2010–2019
Kuht Luhlahlfongi in Moul Nwacsnwacs
April 2013


Kuht Luhlahlfongi in Moul Nwacsnwacs

Ahkostwen ke masap luhn tiac kosro fah ahkyohkye engan luhn moul facluh lasr uh ac ahkfihsracsrye kapkapwack ma pahtpaht lasr uh.

Pweng luhk uh topuk muhtwacwacyacn sie kihsen siyuck ke yohk srihpaciyacn ip luhn nguhn: Efuh kuh yohk na pwacye srihpen masap ke tiac kosro uh? Nga pruhe tuh Nguhn Muhtahl ac fah ahkkweye ma pwacye ke ip yohk nga fahkwack uh.

Plwacn in Engan lal Pahpah

Yohk srihpaciyacn tiac kosro ma pahtpaht uh kuh in etweyuck muhkwena ke liye yohk se ke plwacn in engan luhn Pahpah tuhmasr Inkuhsrao nuh sin tuhlihk Nahtuhl. “Mwet nuh kwewa—mukul ac muhtwacn—oreklac ke luhman God. Kais sie pa tuhlihk mukul kuh muhtwacn nguhn wolacna nuhtin pahpah ninac inkuhsrao uh, ac … oasr ohiyac ac moul muhtahl la” (“Sucu: Sie Mew Fahkwack nuh fin Facluh,” Ensign kuh Liahona, Nohfohmpuh 2010, 129). Mukul ac muhtwacn nuh kwewa muhta yurin God oacna tuhlihk nguhn Nahtuhl met liki elos tuhkuh nuh facluh oacna mwet uh. Plwacn lal Pahpah oruh tuhlihk mukul ac muhtwacn nguhn Nahtuhl uh in eis mahno in ikoac, in ahkyohkye moul in mahno, ac in kapkapwack nuh ke moul ma pahtpaht.

Yohk Srihpaciyacn sie Mahno in Ikoac

Mahno in ikoac lasr uh oruh oasr kain in puhlakihn ma yohk loaliyac ac srihpaciyac ma tiac kuh in eisyuck ke moul lasr met liki facluh ah. Oruh, inmahsrlosr yurin mwet sahyac uh, luhpan akihlen lasr ac mukwi ke ohiyacn ma pwacye, ac kuhiyacsr in ahkos ip yohk ac akwuck luhn wosasuc luhn Jisus Kraist uh ahkyohkyeyucklac ke mahno in ikoac lasr uh. Ke kuht moul uh, kuht puhlakihn fihsrwacsrsrwacsr, luhngse, kuhlwacng, engan, ahsor, suhpwacrlac, ngal, ac finne ke ma upac luhn kuhiyacn mahnosr ke ohiyac ma ahkoekuhtlac ne tok ma pahtpaht. Fwackyuck muh, oasr lesin kuht enenuh in lutlutkihn ac ohiyac sikyak enenuh in oasr lasr, oacna ke ma suhmuhslah ahkuhtweyac, ke ikoac uh (liye 1 Nephi 19:6; Alma 7:12–13).

Kuh in Orwaclah Tuhlihk

Tukun facluh oreklac ah, Adam el fihliyucki ke Imac Eden. Tuhsruhktuh, yohk srihpac lah God El fahk lah tiac wo mukul se in muhkwena (liye Moses 3:18; liye pac Genesis 2:18), ac Eve el orwaclah muhtwacn kiyacl Adam ac mwet in kahsruh na fal se. Kuhpahsr na wowo se ke ip luhn nguhn, mahno, nuhnak, ac luhpan puhla luhn kwewa na mukul ac muhtwacn uh enenweyuck in ahkfahsrye plwacn in engan uh. “Muhtwacn el tiac kuh in sifacna fin wacngihn mukul, ac mukul tiac pac kuh in sifacna fin wacngihn muhtwacn” (1 Met Korint 11:11). Mukul ac muhtwacn uh nuhnkweyuck in lutlutkihn, ahkkweye, ahkinsewowoye, ac ahkfalye sie sin sie.

Lwemlwem ma oruh moul facluh oreklac uh srihsrngiyucki arlac muhtahl. Masap se emet … God el sang nuh sel Adam ac Eve sruok kuhiyaclos nuh ke ohiyacn pahpah ninac ma oacna mukul ac muhtwacn pahyuck (Ensign kuh Liahona, Nohfuhmpuh 2010, 129). Masap se in isus fahko in puhs srwackna orek ne mihsenge. Oruh, pahyuck inmahsrlon sie mukul ac sie muhtwacn uh pa oruh lwelah se ma oruh nguhn met liki facluh ah ilyak nuh ke moul facluh. Kaiyuck upac ke ohsun in mahno met liki pahyuck ac oaru na pwacye nuh ke pahyuck karihngihn oaliyacn ohiyac muhtahl se inge.

Kuh in orwaclah fahko uh pa yohk srihpac ke ip luhn nguhn. Soaru nuh ke kuh se inge suk in lusrong srihpac ke plwacn lal Pahpah ac ke moul facluh lasr uh. Pahpah tuhmasr Inkuhsrao ac Wen Kuloh Nahtuhl pa mwet orwaclah facluh ac luhlahlfongi kais sie sesr ke sie ip ke lwemlwem kuh Lalos. Mwe kol nuh ke oruh fal se ke kuhiyac se in orwaclah moul uh pa ma yohk srihpac nuh ke plwacn luhn Pahpah uh. Fuhkah puhla lasr kac ac orekmakihn kuh muhtahl sac fah nuhnkweyuck nuh ke sie ohiyac yohk engan lasr ke moul facluh ac oruh lasr ne tok ma pahtpaht.

Elder Dallin H. Oaks el ahkuhtweyac:

“Kuh se in oruh moul facluh pa kuh na wowo se emet God El sang nuh sin tuhlihk nahtuhl uh. Orekmakihnyac enenweyuck ke masap se met, tuhsruhk sie pac masap yohk srihpac sahyac ituckyang in sruok soaruiyac uh. Ahkuhtweyac wo kuht oruh ke masap luhn tiac kosro uh ahkuhtweyucki ke kahlwem lasr ke srihpen kuh in orek fahko lasr ke ahkfalyeyacn plwacn luhn God. …

Sahyacn tuhkweni ke pahyuck uh, orekma nuh kwewa ke kuh luhn orek fahko pa yohk liki ac srihk liki ma koluk srihsrihk ac soaru ke atac muhtahl emet luhn mukul ac muhtwacn uh (“The Great Plan of Happiness,” Ensign,Nohfuhmpuh 1993, 74).

Akwuck Fal ke Moul Nwacsnwacs luhn Ohsun in Mahno

Alu luhn Jisus Kraist luhn Mwet Luhlahlfongi ke lwen-Sahflah uh oasr akwuck fal ke moul nwacsnwacs ke ohsun luhn mahno se: ahkkahlwemye ke oruh se fal muhkwena inmahsrlon sie mukul ac sie muhtwacn ke tuhkweni luhn pahyuck ahkuhtweyucki ke plwacn luhn God. Kain ohiyac se tiac ma engnweyuck in sukokyak se, mongo in luhngseyuck se, kuh sie atacn sritacl kuh mwe ahkengan ma in kuhtasrihk in sukokyak se. Ma ingacn tiac ma orek in kuhtangyucklac se kuh mukwikwi se in oreklac. Sahyac na, ma ingacn oasr ke moul facluh sie sin ahkkahlwemye ma yohk emet ke ohiyac muhtahl ac kuh ac sie ohiyac in ahkkweye puhla uh ac tuhkweni uh ke ip luhn nguhn lasr inmahsrlon mukul ac muhtwacn pahyuck. Kuht mwet ahkinsewowoyeyuck ke sukohsohk ke moul nwacsnwacs ac ahkuhtweyucki sin usru lasr uh in ekihn tuhlihk nuhtin God—ac tiac ke ohiyacn ohsun luhn mahno kuh ohiyac ac masap luhn facluh.

Mwet

Ke kuhtuh ohiyac, mwet uh ahkuhtweyucki sel Tohkohsrah Benjamin moul ac wo ke kais sie sesr (liye Mosiah 3:19). Mukul kuh muhtwacn uh pa suhkwac auliyak, pa orek luhmah (liye Mosiah 16:5; Alma 42:10; Moses 5:13), pa fihsrwacsrsrwacsr ac upac, ac pa inse fuhlwact ac kuhtasrihk. Oacna Prestuhn Spencer W. Kimball el luti ac, “ ‘Mwet’ pa ‘mwet facluh uh’ suc lwelah pwacr fihsracsr luhn ma orahkrahk in afohnlah ohiyac ke ip luhn nguhn lal uh” (“Ocean Currents and Family Influences,” Ensign, Nohfuhmpuh 1974, 112).

In liye ke, mukul kuh muhtwacn luhn Kraist (liye Helaman 3:29) pa ip luhn nguhn ac kutong luhngse nuh kwewa (liye Alma 38:12), pa tiac upac ac ikolyuck, ac kuhlwacng ac tiac nuhnkuh kac sifacna. Mukul ac muhtwacn luhn Kraist sruok kahs luhn God, lahfwekuhnuhltahllah sifacna ac sruhkwack sahkseng Lal (liye Mattu 16:24; Mark 8:34; Luk 9:23; D&C 56:2), ac ahkwot nuh met siskacn inkacnek suwohs ac oasrihksrihk soko ke ohiyacn luhlahlfongi, ahkostwen, ac oaru nuh sin Mwet Lahngo ac wosasuc Lal.

In ekihn tuhlihk mukul ac muhtwacn nuhtin God, kuht eis usrui kuh muhtahl Sel. Tuhsruhk kuht inge moul fin facluh puhtatlac se. Ohiyac ma mahnosr oreklac nuh kac uh pa ke puhtatlac sac ac kwacna puhlakihn ma sikyak ke ma koluk, muhsahllah, ac misac. Pwacnwacng, puhtatlac lal Adam ac sikyak ke ip luhn nguhn ac mahno kac ah sun kuht yohkna nuh ke ip luhn moul in mahno lasr uh. Ac inge kuht mwet ma oasr ip luo la, nuh ke nguhn lasr ma pa ip ma pahtpaht lasr uh pa nwackwacni sie mahno in ikoac ma puhlakihn Puhtatlac sac. Oacna Jisus El ahkuhtweyac wo nuh sel Mwet Sap Peter ah, “Pwacye nguhn luhngse ac ikoac muhnahs” (Mattu 26:41).

Atac na pwacye se ke srihkasrak luhn moul facluh, na, kuh in ahkfototoyeyucklac ke kihsen siyuck ten uh: Kuh nga fah topuk luhngse luhn mwet uh, kuh nga fah lohng kolyuck luhn Nguhn Muhtahl ac fihliyac ohiyacn mwet uh ac oruh sie mwet luhlahlfongi ke Iwaclah luhn Leum Kraist (liye Mosiah 3:19)? Pa ngwacn srihkasrak sac. Emweyac, kena, luhngse, ac mokleyuck luhn mwet uh sahp kuh in kuhtangyucklac sin ac ke Iwaclah luhn Jisus Kraist. Kuht oasr inge facluh in muhsahi ohiyac wo ac in kutong luhngse nuh kwewa luhn mahno.

Srihpac luhn Mwet Lokoalok

Plwacn lal Pahpah oreklac in sang inkacnek nuh sin tuhlihk Nahtuhl, in kahsrwelos in pwacrack, ac in usacltahluh nuh Yohrohl ke moulyak, mahno enganwack uh. Pahpah Lucng El kena kuht in tuhkweni ke kahlwem ac sesseslah ke finsrak. In liye kac, Lucifer el orekma in oruh tuhlihk mukul ac muhtwacn nuhtin God in fohsack ac suhpwacr ac in ikolyac kapkapwack luhn ma pahtpaht lalos. Finsrak se luhn pahpah tuhman kikiacp uh pa muh kuht nuh kwewa in kuh in kweok oacna el (liye 2 Nephi 2:27). Lucifer el kena pwacye kuht in muhkwena ke acn lohsr ac wacngihn finsrak la.

Setuhn el tiac tui in orekma in furwe ma yohk srihpac se emet ke plwacn lal Pahpah. Wacngihn mahno lal, ac kapkapwack luhn ma pahtpaht lal uh tilokihnyucki. Oacna ke kof uh tuhkuh ke infacl uh tilokihnyucki ke sie tacm, oruh kapkapwack ke ma pahtpaht luhn mwet lokoalok uh itucki ke srihpen wacngihn mahno in ikoac lal. Ke srihpen lainyuck lal, Lucifer el lahfwekuhnuhl sifacna ke mwe insewowo luhn moul uh ac ohiyac sikyak ma ahkfihsracsryeyuck ke sie mahno in ikoac ac sri. El tiac kuh in lutlutkihn lesin ma nguhn oasr mahno muhkwena kuh in lutlutkihn. El sruhnga ma pwacye ke sie moulyak pwacye sac ac luhn mwet nuh kwewa uh. Sie sin kalmweyac kuh luhn kahs se na upac lun ma suhmuhslah uh pa ahkkahlwemye suhfal lal in tahfwelah in kapwack ac oruh oacna Pahpah tuhmasr Inkuhsrao.

Ke srihpen mahno in ikoac uh pa yohk na pwacye srihpac ke plwacn in engan lal Pahpah uh ac kapwack ke ip luhn nguhn lasr uh, Lucifer el suk in lusrong kapkapwack lasr uh in srihfe kuht in oruh koluk mahnosr. Sie sin ma tahfuhnkahs ke ma pahtpaht pa mwet lokoalok, suc koluk na pwacye nuh se ke srihpen wacngihn mahno in ikoac lal, srihfe kuht in akacsruhi ke kweok lal ke oruh koluk luhn mahnosr uh. Kuhfa sefanna ma wacngihn lal pa oruh suwohs ke srihke lal in pai kuht in muhsahllah ke ip luhn nguhn.

Kuhnahoslah masap ke tiac kosro uh pa ma koluk upac se ac soarui se ke tuhkweni se ke ip luhn mahno lasr uh. Nuh selos suc etuh ac kahlwem ke plwacn in molwelah, ahkfohkfohkye mahno pa oruh luhn lain uh (liye Mosiah 2:36–37; D&C 64:34–35) ac lahfwekihn atac pwacye lasr in ekihn tuhlihk mukul ac muhtwacn nuhtin God. Ke kuht liye moul facluh ac nuh ke moul ma pahtpaht uh, fihsrwacsr in liye lah tuhkweni nuh sie tiac pwacye uh nuhnkweyuck sin mwet lokoalok pa ma na ke kihtin pacl ac wacngihn koano.

Mwe Insewowo ke Oruh Nwacsnwacs

Alma el sang kahs in kahsruh nuh sel Shiblon tuhlihk mukul nahtuhl in kutong luhngse nuh kwewa luhn mahnol, el in muh kuh in sesseslah ke luhngse (liye Alma 38:12). Yohk srihpaciyac, kai ohiyacn mwet in kuht kais sie uh ahkfihsracsrye sie kahsruhpi, loali, ac muhtwengi yohk luhn luhngse luhn God ac luhn tuhlihk Nahtuhl. Luhngse uh yohkwelihk ke loango in suwohswohs ac srihkweni ke kuht fuhlweacng ke mwe sruhf uh.

Prestuhn Marion G. Romney el fahkwack:

“Wacngihn mwe insewowo nga kuh in nuhnkuh kac muh luhngseyuck yohk liki na mwe insewowo ma uliyuck nuh sin mwet suwohs ac moul nwacsnwacs. Jisus el sruhmuhn ke kain opi nuh ke kain in moul nwacsnwacs tuhsruhk el sruokyac ma yohk sac, oruh nuh sihk, nuh selos suc nwacsnwacs insiyaclos, ‘tuh elos,’ el fahk, ‘fah liye God’ (Mattu 5:8). Ac elos fah tiac liye muhkwena Leum, tuhsruhk elos fah puhla insewowo ye muhtahl.

“Pa inge … olwelah luhn Mwet Lahngo: Kuht fin lwelah suwohswohs in ahkkahtoye nuhnak lasr lwen nuh kwewa, na luhlahlfongi lasr fah kapwack fokokoi ye muhtuhn God’ (liye D&C 121:45)” (“Trust in the Lord,” Ensign, Mei 1979, 42).

Kuht olwelah pac lah, ke kuht suk inkacnek in moul nwacsnwacs uh, Nguhn Muhtahl fah wi kuht pacl nuh kwewa (liye D&C 121:46). Pwacnwacng, moulkihn masap luhn tiac kosro uh suli kuhtuh mwe insewowo yohk mukul ac muhtwacn uh kuh in eis ke moul facluh: puhla wo ke ip luhn nguhn fal ye muhtuhn sucu, kawuck, mwet wiyac uh ke Alu, ac, yohkiyac uh, Mwet Lahngo. Kena lasr in wi uh ahkfalyeyucklac ke suwohswohs ke kuht fahsr ke kahlwem ke finsrak.

Ip yohk ke Auliyak

Kuhtuh suwos suc eis pweng se inge enenuh in auliyak ke ohsun luhn mahno kuh kuhtuh ma koluk sahyac. Mwet Lahngo El kwacna fwackyuck muh pa Mwet in Ono Wowo se, ac ine se oasr kwewa luhmweyac se ac yohk srihpaciyac. Kuht nuh kwewa puhlakihn ngal ke muhsahllah kuh kihnet luhn mahno se. Ke kuht ngal uh, kuht suk ke kahsruh ac sruikihn ono ac ohiyac ma kahsruh ahkfihsracsrye kweok lasr uh. Nuhnkuh ma koluk in oruh kihnet ke ip luhn nguhn ma oruh oelac kuh, oacna ke ahkuhtweyucki sel Alma nuh sin tuhlihk mukul se nahtuhl Corianton, puhla pahkotwen (liye Alma 42:18). Puhla ke suhfal ke nguhn lasr uh apkuhran in oacna puhla ke ngal luhn mahnosr—sulkackihnyacn sensen ac sie mwe loango ke kuhtwena muhsahllah uh. Ke Iwaclah luhn Mwet Lahngo tuhkuh sie ono in akmuhsra ma kuh in onwelah kihnet ke ip luhn nguhn lasr uh ac eslah puhla suhfal. Tuhsruhktuh, mwe afyucf kihnet se kuh in orekmakihnyuck muhkwena ke ip yohk luhn luhlahlfongi ke Leum Jisus Kraist, auliyak, ac ahkostwen pacl nuh kwewa. Ma sikyak ke auliyak ke inse pwacye pa nuhnak mihs, insewowo, ac onwelah ac ahksasucye ke ip luhn nguhn.

Pisap kuh prestuhn luhn Pracns lom an pa mwet in kahsruh mwet in ono ke ip luhn nguhn ma oasr suwohs la in kahsrwe kom auliyak ac onweyuck. Nuhnak muhnahs esam, tuhsruhktuh, oaru ac kuhiyacn auliyak lom an enenuh in falyang nuh ke oruh ac pihsen ma koluk lom an—yohk na nuh sin Mwet Luhlahlfongi ke Lwen-sahflah suc oasr ye olweacng muhtahl. Kihnet upac uh ke ip luhn nguhn enenuh mwe ono ahkkweyeyucklac ac pacl in wolac na pwacye.

Sie Olwelah ac sie Fahkwack Luhlahlfongi

Mwe luti se nga ahkuhtweyac ah fah atacn mahtuh ac mahi nuh sin mwet pucspucs ke facluh se ma lihksreni in isrucn oaliyacn orwaclah fahko ac ahksrihkye srihpen moul luhn mwet uh. Tuhsruhk ma pwacye luhn Leum uh tiac aholyuck ke ma pwengpweng, puh suhna, kuh nuhnkuh luhn un mwet puhs. Nga olwelah lah ahkostwen ke masap luhn tiac kosro fah ahkyohkye engan luhn moul facluh lasr uh ac ahkfihsracsrye kapkapwack ma pahtpaht lasr uh. Tiac kosro ac moul nwacsnwacs pa ingena, kwacna, ac e fah wo ac sacohk emet liki ma nuh kwewa in pacl nuh kwewa (liye Moroni 9:9). Nga fahkwack na pwacye ke ine muhtahl luhn Leum Jisus Kraist, amen.