab yog ib txoj kev ua rau ib tug txiv thiab tus poj niam txoj kev sib raug zoo ntawm sab ntsuj plig kom muaj zog. Peb yog neeg uas muaj kev ywj siab coj ncaj ncees thiab qhov uas peb yog Vajtswv cov me nyuam tiag yog lub ntsiab ntawm peb tus kheej---tsis yog kev sib deev, tej cwj pwm ntawm neeg ntiaj teb, los yog noob neej tej kev xav.

Tus neeg ntiaj teb uas Vaj Ntxwv Npeyamis piav txog yeej nyob hauv peb txhua leej txhua tus (saib Mauxiyas 3:19). Tus neeg ntiaj teb tsis hloov siab lees txim thiab nyiam tej yam ntawm sab cev nqaij daim tawv (saib Mauxiyas 16:5; Amas 42:10; Mauxes 5:13), nws yuav txhua yam nws ntshaw, thiab nws muab hlob thiab qia dub. Raws li Thawj Tswj Hwm Spencer W. Kimball qhia hais tias, “‘Neeg ntiaj teb’ cia tej kev ntshaw ntawm cov tsiaj tswj hwm nws tej kev xav ntawm sab ntsuj plig” (“Ocean Currents and Family Influences,” Ensign, Kaum Ib Hlis Ntuj 1974, 112).

Tiam sis “Khetos tus neeg” (Hilamas 3:29) yog ib tug ntawm sab ntsuj plig thiab tswj tag nrho nws tej kev ntswv siab (saib Amas 38:12), nws mob siab thiab tswj nws tus kheej, thiab nws muaj siab dawb thiab tsis xav txog nws tus kheej. Khetos cov neeg tuav Vajtswv txoj lus, tswj lawv tej siab thiab kwv Nws tus ntoo khaub lig (saib Mathais 16:24; Malakaus 8:34; Lukas 9:23; Q&K 56:2), thiab thawb mus tom ntej taug ib txoj kev ti thiab nqaim ntawm kev rau siab ntseeg, kev mloog lus thiab kev tso siab plhuav rau tus Cawm Seej thiab Nws txoj moo zoo.

Vim peb yog Vajtswv cov tub thiab ntxhais, peb tau txais tej cwj pwm los ntawm Nws. Tiam sis peb nyob hauv ib lub ntiaj teb uas poob lawm. Tej yam uas tau siv kom tsim peb lub cev ib txwm yog tej yam uas tau poob lawm thiab yooj yim rau kev txhaum, kev lwj, thiab kev tuag kov yeej peb lub cev. Yog li ntawd, tej yam uas raug peb sab ntsuj plig thiab sab cev nqaij daim tawv los ntawm Adas txoj Kev Poob feem ntau raug peb lub cev nqaij daim tawv. Tiam sis peb yog neeg uas muaj ob sab, vim peb txhua tus ntsuj plig yog ib sab uas nyob mus ib txhis nyob hauv ib lub cev nqaij daim tawv ua raug Adas txoj Kev Poob. Raws li Yexus hais rau tus Thwj Tim Petus hais tias, “Lub siab mas kub lug, tiam sis lub cev qaug zog heev” (Mathais 26:41).

Yog li ntawd, kev sim peb lub siab ntawm lub neej no yeej nyob hauv lo lus nug no hais tias: Kuv puas yuav ua raws li neeg ntiaj teb nyiam, los sis kuv puas ua raws li tus Vaj Ntsuj Plig Dawb Huv tej kev tshoov siab thiab tso tus neeg ntiaj teb tseg thiab ua ib tug neeg ntseeg dhau los ntawm Khetos uas yog tus Tswv txoj Kev Theej Txhoj (saib Mauxiyas 3:19)? Qhov no yog qhov kev sim siab. Yexus Khetos txoj Kev Theej Txhooj kov yeej tau txhua txoj kev xav, kev ntshaw, thiab kev nyiam ntawm tus neeg ntiaj teb. Peb nyob hauv lub ntiaj teb no kom peb loj hlob tuaj ua neeg zoo li Vajtswv thiab tswj tag nrho tej kev ntshaw ntawm peb sab cev nqaij daim tawv.

Leej Txiv txoj hau kev qhia kev rau Nws cov me nyuam, pab lawv zoo siab, thiab coj lawv rov qab los tsev nrog Nws nyob nrog tej cev zoo tag nrho uas tau sawv rov los. Leej Txiv Saum Ntuj Ceeb Tsheej xav kom peb nyob ua ke hauv txoj kev kaj thiab muaj kev cia siab. Tiam sis, Luxifaws ua hauj lwm kom Vajtswv cov ntxhais thiab cov tub tsis paub meej thiab tsis zoo siab kom lawv yuav tsis vam meej nyob mus ib txhis. Leej txiv ntawm txoj kev dag xav kom peb txhua tus “nyuaj siab ib yam li nws tus kheej” (2 Nifais 2:27). Luxifaws xav kom peb nyob ib leeg nyob hauv kev tsaus ntuj thiab tsis muaj kev cia siab.

Dab Ntxwg Nyoog ua hauj lwm tsis tu tsis tseg kom hloov tej yam tseem ceeb tshaj plaws hauv Leej Txiv txoj hau kev. Nws tsis muaj ib lub cev, thiab nws txoj kev vam meej twb raug tso tseg. Ib yam li qhov chaw tauv dej tsis pub cov dej ntws, tus yeeb ncuab txoj kev vam meej nyob mus ib txhis raug txwv vim nws tsis muaj ib lub cev nqaij daim tawv. Vim nws ntxeev siab, Luxifaws tau muab tag nrho cov koob hmoov thiab tej yam yus kawm tau los ntawm sab cev nqaij daim tawv tso tseg. Nws kawm tsis tau tej yam uas ib tug ntsuj plig uas muaj lub cev kawm tau. Nws npau taws vim noob neej txhua tus yuav sawv rov los. Ib qhov kev txhais lo lus raug txim nyob hauv vaj lug kub yog qhov uas nws tsis muaj peev xwm loj hlob rais los ua neeg zoo li peb Leej Txiv Saum Ntuj Ceeb Tsheej.

Vim yuav tsum muaj ib lub cev nqaij daim tawv nyob hauv Leej Txiv txoj kev zoo siab thiab kom peb loj hlob ntawm sab ntsuj plig, Luxifaws xav ntxias peb kom peb siv peb lub cev tsis yog nws thiaj yuav tab kaum peb txoj kev ua neeg zoo li Vajtswv. Qhov txawv txav heev yog qhov uas tus yeeb ncuab uas nyuaj siab vim nws tsis muaj ib lub cev nqaij daim tawv, nws ntxias kom peb nyuaj siab ib yam li nws dhau los ntawm txoj kev siv peb lub cev tsis yog. Qhov uas nws tsis muaj yog qhov uas nws siv kom ntxias peb mus raug kev puas tsuaj ntawm sab ntsuj plig.

Kev txhaum kev cai coj dawb huv yog ib qho kev txhaum loj heev thiab yog kev siv peb lub cev nqaij daim tawv tsis yog. Rau nej cov uas to taub txog txoj kev cawm seej, kev ua rau nej lub cev qias neeg yog ib txoj kev ntxeev siab (saib Mauxiyas 2:36–37; Q&K 64:34–35) thiab kev xyeej hais tias nej yog Vajtswv cov tub thiab ntxhais. Thaum peb xav txog lub neej nyob mus ib txhis, ces yooj yim rau peb paub tias kev lam ua khub raws li tus yeeb ncuab xav kom peb ua yog ib qho uas tsis ruaj thiab tsis muaj nqi.

Amas ntuas nws tus tub Sinploos kom nws “yuav tswj tag nrho [nws] tej kev ntswv siab, xwv kom [nws] yuav muaj txoj kev hlub puv npo” (Amas 38:12). Qhov tseem ceeb yog qhov uas thaum peb tswj tus neeg ntiaj teb ces ua rau peb txhua tus txoj kev hlub Vajtswv thiab Nws cov me nyuam loj hlob tuaj. Kev hlub loj tuaj thaum yus ua ncaj ncees tswj yus tus kheej thiab ploj zuj zus thaum yus ua raws li yus lub siab nyiam xwb.

Thawj Tswj Hwm Marion G. Romney hais tias:

“Kuv tsis paub txog ib co koob hmoov uas tib neeg xav tau ntau tshaj cov uas tau cog lus rau cov neeg dawb huv thiab tsim txiaj. Yexus hais txog tej nqi zog rau tej kev tsim txiaj tiam sis raws li kuv xav nws muab qhov zoo tshaj plaws tshwj tseg rau cov neeg uas muaj lub siab dawb huv, ‘vim lawv yuav pom Vajtswv’ (Mathais 5:8). Thiab tsis yog lawv yuav pom Vajtswv xwb, tiam sis lawv kuj yuav txaus siab nyob rau ntawm nws lub xub ntiag.

“Nov yog ... tus Cawm Seej lo lus cog tseg: ‘Cia li xav txog kev tsim txiaj tsis tu ncua; ces koj txoj kev tso siab yuav muaj zog nyob ntawm Vajtswv lub xub ntiag’ (Q&K 121:45)” (“Trust in the Lord,” Ensign, Tsib Hlis Ntuj 1979, 42).

Tus Tswv kuj cog lus tias thaum peb taug txoj kev tsim txiaj ces “tus Vaj Ntsuj Plig Dawb Huv yuav nrog nraim [peb] nyob” (Q&K 121:46). Yog li ntawd, kev ua raws li kev cai coj dawb huv ua rau peb txais cov koob hmoov loj tshaj plaws uas peb txais tau nyob hauv lub neej no xws li: kev paub tias yus sab ntsuj plig muaj zog thaum nej ntsib nej tsev neeg, phooj ywg, cov neeg hauv lub Koom Txoos, thiab thaum kawg, tus Cawm Seej. Los ntawm kev ncaj ncees, yuav muaj raws li peb txoj kev xav koom nrog lwm tus thaum peb taug kev ci ntsa iab nrog kev cia siab.

Nej ib txhia uas mloog zaj lus no yuav tsum hloov siab lees txim txog tej kev txhaum kev pw ua ke los yog lwm yam kev txhaum. Peb hais tias tus Cawm Seej yog tus Kws Kho Mob uas Muaj Hwj Chim, thiab lub npe tseem ceeb no yog ib lub cim thiab yog qhov tseeb. Peb txhua tus yeej hnov mob thaum peb lub cev nqaij daim tawv raug mob. Thaum peb muaj mob, peb xav kom qhov mob ntaug zuj zus thiab peb zoo siab txais cov tshuaj thiab kev kho mob kom pab peb tsis hnov qhov mob ntawd lawm. Cia li xav txog kev txhaum zoo li nws yog ib qho mob ntawm sab ntsuj plig uas ua rau yus muaj txim, los yog raws li Amas piav rau nws tus tub Khali-atoos, muaj kev “nyuaj siab paub qhov txhaum” (Amas 42:18). Kev muaj txim ua rau peb sab ntsuj plig paub tias muaj xwm txheej ib yam li kev hnov mob yog qhov uas ceeb toom peb lub cev. Muaj cov tshuaj dhau los ntawm tus Cawm Seej txoj Kev Theej Txhoj uas kho tau peb sab ntsuj plig kom tsis muaj txim. Tiam sis, yus siv tau cov tshuaj tsuas yog los ntawm tej ntsiab cai xws li kev ntseeg tus Tswv Yexus Khetos, kev hloov siab lees txim, thiab kev mloog lus tas mus li. Thaum yus hloov siab lees txim tiag tiag ces ua rau yus nyob kaj siab lug, txais kev nplij siab thiab kho yus sab ntsuj plig kom rov qab muaj zog.

Nej tus npisov los yog ceg ntseeg tus thawj tswj hwm yog tus kws pab kho mob ntawm sab ntsuj plig uas muaj cai pab nej hloov siab lees txim. Tiam sis nco ntsoov tias, nej txoj kev hloov siab lees txim yuav tsum ua heev zoo npaum li nej txoj kev txhaum---qhov tseem ceeb yog Haiv Neeg Ntseeg hauv Hnub Nyoog Kawg uas tau khi lus dawb ceev. Yuav tsum siv sij hawm ntev kom kho qhov mob ntawm sab ntsuj plig loj heev zoo tag nrho.

Neeg coob hauv lub ntiaj teb no uas tsis ntseeg txoj kev muaj tub muaj ki yog ib lub hwj chim dawb huv thiab xav tias txoj sia tsis muaj nqi xav tias cov lus qhuab qhia no qub lawm. Tiam sis tib neeg lub siab nyiam, los sis cov pej xeem tej kev xav yeej yuav tsis hloov tus Tswv txoj lus tseeb. Kuv cog lus tias kev ua raws li kev cai coj dawb huv yuav ua rau peb zoo siab hauv lub neej no thiab pab peb vam meej nyob mus ib txhis. Kuv ua tim khawv tias kev coj dawb huv thiab kev tsim txiaj, yeej yog tej yam uas “muaj nuj nqi tshaj plaws txhua yam huv tib si” (Maulaunais 9:9). Kuv ua tim khawv li no los ntawm Yexus Khetos lub npe dawb ceev, amees.