Kōm̧ij Tōmak ilo Jetjet

Aorōk eo ejjeļo̧k jem̧ļo̧k in kōn jetjet emaron̄ in wōt meļeļe kake ilowaan jekjek eo eļap an karōk eo an Jemedwōj Ilan̄ n̄an ajri ro Nejin. “Aolep armej otemjej—em̧m̧aan im kōrā—kar kōm̧anm̧an ilo nememein wōt Anij. Kajjojo ej juōn jetōb jitōnbōro likao im jiron̄ nejin jined im jemed ilan̄, im … kajjojo ewōr juōn mour kwojarjar im jipadpad ippān” (“Baam̧le Eo: Juon Naan in Kean̄ n̄an Laļ in,” Ensign  akLiahona, No̧b. 2010, 129). Aolep m̧aan im kōrā raar jokwe ippān Anij āinwōt ajri in jetōb m̧okta jen aer itok n̄an laļ in āinwōt armej wabanban. Karōk eo an Jemed ekōtļo̧k an ļaddik ro im jiron̄ ro Nejin ilo jetōb bōk ānbwin kanniek in, n̄an bōk en̄jake ilo mour wabanban in, im n̄an eddōkļo̧k m̧aanļo̧k n̄an mour eo ejjeļo̧k jem̧ļo̧kin.

Ānbwin in kanniōk ko ad rej kōm̧m̧an bwe en pidodo n̄an en̄jake ko rem̧wilaļ im reļļap me jab maron̄ kar būki ilo mour eo ad m̧okta. Kōn menin, jemjerā ko ad ippān ro jet, maron̄ eo ad n̄an kile im jerbal ekkar n̄an m̧ool eo, im kekemo̧o̧j eo ad n̄an pokake pedped ko im kain̄i ko an ko̧jpeļ eo an Jisōs Kraist rej ļapļo̧k ilo ānbwin in kanniōk ko ad. Ilo ad pād ilo wabanban, jej en̄jake meanwōd, iakwe, jouj, m̧ōņōņō, būrom̧ōj, inepata, metak, im em̧ool apan̄ ko an jon̄ak ko an ānbwiin ilo wāween ko me rej kōpooj kōj n̄an indeeo. Kar kwaļo̧k, ewōr katak ko jej aikuj katak im en̄jake ko ej aikuj wōr ippād, āinwōt an jeje ko rekwojarjar kōmeļeļeik, “ekkar n̄an kanniōk” (1 Nipai 19:6; Alma 7:12–13).

Ālkin kōm̧anm̧an eo an laļ in, Adam ar pād ilo jikin Kallib Eden. Mekarta, eaorōk bwe Anij eaar ba bwe ejjab em̧m̧an bwe em̧m̧aan eo en makeļok iaan (Moses 3:18; lale barāinwōt Jenesis 2:18). Im Eve ar erom̧ lieo pāleen Adam im ekkar. Koba in ejej uwaan ilo jetōb, kanniōk, ļōmņak, im maron̄ in en̄jake ko an jim̧or em̧m̧aan ro im kōrā ro raar menin aikuj n̄an bōk m̧aantak karōk in m̧ōņōņō in. “Ijoke kōrā e jab anemkwōj jān m̧aan, ak m̧aan anemkwōj jān kōrā, ilo Irooj” (1 Korint 11:11). M̧aan im kōrā eo kar pepe n̄an katak jān, kōkajoorļo̧k, kōjeram̧m̧an, kadedeki, im koweppānļo̧k doon.

Jekjek eo me mour wabanban kar kōm̧anm̧an eo ekwojarjar kar karōk e. “Kien eo m̧oktata … Anij ar leļo̧k n̄an Adam im Eve kar ikkijeen aer maron̄ ro jined im jemed āinwōt ļeo im lio pālele” (Ensign ak Liahona, No̧b. 2010, 129). Kien eo n̄an tūm̧wōn im orļo̧k im kobarak laļ ej jerbal wōt n̄an rainin. Kōn menin, m̧are ikōtaan juon em̧m̧aan im juon kōrā ej jekjek eo kōmālimi me jetōb ko ilo mour eo m̧okta rej deļo̧n̄e mour wabanban in. Lukkuun bōjrak jān m̧ōm̧ an kanniōk m̧okta jān m̧are im kanooj tiljek kōjerbale ilowaan m̧are eo ej kōjparok kwojarjar eo an jekjek in ekwojarjar.

Kajoor eo n̄an tūm̧wōņ im orļo̧k ekanooj aorōk ilo jetōb. Bōd in kōjerbal kajoor in ekajōkdo̧o̧n karōk eo an Jemedwōj Ilan̄ im ad mour wabanban. Jemedwōj Ilan̄ im Nejin Jitōnbōro raar kōm̧anm̧an im kar leke kōj kajjojo kōn juon rakim kōn kajoor in kōm̧anm̧an eo Aer. Tōl ko rekkar n̄an kōjerbali ilo jejjet kōn maron̄ eo n̄an ejaake mour rej m̧ōttan ko raorōk ilo karōk eo an Jemed. Ijoke jej en̄jake im kōjerbal kajoor eo ekwojarjar naaj kile n̄an kōļapļo̧k m̧ōņōņō eo ad ilo mour wabanban in im indeeo eo ad ejjeļo̧k jem̧ļo̧kin.

Elder Dallin H. Oaks ar kōmeļeļeik:

“Kajoor eo n̄an ejaak mour wabanban ej kajoor eo eutiejtata Anij eaar leļo̧k n̄an ajri ro nejin. Kōjerbal eaar menin aikuj ilo kien eo m̧oktata, bōtaab bar juon kien earōk kar letok n̄an kamo bōd kōjerbale. Aorōk eo jej likūt ilo kien erreo ej kōmeļeļik jān meļeļe eo ad kōn jibadbad eo an kajoor in tūm̧wōņ im orļo̧k ko ad ilo kadedeļo̧k karōk eo an Anij. …

“Itulikin kallim̧ur ko an m̧are eo, aolep jerbal ko an kajoor in tūm̧wōņ im orļo̧k eo rej ļapļo̧k ak dikļo̧k rej jerawiwi ilo kajetokjen im kowaan m̧wil eo ekwojarjar eļaptata an em̧m̧aan ro im kōrā ro” (“The Great Plan of Happiness,” Ensign, Nob. 1993, 74).

Kabun̄ eo an Jisōs Kraist im Armej ro Rekwojarjar ilo Raan-ko Āliktata ewōr juon an make, jon̄ak kōn m̧ōm̧ an kanniōk: jemjerā ko repaak rej jejjet wōt ikōtan juon em̧m̧aan im kōrā ilo kadkad eo an m̧are āinwōt kōmeļeļeik ilo karōk eo an Anij. Jemjerā rōt kein ilo kanniōk rejjab en̄jake iddik n̄an etali, juon men kōņaan n̄an kōbab laļ, ak juon itok limo ak kalimomo n̄an pukōte ilo ļōm̧nak kōn kwe make. Rejjab men ko n̄an būki ak juon m̧akūtkūt n̄an kōm̧m̧ani. Ijello̧kin, rej pād ilo mour wabanban juon iaan en̄jake ko reļļap an paotok eo ad im aorōk eo im juon wāween kōkajoorļo̧k en̄jake im kallim̧ur ko ilo jetōb ikōtaan ļeo im lio pālele. Jej rijerbal ro kar kōjeram̧m̧an er kōn anemkwoj im rej kwaļo̧k jān jolet kwojarjar eo ad āinwōt ajri ro nejin Anij—im jab kōn m̧wil im m̧ōm̧ an kanniōk ko, m̧wil ko rekāāl, ak lōmņak kōn wāween mour.

N̄an jet jon̄ak, armej ilo lukkuun pikitokin kar kōmeļeļeiki jen Kiin̄ Benjamin ej mour im em̧m̧an ilo kōj kajjojo (lale Mosaia 3:19). Lukkuun piktok eo an em̧m̧aan im kōrā ejjab likjab, ej ānbwiin im loe (lale Mosaia 16:5; Alma 42:10; Moses 5:13), rej meļeļe im jeļā, im utiej bōro im ļōmņak kōn er make. Āinwōt an Būreejtōn Spencer W. Kimball kar katakin, “Armej ilo ‘lukkuun pikitokin’ ej ‘armej in laļ’ eo ej kōtļo̧k bwe jekjek ko an menin mour n̄an pinej en̄jake ko an ilo jetōb ” (“Ocean Currents and Family Influences,” Ensign , No̧b. 1974, 112).

N̄an keidi, “armej [ak kōrā] in Kraist” (Hilamōn 3:29) ej ilo jetōb im ej dāpij aolep en̄jake ko (lale Alma 38:12), ejjab bwe n̄an dāpiji, im ej kea kake im jab lōmņak kake e make. Armej in Kraist rej dāpij wōt naan in Anij, karmejjete er make im bōk An debwāāl (lale Matu 16:24; Mark 8:34; Luk 9:23; D&C 56:2), im bun̄ m̧aanļo̧k ilo iaļ in erānin̄ im eaidik kōn tōmak, pokake, im wūjlepļo̧k n̄an Rilo̧mo̧o̧r im ko̧jpeļ eo An.

Āinwōt ļaddik im jiron̄ ro nejin Anij, em̧ōj ad jolete maron̄ ko rekwojarjar jān E. Ak kiiō jej mour ilo juon laļ ejab wānōk. Lukkuun men ko me ānbwin ko ad rar ejaake jāni rej jān wōtlo̧k eo im aolep iien im̧we n̄an jerawiwi, jorrāān, im mej. Kōn menin, Wōtļo̧k eo an Adam im jetōb eo im jekjek ko rejelet kōj ilo kanniōk ekkā an jelet ānbwinnid. Im lo jej ruo m̧ōttan ko, n̄an jetōb eo ad me ej m̧ōttan eo indeeo eo ej jokwe ilo kōj ilo juon ānbwin me ej eiokļo̧k Wōtļo̧k eo. Āinwōt an kar Jisōs kwaļo̧k n̄an Rijilōk Piter, “An e kōņaan, ak kanniōk e m̧ōjno̧” (Matu 26:41).

Lukkuun pikitok eo ejjejet ej juon teej ilo mour wabanban in, innām, emaron̄ in kalikar ilo kajjitōk kein ilaļ: In ke uwaak n̄an jerawiwi ko an armej ilo lukkuun pikitokin, ak In ke ebbweer jen kareeļ ko an Jetōb Kwojarjar im wutikļo̧k armej ilo lukkuun pikitokin im erom juon rikwojarjar kōn Pinmuur eo an Kraist Irooj (lale Mosaia 3:19)? En̄in ej juon teej. Kajjojo ro rekwole, kōņaan, an̄in, im ikdeleel eo an armej lukkuun pikitokin maron̄ in erom̧ anjo̧ kōn im jen Pinmuur eo an Jisōs Kraist. Jej pād ijin ioon laļ in n̄an kōļapļo̧k karbōb ko an āinwōt anij im n̄an kōjeikiik aolep ikdelel ko an kanniōk.

Karōk eo an Jemen ar ejaak n̄an leļo̧k tōl n̄an ajri ro Nejin, n̄an jipan̄ er erom̧ m̧ōņōņō, im n̄an bōktok er ilo kōjparok n̄an kapijuknen Ippān ilo jerkakpeje, ānbwin ko ejjeļo̧k jem̧ļo̧kier. Jemedwōj Ilan̄ ekōņaan bwe jen ippān doon ilo meram im obrak kōn kōjatdikdik. N̄an keidi, rijerbal ro an Lucifer rej kōm̧m̧an bwe ļaddik ro im jiron̄ ro nejin Anij ren tarbo̧k im jab m̧ōņōņō im n̄an jerwaan e indeeo eo aer. Kōttōpar eo an jemen ro reriab ej kōņaan bwe jen “en̄taan āinwōt e” (2 Nipai 2:27). Lucifer ekōņaan bwe jen make iaad ilo maroklep im ejjeļo̧k kōjatdikdik.

Satan ejjab bōjrak an jerbal n̄an kakkure m̧ōttan ko raorōk ilo karōk eo an Jemed. Ejjeļo̧k ānbwinin, im indeeo eo an ewōr jem̧ļo̧kin. Āinwōt an dān rup ilo juon reba ejjeļo̧k jikin an dān diwōjļo̧k, āindein an bōjrak indeeo eo an rikapo eo kōnke ejjeļo̧k juon ānbwin. Kōn an jum̧ae, Lucifer ar karmeejete e make aolep kōjeram̧m̧an ko an mour wabanban in im en̄jake ko rekkar kōn juon ānbwin kanniōk in im dii. Ejjamin jeļā katak ko me juon jetōb an juon armej emaron̄ jeļā. Ej bar jilkintok juon m̧ool im kōn jerkakpeje eo an ro nejin armej. Juon iaan eoon ko rekajoor ilo naan bōjrak ej kalikar ilo ejjeļo̧k an kajoor n̄an wōnm̧aanļo̧k im erom̧ āinwōt Jemedwōj Ilan̄.

Kōnke ānbwin ej aorōk eo ilo karōk in m̧ōņōn̄ō eo an Jemen im eddōkļo̧k eo ad ilo jetōb, Lucifer ej pukot n̄an kakkure eddōkļo̧k eo ad n̄an kapo kōj im kōjerbal ānbwinid ilo jab jejjet. Juon iaan m̧ōn ko an ej bwe rikapo eo, eo ej lukkuun en̄taan kōnke ejjeļo̧k ānbwinnin, m̧ōņe kōj n̄an jāār e en̄taan eo an ilo kōjerbal ānbwinnid ilo jab jejjet. Kein jerbal eo ejjeļo̧k ippān ej bwe en kapo kōj n̄an kakkure jetōb eo ilo kōj.

Kakkure kien erreo ej juon jerawiwi eļap im juon jerbal eo ejjab jejjet n̄an ānbwinnid. N̄an ro rejeļā im remeļeļe karōk in lo̧mo̧o̧r eo, kattoon ānbwin ej juon m̧akūtkū in jum̧ae (lale Mosaia 2:36–37; D&C 64:34–35) im karmejete kadkad eo ad em̧ool āinwōt ļaddik ro im jiron̄ ro nejin Anij. Ilo ad kalimjek mour wabanban im n̄an mour indeeo, epidodo n̄an kile oktak eo me ekariab jemjerā eo an rikapo me eriab im ejej tokjeņ.

Alma ar kapilōk ļaddik eo nejin Shiblon n̄an “kajeikiki aolep ikdelel ko [an], me [e] emaron̄ obrak kōn iakwe’ (Alma 38;12). Men eo eaorōktata, kauwe armej ilo lukkuun pikitokin ilo kōj kajjojo emaron̄ kōm̧m̧an oktak kōn m̧weie, m̧weilaļ ļo̧k, im iakwe Anij eļapļo̧k im ajri ro Nejin. Iakwe ej ļapļo̧k n̄e jej jim̧we ilo kabōjrak kōjmake.

Būreejtōn Marion G. Romney ar kwaļo̧k:

“Ijjab maron̄ ļōmņak kōn kōjeram̧m̧an ko me eļapļo̧k kilaer jān kōjeram̧m̧an ko n̄an erreo im wānōk. Jisōs eaar kōnono kōn nōbar ko n̄an wānōk ko roktak bōtaab kōjparok ko reļlapļo̧k, kōn menin āinwōt n̄an n̄a, n̄an ro erreo būruwier, ‘bwe rej,’ eaar ba, ‘naaj lo Anij’ (Matu 5:8). Im ejjab wōt renaaj lo Irooj, bōtaab renaaj en̄jake ilo kapijuknen paotok eo an.

Ijin … Rilo̧mo̧o̧r ar kallim̧ur: Elan̄n̄e jenaaj kowānōk ļōmņak ko ad, innām leke eo ad naaj kajoorļo̧k im̧aan mejān Anij (lale D&C 121:45). (“Trust in the Lord,” Ensign, Māe 1979, 42).

Jaar barāinwōt kallim̧ur bwe, ilo ad bun̄ m̧aanļo̧k ilo iaļen wānōk, Jetōb Kwojarjar naaj m̧ōttad (lale D&C 121:46). Aaet, mour kōn kien erreeo ej karuwaineneik tok jet kōjeram̧m̧an ko rellap an m̧aan im kōrā maron̄ in bōk ilo mour wabanban in—jetōb eo ewāmourur ej waļo̧k ilo baam̧le, ro m̧ōttad, iaio ko ilo Kabun̄ in, im, āliktata, ilo Rilo̧mo̧o̧r eo. Pikitokin ikdeleel eo ad ej obrak ilo jim̧we ilo ad etetal ilo meram im ilo kōjatdikdik.

Kom̧ eo kom̧ij bōk ennaan in eaorōk kōn ukwelo̧k im m̧ōm̧ an kanniōk ak jerawiwi ko jet. Ekkā an Rilo̧mo̧o̧r eo keidi āinwōt juon Taktō Eļap, im taitōl in ewōr jim̧or meļeļein im kōmeļeļe eo an eaorōk. Kōjwōj em̧ōj ad en̄jake metak kōn juon jorrāān ak kinej ilo ānbwin. Ke jaar pād ilo metak, jej lukkuun pukot jipan̄ im kam̧ōņōņō n̄an unokan im kakōlkōl ko me rej jipan̄ kadikļo̧k ad en̄taan. Jerawiwi ej āinwōt juon kijen jetōb me ejelet bōd ak, ilo an Alma kar kōmeļeļeiki n̄an ļaddik eo nejin Koriantōn, “bōktok būrom̧ōj” (Alma 42:18). Bōd ko rejelet jetōb ko ad ej āinwōt metak ko ilo ābwinid: Bōd ej juon kōkaļļe eo ekauwōtata im juon kōtōrak jān jorrāān ko. Kōn Pinmuur eo an Rilo̧mo̧o̧r ej itok kairujruj ko me remaron̄ kemour kinjen jetōb eo ilo kōj im kōm̧akūļo̧ke ļo̧k bōd eo. Ijoke, kairujruj in emaron̄ in wōt jerbal kōn pedped ko an tōmak ilo Irooj Jisōs Kraist, ukwelo̧k, im jetōb in kemour im kōkāāl.

Bisop ak branch būreejtōn eo am ej taktō eo ilo jetōb eo kar kōmālimi n̄an jipan̄ eok ukwelo̧k im mour. Jouj keememej, mekarta, bwe ļap im kajoor eo an ukweļo̧k eo am̧ ej aikuj jejjet n̄an piktok eo an im ļap an jerwaiwi ko am̧—eļaptata n̄an Armej ro Rekwojarjar ilo Raan-ko Āliktata me rej pād ium̧win bujen ekwojarjar. Kinej ko reļļap an jetōb maron̄ in kakōlkōl im tōre en kareeoki im juļo̧ki.

Katak eo me Iaar kōmeļeļeiki emaron̄ m̧ōr im maat kitien n̄an elōn̄ armej ilo laļ in me eļapļo̧k kajirere kake kwojarjar eo an tūm̧ōn im orļo̧k im kadikļo̧k aorōk eo an mour an armej. Ak m̧ool eo bwe Irooj ejjab oktak kōn ta eo ebun̄bun̄, ak pepe ko ilo jukjukinpād. Ij kallim̧ur bwe pokake n̄an kien erreeo ej kōļapļo̧k m̧ōņōņō eo ad ilo mour wabanban in im kōm̧m̧an iaļen ad eddōkļo̧k n̄an indeeo. Erreo im wānōk rej pād kiiō, aolep iien rej pād, im men eo e “ ekanooj kabun̄buruōn im aorōk ilōn̄in men otemjeļo̧k” (Moronai 9:9). Āindein Ij kam̧ool ilo āt eo ekwojarjar etan Irooj Jisōs Kraist, amen.